Izikẹlị 7 - FỊAFỊA BAỊBỤLỤ

Izirẹlị Kunoma Mẹ

¹ KỊNỊNYANAḄỌ ḅe ẹkwẹn ị̀ pịrịm.

² Ori mẹẹ, “Fịị-fịị tomḅọ, mie yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḍuko Izirẹlị amakiri mẹ pịrịarị ye: mie bebe amakiri mẹ ḅẹ kunoma mẹẹ!

³ “Izirẹlị, kunoma mẹ ḅo la tẹ. Ị̀ ịganị mẹ ị́ ịnọ ḅa, àrị ị́ mịẹ tẹ ye kẹ ị́ kọn-arị ẹrẹsị. Àrị ị́ kọn-arị sịḅị-ngụngụnma ḍumo mẹ gbẹẹ-ye kẹ ị́ gbẹẹ ḅa.

⁴ À ḅara wẹrị ḅịa anịanịa ọkụrụkụrụ nyana ị́ pịrị. Ị́ mịẹ tẹ sịḅị-ngụngụnma aị ma gotẹ à fomu-ḅara kẹ ị́ pịrị ḅẹ-yearị, mịẹtẹ í nimi mịnẹ yẹrị anie KỊNỊNYANAḄỌ ḅee.”

⁵ Miemẹ anie Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḅẹẹ ye: “Gbọrụ opu ḅụụ-fụka ḅọrọtẹ so jen ḅụụ-fụka ḅo ị́ la ḅẹ-yearị.

⁶ Anịmgba ḅo fama tẹẹ. Mie kunoma mẹ. Ị́ fa tẹẹ.

⁷ Ọmịnị amakiri mẹ ḅụ angarị apụ kunoma mẹ ḅo ọ́ la ḅẹ-yearị. Ọ́ ḅarị jen kẹ tụndụ ọgọnọ ḅẹ oru-awarị ma ḅio oru-alalị fị ḅịa sakị mẹ ḅo kpekitẹ, pikiri-pikiri kịngẹ mie sime ḅarịye.”

⁸ “Mịọkụ saakị mu ala ḅịa ị̀ ịganị mẹ ḅẹ kụrọmamgba ḅo ọmịnị ịnọ ḅa. Ọ́ mịẹ tẹ ye mie à ḍiki tẹ ọ́ kọn-arị, tẹ ọ́ kọn tẹ sịḅị-ngụngụnma ḍumo mẹmgba ḅẹ ye à nwẹn kẹ ọ́ gbẹẹ pịkị ḅa.

⁹ À ḅara wẹrị ọ́ pịrị ḅịa, à pịkị ọkụrụkụrụ nyana ọ́ pịrị ḅịa. Ọ́ mịẹ tẹ sịḅị-ngụngụnmarị aị ma gotẹ à fomu-ḅara kẹ ọ́ pịrị ḅẹ-yearị, mịẹ tẹ ó nimi ḅarị ḅara mịnẹ yẹrị anie KỊNỊNYANAḄỌ ḅe, tẹ yẹrị ḅe anie ó fomuarị ḅọ ḅe.”

¹⁰ Opu ḅụụ-fụka ene ḅaka ḅara kẹ ḅo Izirẹlị pịrịarị. Kụrọ-kụrọ amịẹaị ḅakarị. Ḅụụ-gelema ḅo opu ḅara la tẹ.

¹¹ Kụrọ-kụrọ amịẹaị dogi-ḅoarị ye anie si-sịḅịḅio. Kirikọn ịn pịrị ḅẹ gberie sọ ofori, ịna ngọ ma, ịna tọrụ-gbẹ sime-ḅara anịanịa ịna ebube.

¹² Sakị mẹ ḅoarị. Eneḅaka mẹ ḅo kpekitẹ, fẹ na dẹrị na ḅarị fie ye nyana ḅịa sakị mẹ, Tamụnọ gbọrụ ḅara kẹ ḅo fomu-ḅara kẹ ḅẹḅọ-ḅẹḅọ pịrị ḅẹ ẹrẹsị,

¹³ Gbọrụ Masịnịḅọ sọ ḍumo ḅo mḅọ fama aị nyana ḅo ḅẹ sakị la ḅịa, Tamụnọ ịganị ḅẹḅọ-ḅẹḅọ ọgọnọ emi ẹrẹsị. Si-apụ fịị-a so ḅịa.

¹⁴ Ọdụ mẹ fiearị, tẹ ḅẹḅọ-ḅẹḅọ ḅụụ-tẹlẹmarị. Kụma paka ọmụ muarị gbọrụḅọ-sọ ofori, Tamụnọ ịganị gbọrụ ḅara kẹ ọrụḅọ-ọrụḅọ ọgọnọ gbana ḅa gotẹ.

Sime Izirẹlị Asi Pịrị Fomu-ḅara

¹⁵ Etela ma ḅụ ini owu-sọarị, tẹ warị aḅio ma ḅụ obi na ḅuru-ḅa na emi. Bebe amakiri mẹ ḅụ sime-ḅọ sime-ḅọ owu mẹ ḅio fịị ḅa, tẹ ḅẹḅọ-ḅẹḅọ tẹ opu ama mẹ ḅio sime-ḅọ sime-ḅọ sime obi na ḅuru-ḅa na pịrị ḅa.

¹⁶ Ja apụ pụkọ-paka mu tụndụ ma kpọlị ḅa, tụndụ-suku olosịkịya dee tẹ ini iwo ḅara. Inimgba ịna asi owu ḅa.

¹⁷ Ọrụḅọ-ọrụḅọ aḅara lọkọ ḅa, tẹ ịna aḅụọ-kụkụ jike ḅa.

¹⁸ Ini akpa ḅiri ḅa, tẹ ịna bebe oju gbẹdẹ-gbẹdẹ ḅa. Ini ịna asịḅị sẹịn-siin ḅa, tẹ inimgba tọrụ-tuu ḅa.

¹⁹ Ini ịna golu na seleḅa na kẹ etela ma ḅụ gbin nguma ḅa fun nguma ḅara, ịna seleḅa-o, golu-o inetẹ ịn ḅọrọma ḅịa KỊNỊNYANAḄỌ ḅe ori opu ịganị ọsụma pakama ḅarị sakị. Ini inetẹ anị kẹ in ḅiiarị aị nyana ḅịa, anịanịa kẹ ịna afuro ḅinma. Golu na seleḅa na mie in dogi-mu si ḅụ sun ye.

²⁰ Sakị ḅẹ gbọrụ sakị ḅụ ini ịna iḅitẹ yela apọkọsụa-aị kẹ ḅụụ-tọn-tọnm, kụma mịọkụ ini arị kẹ sịḅị-ngụngụnmarị. Mie KỊNỊNYANAḄỌ ḅe gotẹ mịẹ tẹ ịna ngọ ma ịna aḅụụ siiarị ye.

²¹ KỊNỊNYANAḄỌ ḅe ḅẹẹarị, “À wẹrịso tẹ kịnị tọrụ-nimi-a jen asịẹ ḅẹ apụ ḅo kụrọ ḅara kẹ ịna furu ḅa, tẹ oloko kan-kan apụ ḅo ịna ngọ mamgba ọkị-so tẹ anị pilema ḅa.

²² À ḅụụ kẹ anị ḅụ suu ḅịa, kụrọ-ḅara kẹ ye furuarị apụ ma ị́ ḅụụ yela-lama wararị Warị mẹ mịẹ-sima tẹ kan sọ mu tẹ anị pilema ḅẹ sakị.

²³ Ye goyegoye pikiri-pikiri ḅio sọ tẹẹ, amakiri mẹ ḅụ kịnị-ḅa ḅin tẹẹ, kụrọ-kụrọ amịẹaị pịkị opu ama mẹ ḅio ḅin tẹẹ.

²⁴ À si-tẹịn asịẹ ọkị-ḅo tẹ ịn wẹrịso tẹ ini ọmịna sime-ayọ ma ọkị ḅa. Ọmịna kụrọ-tẹịn owiapụ ma ḅarị ḅiokpọ nyana ḅịa, à mịẹ tẹ sịẹ-sịẹ ma ọmịna Tamụnọ-tẹkẹ-yọ mẹ mie simarị sakị.

²⁵ Ḅioḅẹngbọ-ḅịkị ḅoarị. Ó dein ḍọkị ḅa, kụma ọmịnị anị ḍọkị ẹrị ḅịa gbala-gbala.

²⁶ Gbọrụ opu ḅụụ-fụka jen pono ḅo ḅa, tẹ sịkọpẹlẹ-a ḅara mie si-oku ḅịḅị kẹ ḅo-ḅo sara ḅarịye. Ọmịnị ịkịankoroapụ ma tẹkẹ ḅa ịn tọrọkọ-jụ ḅo ḅẹ tẹ ini ẹrị ye mịẹfinji ọ́ pịrị. Agbamịẹapụ ma nyana tẹ kẹ tomi ma toluma ḅẹ ye paka ḅịa, tẹ omongiapụ ma in ḍuko tomi ma toluma ḅẹ ye nyana ḅịa.

²⁷ Amadaḅọ ḅe kururu ḅa, tẹ amadaḅọ tụḅọ ḅe ḅarị ḅiokpọmaye nyana ḅịa, tẹ tomi ma ḅalafa ḅụ oju sẹkị ḅa. Àrị ọ́ mịẹ tẹ aị mamgba gotẹ ó fomu ḅa, tẹ ọ́ kẹ jen-apụ kọn tẹ gbọrụ ḅara ḍiki ọ́ kọn ḅa. Miemẹ kẹ ó ḍie ḅa mịnẹ yẹrị anie KỊNỊNYANAḄỌ ḅe.”