Izikẹlị 46 - FỊAFỊA BAỊBỤLỤ

Izirẹlịapụ Ḅẹrẹtọnḅọ Ḅe Na Alalị Ma Na

¹ Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḅẹẹarị, “Ḅioju ḅẹ ogigo mẹ ḅẹ ḅọkọ mẹ anị gbaịn sime ḅa kọrịnama kọrị ene ma ḅụ, kụma anị finji sime ḅa Ịnyọsara-Ene mẹ ḅụ na Ịwọ Akalụ Alalị mẹ ḅụ na.

² Izirẹlịapụ Ḅẹrẹtọnḅọ ḅe etela da ogigo mẹ ḅụ ḅọrọ sọ mẹnjị-toluḅọrọ-anga mẹ la tẹ ogigo-ḅọkọ mẹ ḅụ sịẹ ḅa ḅeriaị ma akaka, agbamịẹapụ ma ò bebema dọkịma-agba ma na gbọrụḅụụ-sime-agba ma na mịẹarị sakị. Anị anga ogigo-ḅọkọ mẹ ḅụ ò sime tẹ sunsin Tamụnọ pịrịị, tẹso, ọ̀ pịkị mẹnjị paka. Ogigo-ḅọkọ mẹ ịn gbaịn ma nwenii ḅoḅiri-so la.

³ Ịnyọsara-Ene na Ịwọ Akalụ na goyegoye ḅụ tomi ma iḅo tẹ sunsin KỊNỊNYANAḄỌ ḅe pịrịị ogigo-ḅọkọ mẹ tọrọkọ.”

⁴ “Ịnyọsara-Ene mẹ ḅụ, Izirẹlịapụ Ḅẹrẹtọnḅọ ḅe ọkị-ḅo KỊNỊNYANAḄỌ ḅe pịrị nyana ye sonio asambịrịma anana na gbọrụ ejimina na, kẹ bebema dọkịma ḅẹ agba mịẹ ḅẹ ye, arịmgba gbọrụ ḅẹẹ-ḅẹẹye sọ ḅụụ ḅụ ofori aị.

⁵ Ọ̀ kẹ gbọrụ ejimina gbọrụ ejimina ḅụ sụa ḅo ḅarị mbịaka lita nwẹn-sịn ye-tọnye mẹ ḅụ tẹrẹị fa si na pakịrị na, pịkị asambịrịma anana ma ḅụ gberie-gberie ḅụ ọ̀ pịrị ḅii-ye ḅii-ye kẹ sụa ḅo. Gbọrụ mgbọlị fịye agba goyegoye ḅụ olivu pulo tẹra lita ọ̀ nwẹn kẹ sụa.

⁶ Ịwọ Akalụ Alalị mẹ ḅụ gbọrụ asambịrịma nambulo na, sonio asambịrịma anana na, gbọrụ ejimina na ọ̀ nwẹn pịrị ḅa, arịmgba ḅụụ ḅụ gbọrụ ḅẹẹ-ḅẹẹye sọ ofori aị.

⁷ Kẹ nambulo goyegoye, na ejimina goyegoye na ḅụ sụa pịrị ḅarịye anie mgbọlị-fịye tẹra lita fa si na pakịrị na (17.5 lit), tẹ asambịrịma anana goyegoye ḅụ Izirẹlịapụ Ḅẹrẹtọnḅọ ḅe ḅii-ye ḅii-ye, ọ̀ nwẹn kẹ sụa pịrịị. Mbịaka agba goyegoye ḅụ ori olivu pulo tẹra lita kẹ sụa pịrịị.

⁸ Izirẹlịapụ Ḅẹrẹtọnḅọ ḅe mẹnjị-toluḅọrọ-anga mẹ ḅụ paka-so ḅarị sakị, anị ḅẹ ogigo-ḅọkọ mẹ tẹ ọ̀ ḅọrọ sọ anga mẹ sikima ò jen ḅọkọ ḅụ ḅọrọ paka ma.”

⁹ Alalị goyegoye tomi ma sunsin KỊNỊNYANAḄỌ ḅe pịrị ḅẹ ḅoarị sakị, ọgọnọ-jụ ḅẹ ogigo-ḅọkọ ḅụ ḅọrọ sọ mu apụ suku-jụ ḅẹ ogigo-ḅọkọ ḅụ paka-so, in sunsin KỊNỊNYANAḄỌ ḅe pịrị fama sakị, tẹ suku-jụ ḅẹ ogigo-ḅọkọ ḅụ sọ mu apụ ọgọnọ-jụ ḅẹ ogigo-ḅọkọ ḅụ paka-so. Gbọrụḅọ sọ mḅọ ḅọrọ-so etela ḅụ ḅọrọ so ḅịa, kụma mḅọ ḅọrọ-so anga na dama-dama ogigo-ḅọkọ mẹ ḅụ.

¹⁰ Izirẹlịapụ Ḅẹrẹtọnḅọ ḅe tomi ma sọ-ḅoarị sakị sọ-ḅoo, pịkị ịn paka-soarị sakị paka-soo.

¹¹ Alalị fị ene ma na Alalị asakị ma na ḅụ ịn kẹ gbọrụ nambulo anịanịa gbọrụ ejimina na sụa pịrị ḅarị mgbọlị afịaị lita nwẹn-sịn ye-tọnye ḅụ tẹrẹị fa si na pakịrị na, tẹ asambịrịma anana na sụa pịrị na, tẹ asambịrịma anana na sụa pịrị ḅẹ ye ḅo sunsin KỊNỊNYANAḄỌ ḅe pịrị ḅẹ ḅo ḅọ mẹ ḅii-ye ḅii-ye. Ọkọ sime mgbọlị afịaị agba goyegoye ḅụ olivu pulo ḅẹ tẹra lita ịn nwẹn kẹ sụa pịrị nyanam.

¹² “Izirẹlịapụ Ḅẹrẹtọnḅọ ḅe ò ḅioḅẹngbọ tọn ḅara ḅụ ye kẹ ḅo KỊNỊNYANAḄỌ ḅe pịrịarị sakị, anị ḅọrọ pịrị tẹ kẹ bebema dọkịma ḅẹ agba mịẹ ḅẹ ye-o, pịrị tẹ kẹ gbọrụḅụụ-sime-agba mịẹ ḅẹ ye-o, ịrụa saakịarị pakịrị anga ḅẹ ogigo-ḅọkọ mẹ ḅụ sọ ḅioju ḅẹ ogigo mẹ mu-mu ye mẹ ịn nwẹn finji ọ̀ pịrịị. Ò ye mẹ pịrị ḅẹ ḅara Ịnyọsara-Ene mẹ ḅụ ọ̀ mịẹ-mịẹ ḅara mẹ tẹ ọ̀ paka-so tẹ ḅẹḅẹ ịn pịkị ogigo-ḅọkọ mẹ gbaịn.”

Ene-ḅaaene-ḅaaene Pịrị ḅẹ Agba

¹³ KỊNỊNYANAḄỌ ḅe ḍukoarị, “Dede goyegoye ḅụ gbọrụ kụra sịḅị ḅụ ḅọrọtẹ asambịrịma anana tẹ ḅụụ ḅụ ḅẹẹ-ḅẹẹye ofori ye ịn nwẹn kẹ bebema dọkịma-agba mịẹ KỊNỊNYANAḄỌ ḅe pịrị. Mị agba mẹ ene goyegoye ḅụ anị mị.

¹⁴ Pịkị mịẹ ḅarị agba dede goyegoye anie fịturu mịẹ fịlawa ḅụ maa kilogịramụ la ye, kẹ olivu pulo ḅẹ gbọrụ lita kẹ fịlawa mẹ na pikiri gwaa. Kẹ mẹ agba mẹ mịẹ KỊNỊNYANAḄỌ ḅe pịrị ḅẹ tọn ḅara mẹ kụrọ nyana mu ḅẹẹ-sakị ḅẹẹ-sakị la ḅa.

¹⁵ Asambịrịma anana ḅe na, fịlawa mẹ na, olivu pulo mẹ na dede goyegoye ịn nwẹn kẹ agbamịẹ KỊNỊNYANAḄỌ ḅe pịrị mu ḅẹẹ-sakị ḅẹẹ-sakị la ḅa.”

Izirẹlịapụ Ḅẹrẹtọnḅọ Ḅe Na Kiri Mẹ Na

¹⁶ Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe oloko-sụam: “Izirẹlịapụ Ḅẹrẹtọnḅọ ḅe nwẹnị ọ̀ nyana kiri ḅẹ gbọrụ anga kẹ ḍiepịrịye ḅara ḅụ ori owiapụ-awọmẹ ma ḅẹ gbọrụḅọ pịrị-pịrị, anị anị tụḅọ ḅe nye sọ tẹẹ, furo mẹ nyana gbamaso kiri ḅụ.

¹⁷ Kụma Izirẹlịapụ Ḅẹrẹtọnḅọ ò nyana kiri ḅẹ gbọrụ anga kẹ fịrịmẹnjị ọ̀ pịrịarị ḅọ pịrị-pịrị, anị pịkị-ḅo siin Izirẹlịapụ Ḅẹrẹtọnḅọ ḅe nye sọ ḅa, Ye Pịkị-ḅo Nyanaḅọ Ḅara La-la Kụra mẹ la sakị (anie kụra amesi oyi finji goyegoye ḅụ). Anị sime ọ̀ pịrịm, tẹ ori na ori owiapụ-awọmẹ na ngẹrị mie anị nyana gbamaso ḅarịye.

¹⁸ Izirẹlịapụ Ḅẹrẹtọnḅọ ḅe tomi ma kiri ḅụ gbọrụ pakịrị sọ ọkị ma ịna ḅara ḅụ. Ọ̀ kẹ ori owiapụ-awọmẹ pịrịarị kiri goyegoye sime ọ̀ pịrị ye ngẹrị ḅụụ paka-ḅo, mịẹ tẹ ori ị̀ atomi ma ponoma ḅịa ḅara ịna kiri ọkị ḅụ.”

Tamụnọ-warị Mẹ Ḅẹlẹ-sọ-awarị

¹⁹ Anịtẹso tomḅọ ḅe ị̀ ọkị mu tọrụ kẹ ọgọnọ-jụ da aḅio ma sọ-sọ anga mẹ tẹ ḅioju ḅẹ ogigo-ḅọkọ mẹ kpeki anga mẹ lam. Ma ma mie fịafịa aḅio ma tẹ sime agbamịẹapụ ma pịrị aị ma. Ọ̀ gbọrụ anga tọkịma ì ḍiem ḅio ma ḅụ ịrụa-ideriarị-anga mẹ ḅụ tẹ

²⁰ ḅẹẹm, “Mie agbamịẹapụ ma kẹ si agba mịẹ ḅẹ tẹ kẹ pịrị anama ma na kẹ ye gbẹẹ ḅẹ tẹ pịrị anama na sọọ, pịkị fịlawa fọị ayọ ma mịẹ tẹ tọn-tọn gberie-sọ ịn nwẹn dogi paka etela da ogigo mẹ mu tẹ anị ye kẹ tomi ma lama ḅịa ḅara.”

²¹ Anịtẹso ori ị̀ ọkị mu etela da ogigo mẹ la tẹ ị̀ kẹ mẹnjị anị ḅẹ ini ịkọlị ma ikelema-korom, tẹ gbọrụ ịkọlị-ịkọlị ḅụ à jen ogigo ẹrịm.

²² Etela da ini ịkọlị ma ḅio gbori-ikelema wararị ogigo-ogigo emi, anị ḅẹ nangwọ si amita, finji nwẹnị jei amita. Ini ịkọlị ma ḅụ simearị ogigo ma jen-jen nẹngị-a.

²³ Ḍụḅarị onu gberie-gberie gbori-ikelemam, tẹ ọpọ-ọpọ-ọpọ ịn nwẹn nama akaka ma bịanm.

²⁴ Tomḅọ ḅe ḍuko ị̀ pịrịm, “Ma ma mie ḅẹlẹ-sọ-awarị ma tẹ Tamụnọ-warị mẹ ḅẹ fịrịmẹnjịapụ ma tomi ma kẹ agbamịẹ-aị ma sọọ ḅẹ ayọ ma.”