Izikẹlị 44 - FỊAFỊA BAỊBỤLỤ

Ịrụa-saakịarị-anga ḅẹ Ogigo-Ḅọkọ mẹ kẹ Mịẹ ḅẹ ye Mẹ

¹ Tomḅọ ḅe ị̀ tọrọkọ-sụn tẹ ị̀ kẹ Tamụnọ-warị mẹ sịẹ kiri mẹ ḅẹ ịrụa saakịarị pakịrị mẹ ḅẹ Ogigo-ḅọkọ mẹ mum. Ogigo-ḅọkọ mẹ gbaịnm,

² tẹ KỊNỊNYANAḄỌ ḅe nwẹnị ị̀ ḅẹ, “Mị ogigo-ḅọkọ mẹ gbaịn sime ḅa, tẹ ḅarị jen kẹ finji ḅịa gbala-gbala. In minini tẹ gbọrụ tomḅọ sọ anị ḅụ ḅọrọ ḅịa, Yẹrị, KỊNỊNYANAḄỌ, Izirẹlịapụ tẹkẹarị Tamụnọ ḅe anị ḅụ ḅọrọ sọ-mu tẹ ẹrẹsị. Anị gbaịn sime ḅa.

³ Anịsọ Izirẹlịapụ Ḅẹrẹtọnḅọ ḅe mu anị anga ị̀ tọrọkọ ḅụ sime tẹ fịafịa fịye fị ḅa. Ogigo-ḅọkọ mẹ ḅẹ mẹnjị-toluḅọrọ-anga mẹ ḅụ, mie ọ̀ ḅọrọ sọ-na-paka-na ḅarị ye.”

Kẹ Tamụnọ-warị sọ ḅẹ Oloko ma

⁴ Anịtẹso tomḅọ ḅe ị̀ ọkị ọgọnọ-jụ da ogigo-ḅọkọ mẹ ḅụ ḅọrọ sọ-mu Tamụnọ-warị mẹ tọrọkọ lam. À ḍiki sakị, àrị ẹrịm mịnẹ KỊNỊNYANAḄỌ ḅe Warị mẹ ḅio ori emi mẹ ḍie pakamarị bele mẹ anị ḅio ḅin tẹ. Àrị ị̀ ḅụụ sịẹma kiri gbin tẹ tọrụ kẹ kiri iḅom,

⁵ tẹ KỊNỊNYANAḄỌ ḅe nwẹnị ị̀ ḅẹẹ, “Fịị-fịị tomḅọ, ị́ ẹrị ye na ị́ naa ye na kẹ elekima sụa. À Tamụnọ-warị mẹ ḅẹ oloko ma na kẹ ọrụtọn aị ma ḍuko ị́ pịrị ḅẹ-yearị. Kẹ elekima sụa lama in minini tẹ Tamụnọ-warị mẹ ḅio sọ-na-paka-na ḅẹ atomi ḅara na pịkị ọkọ mịẹ ḅịa apụ na.”

⁶ “Ḍuko arị Izirẹlị ḅẹ kọngọ-kụrọma apụ ma pịrịị mịnẹ, yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḅarị jen kẹ ịn mịẹ sime sịḅị-ngụngụnma aị ma inema ḅịa.

⁷ Ini ị̀ Warị mẹ kẹ tọn-tọn-a ḅara wẹrịtẹ wẹrịso tẹ tarị-ḅụụ sin-a kịnị-tọrụ-nimia igoniapụ, ị̀ ḅịḅị poki-poki-a apụ ma ị̀ Warị mẹ sọ-ḅo ḅụ, ịn ḅẹlẹkị na ọmbie na kẹ agba mịẹ-mịẹ ị̀ pịrịarị sakị ḅụ. Mie ḅụ ị̀ atomi ị̀ ọḅọkụ simatẹ ịn mịẹ tẹ sịḅị-ngụngụnma aị mamgba ḅụ.

⁸ Ini à tọn koroma fịafịa mịẹ-mịẹ aị ma kẹ sịḅịda-a ị̀ fịafịa Warị mẹ ḅẹ mịẹ-mịẹ aị ma ḅụ, kụma anie nakara kịnị-tọrụ-nimia igoniapụ ẹrẹ mie ịn kẹ sịḅị-dama ye.”

⁹ “Yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḍuko pakamarị mịnẹ gbọrụ tarị-ḅụụ sin-a, kịnị-tọrụ-nimia jen sịẹ ḅẹ ḅọ sọ, tẹ ị̀ ḅịḅị kan-arị ḅọ ị̀ Warị sọ-mu ḅịa, kịnị-tọrụ-nimia ḅọ tẹ Izirẹlịapụ ma ogboku angarị ḅọ sọ sọ-mu ḅịa.”

Livayị Apụ Ma Agbamịẹapụ Sọ Ḅụ Ini Ofori

¹⁰ KỊNỊNYANAḄỌ ḅe ị̀ ḅẹẹm, “À fomu-ḅara kẹ arị Livayị apụ ma pịrịarị, anie osi Izirẹlịapụ ma ḅụụ sọ tẹ ị̀ ḅụụ mangị-so tẹ mu sunsin oru-afụḅara pịrị apụ ma.

¹¹ Ịn fịrịmẹnjị ị̀ pịrị ḅa ogigo-aḅọkọ ma ḍikiḍiki na Tamụnọ-warị mẹ ḅẹ ja fịrịmẹnjị na ḅụ; ini anie ịn kẹ dọkịma-agba na ja agba na mịẹ ḅẹ anama ma ḅaa ḅarịye, tẹ ịn sime tẹ fịrịmẹnjị tomi ma pịrị ḅa.

¹² Kụma ini mie Izirẹlịapụ sunsin oru afụḅara pịrị mẹ ye ḅụ anị kẹ ọrụtọn ye, tẹ mịẹ ḅọkọ ḅụ ịn ḅọrọ tẹ tomi ma da si ḅụ suum, Yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅẹ tẹmẹ-la ḅara kẹ karị tẹ mịnẹ in fomu-ḅara da-a ofori.

¹³ Ini agbamịẹapụ fịrị mẹnjị ḅịa, anịanịa mu ị̀ fịafịa gberie-sọ kpeki, anịanịa Fịafịa-tẹịn Yọ mẹ sọ-mu. Miemẹ mie ịn mị sịḅị-ngụngụnmarị aị mẹ ḅẹ fomu-ḅara.

¹⁴ À kẹ ịn pịrị ye anie Tamụnọ-warị mẹ ḅio ye la-a akọrịnama ma kọrị.”

Agbamịẹapụ Ma

¹⁵ Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḅẹẹm, “Arị agbamịẹapụ ma tẹ sime Livayị pịrị tẹ Zadọkụ furo ḅụ paka apụ ma, anị sime-ḅara sime-ḅara sọ, paa ḅioḅẹngbọ kẹ sịrẹrẹ na-iḅi ḅara kẹ fịrịmẹnjị ị̀ pịrị tọrọkọ mum ị̀ warị mẹ ḅio ḅụ, Izirẹlị ḅẹ kirikọn-apụ ma ị̀ ḅụụ pịkị-so sakị. Mie ḅụ mịọkụ ini anie fịrịmẹnjị ị̀ pịrị ḅarị apụ, tẹ ị̀ tọrọkọ ḅo-ḅo tẹ ḅẹlẹkị na ọmbie na kẹ agba mịẹ-mịẹ ị̀ pịrị.

¹⁶ Ini ngẹrị mie ị̀ Warị sọ-ḅo ḅẹ apụ, agbamịẹ-anga mẹ ḅụ fịrịmẹnjị ị̀ pịrị, tẹ pịkị sunsin ị̀ pịrị mẹ kẹ ọrụtọn ḅarịye ị̀ Warị mẹ ḅio.

¹⁷ Ịn ogigo-ḅọkọ mẹ sọ mu ḅioju ḅụ Tamụnọ-warị mẹ ḅẹ ogigo mẹ sọarị sakị ferefere pịna-fa kapa mie ịn sụa ḅarịye. Ịn ḅioju ḅẹ ogigo mẹ anịanịa Tamụnọ-warị mẹ ḅio namakọrịarị sakị nama oju ḅẹ isuke kẹ ḍori ḅịtẹ kẹ gbin kapa gbala-gbala ịn sụa ma.

¹⁸ Mie ḅụ imo ịna oju sara ḅịa; fereferetẹ pịna-fa ḅịtẹ kẹ gbin ḍọkọịnma sịḅị gbaịn-arị asun ịn nwẹn sure tẹ ferefere pịna-fa ḅụọ sụa kapa sụa, kụma ịn konju-ponoye pono ma.

¹⁹ Tẹrẹmẹ ịn paka etela da ogigo mẹ tẹ tomi ma sime anga mẹ mu, ịn tarị ịn Tamụnọ-warị mẹ ḅio ịn fịrịmẹnjị sime sakị sụa kapa mẹ siin koroma fịafịa aḅio ma ḅụ. In jen kapa sụa, mịẹ tẹ ịna tọn-tọn ḅara sime kapa mẹ ye kẹ tomi ma lama ḅịa ḅara.”

²⁰ Agbamịẹapụ ini ịna sịḅị sẹịn siin ḅịa, ịn pịkị wẹrịso tẹ inume mẹ nangwọ ḅịa. Ini anị kẹ anị nangwọ la na-iḅi ḅara wẹrị.

²¹ Agbamịẹapụ iru ḅuu tẹrẹmẹ in ḅioju ḅẹ ogigo mẹ sọ-mu ma.

²² Gbọrụ agbamịẹḅọ sọ jụmọ sime siya tẹ ẹrẹḅọ sime ma; ori Izirẹlị ḅẹ ẹrẹḅọtụḅọ tẹ amụ ḅụụ-gboloa ḅọ simee, anịanịa jen fịtẹ agbamịẹḅọ ta.

²³ “Agbamịẹapụ ma ye kẹ ị̀ atomi toluma tẹ ịn fịafịa ye na fịafịa-a ye na ogboku simearị kịrị nimi, pịkị Tamụnọ tẹkẹ mịẹ-mịẹ ḅụ fịafịa ye na fịafịa-a ye na.

²⁴ Oloko gboloma ịgbanịya paka-paka, agbamịẹapụ ma mie ḅẹrẹ mẹ kọn-pẹlẹ ḅarịye ì oloko ma sime-ḅara ḅụ. Ịn Tamụnọ alalị ma wẹrị ḅa à tọn koroma aḅara na à sụa oloko ma na ḍikitẹ, ịn pịkị Ịnyọsara-Ene mẹ wẹrị fịafịama.

²⁵ “Agbamịẹḅọ ḅara kẹ ḍụẹịn lama tẹ Tamụnọ kọrịnama ḅụ fịafịa-a ḅọ sọ ma, anị mḅọ ḍaḅọ, anịanịa mḅọ iyingiḅọ, anịanịa mḅọ tụḅọ, anịanịa mḅọ iyimbere, anịanịa mḅọ amụ owiḅọ sime-a ịyịmbara sikima.

²⁶ Ò ḅo siin fịafịa tẹ ḅẹḅẹ, ọ̀ sọnọma aḍin kẹ koruu

²⁷ anịtẹso, ọ̀ Tamụnọ-warị mẹ ḅẹ ḅioju ḅẹ ogigo mẹ sọ mu tẹ ọ̀ ḅụụ-fịafịama agba mịẹ-mịẹ tẹ ori inetẹ siin Tamụnọ-warị mẹ ḅio fịrịmẹnjị. Yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ọkọ ḅẹẹm.

²⁸ “À kẹ Izirẹlị pịrịm ịn da ḅọrọma ḅụọ-ḅụọ pịrị ḅẹ ye mẹ agbamịẹapụ ma la kiri anie agbamịẹ fịrị mẹ. Izirẹlị ḅụ in ḍiekiri nyana ma; yẹrị anie ịn nyana ḅẹ ḅii ye-mẹmgba.

²⁹ Mgbọlị fịaị kẹ mịẹ agba ma, si gotẹ mịẹ agba ma, na ye gbẹẹ agba ma na agbamịẹapụ ma fị ḅẹ ye sọ ḅa, ịn pịkị Izirẹlị ḅụ ịn kẹ sikima wẹrị ị̀ pịrị ye goyegoye ọkị ḅa.

³⁰ Agbamịẹapụ ma tarị ḍụọ ḅio soku ḅo ị̀ pịrị ye goyegoye ḅụ iḅitẹịn ye mẹ ọkịị, pịkị jen goyegoye tẹ ịn kẹ ḅo ị̀ pịrị ye sọ. Tomi ma fịturu mịẹ sakị-sakị ịn tarị kpoo mẹ kẹ ḍie Tamụnọ pịrị, tẹ ì boma ịna sime-ayọ ọgọnọ sime ḅa.

³¹ Agbamịẹapụ ma ini ngẹrị fịị feni anịanịa nama pẹị ma, pịkị jen nama ḅaa ye sọ.”