Izikẹlị 43 - FỊAFỊA BAỊBỤLỤ

KỊNỊNYANAḄỌ ḅe Pịkịma Tamụnọ-warị mẹ ḅoarị

¹ Tomḅọ ḅe ị̀ ọkị tọrụ kẹ ịrụa saakịarị pakịrị anga mẹ ḅẹ Ogigo-ḅọkọ mẹ mum,

² tẹ anịanga ịrụa saakịarị pakịrị mẹ ḅụ, à ḅịya tọrụngbọ sọarị bele ẹrịm anị ḅoarị. Mị bele mẹ ḍiearị mịnẹ Izirẹlịapụ tẹkẹarị Tamụnọ ḅe emi. Tamụnọ pọkọ nwẹnị abajị fie-fie ḅara fie, tẹ kiri mẹ tọrụngbọ ḅio sọarị bele ḅịya ḅara ḅịya.

³ Mị ịkịan mẹ Tamụnọ Jeruselemu fama ḅẹ ḅo sakị mẹ ḅụ arị ẹrị ye mẹ na kịkam, pịkị Keba Tọrụ akaka ḅụ arị ẹrị ye mẹ sọ na. Anịtẹso àrị ị̀ ḅụụ sịẹma kiri gbin tẹ tọrụ kẹ kiri ḅụ iḅom.

⁴ Ḅịya tọrụngbọ ḅio sọarị bele mẹ mẹnjị Tamụnọ-warị mẹ sọ-mum ịrụa saakịarị pakịrị ḅẹ ogigo-ḅọkọ mẹ ḅụ.

⁵ KỊNỊNYANAḄỌ ḅe tẹmẹ ị̀ saakị-gelema tẹ ị̀ ọkị ḅioju ḅẹ ogigo mẹ ḅio sọ-mum, anị anga ḅụ arị ẹrịm KỊNỊNYANAḄỌ ḅe ebube mẹ Tamụnọ-warị mẹ sọ ḅin tẹ.

⁶ Tomḅọ ḅe nwẹnị ị̀ akaka sịẹsime anị anga ḅụ, tẹ à naam KỊNỊNYANAḄỌ ḅe Tamụnọ-warị mẹ ḅio sime tẹ ẹkwẹn ị̀ pịrịarị:

⁷ “Fịị-fịị tomḅọ, ì emine mịẹ anga emi. À mịanga anga ḅa Izirẹlịapụ ma ogboku, tẹ ḅẹrẹtọn ịn pịrị mu ḅẹẹ-sakị ḅẹẹ-sakị la ḅa. Izirẹlịapụ ma-o ịna amadapụ-o ḅarị jen kẹ ị̀ fịafịa ẹrẹ mẹ sima ḅịa sunsin oru-atamụnọ pịrị anịanịa ịna amadapụ ma fịtẹ oju akpakpa ma kẹ mị yọ ḅụ ḍiḅi.

⁸ Amadapụ ma ịna warị ḅọkọ amasịn na ḅọkọ ḅẹ ḅeriye na kẹ ị̀ warị mẹ ḅẹ warị ḅọkọ amasịn na ḅọkọ ḅẹ ḅeriye ma na bịan tẹ namam; anie mịẹ tẹ gbọrụ kiki ngẹrị mie wamịna ogboku sime ye. Ini ị̀ fịafịa ẹrẹ mẹ simam ịn mị sịḅị-ngụngụnma aị mamgba ḅụ, tẹ anie ḅụ àrị in gulugulumam.

⁹ Mịọkụ in sunsin oru-atamụnọ pịrị dasịẹma nyanam, tẹ ịna amadapụ ma fịtẹ oju akpakpa ma soku-siin. Ini ọkọ mịẹ-mịẹ àrị ịna ogboku anga ḅa.”

¹⁰ Tẹ KỊNỊNYANAḄỌ paa ẹkwẹn tọrọkọ mum, “Fịị-fịị tomḅọ, Tamụnọ-warị mẹ gboloma ye ḍuko Izirẹlịapụ ma pịrị, tẹ mịẹ tẹ ini anị nama ḅẹ tẹ tọn ḅara mẹ ḍawọ. Ịn mịẹ tẹ ini ịn mịẹ tẹ si amịẹaị ḅụ ḅụụ-jịrị.

¹¹ Anịtẹso ini ịn mịẹ tẹ aị ma ḅụ ḅụụ-jịrị tẹ ḅẹḅẹ, Tamụnọ-warị mẹ nama ḅẹ tẹ tọn ḅara mẹ ḍuko finji ịn pịrị, anị sime ḅẹ ḅara, anị ḅẹ ḅara, anị ḅẹ ḅọrọ sọ mu ayọ na ḅọrọ paka ayọ na, ḍiki-tọrụ ḅụ anị simearị ḅara, ye goyegoye kẹ ọrụtọn wẹrị ḅara, pịkị anị ḅẹ oloko mamgba na tọn-koroma-aị na. Mie-mẹmgba kẹ ḍiri ḅio kẹ koroma ịn pịrị, mịẹ tẹ ini inetẹ ye goyegoye kẹ ọrụtọn wẹrị ḅara ẹrị ḅẹ ḅara, tẹ oloko ma ḅẹ ḅara mamgba mị.

¹² Mie anie Tamụnọ-warị mẹ ḅẹ oloko mẹ: Bebe tụndụ mẹ ọgọnọ-jụ mẹmgba iri mẹ wẹrị sikima tẹ fịafịa yọ.”

Agbamịẹ-anga Mẹ

¹³ Ma ma mie agbamịẹ-anga mẹ tọn tẹ anị paka ḅara, ịn kẹ Tamụnọ-warị mẹ tọn ye mẹ sime-ḅara sime ye kẹ tọn ḅụ. Agbamịẹ-anga mẹ suku mẹ ikelema-koro anị mita pakịrị kẹ pokolom, pịkị ọkọ kẹ finjim, anị ḅẹ akaka mẹ ikelema-koro nwẹnị mita kẹ inia akiri kẹ gelem.

¹⁴ Agbamịẹ-anga mẹ ḅẹ ideri tẹịn anga mẹ suku mẹ ọgọnọ ḅụ iwo gbọrụ mita kẹ gelem. Anị ḅẹ jen pakịrị anga, daasịẹ anga mẹ ḅụ ọḅụ da, mita pakịrị, ikelema-koro, anị nwẹnị maa mita kẹ gele. Anị pakịrị ḅọrọ ḅụ ọḅụ da anị pịkị mita pakịrị kẹ ikelema-korom.

¹⁵ Mị ọgọnọ-jụ mẹ tẹ ini agbamịẹ-aị ma dọkịma-dọkịma anga mẹ ḅẹ gele maa amita. Ini ịkọlị ma ḅụ waa-paka ma gele osi apakịrị ma nẹngịm.

¹⁶ Agbamịẹ-anga mẹ ọgọnọ mẹ finji na nangwọ na gbasịm, pakịrị sonioa mita sonioa mita.

¹⁷ Ḅiri mẹ sọ inia apakịrị ma gbasịm, sọnọma mita pakịrị-pakịrị, anị nwẹnị pono ikelema ye nyana akaka ma ḅụ, mita tẹ kẹ inia akiri ḍiya ḅẹ gbọrụ pakịrị kẹ gele. (Pokolo yọ mẹ mita pakịrị kẹ finjim). Kẹ agbamịẹ-anga mẹ tanjị-tanjịye mẹ ịrụa saakịarị pakịrị ḅụ anị simem.

Agbamịẹ-anga mẹ Mịẹ Fịafịam (Kẹ Tọn-tọn Ḅara wẹrị) Mẹ

¹⁸ Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ị̀ ḅẹẹm, “Fịị-fịị tomḅọ, à ḍuko ị́ pịrịarị ye poki. Agbamịẹ-anga mẹ nama sakị, ị́ anị kẹ tọn-tọn ḅara wẹrị ḅa anị ọgọnọ agbamịẹye dọkịma ḅụ, pịkị ịn kẹ agba mẹ mịẹ anama ma ọmbie kẹ anị asana ḅụ.

¹⁹ Àrị agbamịẹapụ ma tẹ Erọnị furo paka apụ tẹ Zadọkụ ọrụ ḅụ ḅo apụ kịngẹ mie ị̀ tọrọkọ ḅo tẹ fịrịmẹnjị ị̀ pịrị ḅarịye. Yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe miemẹ tọnm. Ị́ asambịrịma nambulo kẹ ịn pịrị tẹ ịn kẹ si gotẹ tẹ kẹ agbamịẹ ḅa.

²⁰ Ị́ mịẹ ḅẹ ye, anị ḅẹ ọmbie mẹ ọkị tẹ agbamịẹ-anga mẹ ḅẹ akaka ḅẹ ye-dasịẹma aị ma ọgọnọ gbana, agbamịẹ-anga mẹ ḅiri mẹ ịkọlị ma sọ, akaka mamgba ikelema-koro. Mị-ḅara ḅụ ị́ agbamịẹ-anga mẹ fịafịama tẹ anị kẹ tọn-tọn ḅara wẹrị ḅa.

²¹ Ịn kẹ si gotẹ kẹ agbamịẹ nambulo ḅe ọkị ọkị tẹ kẹ Tamụnọ-warị mẹ sịẹ wararị kiri mẹ ḅụ ḅelema tẹ anị dọkịma, kẹ miemẹ mịẹ ḅẹ tẹ tọn wẹrị anga mẹ ḅụ.

²² Ene ḅaa ḅụ gbọrụ ekpe oḅori tẹ ḅụụ ḅụ ḅẹẹ-ḅẹẹye ofori ye ọkị tẹ kẹ si gotẹ agba mịẹ. Anị ḅẹ ọmbie mẹ kẹ agbamịẹ-anga mẹ mịẹ-fịafịama, ị́ nambulo ḅe kẹ mịẹ gbọrụ ḅara mẹ.

²³ Ị́ anie mịẹ fama tẹso, gbọrụ asambịrịma nambulo na gbọrụ asambịrịma ejimina ọkị, maaịn mamgba ḅụụ ḅụ ḅẹẹ-ḅẹẹye ofori aị,

²⁴ tẹ ịn kẹ ḅo ị̀ pịrị. Agbamịẹapụ ma fụn kẹ ini asana tẹ ịn kẹ dọkịma-agba mịẹ ị̀ pịrị ḅa.

²⁵ Ene goyegoye nwenii sọnọma aḍin ị́ nwẹn kẹ gbọrụ oḅori na, gbọrụ nambulo na, gbọrụ ejimina na kẹ si gotẹ tẹ mịẹ agba mịẹ ḅa. Arịmgba gbọrụ ḅọkọ ḅụ sọ ḅụụ ḅụ ḅẹẹ-ḅẹẹ gberie-sọ ofori ḅara simee.

²⁶ Sọnọma aḍin agbamịẹapụ nwẹn kẹ agbamịẹ-anga mẹ kẹ tọn-tọn ḅara wẹrị tẹ anị tẹlẹma kẹ anị kẹ ye mịẹ ḅẹ ḅara sime.

²⁷ Sọnọma aḍin ma ḅọrọ ḅẹḅẹ agbamịẹapụ ma ḅọrọ ḅẹḅẹ agbamịẹapụ ma saakị agbamịẹ-anga mẹ ḅụ agba mịẹ, anie tomi ma dọkịma-agba ma na gbọrụḅụụ-sime-agba ma na. Anịtẹso arị ọmịnị-mgba ḅụ ḅioḅẹlẹ ḅa. Yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ọkọ ḅẹẹm.”