Izikẹlị 42 - FỊAFỊA BAỊBỤLỤ

Tamụnọ-warị mẹ Kpeki Maa Awarị

¹ Anịtẹso tomḅọ ḅe ị̀ ọkị etela da ogigo mẹ sọ-mu tẹ ị̀ kẹ mu Tamụnọ-warị akaka ḅẹ ọgọnọ-jụ pakịrị anga da ḅụ sime warị mẹ lam, anị Tamụnọ-warị mẹ ḅẹ ịrụa-ideriarị-anga ḅẹ warị mẹ na sụma-a.

² Mị Warị mẹ ḅẹ nangwọ mita amesi oyi finji, tẹ finji mẹ nwẹnị si sọnọa mita finji.

³ Gbọrụ pakịrị anga ḅụ anị tọrụ kẹ ḅele-kiri mẹ tẹ oyia mita kẹ finjim, tẹ bebe Tamụnọ-warị mẹ ḅẹ nangwọ mie anị ọkị ye; tẹ osi pakịrị anga ḅụ anị tọrụ kẹ etela da ogigo mẹ ḅẹ sara-gelema yọ mẹ dam. Tẹra aḍigi ḅara mie ini arị nama ye, tẹ tẹrẹị ma jen gele jen nẹngị ḅara mie ini arị nama ḅara; gberie sụma mu osi ye nẹngịm.

⁴ Mị warị mẹ ḅẹ ọgọnọ-jụ da pakịrị mẹ mẹnjị ḅọrọ anga simem, tẹ sọnọa amita (5 m) kẹ finjima tẹ mesi oyia amita finji (50 m) kẹ nangwọm, tẹ anị ḅọrọ-so anga nyanam.

⁵ Warị mẹ ḅẹ ọgọnọ ḅẹ dẹkị mẹ ḅẹ aḅio ma kpakụrụ ogboku ḅẹ aị ma suku-ḅio ḅẹ aị ma na nẹngịm, ini arị kẹ siin ọḅụ dam ẹrẹsị.

⁶ Tẹra aḍigi ma ḅẹ aḅio mamgba nama sikima aị ọgọnọ arị sịẹsimem, tẹ ḅeriaị arị dasịẹma-a suku-ḅio ḅụ, ogigo mẹ ḅio osi awarị ma ḅụ anị sime-a ḅara.

⁷ Gbọrụ onu ḅio ma gbọrụ na sụn ḅụ etela da ogigo mẹ na ogboku ḅẹ aḅio ma na tọrọkọ ḅụ simem, anị ḅẹ nangwọ si sọnọ amita finji.

⁸ Etela da ogigo mẹ akaka ḅẹ aḅio ma si sọnọ amita finji kẹ nangwọ sakị, fịafịa-yọ mẹ kpeki tẹịn aị ma anị ḅẹ maa kiri kẹ nangwọm.

⁹ Suku-ḅio ḅẹ aḅio tẹ ịrụa saakịarị pakịrị mẹ ḅụ sime aị ma ḅọrọ ḅioju ḅẹ ogigo mẹ sọ-sọ anga simem.

¹⁰ Suku-jụ da anga ḅụ etela da anga mẹ ḅẹ nangwọ la ḅara, ḅo Tamụnọ-warị mẹ bịan, etela da onu mẹ na dama ḅụ ḅio-ḅio-ḅio.

¹¹ Ḅio ma tọrọkọ ḅụ mẹnjị-ḅọrọ-anga simem, anị ọgọnọ-jụ da pakịrị anga mẹ ḅụ sime gbọrụ ḅara mẹ. Anị tọn kụma gbọrụ ḅara mẹ, sime-ḅara sọ ọkọ, pịkị ḅọrọ sọ-mu anga mẹ sọ gbọrụ ḅara mẹ.

¹² Warị mẹ ḅẹ suku-jụ da pakịrị anga mẹ ḅẹ aḅio ma suku-ḅio ḅụ ḅọkọ simem, anie anị pịkị ịrụa-saakịarị-anga anga da yọ mẹ tẹ onu mẹ saakị anga mẹ ḅụ sọ sime-ḅara.

¹³ Tomḅọ ḅe ị̀ ḅẹẹm, “Ma maa awarị ma fịafịa awarị. Arị ḅio ḅụ KỊNỊNYANAḄỌ ḅe tọrọkọ laarị agbamịẹapụ ma fịafịa-tẹịn agbamịẹ-aị ma fịarị. Ḅio ma fịafịa wararị ẹrẹsị agbamịẹapụ ma fịafịa-tẹịn agbamịẹ-aị ma kẹ arị ḅio koromarị mgbọlị afịaị agbamịẹ-aị na, si gotẹ mịẹ agba na kẹ ye gbẹẹ ḅẹ tẹ pịrị-aị na.

¹⁴ Agbamịẹapụ ma Tamụnọ-warị mẹ ḅio sime nwenii tẹ paka etela da ogigo mẹ mu ḅii tẹ ḅẹḅẹ ịn KỊNỊNYANAḄỌ tọrọkọ ịn fịrịmẹnjị sime sakị ịn sụa fịafịa kapa mẹ siin koroma tẹrẹmẹ ịn paka nyanam. Ịn ja akapa sụa tẹrẹmẹ ịn paka tomi ma sime anga mu nyanam.”

Tamụnọ-warị Mẹ Nama Kiri Mẹ Tọn Tẹ Anị Paka Ḅara

¹⁵ Tomḅọ ḅe Tamụnọ-warị mẹ nama anga mẹ ḅọ ḅioju mẹ tọn fama tẹso, ori ị̀ ọkị pakam, ịrụa-saakịarị-anga da ogigo-ḅọkọ mẹ ḅụ, tẹso, ori etela da anga mẹ tọnm.

¹⁶ Ò kiri tọn sịn-ikiḅa mẹ kẹ ịrụa saakịarị pakịrị mẹ tọnm, tẹ anị pakaye mita oyia asi mesi finji na oyia amita na.

¹⁷ Ori ọgọnọ-jụ da pakịrị mẹ tọnm, anị paka ye mita oyia asi mesi finji na oyia amita na, kiri-tọn sịn ikiḅa mẹ ḅụ.

¹⁸ Ò suku-jụ da pakịrị mẹ tọnm: anị paka ye mita oyia asi amesi finji na oyia amita na, kiri-tọn sịn ikiḅa mẹ ḅụ.

¹⁹ Anịtẹso ọ̀ pịkị ịrụa-ideriarị-anga mẹ da mẹ tọnm; anị pakaye mita oyia asi mesi finji na oyia amita na, kiri tọn sịn ikiḅa mẹ ḅụ,

²⁰ mie ḅụ onu mẹ gbọrụ ikelema anga mẹ finji na nangwọ na gbasị, ini akaka mamgba gberie, mita oyia asi mesi finji na oyia amita na famam. Onu mẹ kọrị ye anie fịafịa ye ḅụ fịafịa-a ye puu-ḅelema.