Izikẹlị 41 - FỊAFỊA BAỊBỤLỤ

¹ Jen, tomḅọ ḅe ị̀ ọkị ogboku ḅẹ ḅio mẹ sọ mum, Fịafịa Yọ mẹ. Ò tolu-ḅọrọ mu anị la anga mẹ tọnm: anị ḅẹ pokolo mẹ tẹra mita lam,

² tẹ finji mẹ nwẹnị sọnọ amita, tẹ akaka ma ḅẹ akpakpa, pakịrị-pakịrị ḅụ, maa mita na pakịrị na. Ḅio mẹ sọ ọ̀ tọnm; anị paka ye, nangwọ mẹ si mita, tẹ finji mẹ nwẹnị oyi amita.

³ Anịtẹso ọ̀ nwẹnị sọ-mu tẹịn ḅio mẹ mu. Ọ̀ ḅọrọ mu anịanga mẹ tọnm; anị ḅẹ pokolo gbọrụ mita, tẹ finji mẹ nwẹnị tẹra mita, maa akaka ma na anị na, tẹra mita na pakịrị na, anị nwẹnị akpakpa sọm.

⁴ Ò ḅio mẹ tọnm, tẹ anị nwẹnị pakịrị oyi amita oyi amita (10 m) paka. Anịtẹso ori ị̀ ḅẹẹm, “Mie Fịafịa-tẹịn Yọ mẹẹ.”

Tamụnọ-warị Akaka Ma Ḅụ Sụa Iḅoma Aḅio Ma

⁵ Tomḅọ ḅe Tamụnọ-warị mẹ ḅẹ ḅioju mẹ ḅẹ akaka mẹ akpakpa sọ mẹ tọnm, tẹ anị paka ye tẹra mita. Mị akaka mẹ ḅụ ini iḅoma sụa bebe Tamụnọ-warị mẹ ikelemam, ḅio kala aị kala aị, maa mita finji.

⁶ Mịna aḅio ma tẹra aḍigi ọgọnọ ini arị namam, tẹ ḅio asuei gbọrụ dẹkị gbọrụ dẹkị. Tamụnọ-warị mẹ ḅẹ etela da akaka mẹ ḅẹ dẹkị ma ọgọnọ mẹ akaka ma ịrụ suku-ḅio ḅẹ dẹkị ḅẹ aị nẹngị, dẹkị-dẹkị ḅụ anị gbọrụ ḅara mẹ, mịẹ tẹ ḅio mẹ akaka mẹ sịrẹrẹ tẹ ḅarị anị ḅio nama suu ḅara sime ḅịa ḅara.

⁷ Tẹ mịẹ ḅara ḅụ etela ḅụ Tamụnọ-warị mẹ ḍiki ḅụ anị kịka ḅara suku-ḅio saakị iwo warị akaka mẹ akpakpa sọ mẹ gbasị mu ọgọnọ-jụ mẹ lam. Tamụnọ-warị mẹ akaka mẹ bịan ḅụ etela da pakịrị mẹ ḅụ etela da aḅio ma ọgọnọ la gotẹ maa finjimatẹ tanjị etela ịn nwẹn nama iwomam, mịẹ tẹ kịnị inetẹ suku ḅio ḅẹ dẹkị ḅụ kpọlị mu ogboku ḅẹ ye la, pịkị mu ọgọnọ-jụ ḅẹ ye la ḅẹ ḅara.

⁸ Arị ẹrịm mịnẹ ịn Tamụnọ-warị suku sara-gelemam, anị nwẹnị suku-saakịye sọ iḅoma aḅio ma pịrị. Anị ḅẹ nangwọ mẹ maa mita na pakịrị na.

⁹ Iḅoma aḅio ma ḅụ etela da warị akaka ma tẹra mita kẹ akpakpa sọm. Ḅele tẹ kiri mẹ tẹ Tamụnọ-warị mẹ ḅẹ iḅoma

¹⁰ na agbamịẹapụ ma aḅio na ogboku sime ye mẹ finji oyi amita, bebe Tamụnọ-warị mẹ ikelema-koro.

¹¹ Ḅele kiri mẹ ḅụ ḅọrọ ḅio jụ ma sọ anga simem, gberie ọgọnọ da, osi ye suku jụ da anga; tẹ suku mẹ ḅele-kiri mẹ bịan-sịẹ ye mẹ oyi amita kẹ finjim, ikelema-koro anga mamgba.

Ịrụa-ideriarị-anga Da Warị Mẹ

¹² Sụma wararị ịkọlị mẹ, ịrụa-ideriarị-anga anga mẹ, Tamụnọ-warị mẹ ḅụ, gbọrụ warị simem, anị ḅẹ nangwọ mita amesi sọnọ finji, finji mẹ nwẹnị mita suei sọnọ finji; anị ḅẹ akaka mẹ ḅẹ akpakpa sọ, bebe warị mẹ ikelema-koro, maa mita na pakịrị na.

Bebe Tamụnọ-warị Mẹ Tọn Mẹ

¹³ Tomḅọ ḅe Tamụnọ-warị mẹ ḅụ etela da anga mẹ tọnm, tẹ anị ḅẹ nangwọ mita amesi oyi finji. Tẹ Tamụnọ-warị mẹ ọḅụjụ ḅụ, saḅa-ḅọrọ mu ḅele-kiri mẹ ḅụ sụma-jụ ịrụa-ideriarị-anga mẹ sime warị mẹ la, ḅele mẹ mita amesi oyi finji.

¹⁴ Tamụnọ-warị mẹ tọrọkọ mẹ, ḅele-kiri mẹ kẹ sụa, ḅẹ finji mita amesi oyi finji.

¹⁵ Ori ịrụa-ideriarị-anga anga sime warị mẹ nangwọ tọnm, anị ḅẹ maa apakịrị ma ḅẹ mẹnjị-ḅọrọ ayọ ma sọ ọ̀ kẹ sụa tọnm, tẹ anị paka ye pịkị mita amesi oyi finji (50 m). Tamụnọ-warị mẹ ḅẹ mẹnjị-toluḅọrọ-anga mẹ na, Fịafịa Yọ mẹ na, Fịafịa-tẹịn Yọ mẹ na,

Tamụnọ-warị mẹ ḅẹ pakịrị-pakịrị ma gboloma ye

¹⁶ ịn ḍụḅọ kẹ oḅolo famam, kiri ḅụ saakị iwo mu ikiḅa-aḅọkọ ma la. Arị ikiḅa-ḅọkọ ma kịnị inetẹ gbaịn ḅa.

¹⁷ Tamụnọ-warị mẹ ḅẹ ḅioju ḅẹ akaka ma iwo mu ḅọkọ ma sịḅị-jụ ḅọrọ sọkị sụa aị famam,

¹⁸ eneme asịn na pamba-sụa anama na. Eneme asịn ma na nama ma gberie fama gberie ọkị ḅara mie ịn kẹ arị kẹ sụa ye, jen-jen pono, bebe ḅio ikelema-koro. Gbọrụ nama maa atọrụ maa atọrụ:

¹⁹ tomḅọ tọrụkuḅu tẹ ịn kẹ osi pakịrị anga ḅẹ eneme-sịn mẹ da ye, na ọkụkụ tọrụkuḅu tẹ ịn kẹ pịkị osi anga da ye. Mie kịka ḅara mie anị sime bebe warị-akaka mẹ kana-koro ḅara;

²⁰ kiri ḅio iwo mu ḅọkọ ma sịḅị ọgọnọ la, ịn sẹrubimu na eneme-asịn sọkị wararị onu mẹ ḅụ.

²¹ Ḅọkọ asịn ma ḅẹ inia apakịrị ma gbasịm. Ḅọrọ sọ Fịafịa-tẹịn Yọ mẹ mu anga mẹ tọrọkọ ḅụ gberie simem; ḍiki-tọrụ ḅụ anị kịka ye,

Sịn kẹ mịẹ Agbamịẹ-anga mẹ

²² sịn kẹ mịẹ agbamịẹ-anga. Anị ḅẹ gele gbọrụ mita na pakịrị na (1.5 m), tẹ finji mẹ nwẹnị gbọrụ mita (1 m). Anị ḅẹ ịkọlị ma ḅẹ asịn ma na, anị ḅẹ suku mẹ na, anị ḅẹ akaka mamgba na sịn mie ịn kẹ mịẹ yee. Tomḅọ ḅe nwẹnị ị̀ ḅẹẹ, “Mị dẹbịlẹ mẹ anie KỊNỊNYANAḄỌ ḅe tọrọkọ sịẹsimearị ye mẹẹ.”

Ḅọkọ Ma

²³ Mẹnjị ḅọrọ mu Fịafịa Yọ mẹ na pịkị Fịafịa-tẹịn Yọ mẹ na la kunoma anga ma ḅụ gbọrụ ḅọkọ gbọrụ ḅọkọ simem.

²⁴ Arị aḅọkọ ma maa ḅụụ maa ḅụụ ḅara simem, tẹ karakara ogboku mẹ ḅụ arị finjiarị.

²⁵ Fịafịa Yọ mẹ ḅẹ aḅọkọ ma ọgọnọ ini eneme-asịn na pamba-sụa anama na sọkị wararị, warị-akaka ma ḅụ anị sime gbọrụ ḅara mẹ. Mẹnjị-toluḅọrọ-anga mẹ ḅẹ etela da ḅọkọ mẹ, ịn ḍụḅọ kẹ gbaịnm.

²⁶ Mị ḅio mẹ akaka ma ḅụ ikiḅa-aḅọkọ emi, tẹ ini eneme asịn kẹ akaka ma ḅirimam.