Izikẹlị 4 - FỊAFỊA BAỊBỤLỤ

Izikẹlị Ịn Jeruselemu Ọkị Ḅẹ Tẹ Anị Ikelema-koro Ḅara Ḅẹ Egberi Mịẹm

¹ Tamụnọ ḅẹẹm, “Fịị-fịị tomḅọ, gbọrụ biriki kpoo ọkị tẹ kẹ ị́ tọrọkọ koroma, tẹ anị anị ọgọnọ Jeruselemu mẹ kịkaye kẹ.

² Anịtẹso ama ọkị ḅẹ apụ mịẹ-mịẹ ye mị, nangwọ-nangwọ tẹ olulu soku onu mẹ ikelema, kiri soku-soku tunduruma ikelema, ọmụapụ sime-yọ nama, tẹ pịkị sịkọpẹlẹ-a ḅara kẹ onu mẹ jine-jine ḅịkịma ḅẹ ejimina amẹẹ kẹ anị ikelema.

³ Ikulele opu-panị ọkị tẹ kẹ onu mẹ kịkama tẹ kẹ ị́ ḅụụ na anị na ogboku sịẹma. Ama ọkị apụ anị gbori tẹẹ, tẹ ị́yẹrị gbala ama mẹ ọkị ḅẹ ḅọ ḅee. Miemẹ elekima sọ Izirẹlị sịẹ mẹ pịrị ḅa.”

⁴ “Anịtẹso, í ere-ḅara kẹ ḅọlọlọ tẹ Izirẹlị warị mẹ ḅẹ si mẹ dogii. Ị́ agaga kẹ ḅọlọlọ ḅarị ene ma ḅẹ kịẹn-ḅịḅị anie ị́ kẹ ịna si dogi ḅarị ene ma.

⁵ À kẹ ị́ pịrị ene ma kịẹn-ḅịḅị mẹ anie ịn kẹ si ma dogi ḅarị akụra ma ḅẹ kịẹn-ḅịḅị mẹ. Mie ḅụ oyi akụra fa kụra gbọrụ ẹndẹ ịn nwẹn kẹ Izirẹlị warị mẹ ḅẹ si mẹ dogi ḅa.

⁶ Ị́ anie mịẹ fama sakị, pịkị tẹ ị́ ama-ḅara ḅẹ agaga kẹ ḅọlọlọ, tẹ ḍin amesi kẹ Juda ḅẹrẹ-ḅarasii mẹ ḅẹ tọrụsiẹrị da — ene kụra-kụra anie ịna fomu-ḅara.”

⁷ “Ị́ atọrụngbọ kẹ ịn Jeruselemu ọkị ḅẹ tẹ ẹbịarị ye mẹ ḅụ gbana. Mgbụlụḅa sụa tẹ pịkị opu ama mẹ da tẹ ịkịankoro anị ọgọnọ gbana.

⁸ Àrị ị́ fịna wẹrị ḅa mịẹ tẹ ị́ ị́ kẹ ḅọlọlọ wararị agaga mẹ ḅụ pịkị tẹ osi anga kẹ ḅọlọlọ ḅịa ḅara, nwenii in Jeruselemu ọkị sakị la.”

⁹ “Mịọkụ mie ị́ mịẹ ḅarịye — witi nwẹn-sịn fịye mgbọlị (anị ḅẹ yela-a ye mẹ), na bali na, akịdị na, apapa na, milẹtị na ḅẹ mgbọlị afịaị ma ọkịị. Arị gbẹẹ gboloma tẹ kẹ fịturu mịẹẹ. Anie mie ị́ fị ḅarịye ị́ ị́ ere-ḅara ḅẹ agaga kẹ ḅọlọlọ sime ḅarị oyi aḍin fa ḍin ẹndẹ ma ḅụ.

¹⁰ Ene goyegoye ịn kẹ ị́ pịrị ḅarị fịturu, ye tọn ye ḅụ oyia asi suei finji la ḅa, tẹ anị fa ḅịa nwenii jen ene la ḅa.

¹¹ Í ḅuu ḅarị minji sọ ịn tọn ḅa, minji maa mọngị gbọrụ ene.

¹² Samụnọtẹ tomina fịnya mie ị́ kẹ fịnị tọnọ ḅarịye tẹ anị ọgọnọ fịturu fọị tẹ fị, ḅẹḅọ-ḅẹḅọ inetẹ ị́ ẹrị ḅẹ anga ḅụ.”

¹³ KỊNỊNYANAḄỌ ḅe nwẹnị ḅẹẹ, “Miemẹ kẹ kịnị ḍiearị ye anie Izirẹlịapụ ma mịẹ-mịẹ jen ḅara ḅarị ofori ye ḅụ KỊNỊNYANAḄỌ ḅe ḅẹẹ tẹ mịnẹ ịn fị ma nwẹn ḅẹẹ fịye fị ḅarị ḅara, arị ịn kẹ jen asịẹ ḅụ gala-galamarị sakị mẹ.”

¹⁴ Kụma à pakịrịm, “Ẹn-ẹn, Tẹịn-Ḅẹrẹtọn-Kụrọ-Nyana KỊNỊNYANAḄỌ! Gbala amụ arị ị̀ ḅụụ pilema-a. Ị́ kala-sakị kụra ḅio gbala-gbala amụ arị ngẹrị fịị nama anịanịa piri-ḅio-ḅẹ nama ḅaa nama pẹị-a. Gbala-gbala amụ ịn kẹ fịafịa-a ḅara ọkị tẹ fịye fị-a.”

¹⁵ Mie ḅụ Tamụnọ ḅẹẹm, “Iḅi lamam. À nambulo fịnya kẹ anị kiri ḍima ḅa, í inetẹ anị kẹ fịnị mẹ tọnọ tẹ kẹ ị́ fịturu mẹ fọị ḅa.”

¹⁶ Ọ̀ pịkị kẹ sụa ḍukom, “Fịị-fịị tomḅọ, à Jeruselemu nyanarị fịturu mẹ pẹlẹ iderima ḅẹ-yearị. Anị anga ini opu ḅụụ-fụka da tẹ ḅụụ-ḅalaḅala ḅa, ini ịn fị ḅẹ fịye mẹ na in ḅuu ḅẹ minji mẹ na tọn-tọn tẹ kẹ ịn pịrị ḅarị sakị mẹ.

¹⁷ Ịna fịturu na minji na fa-fama ḅa; ịn ḅarị ịn mịẹ ḅẹ ḅara nimi-a ḅara sime ḅa, tẹ ịna oju sịkịrị ḅa ịna asi gotẹ.”