Izikẹlị 39 - FỊAFỊA BAỊBỤLỤ

Owu Gọgụ Ḅara-siinm

¹ Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḅẹẹm, “Fịị-fịị tomḅọ, Gọgụ sime si ḅara ḍuko-pakama, anie ḅẹrẹtọn Mẹsẹkị na Tubalị na asịẹ ma pịrịarị ḅọ ḅe, tẹ ḍuko ọ̀ pịrị mịnẹ yẹrị ori na fịya-a ḅọ.

² Àrị ọ̀ da pịkị iwo pakịrị anga da tẹ ọ̀ ḅọrọma pakama mu nwenii ò ḅo iḅere-iḅerea ọgọnọ-jụ la ḅa Izirẹlị ḅẹ tụndụ ma ḅụ.

³ Anịtẹso àrị ori iboli ḅakụ siin ḅa ori ere-ḅara ḅụ, pịkị ori aḍịẹịn ma ori ama-ḅara ḅụ.

⁴ Gọgụ na ori ọmụ-ogbo na ọ̀ jụ ḅẹ apụ ma na Izirẹlị ḅẹ tụndụ ma ọgọnọ fịị sara ḅa, tẹ à wẹrịso tẹ ịna oju akapa ma fịye sọ feni amẹẹ na piri-ḅio-ḅẹ anama amẹẹ mamgba na pịrị ḅa.

⁵ Wulalatẹ simearị ḍụọ kọrị kiri mẹ ọgọnọ ịn fịị sara ḅa, yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ọkọ ḅẹẹm.

⁶ Magọgụ amakiri mẹ ḅụ à saakị fịnị sụa ḅa, pịkị tọrụ-akaka ma tẹ kịnị ye ịn la-a ḅara kẹ angarị ayọ ma ḅụ sọ, tẹ ḅẹḅọ-ḅẹḅọ nimi ḅa mịnẹ yẹrị anie KỊNỊNYANAḄỌ ḅe.

⁷ Àrị ẹrị ḅa mịnẹ ị̀ atomi Izirẹlị ị̀ fịafịa kịrị ẹrẹ mẹ nimim; tẹ à ḍụkụ tẹ ị̀ ẹrẹ ḅarị jen kẹ tọrụ-tuu ḅịa. Anịtẹso sịẹ-sịẹ ma nimi ḅa mịnẹ yẹrị, KỊNỊNYANAḄỌ ḅe, anie Izirẹlị tẹkẹarị Fịafịa Ḅọ ḅe.”

⁸ Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḅẹẹm, “À ḍuko ene mẹ gbarị-a ḅara ḅụ ḅoarị.

⁹ Izirẹlị opu ama ma ḅio angarị apụ ma paka mu kịnị koroma mangị-so owuna-aị kolokolo mu fịnị tọnọ ḅa. Ịna ekpeke amẹẹ na, iboli amẹẹ na, ḍiein amẹẹ na, ḅẹkẹrẹ amẹẹ na, mgbele amẹẹ na kẹ fịnị sụkama ḅa, tẹ arị fa ḅịa sọnọma kụra la ḅa.

¹⁰ Ịn ḅarị mu ḍụọ kọrị apiri-ḅio fịnị kolokolo nyana-a anịanịa opu piri-ḅio sịn pẹlẹ-pẹlẹ-gbin, ịn kịnị koroma mangị-so owuna-aị ma tọnọarị ẹrẹsị. Ini ịna aị fọịn so apụ ma aị fọịn so ḅa. Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ọkọ ḅẹẹm.”

Gọgụ Ḍiḅi Mẹ

¹¹ KỊNỊNYANAḄỌ ḅe ḅẹẹm, “Mie-mẹmgba pakarị sakị, àrị anịanga Izirẹlị ḅụ ḍụẹịn-ḍiḅi-kiri kẹ Gọgụ pịrị ḅa, ‘Mẹnjị-ḅọrọ-yemuarịapụ Tụndụ-suku Mẹ’ ḅio, Fịtẹ Tọrụ-minji mẹ ḅẹ ịrụa-saakịarị-anga mẹ ḅụ. Ini anị anga Gọgụ na ori ọmụ-ogbo na ḍiḅi ḅa, tẹ ini tụndụ suku mẹ sịn ḅa ‘Gọgụ ọmụ-ogbo Tụndụ suku Mẹ.’

¹² Ḍụẹịn ma ḍiḅi tẹ amakiri mẹ wẹrị fịafịama mẹ kẹ Izirẹlịapụ ma ọkị ḅarịye sọnọma akalụ.

¹³ Ama kiri mẹ ḅụ sime-ḅọ sime-ḅọ ḅarasụa tẹ arị ḍiḅi ḅa, tẹ ini ịn kụn ḅa mie gotẹ, owu ị̀ ḅara iḅi ḅarị ene ḅaka mẹ ḅụ. Yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ọkọ ḅẹẹm.

¹⁴ Sọnọma akalụ ma ḅọrọ tẹ ḅẹḅẹ, ini owiapụ sẹlẹ pakama-ḅo tẹ ini amakiri mẹ mẹnjị ḍiki tẹ ḍiḅi-a tẹ papaa kiri ọgọnọ koro-simearị oju-akpakpa ma ọkị ḍiḅi ḅa, mịẹ tẹ ini amakiri mẹ mị fịafịama ḅẹ ḅara.

¹⁵ In bebe amakiri mẹ mẹnjị iwo-na-ideri-naarị ogbo in tomḅọ mgbe ḍọkị ẹrị-ẹrị, ini anị akaka ye kẹ elekima sụa ḅa, mịẹ tẹ ḍuḅu soku apụ ma inetẹ ḅo tẹ anị kẹ Gọgụ Ọmụ-ogbo Tụndụ-suku mẹ ḅụ ḍiḅi ḅẹ ḅara.

¹⁶ (Anị anga kpeki ḅụ ini ama pakama ḅa tẹ ini ọmụ-ogbo ẹrẹ kẹ anị koro ḅa.) Tẹ anie ḅụ ịn paa siin amakiri mẹ fịafịama ḅa.”

¹⁷ Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ị̀ ḅẹẹm, “Fịị-fịị tomḅọ, feni mamgba na nama mamgba na sịn ḅo anga-anga mamgba ḅụ tẹ ini agbamịẹ fịaị tẹ àrị Izirẹlị tụndụ ma ọgọnọ dẹẹ ịn pịrị ḅẹ-yearị aị ma fị. Anị kpọma ḍụḅatẹ opu alalị sọ ḅa Izirẹlị ḅẹ tụndụ ma ọgọnọ, ini inetẹ nama pẹị tẹ pịkị ọmbie ḅuu ḅarị anga mẹ.

¹⁸ Ini ọmụapụ oju ma pẹị tẹ pịkị tomikiri ḅẹ ḅẹrẹtọn-apụ ọmbie ḅuu ḅa, inimgba ịn kẹ ịn ḅaa ḅarị ḅara gbala ejimina amẹẹ na anana amẹẹ na, anịanịa oḅori amẹẹ na, anịanịa tim-timtẹ anambulo ḅaa ḅara.

¹⁹ Àrị agbamịẹ anama ḅaa ḅara kẹ mịna atomi ma ḅaa sakị, feni ma na nama ma na ini inetẹ ḅara kẹ ịna la ḅarị ḅẹlẹkị mamgba pẹị tẹ pịkị ọmbie ḅuu nwenii tẹ anị ịna tọrụ ḅaa ḅa.

²⁰ Ị̀ dẹbịlẹ mẹ suku ini inetẹ ịna ḅara la ḅarị ḅara kẹ asụ amẹẹ na in dọkụ-mẹnjịapụ na ọmụapụ na owu-sọ owiapụ na pẹị ḅa. Yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ọkọ ḅẹẹm.”

Izirẹlị Tarị Anị Sime Ḅara Sime Ḅarị Mẹ

²¹ KỊNỊNYANAḄỌ ḅe ḅẹẹm, “À mịẹ tẹ sịẹ-sịẹ ma ì ebube ẹrị ḅa, tẹ à pịkị kẹ ịn ḍie ḅa àrị ị̀ kụrọ kẹ mịẹ ḅụ suuarị ḅara arị ì inoma ofori tọn-pẹlẹ aị ma mịẹarị sakị.

²² Anị sakị ọkị mu Izirẹlịapụ ma nwẹnị nimi ḅa mịnẹ yẹrị anie KỊNỊNYANAḄỌ ịna Tamụnọ ḅe.

²³ Tẹ sịẹ-sịẹ ma nimi ḅa mịnẹ Izirẹlịapụ ma gotẹ kun-ḅara ḅio sọ ye in si kẹ ị̀ mịẹm. Àrị in ḍiki-tọrụsin tẹ si kẹ ịn tọn apụ ma ịn nẹngịma tẹ ịn ḅaam ọmụ ḅio.

²⁴ Àrị ịn la kiri kẹ ịn pịrịm ịn mịẹ mọnị-mọnị aị na si-sịḅịḅio na ḅụ, tẹ arị ịna ḅụ pịkị-som.”

²⁵ Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḅẹẹm, “Kụma mịọkụ àrị ọkụrụkụrụ nyana Jekọbụ furo-ḅẹ-apụ ma pịrị ḅa, Izirẹlịapụ ma, tẹ mịẹ tẹ in siin lọkọlọkọ ḅa. Àrị ị̀ fịafịa kịrị ẹrẹ mẹ ḍụa ḅa.

²⁶ Ịn pịkị-ḅo siin ịna ḅara-kuḅu ḅẹ amakiri ḅụ anga sakị, ye ḅụụ la-a ḅara ḅụ, jen gbọrụḅọ-sọ sime tẹ ini ẹrẹma-a ḅara, ini inetẹ ịn kẹ ị̀ kẹ dẹrịma ye mẹ ḅẹ tọrụ-tuu mẹ kẹ ḅioḅọrọma ḅa.

²⁷ Kẹ tọnwa asịẹ ma ḍie mịnẹ yẹrị anie fịafịa kịrị ḅọ ḅe gotẹ àrị ị̀ atomi ma kẹ pịkị-ḅo ḅa bebe amakiri mamgba tẹ si kẹ ịn tọn apụ ma angarị ayọ ma ḅụ.

²⁸ Anịtẹso ị̀ atomi ma nimi ḅa mịnẹ yẹrị anie KỊNỊNYANAḄỌ ḅe. In miemẹ nimi ḅa, à kun-ḅara kẹ in kẹ fịrịmam, tẹ mịọkụ àrị ịn kẹ pịkị-ḅo ịna ḅara-kuḅu ḅẹ amakiri lamatẹ ẹrẹsị, kpọkpọ gbọrụḅọ-sọ koroma-soa ḅara ḅụ.

²⁹ À ḅaka ḅara kẹ ị̀ Tẹmẹ kẹ Izirẹlịapụ ma aḅụụ ḅio su ḅa, tẹ gbala-gbala ịn ḅarị jen kẹ ọḅụ pịkị in gbin ḅịa. Yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ọkọ ḅẹẹm.”