Izikẹlị 38 - FỊAFỊA BAỊBỤLỤ

Gọgụ anie Tamụnọ kẹ Namakọrịarị ye

¹ KỊNỊNYANAḄỌ ḅe ẹkwẹn ị̀ pịrịm.

² Ori mẹẹ, “Fịị-fịị tomḅọ Gọgụ mịẹ tẹ asi ma ḍuko ama pịrịị, Magọgụ amakiri ḅẹ asịẹ ma, Mẹsẹkị na Tubalị na, ḅụ ḅẹ Sịḅịda-ḅẹrẹtọnḅọ ḅe. Ò sime si ḅara ḍukoo,

³ tẹ ḍuko ọ̀ pịrịị mịnẹ, yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe anie ori na fịya-a ḅọ.

⁴ Àrị ọ̀ da pịkị ikele-ikele ḅa, àrị arị kẹ ori amgba ma sụka tẹ ori na ori ọmụapụ mamgba na fọnọ so ḅa. Ori ọmụ-ogbo mẹ, kịrị kapa sụa tẹ asụ kpọlị tẹ kẹ mẹnjị apụ sọ nyana ye mẹ, ḍụḅa ḅụram; tẹ inimgba ekpeke dogi tẹ okologie ọlọm.

⁵ Pasịya na, Sudanị na Libiya na ḅụ ḅo owiapụ ori na emi, inimgba ekpeke na okpoko-sun na nyana wararị.

⁶ Goma na Bẹtị-togama na ḅẹ owu-sọ owiapụ mamgba tẹ ọgọnọ-jụ ḅo apụ ma ori na emi, tẹ anie anị pịkị sime osi asịẹ ma ḅẹ owiapụ ma sọ pịrị ḅara.

⁷ Ḍuko ọ̀ pịrị ọ̀ tẹlẹmaa, tẹ mịẹ tẹ ori ọmụapụ mamgba tẹlẹma sime ọ̀ tọn ḅara ḅụ.

⁸ Tọnwa akụra ḅọrọtẹ so sakị, à tọn ọ̀ pịrị tẹ ori ọmụ kẹ bebe amakiri mẹ tẹ ịn tọnwa asịẹ ḅụ kobiri ḅo gboloma tẹ ini ọmụ ḅalafa ofori ḅara kẹ anga yọ mẹ koro ḅa. Ori ọmụ kẹ Izirẹlị ḅẹ tụndụ ma koro ḅa, anie papaa gbiin-koro sime tẹ kịnị anga-a tẹ alatẹ anga mẹ, kụma mịọkụ ḅụ kịnị mamgba ye ịn la-a ḅara kẹ angarị anga mẹ.

⁹ Ori na ori ọmụ-ogbo na, ori na emi tọnwa asịẹ ma na owu kẹ ịn paka ḅarị ḅara erise na oḅuto na kịka tẹ amakiri mẹ gbaịn ḅa.”

¹⁰ Mie Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe kẹ Gọgụ ḅẹẹarị ye: “Anị ene mẹ ḅụ, ị́ saakị ị́ mịẹ ḅẹ si-aị tọn koroma ḅa.

¹¹ Ị́ tọn-pẹlẹ tẹ ọmụ kẹ ḅarasụa nyana ḅẹḅẹ amakiri mẹ koro ḅa, anie tomi ma dein na ye-ḅụụ-la-a ḅara na kẹ anga ye mẹ, onu gbori-a ama ma tẹ ḅụụ-ḍụa ayọ nyana-a ama.

¹² Ị́ ḅara kẹ tomi ma aị dogi-so tẹ ye-kọnma-a ḅara kẹ ịn fọịn fama ḅa, anie gbọrụ sakị ḅụ, fa tẹẹ opu ama ḅio anga sime apụ ma. Sịẹ-sịẹ mẹ ḅụ mie ini in kobiri ḅo yee, tẹ mịọkụ ịn nama amẹẹ na jaị na nyana tẹ tomikiri mẹ ḅẹ tẹra-isira ḅụ angarị.

¹³ Sẹba na Dedanị na Sipeni na ama ma ḅụ sime tẹ ḅo masịnịapụ ma í gbela ḅa, ‘Ị́ ọmụ-ogbo kobiri tẹ, owu paka tẹ ye fọịn tẹ kụrọ-ḅara kẹ ye tan so ḅẹ ḅara? Ị́ ḅiiarị í seleḅa na golu na nyana, opu ama ma na ja ngọ na, tẹ gbọịn-gbọịnma arị ọmụ ḅio ị́ fọịn ḅo aị mamgba kẹ mẹnjị-so?’ ”

¹⁴ Mie ḅụ Tẹịn-Ḅẹrẹtọn-Kụrọ-Nyana KỊNỊNYANAḄỌ ị̀ fịrịmam ò ḍuko sime ye mẹ ḍuko Gọgụ pịrị: “Mịọkụ ị̀ atomi Izirẹlị ye-ḅụụ-la-a ḅara kẹ angarị ogbo ị́ saakị paka ḅa,

¹⁵ iḅere-iḅerea ọgọnọ-jụ í sime-yọ ḅụ, tọrọkọ tarị tẹ gbọrụ opu kụrọtẹ ọmụapụ ḅin wararị tẹ tọnwa asịẹ ḅụ ḅo apụ, inimgba asụ kpọlị wararị.

¹⁶ Í owu kẹ ị̀ atomi Izirẹlị paka ḅa tẹ anị erise fie amakiri mẹ saḅa-ḅọrọ ye kịka ḅa. Sakị ḅo sakị, arị ị́ fịrịma mu owu kẹ ị̀ amakiri mẹ paka ḅa, kẹ mịẹ tẹ sịẹ-sịẹ ma ì lekiri ḅẹ ḅara, kẹ à kịrị ḅele ḅara ḍie-pakama, àrị ị́ ḅụ ḅọrọ tẹ mịẹarị ye ḅụ.

¹⁷ Ị́yẹrị anie iḅere-iḅerea kụra ḅio arị ị̀ fịrịmẹnjịapụ, Izirẹlị ḅẹ ịkịankoroapụ ma ḅụ ḅọrọ tẹ ḍuko-wasama sakị, mịnẹ tọrọkọ ḅo ḅarị sakị ḅụ à gbọrụḅọ ọkị-ḅo tẹ owu kẹ Izirẹlị paka ḅẹm. Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ọkọ ḅẹẹm.”

Tamụnọ kẹ Gọgụ pịrị Fomu-ḅara

¹⁸ Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḍukoarị, “Gọgụ ọmụ kẹ Izirẹlị koroarị sakị, à kpọma ịganị ḅa.

¹⁹ À ḍuko-pakamarị ị̀ ịganị mẹ ḅẹ ọfịrị ḅụ, mịnẹ anị ene mẹ ḅụ, kiri opuma jike ḅa Izirẹlị amakiri mẹ ḅụ.

²⁰ Inji na feni na goyegoye, nama goyegoye, opu ye ma kala ye na, tomikiri ḅụ ḍumo wararị tomḅọ goḅọ-goḅọ, oju sẹkị ḅa ì gotẹ ḅalafa ḅụ. Tụndụ ma ḅịkị ḅa, sịẹ-gele-gele wararị ịkụ ma paịn-sara ḅa, tẹ onu goyegoye ḅịkị ḅa.

²¹ À kịrị-kịrị ḅụụ-fụka kẹ Gọgụ tẹmẹ-naịn-naịnma ḅa. Yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ọkọ ḅẹẹm. Ori atomi ịna okologie ma kẹ jụmọ-jụmọ pẹlẹ ḅa.

²² Àrị obi na ọmbie ọsụma na kẹ ò fomu ḅa. Eene na ḍụḅarị mgbọlị-mgbọlị na pẹlẹ-a ḅara kẹ paịn-paịn-sara ḅa, pịkị kọrị-fịnị na ọpọlị-orumo na kẹ arị ḅụ sụa, ori na ori ọmụ-ogbo na ọgọnọ sara ḅa, pịkị ọ̀ jụ sọ tọnwa asịẹ ma na ọgọnọ sọ.

²³ Mị ḅara ḅụ, à ḅọrọtẹ kẹ sịẹ-sịẹ ma ḍie ḅa mịnẹ yẹrị anie Opu kịrị ḅele tẹ ḅọ ḅe. In nimi ḅa yẹrị anie KỊNỊNYANAḄỌ ḅe.”