Izikẹlị 37 - FỊAFỊA BAỊBỤLỤ

Samụnọ Mgbe-mgbe Tụndụ Suku Mẹ

¹ KỊNỊNYANAḄỌ ḅe kụrọ kẹ ị̀ ḅụụ ḅio sunm, tẹ nwẹnị ị̀ ọkị mu gbọrụ tụndụ suku koroma, anie mgbe-mgbe-mgbe kiri mẹ gbaịn wararị anga mẹ.

² Ori ị̀ kẹ mẹnjị bebe tụndụ-suku mẹ ikelema-koro tẹ àrị inetẹ ẹrịm tọnwa-tọnwa mgbe anịanga emi tẹ arị samụnọ lama tẹẹ.

³ Ọ̀ nwẹnị ì ḅii, “Fịị-fịị tomḅọ, ma mgbe ma inetẹ siin ḍumo ḅa aro?” À pakịrịm, “Tẹịn-Ḅẹrẹtọn-Kụrọ-Nyana KỊNỊNYANAḄỌ, ị́yẹrị nimim!”

⁴ Ori mẹẹ, “Ịkịan koro ẹkwẹn kọn mịna mgbe ma pịrịị. Ḍuko mịna samụnọtẹ mgbe ma pịrị tẹ ịn KỊNỊNYANAḄỌ ḅe ẹkwẹn mẹ poki.

⁵ Ḍuko ịn pịrị mịnẹ, yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḅẹẹm, ‘àrị ọwụ kẹ ọmịna aḅụụ ḅio suu ḅẹ-yearị tẹ ó siin ḍumo ḅa.

⁶ À san na meni na kẹ ọ́ pịrị tẹ oju apara kẹ ọ́ gbaịn ḅa. Àrị ọwụ kẹ ọmịna aḅụụ ḅio suu tẹ ó siin ḍumo ḅa. Anịtẹso ó nimi ḅa mịnẹ yẹrị anie KỊNỊNYANAḄỌ ḅee.’ ”

⁷ Mie ḅụ àrị ò ḍuko ị̀ pịrị ḅara mẹ kẹ ịkịankorom. Àrị ẹkwẹn-arị ogbo à ye kpakara-kpakarama fiearị ye naam, tẹ mgbe ma nwẹnị saakị jen-jen sụka tẹ gboloma.

⁸ Àrị ẹbị tẹ ḍikiarị ogbo, san ma na meni ma na mgbe ma gbaịnm; anị tẹso, oju apara ma. Kụma oju ma ọwụ nyana-a.

⁹ Tamụnọ ị̀ ḅẹẹm, “Fịị-fịị tomḅọ, ịkịan koro fẹrụ mẹ pịrịị. Ḍuko fẹrụ mẹ pịrị mịnẹ Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe tọn anị pịrịarị anị pakịrị-pakịrị ḅụ fie ḅo tẹ ọwụ kẹ ma fịtẹ oju ma ḅio suu, tẹ arị kẹ pịkị-ḅo ḍumo ḅụ suu.”

¹⁰ Mie ḅụ àrị ịkịankorom ò ḍuko ị̀ pịrị ḅara ḅụ. Ọwụ oju ma sọ-mum, tẹ ịn nwẹnị ḅo ḍumo tẹ saakị sịẹ. In ḅoo la ḅara ḅụ ini ọmụ-ogbo mịẹ lam.

¹¹ Tamụnọ ị̀ ḅẹẹm, “Fịị-fịị tomḅọ, Izirẹlịapụ ma ịn mịna mgbe ma na kịkarị. Ịn ḅẹẹarị mịnẹ ịn samụnọ-kpakịkị tẹ, tọrọkọ-jụ gbọrụ ḅiokpọmaye sọ ịn ḅarị nyana-a.

¹² Mie ḅụ ịkịan koro ị̀ atomi Izirẹlị pịrị tẹ ịn ḅẹẹ mịnẹ Yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ịna aḍuḅu ma finji ḅẹ-yearị. Àrị ịn pakama-ḅo tẹ ịn kẹ Izirẹlị amakiri ḅo ḅẹ-yearị.

¹³ Àrị ị̀ atomi ma ḍiḅi wararị aḍuḅu ma inji tẹ ịn pakama-ḅo sakị in nimi ḅa mịnẹ yẹrị anie KỊNỊNYANAḄỌ ḅe.

¹⁴ Àrị ị̀ ọwụ kẹ ịna aḅụụ ḅio suu ḅa, tẹ ịn kẹ pịkị-ḅo ḍumo ḅụ suu tẹ mịẹ tẹ ini ịna soku ḅẹ amakiri ḅụ anga ḅa. Anịtẹso in nimi ḅa mịnẹ yẹrị anie KỊNỊNYANAḄỌ ḅe. À mịẹ mininim à mị ḅẹm — à mịẹ ḅa. Yẹrị, KỊNỊNYANAḄỌ ḅe, ọkọ ḅẹẹm.”

Juda na Izirẹlị na Gbọrụ Ama-da yọ ḅụ

¹⁵ KỊNỊNYANAḄỌ ḅe jen kẹ ẹkwẹn ị̀ pịrịm.

¹⁶ Ori mẹẹ, “Fịị-fịị tomḅọ, gbọrụ sịn ikiḅa ọkị tẹ anị ọgọnọ ma ẹkwẹn ma kẹẹ, ‘Juda Ama-da Yọ.’ Anịtẹso pịkị jen sịn ikiḅa ọkị tẹ anị ọgọnọ ma ẹkwẹn ma kẹẹ, ‘Izirẹlị Ama-da Yọ.’

¹⁷ Anịtẹso maa sịn ikiḅa ma asịḅị kẹ jen-jen bịan tẹ ị́ ḅara-ḅio ọlọ wẹrị arị gbọrụ sịn kịka.

¹⁸ Ị́ atomi miemẹ fiearị ye kẹ í gbela sakị,

¹⁹ ḍuko ịn pịrịị mịnẹ, yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe elekima sọ Izirẹlị pịrị wararị sịn-ikiḅa mẹ ọkị tẹ kẹ elekima sọ Juda pịrị wararị sịn-ikiḅa mẹ na kẹ gbọrụ ḅụụ koroma ḅẹ-yearị. Maaịn ma ḅụ, à gbọrụ sịn-ikiḅa mịẹ pakama-ḅo tẹ anị ọlọ ḅa ị̀ ḅara ḅio.

²⁰ “Maa asịn-ikiḅa ma kẹ ị́ ḅara-ḅio ọlọọ, tẹ mịẹtẹ tomi ma arị ẹrị.

²¹ Anịtẹso ḍuko ịn pịrịị mịnẹ, yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe mu ị̀ atomi mamgba pakama-ḅo ḅẹ-yearị sịẹ-sịẹ ma tẹ ịn mu tẹ ayọ ma ḅụ, in kobiri gboloma, tẹ ịn kẹ pịkị-ḅo ịna soku-ḅẹ amakiri la.

²² Amakiri mẹ ḅụ arị in gboloma tẹ ịn gbọrụ sịẹ sọ ḅa, Izirẹlị ḅẹ tụndụ ma ọgọnọ ḅụ. Ịn gbọrụ amadaḅọ nyana tẹ ḅẹrẹtọn ịn pịrị ḅa, tẹ ịn ḅarị jen kẹ maa asịẹ puu ḅịa anịanịa ḍiema tẹ maa ama-da ayọ sọ.

²³ Ịn ḅarị jen kẹ sịḅị-ngụngụnmarị oru-afụḅara kẹ ịna aḅụụ pilema ḅịa, anịanịa si kẹ ịna aḅụụ ḅụrụma kọsịma. Ịn ḅọrọ tẹ si mịẹ tẹ ị̀ kẹ dẹrịmarị etela mamgba ḅụ arị ịn pakama-ḅo ḅa. Àrị ịn mịẹ kpaịnma ḅa, ini ị̀ atomi sọ ḅa, tẹ yẹrị ịna Tamụnọ sọ ḅa.

²⁴ Ị̀ fịrịmẹnjịḅọ Devidi kịka amadaḅọ ịna amadaḅọ sọ ḅa. Inimgba gbọrụ ḅụ sime ḅa gbọrụ ḅẹrẹtọnḅọ suku ḅio, tẹ ḅioḅẹngbọ-kẹ-sịrẹrẹ-niḅi ḅara kẹ ì oloko ma poki tẹ mịẹ ḅa.

²⁵ Ini à kẹ ị̀ fịrịmẹnjịḅọ Jekọbụ pịrị amakiri mẹ ḅụ anga ḅa, ịna elemu-aḍapụ ma anga amakiri mẹ. Ini anịanga anga gbamaso ḅa, anie ịna awọmẹ na ịna furo-ḅẹ-apụ mamgba sọ mịẹ ḅarị ḅara. Ị̀ fịrịmẹnjịḅọ Devidi kịka amadaḅọ ḅẹrẹtọn ịn pịrị gbamaso ḅa.

²⁶ Àrị ini na fị ḅarị ọḅọkụ mẹ mịẹ tẹ ye ḅarị ịn la ḅịa gbamaso ḅa. Àrị ịn mịẹ kụrọma tẹ ịna kịẹn-ḅịḅị ḍụḅama ḅa, tẹ ị̀ Warị kẹ ịna amakiri ḅụ nama ḅa, anị sime gbamaso ḅẹ anga mẹ.

²⁷ Àrị ini na anịanga anga ḅa; àrị ịna Tamụnọ sọ ḅa, tẹ ini atomi sọ ḅa.

²⁸ Àrị ị̀ Warị kẹ anịanga ịna ogboku koroma gbamaso sakị, mie sịẹ-sịẹ ma nimi ḅarịye mịnẹ yẹrị, KỊNỊNYANAḄỌ ḅe, Izirẹlị sẹlẹ ọkị tẹ ini ì soku ḅẹ atomi sọ.”