Izikẹlị 36 - FỊAFỊA BAỊBỤLỤ

Tamụnọ Boma Izirẹlị Ọgọnọ Ḅụ

¹ KỊNỊNYANAḄỌ ḅe ḅẹẹm, “Fịị-fịị tomḅọ, ẹkwẹn Izirẹlị ḅẹ tụndụ ma pịrị tẹ ịn ḅẹ ini oku mẹ poki, anie yẹrị,

² Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe, nyana ịn pịrị ye mẹ; si kẹ Izirẹlị tọn apụ ma in ḍiki tẹ ḅioḅẹlẹ-ḅẹlẹ tẹ ḅẹẹm, ‘Mịọkụ arị elemu sakị kụra ḅio ḅẹ atụndụ ma wamịna nye!’ ”

³ “Ọkọ ẹrẹsị, ịkịan koro tẹ ḍuko wasamaa, yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḍuko ḅẹ-yearị ye mẹ. Kpeki wararị asịẹ ma Izirẹlị ḅẹ tụndụ ma ọkị tẹ arị fọịn sakị mẹ, inimgba Izirẹlị mịẹ simam.

⁴ Mie ḅụ, ọmịnị yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḍuko ọ́ pịrịarị ye pokii — ọmịnị tụndụ ma na, kala-tụndụ ma na, ḍawọ ma ma, tụndụ asuku ma na, ọmịnị kaan-sara simearị ayọ ma na, pịkị ọmịnị kịnị mangị-so famatẹ opu ama ma tẹ ikelema-koro wararị asịẹ ma fọịntẹ opu ama ma.”

⁵ “Yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ẹkwẹn pakama Izirẹlị ikelema-koro wararị asịẹ ma ọgọnọ gbana tẹẹ, ị̀ ịganị ọfịrịarị ogbo, mene-mene Idọmụ ọgọnọ. Ye ḍiki ḍiki tẹ ḅioḅẹlẹ na ḍiki-iderima na ḅụ ini ị̀ amakiri mẹ fọịn-ọkị tẹ anị ḅẹ osuka fị ayọ ma kẹ ịna aị sọmam.

⁶ “Mie ḅụ, ịkịan koro Izirẹlị amakiri mẹ pịrịị; ḍuko tụndụ ma na, kala-tụndụ ma na, ḍawọ ma na, tụndụ asuku ma na pịrịị, yẹrị Tẹịn-Ḅẹrẹtọn-Kụrọ-Nyana ḅọ ḅe afana ịganị ḅụ ḍukoarị ye, sịẹ-sịẹ ma kẹ ịn mịẹ-sima tẹ ịn kẹ ideri kiri ḅụ koroma ye ẹrẹsị.

⁷ Yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe tẹmẹ-la ḅara kẹ minini tẹẹ mịnẹ Izirẹlị ikelema-koro wararị asịẹ ma iderima tẹ ḅụụ-jịrị ḅa.

⁸ Kụma Izirẹlị ḅẹ tụndụ ma ọgọnọ sịn ma siin ịnyịnya pakama tẹ sịnmgbọlụ sụa ọ́ pịrị ḅa, ị̀ atomi Izirẹlị. Ọ́ pịkịma ama ḅo ḅẹ-yearị ala-a sakị ḅụ.

⁹ Àrị ọmịna jụ emi, tẹ à mịẹ tẹ ó nimi ḅa mịnẹ ọmịna kiri ịn pịkị siin soku tẹ fịaị ḍiḅi ḅa anị ḅụ.

¹⁰ À mịẹ tẹ ọmịna kịẹn-ḅịḅị ḍụḅa ḅa. Ọmịnị opu ama ma ḅio anga tẹ kan sara sime wararị aị ma siin nama ḅa.

¹¹ À mịẹ tẹ tomi ma kịẹn-ḅịḅị na nama ma kịẹn-ḅịḅị na ḍụḅa ḅa. Ḅọrọtẹ sakị ḅụ ọ́ la ḅara nẹngị ḅara mịẹ ọ́ la ḅarịye, tẹ ọ́ tọnwa awọ nyana ḅa. À wẹrịso tẹ ọmịnị elemu ọmịnị anga-anga ḅara anga ḅa, tẹ à mịẹ tẹ jen sakị jen sakị amụ ọ́ lọkọlọkọ la-a ḅara kẹ lọkọlọkọ ḅa. Anịtẹso ó nimi ḅa mịnẹ yẹrị anie KỊNỊNYANAḄỌ ḅe.

¹² Ị̀ atomi Izirẹlị, arị ọ́ kẹ pịkị-ḅo amakiri mẹ anga ḅa anị ọmịna soku-ḅẹ amakiri sọ ḅa, tẹ anị ḅarị gbala-gbala ḍụkụ tẹ ḅuru ọmịna awọmẹ ḅaa ḅịa.

¹³ “Yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḅẹẹm: karakaraye mịnẹ tomi amakiri mẹ sịn-arị, ‘tomi pẹị-pẹị tẹ pịkị awọmẹ kọrị-ọkịarị amakiri,’

¹⁴ kụma mịọkụ saakị tọrọkọ mu, anị ḅarị jen kẹ tomi pẹị-pẹị yọ sọ tẹ ọmịna awọmẹ kọrị-ọkị ḅịa. Yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ọkọ ḍukom.

¹⁵ Amakiri mẹ ḅarị jen kẹ sịẹ-sịẹ ma tẹ anị komboarị apụ ma poki nyana-a anịanịa nini-suku sụa anị pịrịarị apụ ma ẹrị. Amakiri mẹ ḅarị jen kẹ sịẹ mẹ ḅẹ awọmẹ ma kọrị ḅịa. Yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ọkọ ḅẹẹm.”

Izirẹlị Ịwọ Ḍumo

¹⁶ KỊNỊNYANAḄỌ ḅe ẹkwẹn ị̀ pịrịm.

¹⁷ Ori mẹẹ, “Fịị-fịị tomḅọ, Izirẹlị ḅẹ apụ ma ịna amakiri ḅụ anga sime sakị, ini anị pilemam ịn ḍumo kọn ḅara na ịn mịẹ aị na ḅụ. À kẹ ịna amịẹye mẹ ọkị ḅara gbala ẹrẹḅọ sakị-ẹrịarị tẹ anị á kẹ fịafịa-a kiri ḅụ wẹrị ḅara anie in sime ḅara.

¹⁸ Àrị ịn wẹrịso tẹ ini ị̀ ịganị ḅẹ kụrọ dam, kịnị ḅaa asi na oru-afụḅara na tẹ ịn kẹ amakiri mẹ pilematẹ aị ma ẹrẹsị.

¹⁹ À ḅẹrẹ-ḅarasii pẹlẹ ịna ọgọnọ gbanam ịn kẹ ḍumo kọn ḅara na ye mịẹ ḅara na gotẹ, tẹ arị ịn gala-galama jen asịẹ ḅio suum.

²⁰ In mu anga mu anga ịn tọrụ-tuu ọkị-ḅo ị̀ fịafịa ẹrẹ ọgọnọ gbanam, kịnị ḅẹẹm, ‘Mịna apụ ma ini ịna soku-ḅẹ Tamụnọ kẹ ịn pịrị amakiri mẹ koroma-so-soa ḅẹ tẹ in som ẹrẹsị.

²¹ Anie ị̀ mịẹ tẹ àrị ị̀ ẹrẹ balam, Izirẹlịapụ in mu anga mu anga tọrụ-tuu ọkị-ḅo anị pịrịarị sakị goyegoye.’ ”

²² “Mịọkụ ọkọ ẹrẹsị, yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe nyana Izirẹlịapụ ma pịrị oku mẹ kẹ ịn pịrịị: ‘À mịẹ ḅẹ-yearị ye mẹ arị ọmịnị Izirẹlị ḅẹ apụ ma gotẹ mịẹ-a, kụma ị̀ fịafịa ẹrẹ gotẹ, anie ó mu sịẹ-sịẹ ma ḅụ ọmịnị anị tọrụ-tuu tẹ ye mẹ.

²³ À sịẹ-sịẹ ma tọrọkọ ì opu ẹrẹ mẹ ḅẹ fịafịa mẹ ḍie-pakama sakị — ọ́ mịẹ tẹ ini ogboku anị tọrụ-tuu ẹrẹ mẹ — in nimi ḅa mịnẹ yẹrị anie KỊNỊNYANAḄỌ ḅe. Àrị ọ́ kẹ mịẹye ḅụ su tẹ sịẹ-sịẹ ma nimi ḅa mịnẹ yẹrị anie Fịafịa ḅọ.

²⁴ Sịẹ goyegoye na amakiri goyegoye na ḅụ arị ọmịnị ọkị pịkị-ḅo ọmịna soku-ḅẹ amakiri lama ḅa.

²⁵ À kịọnkịọn minji kẹ ọmịnị asana tẹ mị tẹ ọmịna oru-afụḅara mamgba na jen ye goyegoye tẹ ó pilematẹ ye mẹ ḅụ ọ́ sịkịrị fịafịa ḅa.

²⁶ Àrị ịwọ ḅioḅẹngbọ na ịwọ kuroma na kẹ ọ́ pịrị ḅa. Àrị ọmịna kọngọ-kụrọma ḍụḅarị ḅioḅẹngbọ mẹ siin so tẹ ḅịḅịpoki ḅioḅẹngbọ kẹ ọ́ pịrị ḅa.

²⁷ Àrị ị̀ tẹmẹ kẹ ọmịna ḅụụ-ḅio suu tẹ ẹrị ḅa mịnẹ ọmịnị ì oloko ma ḍukamẹnjịm pịkị à tọn ọ́ pịrị aị mamgba kokom.

²⁸ Anịtẹso ọmịnị à kẹ ọmịna elemu aḍapụ ma pịrị amakiri mẹ ḅio anga ḅa. Ọmịnị ị̀ atomi sọ ḅa, tẹ yẹrị ọmịna Tamụnọ sọ ḅa.

²⁹ Ó pilemarị ye goyegoye ḅụ arị ọ́ ḅọrọma ḅa. À tọn mbịaka mẹ pịrịtẹ anị paka sara ḅa, mịẹ tẹ ọ́ ḅarị jen kẹ ḅuru-ḅa nyana ḅịa ḅara.

³⁰ À mịẹ tẹ ọmịna asịn ma tẹ fị-fị mgbọlụ sụarị aị ma sụa tarị ḅara nẹngị ḅa, tẹ ọmịna aḍụọ ma pịkị fịaị pakama tarị ḅara nẹngị ḅa, mịẹ tẹ ḅuru-ḅa ḅarị jen kẹ paka tẹ sịẹ-sịẹ ma ogboku ọmịna tọrụ-tuu ḅịa ḅara.

³¹ Ọmịnị ọmịna si-yemịẹ-ḅara mẹ na iri-aị ma na inoma aị tẹ ọ́ mịẹ tẹ aị ma na kẹ ḅiokoroma ḅa, tẹ ọmịna aḅụụ ọmịna sịḅị-ngụngụnma ḅa, ọmịna asi ma na inoma aị ma na ẹrẹsị.

³² Izirẹlị, à ḅiiarị ó nimi mịnẹ àrị ọmịna asịḅị gotẹ mie-mẹmgba mịẹ-a. À ḅiiarị ọ́ mịẹarị aị ma ḅẹ ḅụụ-jịrị na tọrụ-tuu na ọmịna aḅụụ ịnọ. Yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ọkọ ḅẹẹm.’ ”

³³ Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḅẹẹm, “Àrị ọmịna asi mamgba ḅụ ọ́ sịkịrị-fịafịama sakị, à wẹrịso tẹ ó siin ọmịna opu ama ma ḅio anga ḅa, tẹ ó siin kan-sara tẹ anga ma nama ḅa.

³⁴ Ọmịna ḍụọ-ḍiḅi-akiri ma akaka mẹnjị ḅọrọ-ḅọrọ apụ mamgba ẹrịm arị opu-piri sọ tẹ koro simem, kụma à wẹrịso tẹ ó siin arị kẹ ḍụọ ḍiḅi ḅa.

³⁵ Ọrụḅọ-ọrụḅọ nwẹnị ḅẹẹ ḅa, mịẹ kiri mẹ tẹ gbọrụ sakị ịkpa sọ sime yọ mẹ ḅo Ideni Ḍụọ sọ tẹ ḅara ḍiki, tẹ opu ama ma tẹ ịn kan kiri lamatẹ fọịn tẹ kẹ arị kan ḅara kẹ arị kẹ gbin koroma-so aị ḅo kịnị anga tẹ kẹ kụrọnị ḅara wẹrị tẹ ḅara ḍiki.

³⁶ Anịtẹso kpeki tẹ anga sime asịẹ ma tẹ fa-a so apụ ma nimi ḅa mịnẹ Yẹrị, KỊNỊNYANAḄỌ ḅe, siin fa tẹẹ opu ama nama-namam tẹ pịkị si tẹ ḍụọ-ḍiḅi akiri siin ḍiḅi-ḍiḅim. Yẹrị, KỊNỊNYANAḄỌ ḅe, minini tẹ à mịẹ ḅẹm — tẹ à mịẹ ḅa.”

³⁷ Tẹịn-Ḅẹrẹtọn-Kụrọ-Nyana KỊNỊNYANAḄỌ ḍukoarị, “À pịkị siin jen gbọrụ sakị kẹ Izirẹlị ḅẹ apụ ma wẹrịso tẹ ini ị̀ ḅara ḅarasụa ḅii ḅa, tẹ à wẹrịso ịn pịrị tẹ ịna akịẹn-ḅịḅị sun anana-ogbo kịka ḅa.

³⁸ Mịọkụ ḅụ kaan-sara wararị opu ama ma ḅio tomi nwẹnị ḅin ḅa, gbọrụ sakị ḅụ anana Jeruselemu ḅin-ḅin ḅara, ịn kẹ alalị sakị ḅụ agbamịẹ-mịẹ ḅẹ anana ma. Anịtẹso in nimi ḅa mịnẹ yẹrị anie KỊNỊNYANAḄỌ ḅe.”