Izikẹlị 35 - FỊAFỊA BAỊBỤLỤ

Tamụnọ Kẹ Idọmụ pịrị Fomu-ḅara

¹ KỊNỊNYANAḄỌ ḅe ẹkwẹn ị̀ pịrịm.

² Ori mẹẹ: Fịị-fịị tomḅọ, Idọmụ bebe amakiri mẹ si ḍuko-pakama.

³ Ḍuko tomi ma pịrịị, yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḍukoarị ye: Idọmụ ḅẹ tụndụ amẹẹ, yẹrị ọmịnị na fịya-a ḅọ! Àrị ọ́ mịẹ tẹ ọ́ papaa fa tẹ mịẹ-mịẹ ye ofori ḅara kẹ koro-sime ḅa.

⁴ Àrị ọmịna opu ama ma sima fama tẹ kẹ gbin koroma ḅa; Tẹ ọmịna amakiri mẹ fa tẹ sime ḅa; Anịsakị ó nimi ḅa mịnẹ yẹrị anie KỊNỊNYANAḄỌ ḅe.

⁵ Ị́yẹrị anie sakị mamgba si kẹ Izirẹlị tọn-arị ḅọ tẹ mịẹ tẹ ịn pẹị ḅẹ nama ḅaa ḅara kẹ árị atomi ḅaam árị opu ḅụụ-fụka sakị ḅụ, árị á si ma ḅẹ kunoma fomu-ḅara da sime sakị mẹ ḅụ.

⁶ Anịtẹso mie ḅụ, piki-pikiye-ofori ḅara ḅụ, yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe anie ḍumo wararị Tamụnọ ḅe ẹrẹsị, fị sime ọ́ pịrịm, ọmịnị inetẹ anị ḅio pụkọ-paka-so ḅịa. Kịnị ḅaa-ḅẹrẹ ọ́ fịnama wararị, tẹ ḅaa ó ḍukamẹnjị ḅa.

⁷ À mịẹ tẹ Idọmụ tụndụ ọgọnọ ḅẹ amakiri mẹ fa tẹẹ ye sọ ḅa tẹ anị yọ mẹnjị-ḅọrọ ḅọ ḅọrọ ḅọ ḅaa ḅa.

⁸ À ḍụẹịn-ḍụẹịn-ḍụẹịn kẹ tụndụ ma sara gbaịn ḅa, tẹ ọmụ ḅio fịị apụ ma oju akpakpa ma tụndụ ma na tụndụ-suku ma na gbaịn ḅa,

⁹ À mịẹ tẹ ị́ fa gbamaso ḅa, tẹ gbọrụḅọ-sọ ḅarị jen kẹ í opu ama ma ḅio anga ḅịa. Anịtẹso í nimi ḅa mịnẹ yẹrị anie KỊNỊNYANAḄỌ ḅe.

¹⁰ “Ị́ ḅẹẹm mịnẹ ma maa asịẹ ma, Juda na Izirẹlị na gboloma, na ịna amakiri ma na sime ị́ pịrịm, tẹ arị nyana ḅa, karakaraye yẹrị KỊNỊNYANAḄỌ ḅe anie ịna Tamụnọọ sọ.

¹¹ Anịtẹso mie ḅụ, piki-pikiye-ofori ḅara ḅụ, yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe anie ḍumo wararị Tamụnọ ḅee ẹrẹsị, àrị ị́ ịganị ḅẹ gbẹẹ-ye kẹ ị́ gbẹẹ ọkị ḅa, ị́ afana na í ḍiki-ḅioḅu na tẹ ị́ nyana ị̀ atomi pịrị ye mẹ ẹrẹsị. In nimi ḅa mịnẹ ị́ kẹ ịn mịẹ ye ḅẹ fomu-ḅara mie à kẹ ị́ pịrịarị ye.

¹² Anịtẹso ó nimi ḅa mịnẹ yẹrị, KỊNỊNYANAḄỌ ḅe ọ́ naam, ó ḍiki-iderima ḅara kẹ ḅẹẹarị sakị, mịnẹ Izirẹlị ḅẹ tụndụ ma gulugulu fama tẹẹ, tẹ arị sime ọ́ pịrịm, tẹ ọ́ gbọrsịḅị arị mẹnị ọkị ḅẹm.

¹³ Ọ́ tọrụ ḅọị-a ḅara kẹ ḅụụ-boma ị̀ pịrị ye mẹ, à naam.”

¹⁴ Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḅẹẹarị, “À kẹ ọ́ fama ḅarị ḅara bebe tomikiri mẹ naa tẹ ọmịna ḅịkị mẹ ḅẹ ḍereku kọn ḅa,

¹⁵ anie ọmịnị Izirẹlị faa fama ye ḅẹ ḍereku kọn gbọrụ ḅara mẹ, sime ị̀ pịrị apụ ma. Seya ḅẹ tụndụ amẹẹ, inn, bebe Idọmụ amakiri mẹ faa ḅa. Anịtẹso ọrụḅọ-ọrụḅọ nimi ḅa mịnẹ yẹrị anie KỊNỊNYANAḄỌ ḅe.”