Izikẹlị 34 - FỊAFỊA BAỊBỤLỤ

Izirẹlị ḅẹ Anana-ḍikiḍikiapụ ma

¹ KỊNỊNYANAḄỌ ḅe ẹkwẹn ị̀ pịrịm.

² Ori mẹẹ, “Fịị-fịị tomḅọ, Izirẹlị daarị apụ ma sime si ḅara mẹ ḍuko. Ịkịankoro ịn pịrị, tẹ yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe kẹ ịn ḅẹẹarị ye ḍuko ịn pịrịị. Ọmịnị Izirẹlị ḅẹ anana-ḍikiḍikiapụ ọ́ fa tẹẹ! Ọmịna aḅụụ mie ọ́ balarị, kụma gbala-gbala ọmịnị anana ma koko-a.

³ Ọmịnị ịna ḅụ paka-ḅo ndo-minji mẹ ḅuuarị, ịna ḅụ ḅẹ isuke kẹ ḍori akapa sụarị, pịkị iḅi tẹịn anana ma ḅaa-ḅaa pẹịarị. Kụma gbala-gbala ọmịnị anana ma koko-a.

⁴ Amụ ọmịnị ịnyọ ḅụụ ḅụ fa tẹẹ aị ma ḍikiḍiki-a, obiarị aị ma gwọ-a, yela aị ma ịnọ ma fịna-a, etela-iri tẹ aị ma kẹ pịkị-ḅo-a, anịanịa fa aị ma ḍọkị. Anie nakara ọ́ kụrọ-kụrọ ḅara kẹ arị na mịẹm.

⁵ Anana ma ḍikiḍikiḅọ nyana-a ẹrẹsị ịn gala-gala tẹ piri-ḅio-ḅẹ si anama ịn ḅaa tẹ pẹịm.

⁶ Anị ḅara ḅụ ị̀ anana ma gele atụndụ ma na tụndụ ma na ọgọnọ ikele-ikelem. Ịn gala-gala bebe tomikiri mẹ ikelemam, tẹ gbọrụḅọ-sọ ini ẹrị ḅẹ tẹ ịn ḍọkị-a.”

⁷ “Mịọkụ ọmịnị anana-ḍikiḍikiapụ ọmịnị yẹrị, KỊNỊNYANAḄỌ ḅe, ḍuko ọ́ pịrịarị ye poki.

⁸ Yẹrị anie ḍumo wararị Tamụnọ ḅe sakị goyegoye, ọmịnị í poki na-iḅim. Piri-ḅio-ḅẹ si anama ḅo ị̀ anana ma ogbo koro tẹ ịn ḅaa pẹịm, anana-ḍikiḍikiḅọ ofori ẹrẹsị. Ị̀ anana-ḍikiḍikiapụ ḅụụkụrọma tẹ anana ma ḍọkị-ḅoa. Ịna ḅụụ mie in ḍikiḍiki sime ye, ị̀ anana ma-a.

⁹ Mie ḅụ anana-ḍikiḍikiapụ, ọmịnị ì pokii.

¹⁰ Yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḍuko-pakamarị mịnẹ ọmịnị ị̀nịna fịya-a apụ sọ tẹẹ. Àrị ọmịna ḅara ị̀ anana ma ọkị-so ḅa, tẹ ḍụkụ tẹ ọ́ ḅarị gbala-gbala in ḍikiḍikiapụ sọ ḅịa; gbala-gbala à ḅarị jen kẹ ḍụkụ tẹ ọmịnị in koko ḅịa, ọmịna aḅụụ ngẹrị. Àrị ọmịna aḅara-ḅio ị̀ anana pụkọ-pakamaḅo ḅa, tẹ ḍụkụ tẹ ọmịnị ịn pẹị ḅịa.”

Iḅi Anana-ḍikiḍikiḅọ Ḅe

¹¹ Yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḍuko ọ́ pịrịarị mịnẹ à ḅarana ị̀ anana ma ḍọkị-pakama-ḅo tẹ in ḍikiḍiki ḅa,

¹² anie anana-ḍikiḍikiḅọ kẹ ori anana ḍikiḍikiarị gbọrụ ḅara mẹ, anie gala-gala tẹ ò kobiri ḅo siin gboloma aị ma. Arị ịn kẹ pịkị-ḅo ḅa anị kanakana opu ḅụụ-fụka ene mẹ ḅụ ịn gala-gala mu la anga mamgba ḅụ.

¹³ Jen asịẹ ma ḅio arị ịn pakama-ḅo ḅa, in kobiri gboloma tẹ ini ọkị-ḅo ịna ḅara-kuḅu ḅẹ amakiri la ḅa. À tọrọkọ tarị tẹ ịn kẹ pịkị-ḅo Izirẹlị ḅẹ tụndụ ma na mẹnjịarị aminji ma na la tẹ ini iḅi-osuka fị akiri ḅụ ye fị ḅa.

¹⁴ Tụndụ ọgọnọ ḅẹ lẹsẹrẹ-kiri ḅẹ iḅi-osuka ḅụ in ye-ḅụụ-la-a ḅara kẹ sime tẹ osuka fị ḅa, tụndụ asuku ma ḅụ sọ, pịkị Izirẹlị ḅẹ amakiri mẹ ḅẹ ịwọ osuka fị ayọ mamgba ḅụ na.

¹⁵ Yẹrị ḅarana ị̀ anana ma ḍikiḍikiarị ḅọ sọ ḅa, tẹ àrị ịnyọsara yọ ḍọkị ịn pịrị ḅa. Yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ọkọ ḅẹẹm.

¹⁶ À fa tẹẹ aị ma ḍọkị ḅa, ikele-ikele so mu jen anga la tẹ aị ma kẹ pịkị-ḅo ḅa, yelatẹ aị ma ịnọ ma fịna ḅa, tẹ obiarị aị ma gwọ ḅa; kụma tim-timtẹ oju iḅi wararị aị ma à ḅaa guluguluma ḅa, yẹrị anie kuraye mịẹarị anana-ḍikiḍikiḅọ ẹrẹsị.

¹⁷ Ọkọ ẹrẹsị mịọkụ, ị̀ anana-ogbo, yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḍuko ọ́ pịrịarị mịnẹ àrị ọmịna ḅụ gbọrụḅọ-gbọrụḅọ kọn ḅa, tẹ iḅi-apụ ma sẹlẹ sikima ḅa si-mịẹapụ ma ḅụ, anana ma oḅori ma ḅụ.

¹⁸ Ọmịna ḅụ ḅẹ jen-apụ, ọ́ fịarị iḅitẹịn osuka mẹ, ọmịnị na iḅi-a; ọ́ fị-fịa osuka mẹ sọ ọ́ nanga kiri pịrịarị! Ọ́ kịọnkịọn minji ḅuu tẹso ọkụma, ọmịnị ó ḅuu-a ye pikirima lịka mịẹ tẹẹ!

¹⁹ Ị̀ osi anana ma nwẹnị ọ́ nanga kiri pịrị tẹ osuka ma fị pịkị ọ́ kẹ lịka mịẹ tẹ minji mẹ ḅuu.

²⁰ Mie ḅụ mịọkụ, yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḍuko ọ́ pịrịarị ọmịnị kụrọ wararị anana ma na ịnyọ nyana-a anana ma na ogboku ḅụ à ḅẹrẹkọn ḅa.

²¹ Ọmịnị obiarị aị ma sukuruma ḅelema tẹ ịfalị kẹ in jine siin tẹ anana-ogbo mẹ ḅụ.

²² Kụma àrị ị̀ anana pụkọ-pakaḅo ḅa, tẹ ḍụkụ tẹ ịn ḅarị si ḅara kẹ ini na mịẹ ḅịa. Ị̀ anana ma à gberie-gberie kọn ḅa, tẹ iḅi aị ma sẹlẹ sikima ḅa si aị ma ḅụ.

²³ Arị ị̀ fịrịmẹnjịḅọ Devidi kịka amadaḅọ kẹ ịn pịrị tẹ ori ịna kpọkpọ gbọrụ anana-ḍikiḍikiḅọ sọ tẹ in koko ḅa.

²⁴ Yẹrị, KỊNỊNYANAḄỌ ḅe, ịna Tamụnọ sọ, tẹ ị̀ fịrịmẹnjịḅọ Devidi kịka amadaḅọ ịna ḅẹrẹtọnḅọ sọ ḅa. Yẹrị ọkọ ḅẹẹm.

²⁵ À ye ịn la ḅịa ḅiokpọ kẹ ịn pịrị ḅarị ọḅọkụ kẹ ini na fị ḅa. À kịnị-ḅaaḅa si anama mamgba sikima fama ḅa amakiri mẹ ḅụ, mịẹ tẹ ị̀ anana ye-ḅụụ-la-a ḅara kẹ ḍụọ ḍiḅi akiri ma ḅio anga tẹ opu-apiri ma ḅio mono ḅa.

²⁶ “Àrị in boma ḅa tẹ minini ịn pịrị tẹ ini ị̀ fịafịa tụndụ mẹ anga ikelema-koro ḅa. Anị anga ḅụ à nwẹịn-nwẹịn eene kẹ in boma ḅa ini anị ḅii sakị-sakị.

²⁷ Sịn ma mgbọlụ sụa ḅa, ḍụọ akiri ma fịaị pakama ḅa, tẹ ọrụḅọ-ọrụḅọ amịna ḅara-kuḅu ḅẹ kiri ḅụ ye-ḅụụ-la-a ḅara kẹ anga ḅa. Àrị ị̀ atomi ikoli ma anyịma tẹ ịn kẹ omoni sọmarị apụ ḅara-ḅio ịn pakama-ḅo sakị, anịsakị mie in nimi ḅarịye mịnẹ yẹrị anie KỊNỊNYANAḄỌ ḅe.

²⁸ Oru nimi asịẹ ma ḅarị jen kẹ ịn fọịn ḅịa, tẹ piri-ḅio-ḅẹ si anama pịkị ịn ḅaa pẹị ḅịa. In ye-ḅụụ-la-a ḅara kẹ anga ḅa, tẹ gbọrụḅọ sọ ịna tẹmẹ-naịn-naịnma ḅịa.

²⁹ À fịaị pakamarị iḅi kiri kẹ ịn pịrị ḅa, tẹ ḅuru-pọkọtarị kuno ḅa amakiri mẹ ḅụ. Osi asịẹ ma ḅarị jen kẹ nini-suku sụa ịn pịrị ḅịa.

³⁰ Ḅẹḅọ-ḅẹḅọ nimi ḅa mịnẹ yẹrị Izirẹlị gbaịn-arị, anịsakị ini pịkị ị̀ atomii. Yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ọkọ ḅẹẹm.

³¹ “Ọmịnị, ị̀ anana, à fịye kẹ pịrị fịarị anana-ogbo mẹ, anie ị̀ atomi ma, yẹrị ọmịna Tamụnọọ,” Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ọkọ ḅarị.