Izikẹlị 31 - FỊAFỊA BAỊBỤLỤ

In Sida Sịn Kẹ Ijiputi Na Tọnma tẹ

¹ Ịn wa kun-so tẹ oyi gberie finji karama kụra mẹ ḅụ ḅẹ tẹrẹị karama akalụ mẹ ḅẹ tarị ene mẹ ḅụ, KỊNỊNYANAḄỌ ḅe ẹkwẹn ị̀ pịrịm.

² Ori mẹẹ: Fịị-fịị tomḅọ, ḍuko Ijiputi ḅẹ amadaḅọ ḅe na ori atomi mamgba na pịrịị: Ị́ kpọma kụrọ-ḅara ḍikii! Ndẹẹ àrị inetẹ ị́ kẹ tọnma ḅẹ ye?

³ Ị́ kịkarị ye Lẹbanọnị ḅẹ sida sịn, iḅitẹ purukutẹ aḅara nyana ye; tẹ gele lamatẹ iwo So-tọrụ mu oḅuto la ye.

⁴ Minji emi, mịẹ tẹ anị so-paka ḅẹ ye, Tẹ suku-ḅio mẹnjịarị atọrụ tẹ anị kokoarị ye. Arị minji kẹ mu sịn mẹ so-pakarị yọ lamam Tẹ mẹnjịarị minji kẹ opu piri mẹ ḅio sime asịn mamgba fịrịmam.

⁵ Minji iḅima anị lam ẹrẹsị Anị so-paka tẹ gele osi asịn ma nẹngịm. Anị ḅẹ aḅara ma kpokoro tẹ nangwọm.

⁶ Feni ḅara-ḅara anị aḅara suku-ḅio amịna awarị namam; Piri-ḅio-ḅẹ anama anị suku-ḅio sịḅị-kikimatẹ ịna awọmẹ iyim; Tomikiri ḅẹ asịẹ ma anị aḅara suku-ḅio sịḅị-kikima tẹ ịnyọsaram.

⁷ Sịn mẹ kpọma iḅi ḅara ḍiki Opuma gele, nangwọ-nangwọtẹ aḅara nyana. Anị ḅe akuno ma kiri-sọ ideri-mu suku ḅio mẹnjịarị minji ma lam.

⁸ Tamụnọ ḍụọ mẹ ḅio kẹ anị na tọnma ḅẹ jen sida sịn-arị ofori. Gbọrụ faha sịn sọ amụ mị-ḅara kẹ sịn-aḅara sụa sara-a, Tẹ jen papaa sịn sọ amụ nwẹn sime aḅara sụa-a. Gbọrụ sịn sọ amụ mị-ḅara kẹ Tamụnọ ḅarana ḍiḅi ḍụọ mẹ ḅio nwẹn iḅi-a.

⁹ Yẹrị anị mịẹ iḅimam, wasamatẹ aḅara kẹ anị pịrị ḅụ. Tamụnọ ḍụọ Ideni mẹ ḅio sime sịn goyegoye anị ḍiki pọkọsọlịm.

¹⁰ “Ọkọ ẹrẹsị, yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe anị sịn mẹ ḅụ paka ḅẹ-yearị ye ḍuko ị́ pịrịarị, anie gele iwo mu oḅuto la tẹ ye mẹ. Anị gele iwo ḅara mie anị pịkị opu-amịẹaị mịẹ ḅara;

¹¹ mie ḅụ arị anị sịkị tẹ minini tẹ mịnẹ kịnị tọrụ nimi-a jen sịẹ ḅẹ ḅẹrẹtọnḅọ anị ọkị ḅa. Ori nwẹnị anị sịn mẹ gbẹẹ ḅara kẹ anị na mịẹ ḅa anị ḅẹ si-sịḅịḅio gotẹ.

¹² Ọkụrụkụrụ nyana kịnị pịrị-pịrị-a kịnị tọrụ nimi-a jen sịẹ ḅẹ apụ anị pẹlẹ-gbin tẹ koroma-so ḅa. Anị ḅẹ aḅara ma na anyị tẹ ịkpangị ma na tụndụ ọgọnọ goyegoye na tụndụ-suku goyegoye ḅụ sara sime ḅa. Sịẹ-sịẹ mamgba tẹ anị suku-ḅio sịḅị kikima tẹ anga sime apụ mamgba mẹnjị so ḅa.

¹³ Feni amẹẹ ma ḅo tẹ ḅịkị tẹ sịn mẹ ọgọnọ sịẹ ḅa, tẹ piri-ḅio-ḅẹ anama anị aḅara ọgọnọ mẹnjị-mẹnjị ḅọrọ ḅa.

¹⁴ Tẹ anie ḅụ, mịọkụ saakị tọrọkọ mu, gbọrụ sịn sọ anị minji nyana ḅara-ḅara sọ, ḅarị jen kẹ anị ḅara kẹ so-paka tẹ gele fa mu oḅuto ḅọrọ mu gele ḅara mẹ kọn ḅịa. Arịmgba fịị sime arị pịrịm, fịị-fịị tomḅọ ḅara mẹ, fịị sime pịrị tẹ fịtẹ-apụ ḅụ sọ tẹ fịtẹ-apụ tomikiri anga.”

¹⁵ Mie Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḍukoarị ye: Sịn mẹ ḍuḅu ḅio muarị eneḅaka mẹ ḅụ, à mịẹ tẹ kiri suku ḅio simearị minji mẹ anị gbaịn ḅa, anie kururuarị elekima mẹ. À tọrụ ma ọlọ-sịẹma tẹ mẹnjị-mẹnjị pakarị ewere ma ḅarị mẹnjị ḅịa. Sịn mẹ fịị tẹ ẹrẹsị, à kanakana ọkị-ḅo Lẹbanọnị Tụndụ ma gbaịn ḅa, tẹ opu piri mẹ ḅẹ asịn mamgba kpatụ fịị ḅa.

¹⁶ Arị anị kẹ iderima ḍuḅu mẹ fịrịma sakị, anị ḅẹ ḅịkị mẹ ḅẹ fie sịẹ-sịẹ ma jikema ḅa. Ideni ḍụọ mẹ ḅẹ asịn mamgba na Lẹbanọnị ḅụ iḅitẹịn tẹ minji la lama tẹ asịn ma tẹ ideri fịtẹ-apụ tomikiri mẹ mu tẹ aị ma anị ḅẹ ḅịkị mẹ ḅẹ ḅioḅẹlẹ kọn ḅa.

¹⁷ Arị anị na mu ḍuḅu mẹ ḅụ osi apụ ma tẹ tarị ḅịkị tẹ apụ ḅụ sọ ḅa. Tẹ anị ḅẹ kpiti ḅio angarị apụ mamgba ini ịn gala-galama ḅa sịẹ-sịẹ ma ogboku mu ḅụ.

¹⁸ “Sịn mẹ anie Ijiputi ḅẹ amadaḅọ ḅe na ori atomi na, Ideni ḍụọ ḅio ḅẹ asịn ma sọ anị sịn mẹ gele tẹ tọrụ-gbẹ ḅara sime-ḅara sime-a. Kụma mịọkụ, arị Ideni ḍụọ ḅẹ asịn ma kịka tẹ ideri koro mu fịtẹ-apụ ma ḅụ sọ tẹ Tamụnọ-nimi-a tẹ ọmụ ḅio fịị apụ ma ḅụ sọ ḅa. Yẹrị ḍuko tẹẹ,” Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ọkọ ḅarị.