Izikẹlị 28 - FỊAFỊA BAỊBỤLỤ

Koro Taya Ọgọnọ Gbana Ịkịan

¹ KỊNỊNYANAḄỌ ḅe ẹkwẹn ị̀ pịrịm.

² Ori mẹẹ, “Fịị-fịị tomḅọ, yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḍuko ị̀ pịrịarị ye mẹ ḍuko Taya ḅẹ ḅẹrẹtọnḅọ ḅe pịrịị: ‘opu-amịẹaị fẹrụ kịka tẹ í ḅio ḅin tẹ ị́ ọkịarị mịnẹ ị́yẹrị tamụnọọ. Ị́ ḅẹẹarị mịnẹ ẹkẹkẹ-tamụnọ ḅara ḅụ í í emine ọgọnọ yaụ-sime wararị, abajị ma nwẹnị í ikelema wararị. Ẹbịsịya í inetẹ ẹkẹkẹ-tamụnọ ḅara kẹ ḅiotọn ḅa, kụma, ẹn-ẹn, ị́yẹrị fịị-fịị tomḅọọ, ị́ ẹkẹkẹ-tamụnọ ḅara sime-a.

³ Í kuromarị í ye-nimi Danẹlị nẹngịm, mịẹ tẹ gberie-sọ inetẹ ị́ ḅụụ ḅụ ḅọịye sọ ḅịa ḅara.

⁴ Í nimi na ḅara-ḍịn na ị́ mịẹ tẹ í golu na seleḅa na ngọ-kọn sara tẹ kẹ ḅụụ-wẹrịmam.

⁵ Ị́ ḅụụ-sarasara tẹ aka kẹ tuḅokọn tẹ sọye-sọye-sọye mịẹm. Ị́ kpọma ị́ kọn sara aị ma kẹ ḅụụ-tọn-arị ḅara ḍiki!’ ”

⁶ “Anịtẹso mịọkụ, mie yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḍuko ye: í kuromarị ị́ ẹkẹkẹ-tamụnọ ye-nimi ḅara kẹ ye-nimi wararị ẹrẹsị,

⁷ à si kẹ ị́ tọn-arị tẹ guda-guda ḅara kẹ kịnị na mịẹarị apụ ọkị-ḅo tẹ ini owu kẹ ị́ paka ḅa. Ị́ ị́ aka na nimi na kẹ nyanaḅọ aị mamgba in guluguluma fama ḅa.

⁸ Ini ị́ ḅaa tẹ ị́ kẹ minji-minji ḍuḅu fịrịma ḅa.

⁹ In ḅo ị́ ḅaa ḅarị sakị mẹ sọ ị́ paa ọkị ḅẹ mịnẹ tamụnọọ? Ị́ tọrụ kẹ ị́ ḅaa ḅẹ apụ ma na dama-dama sakị ị́ fịị-fịị tomḅọ sọ ḅa, ḅọkọ-ḅọkọ mamgba ḅụ ị́ tamụnọ ḅara sime ḅịa.

¹⁰ Í obiri fịị ḅara fịị ḅa tamụnọ nimi-a jen sịẹ ḅẹ apụ ḅara-ḅio ḅụ. Yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ọkọ tọnm.”

Taya Ḅẹ Amadaḅọ Ḅe Ḅịkị Tẹẹ

¹¹ KỊNỊNYANAḄỌ ḅe siin ẹkwẹn ị̀ pịrịm.

¹² Ori mẹẹ, “Fịị-fịị tomḅọ, Taya ḅẹ amadaḅọ ḅe ḅụụ paka ḅẹ tẹ ò koruarị ye mẹ gotẹ kururuu. Ḍuko ọ̀ pịrịị mịnẹ yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḅẹẹm: sakị ḅẹ gbọrụ sakị ḅụ ị́yẹrị anie ye kẹ tọnma ḅẹ kpaịn famatẹ ḅara sime-ḅọ. Ị́ kpọma ye-nimi tẹ pịkị tọrụ-gbẹm!

¹³ Ideni, Tamụnọ Ḍụọ mẹ ḅio ị́ angam, tẹ yela-aị goyegoye ḅirim: awụ tọrụ sụa aị na, damịnị na, tọpazị na, bẹrịlị na, kanẹlịyanị na, jasịpa na; safahasị na, ẹmịralidisi na, ganẹtisi na. Í golu ḅiriaị nyanam. Ịn ị́ tẹmẹ ene ḅụ ini arị mịẹ ị́ pịrịm.

¹⁴ À ḅalafama enjẹlị tọn koroma tẹ arị í ḍikiḍikim anịanga ḅụ. Ị́ ị̀ fịafịa tụndụ ọgọnọ anga tẹ ḅịya tọrụngbọ ḅio sọarị yela aḍụḅarị ma ogboku mẹnjịm.

¹⁵ Ị́ ḍumo kọn ḅara kpaịnm ị́ tẹmẹ eneḅaka ḅụ ọkị-ḅo ị́ saakị si mịẹ ene lam.

¹⁶ Ị́ ị́ ḅụụ kọsịm fẹ na dẹrị na ḅụ, tẹ miemẹ í dogi-mu kụrọ-kụrọ amịẹaị na si na ḅio suum. Mie ḅụ à kụrọ-ḅara kẹ ị́ ḍikiḍiki sime enjẹlị ḅe í dee siin ḅịya tọrụngbọ ḅio sọarị aḍụḅarị ma sime anga ḅụ.

¹⁷ Ị́ ḅụụ-ḅẹlẹma ḅara sime ye mẹ ị́ anị kẹ ḅụụ-tọnm, tẹ ị́ ereso mẹ ị́ mịẹ tẹ í oḅori-ḅọ ḅara kẹ ye mịẹm. Miemẹ ẹrẹsị àrị í fuku kiri gbinm tẹ ị́ kẹ anịanga koroma tẹ í ḅeri nụnụ ye sọ osi amadapụ ma pịrịm.

¹⁸ Fẹ na dẹrị na ḅụ ị́ mịẹ siye sime ḅara gotẹ ị́ tẹkẹ ayọ ma ḅụrụ-kọsịm. Mie ḅụ à fịnị kẹ opu ama mẹ ḅụ sụa tẹ anị dọkịma ḅo kiri lamam. Mịọkụ tọrụ saakị í ḍikiarị apụ mamgba í ideri-ḅo fọọn la tẹ ḅara kẹ ị́ ẹrị ḅa.

¹⁹ Í so tẹẹ, í so gbamaso tẹẹ, tẹ sịẹ-sịẹ mamgba tẹ ḅo í nimi tẹ apụ mamgba tẹmẹ-naịn-naịn tẹẹ, ḅalafaarị mịnẹ ị́ ḅụụ paka ye mẹ ini sọ anị ḅụ ḍiekiri nyana ḅarị ḅoto.”

Koro Sayịdọnị Ọgọnọ gbana Ịkịan

²⁰ KỊNỊNYANAḄỌ ḅe ị̀ ḅẹẹm,

²¹ “Fịị-fịị tomḅọ, Sayịdọnị opu ama ḅụ paka ḅẹ si ye ḍuko pakama.

²² Ḍuko anịanga sime apụ ma pịrịị, Yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḍuko ịna ọgọnọ gbana ḅẹ-yearị ye mẹ: ‘Sayịdọnị, yẹrị ị́nịna fịya-a ḅọ sọ tẹẹ; à kẹ ị́ mịẹarị ye gotẹ tomi ì tokini ḅa. In nimi ḅa mịnẹ yẹrị anie KỊNỊNYANAḄỌ ḅe, à fịafịa tẹ kịrị ḅara kẹ in ḍie sakị, fomu-ḅara kẹ í ḅio angarị apụ ma pịrị ḅụ.

²³ Àrị obi kẹ ị́ fịrịma ḅa tẹ mịẹ tẹ ọmbie í etela ogbo ma ḅụ ogilolo puu ḅọrọ ḅa. Pakịrị-pakịrị ḅụ kịnị owu kẹ ị́ paka ḅa, tẹ ini ị́ atomi ḅaa ḅa. Anịtẹso í nimi ḅa mịnẹ yẹrị anie KỊNỊNYANAḄỌ ḅe.’ ”

Izirẹlị Bomatẹ Apụ Sọ Ḅa

²⁴ KỊNỊNYANAḄỌ ḅe nwẹnị ḅẹẹ, “Izirẹlị ikelema-koro wararị asịẹ ma tẹ ḍiki iderima ḅara kẹ Izirẹlị na mịẹarị apụ ma ḅẹ gberie-sọ ḅarị jen kẹ nangị na ọmị na kịka tẹ ye kẹ Izirẹlị lama ḅịa. Tẹ in nimi ḅa mịnẹ yẹrị anie Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe.”

²⁵ Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḅẹẹm, “Àrị Izirẹlịapụ ma kẹ pịkị ḅọ ḅa àrị ịn gala-galama mu asịẹ ma ḅụ, tẹ sịẹ-sịẹ mamgba nimi ḅa mịnẹ yẹrị anie fịafịa kịrị ḅọ ḅe. Izirẹlịapụ ma ịna ḅara-kuḅu ḅẹ amakiri ḅụ anga ḅa, à kẹ ị̀ fịrịmẹnjịḅọ Jekọbụ pịrị amakiri mẹ.

²⁶ Ini anị yọ ye-ḅụụ-la-a ḅara kẹ anga ḅa. Ịn warị nama-nama tẹ kụrọ aḍụọ-ḍụọ ḍiḅi ḅa. À fomu-ḅara kẹ ini na kpeki tẹ anga tẹ ḍiki-iderima ḅara kẹ ịn mịẹ apụ ma pịrị tẹ Izirẹlị ịn la-la ye ofori ḅara kẹ sime ḅa. Anịtẹso in nimi ḅa mịnẹ yẹrị anie KỊNỊNYANAḄỌ ịna Tamụnọ ḅe.”