Izikẹlị 27 - FỊAFỊA BAỊBỤLỤ

Sime Taya pịrị Ḍụẹịn ḍiḅi Nume

¹ KỊNỊNYANAḄỌ ḅe ị̀ ḅẹẹm,

² Fịị-fịị tomḅọ, ḍụẹịn ḍiḅi nume-su Taya pịrị,

³ anie opu-tọrụ mẹ akaka simearị opu ama mẹ, tẹ minji suku goyegoye ḅụ angarị apụ ma na tuḅokọn-arị opu ama mẹ. Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḍukoarị ye ḍuko á pịrịị: Taya, ị́ kara-gbasịtẹ iḅi mẹ kẹ ḅụụ-bomam.

⁴ Í sime-yọ anie opu-tọrụ mẹ, Ị́ nama awarị ma ị́ mịẹ tẹ í iḅi arụ kịkarị;

⁵ Amọnị Tụndụ Ọgọnọ kẹ ḅo faha nwẹn-sịn opu sịn mẹ mie ịn kẹ anị ḅẹ sukutarị opu ḍụḅọ mịẹ ye tẹ Lẹbanọnị ḅụ ḅo sida sịn-arị kẹ ị́ sịkaka mịẹ.

⁶ Basani ḅụ ini oku nwẹn-sịn asịn ọkị-ḅo tẹ kẹ ḅekina-ajụẹịn karam; Ịn kẹ ị́ dẹkị ịkasị ye Sayịpụrọsị ḅụ ḅo payịnị-sịn, Tẹ ịn nwẹnị ọdụ kẹ anị dẹẹ.

⁷ Ị́ avala ma ferefere pịna-pịna ḅịtẹ mie ịn kẹ gbin yee, Ijiputi ḅụ ḅo ḅirima-aị ḍori sụa wararị ferefere pịna-pịna ḅịtẹ, Ala-jụ kịnị sarama lekiri ḅarị ye. Ị́ arụ-kuḅu ḅẹ tọrọkọ gbaịn isun mẹ, iḅitẹịn ḅịtẹ anie ịn kẹ arị mịẹ yee, awụ tọrụ sụa ye tẹ Sayịpụrọsị asọ ḅụ ḅo ye.

⁸ Ị́ aḅekin-jụẹịn dọkụapụ Sayịdọnị na Avadi na opu ama ma ḅụ ḅom. Í soku-ḅẹ ḅara-ḍịn apụ ma anie tọrụ-dọkụapụ ma.

⁹ Arụ ma akanịapụ ma Ịn kpọma ye kẹ toluma tẹ apụ tẹ Bibilọsị ḅụ ḅo apụ. Tọrụ pakarị arụ goyegoye ḅụ tọrụ-dọkụapụ ḅo-ḅo tẹ Ị́ sọpụ ḅio tuḅokọn-aị fẹm.

¹⁰ Pasịya, Lidiya, na Libiya na ḅụ ḅo ọmụapụ ị́ ọmụ-ogbo ḅio fịrịmẹnjịm. Ị́ ọmụapụ sime-ayọ ma ḅụ ini ịna ekpeke ma na ịna okpoko-asun ma na kẹ sololom. Ini ma anie ebube nyana ḅo ị́ pịrị atomi ma.

¹¹ Avadi ḅụ ḅo ọmụapụ í onu ma ḍikiḍikim, Gamadi ḅụ ḅo owiapụ ị́ atawa ma ḍikiḍikim. Ini ịna ekpeke ma kẹ warị-anga sololom. Ini ma anie ị́ mịẹ tẹ í iḅi atomi ma.

¹² Í Sipeni na tuḅokọnm tẹ seleḅa, ikulele, tini, na lẹjị na ọkị-ḅom, kẹ ị́ tọnwa ngọ ma gbẹẹ ḅụ.

¹³ Í Girisi, Tubalị na Mẹsẹkị na ḅụ tuḅokọn tẹ ị́ ngọ ma kẹ omoni ḍimam, pịkị ojo ngọ-ngọ sọ.

¹⁴ Ị́ ị́ya ngọ ma kẹ asụ na, ọmụgbin-asụ na, kụrọ-sịḅịsụa-asụ na tẹ Bẹtị-togama ḅụ ḅo aị ma na dẹrịm.

¹⁵ Rodisi ḅẹ apụ ị́ na tuḅokọnm; tọrụ-akaka ḅẹ amakiri ma ḅẹ apụ ọdụ na eboni aḍụḅọ na kẹ ị́ ngọ ma ḍimam.

¹⁶ Siriya ḅẹ apụ í tuḅoni-aị ma na í kiri ḅio paka-ḅo aị ma na fẹm. Ini nwẹnị emiralịdị aḍụḅarị na, ferefere pịna-pịna ḅịtẹ na, kịlalị na kpọma yela-lama aḍụḅarị na kẹ í tuḅoni-aị mamgba gbẹẹ.

¹⁷ Juda na Izirẹlị na witi mbịaka, ḅẹm, olivu-olo na kụnụaị na kẹ ị́ ngọ ma gbẹm.

¹⁸ Damasịkọsị, ị́ nyana kiri ḅio paka-ḅo tọnwa aị na opu tuḅoni ngọ ma na ẹrẹsị Helịbọnị na Zaha na ḅụ ḅo waịnị iru kẹ ị́ na tuḅokọnm.

¹⁹ Danị na Girisi na ḅẹ apụ mie í tuḅoni-aị ma ọkị-ḅo yee; ini ịn kẹ ye-tẹmẹ tẹ ikulele na, kasiya na, kalamusu na kẹ ị́ tọnwa tuḅoni-aị ma ḍimam.

²⁰ Dedanị ḅẹ apụ ịna asụ-ọgọnọ-lẹgị-ḅịtẹ kẹ ị́ ngọ ma ḍimam.

²¹ Arebịya apụ ma na Keda ḅẹ amakiri ḅẹ sịḅịdapụ na asambịrịma anana amẹẹ na ḍụḅa paka-ḅo tẹ anana amẹẹ na oḅori amẹẹ na kẹ í tuḅoni-aị ma gbẹm.

²² Sẹba na Rama na ḅẹ masịnịapụ opuma yela pọkọsụa-aị na golu na iḅitẹịn aị na kẹ ị́ ngọ ma ḍimam.

²³ Harani na Kane na Ideni na opu ama ma, Sida ḅẹ masịnịapụ ma na, Asọ na Kilimadi na opu ama ma — inimgba ị́ na tuḅokọnm.

²⁴ Ini opuma igbigi famarị ḅịtẹ na, awụ-tọrụ-sụa ḅịtẹ na, ḅirima aị ḍori aị nyana aị na, iḅima ḅịyarị kiri-dẹẹ-aị na iḅiọkụ parịtẹ ye-kpọaị na ḍigi na kẹ ị́ dẹrịm.

²⁵ Í tuḅoni ngọ ma tọnwa ḍụḅatẹịn arụ ogbo mie arị kẹ sịn paka ye. Ị́ kịkaye anie tọrụ-minji emi arụ Ikutẹ ngọ sịn ye.

²⁶ Í ḅekina-jụẹịn dọkụapụ ị́ kẹ mu abajị ogbo la sakị kiri kpeki-a anga ḅụ igwe-fẹrụ ị́ arụ mẹ puu tẹ anị ḅilemam.

²⁷ Í tuḅoni ngọ mamgba, Ị́ na mu sime arụ-asawọ mamgba, Ị́ arụ mẹ ḅẹ akanịapụ ma na tuḅoni aị ma, Ọmụḅọ goḅọ-goḅọ tẹ arụ mẹ ḅio sime-ḅọ Inimgba, inimgba minji ḅio fa-famam Ị́ arụ mẹ puu tẹ ḅile sakị.

²⁸ Minji ḅio fa sime ọmụapụ ma oloku ḅịḅị mẹ Fie mu pọkụ-ḅọkọ lam.

²⁹ Mịọkụ arụ goyegoye ḅụkụlọarị ḅọ ḅarị ofori, Tẹ tọrụ-dọkụḅọ goḅọ-goḅọ koro kiri ḅo tẹ.

³⁰ Inimgba í gotẹ ḍụẹịn ḍuu ḅara kẹ tẹmẹ akụ ḅụ kururuarị, Ịn fọọn ḍu ịna asịḅị sara tẹ fọọn ḅio mbelembelearị.

³¹ Ini í gotẹ sịḅị-sẹịn Tẹ akpa ḅiriarị. Ịna aḅioḅẹngbọ akụarị ini owuarị sakị.

³² Ịn ḍụẹịn owu nume-su ị́ pịrịarị: Tụḅọ Taya na pii-pii ḅẹẹ-ḅẹẹ, Taya tẹ mịọkụ abajị gbaịntẹ yaụ-sime wararị ḅọ ma?

³³ Ị́ amasịnị-apụ abajị saḅa-saḅa mu ja asịẹ la sakị, Ị́ sịẹ goyegoye ḅii aị kẹ ịn pịrị ḅinmam. Ị́ mịẹ tẹ amadapụ ye-kọnm Ị́ ngọ ma ḅụ ḅẹ aị ma ḅụ.

³⁴ Mịọkụ ị́ tọrụ mẹ ḅio fa tẹ koro-simearị; Í ḅile mu abajị owolo ma ḅio la tẹẹ. Ị́ dẹrị-aị ma na namakọrị ị́ pịrịarị apụ mamgba na Ị́ na ịmaịn-faa tẹẹ abajị mẹ ḅio.

³⁵ Tọrụ-akaka angarị ḅọ goḅọ-goḅọ ḅụụ-gbiripu tẹ ị́ ḅụ paka ye mẹ gotẹ. Ịna amadapụ ma kịngẹ sọ tẹmẹ-naịn-naịntẹ ḅalafa ịna fụḅara-ḅọkọ kẹẹ tẹ.

³⁶ Í so tẹ, ị́ gbọrsịḅị so tẹ, tẹ bebe tomikiri mẹ kana-koro ḅụ masịnịapụ ma tẹmẹ-naịn-naịntẹ ḅalafaarị mịnẹ ini ị́ ḅụ paka ḅẹ ye mẹ ḅụ kiri nyana ḅẹ ḅoto.