Izikẹlị 26 - FỊAFỊA BAỊBỤLỤ

Koro Taya ọgọnọ gbana Ịkịan

¹ Kịnị ma kun-so tẹ oyi gberie finji karama kụra mẹ, akalụ ḅụ tarị ene mẹ ḅụ KỊNỊNYANAḄỌ ḅe ẹkwẹn ị̀ pịrịm.

² Ori mẹẹ, “Fịị-fịị tomḅọ, miemẹ anie Taya opu ama mẹ ḅẹ apụ ma gotẹ ḅioḅẹlẹ kẹ sulearị. Ini olokuarị, ‘Jeruselemu gulugulu famatẹ! Á masịnịapụ kụrọ mẹ so tẹẹ! Á ḅarị jen kẹ jen-apụ na pii-pii ḅẹẹ ḅịa!’ ”

³ Mịọkụ ọkọ ẹrẹsị mie yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḅẹẹ ye: “Taya opu ama, yẹrị ị́ na fịya-a ḅọ sọ tẹẹ. À tọnwa asịẹ ọkị-ḅo tẹ ini owu kẹ ị́ paka ḅa, tẹ in ḅo ḅarị ḅara abajị ọnụngọ ḅakụ-ḅakụ sọ-ḅo-ḅo ḅara kịka ḅa.

⁴ Ini í onu ma kan guluguluma ḅa, pịkị ị́ atawa ma kan-sara ḅa. Anịtẹso à fọọn mẹmgba ọfịn siin tẹ keri-keri tẹ simearị ịkụ kịngẹ kọn ḅa.

⁵ Anị yọ anị abajị ogbo simearị anga mẹ ḅụ inji-ḅaapụ anị ọgọnọ ini ịgbọ ma iri ḅa. Yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ọkọ ḅẹẹm. Sịẹ-sịẹ ma Taya fọịn ḅa,

⁶ tẹ ịna okologie kẹ ịna ama ma tẹ kpongbo-kiri mẹ ḅụ simearị aị ma ḅio angarị apụ ma ḅaa ḅa. Anịtẹso Taya nimi ḅa mịnẹ yẹrị anie KỊNỊNYANAḄỌ ḅe.”

⁷ Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḅẹẹarị, “Àrị opu sọ tẹịn amadaḅọ — Babịlonịya ḅẹ Amadaḅọ Nebukadineza — ọkị-ḅo ḅẹ-yearị, ori owu kẹ Taya paka. Tomikiri mẹ ḅẹ ọgọnọ-jụ ò sime tẹ ḅo ḅa, ḅakatẹ ọmụ-ogbo na ori na, asụ na kirimẹnjị-ọmụarụ na asụ amẹẹ kẹ paka ọmụ muarị ogbo na sọ.

⁸ Kpongbo-kiri ḅẹ ama ma ḅio angarị apụ ma ini ịn ḅaa ḅa owu ḅio. Ị́ na fịya-a apụ ma nkọrọ soku-soku tẹ mkpu mịẹ-mịẹ tẹ onu nama tẹ kẹ í kiki ḅa.

⁹ Ini onu jine gbin-gbin ejimina amẹẹ kẹ ḅo onu ma jine gbin tẹ pịkị ikulele ikiḅa-ikiḅa kẹ ị́ atawa ma kan kiri ọgọnọ sara ḅa.

¹⁰ Ịna asụ ma mẹnjịarị tẹ fiin-saakịarị fọọn mẹ ị́ gbaịn ḅa oḅuto ọkụ. Ịna asụ ma tẹ yedogi-kirimẹnjị-arụ ma na kirimẹnjị-ọmụarụ ma na fọnọ-mẹnjịarị aị ma fiema ḅọrọ ḅarịye mẹ í onu ma jike ḅa, arị ị́ kan tẹ opu ama mẹ ogigo-aḅọkọ ma ḅụ ḅọrọ ḅarị sakị.

¹¹ Ịna ḅụ asụ kpọlị tẹ ọmụgbin-arị apụ ma ḍụrụkụ ma etela ma ḅụ ḅọrọ ḅa, ini ọkọ mịẹarị ini ị́ atomi ḅụ okologie sụka apụ ma ḅaarị. Í opu ḅeriaị ma in sukuruma kiri gbin ḅa.

¹² Ị́ na fịya-a apụ ma ị́ ngọ ma na ị́ tuḅoni aị ma na kẹ amịna ḅụụ gbẹẹ ḅa. Ini í onu ma nụnụ kiri gbin ḅa, pịkị í yela iḅi awarị ma kan guluguluma ḅa. Ini arịḅẹ aḍụḅarị ma na ḍụḅọ ma na tẹ anị ḅụ kan-sara aị mamgba na sọ ọkị mu abajị ḅio gbin suu ḅa.

¹³ À mịẹ tẹ ị́ anume mamgba kuno tẹ ị́ ọbọ ma ḅẹ anume ma yaụ-sime ḅa.

¹⁴ Papaa finji-sara wararị ịkụ mie à wẹrịso tẹ inji-ḅaapụ inetẹ anị ọgọnọ ịna ịgbọ iri ḅarịye. Kịnị ḅarị jen kẹ opu ama siin nama ḅịa. Yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ọkọ ḅẹẹm.”

¹⁵ Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe miemẹ nyana tẹ ḍuko Taya opu ama mẹ pịrịarị: “Ini ọmụ ḅụ ị́ nẹngịmarị sakị ịn pẹị ḅẹ anama ḅaa ḅara kẹ ḅaarị apụ ma kọn-arị oloku mẹ tọrụ-akaka mẹ ḅụ angarị apụ ma tẹmẹ-naịn-naịnma ḅa.

¹⁶ Tọrụ-dọkụ kẹ angarị asịẹ ḅẹ amadapụ mamgba ịna emine ma ọgọnọ koro ḅo ḅa. Ini ịna vọrọrọ-akapa na ịna ḅirima akapa na siin tẹ oju-sẹkịma kiri-ḅio lẹgị ḅa. Ini ị́ ḅụụ paka ḅarịye mẹ gotẹ tẹmẹ-naịn-naịn ḅarị ḅara mẹ mịẹ tẹ ịna oju-sẹkị pẹlẹ ḅịa.”

¹⁷ Ịn mị ḍụẹịn-owu-nume mẹ su ị́ pịrị ḅa: Eresoarị opu ama mẹ ini anị guluguluma tẹ! Tọrụ ma ḅụ simearị arụ mamgba ini ọfịn siin fama tẹẹ. Mị opu ama mẹ ḅẹ apụ ma tọrụ ma ḅụ ḅẹrẹtọn-tọnm, Tẹ tọrụ-akaka mẹ ḅụ anga apụ mamgba tẹmẹ-naịn-naịnmam.

¹⁸ Mịọkụ, anị ḅịkị tẹ eneḅaka mẹ ḅụ, Sọọ mamgba oju sẹkịarị, Tẹ ịna atomi ma ḅụụ-gbiripu tẹ nwẹn sime guluguluma mẹ ḅụ.

¹⁹ Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḅẹẹarị, “Àrị ị́ mịẹ tẹ ị́ papaa gbin koro-sime ḅa, tẹ fa-fama tẹ gbọrụḅọ-sọ anga-a opu ama ma kịka ḅa. Abajị pokolo mẹ ḅẹ opu aminji ma mie à kẹ ị́ gbaịn ḅarịye.

²⁰ Àrị ị́ kẹ ḍuḅu ḅio fịrịma tẹ í mu elemu asakị kụra-ḅio ḅụ fịị ḅọrọtẹ apụ ma ḅụ sọ ḅa. Àrị ị́ mịẹ tẹ í mu kiri suku-ḅio ḅẹ tomikiri mẹ ḅụ sime ḅa sime-gbamaso gulugulu ogboku, ị́ nwẹnị fịtẹ-apụ ma ogbo sọ ḅa. Anị dogi-ḅo ḅarịye anie kịnị ḅarị jen kẹ í ḅio anga tẹ í í kiri ọkị ḅịa ḍumo wararị apụ ma amakiri mẹ ḅio.

²¹ Àrị ị́ kẹ tẹmẹ-naịn-naịnmarị elekima mịẹ ḅa, tẹ anie í kunoma sọ ḅa. Ẹbịsịya kịnị ị́ ẹrị ḅẹ ḍọkị ḅa, kụma gbala-gbala ini ị́ ḍọkị ẹrị ḅịa.” Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ọkọ ḅẹẹm.