Izikẹlị 25 - FỊAFỊA BAỊBỤLỤ

Amọnị gboloma Ịkịan

¹ KỊNỊNYANAḄỌ ḅe ẹkwẹn ị̀ pịrịm.

² Ori mẹẹ, “Fịị-fịị tomḅọ, Amọnị bebe amakiri mẹ mịẹ si ḍuko anị ọgọnọ gbana.

³ Ḍuko ịn pịrị ịn yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḍukoarị ye pokii. Kịnị ị̀ Warị kẹ tọn-tọn-a ḅara wẹrịarị tẹ ini ẹrị ye mẹ ịna ḅụụ-ḅẹlẹ mẹ, ini Izirẹlị amakiri mẹ sima-kọsịma tẹ ini ẹrị ye mẹ, in Juda ḅẹ apụ kun-so jen sịẹ mu ye mẹ ẹrị ye mẹ.

⁴ Í ḅioḅẹlẹ mẹ ẹrẹsị, à wẹrịso tẹ ịrụa saakịarị anga ḅẹ ịkpa ḅẹ afuro ma ḅo ọmụ ḅụ ị́ nẹngịma ḅa. Ini ịna akpụrụ-awarị kẹ í bebe amakiri mẹ ḅụ nama tẹ anị yọ koro-sime ḅa. Í nye sọ na-iḅi sịn mgbọlụ mẹ na ndo-minji mẹ na ịn nwẹn fị ḅa tẹ pịkị ḅuu ḅa.

⁵ Raba opu ama mẹ àrị anị kẹ kamẹlị opu anama amẹẹ koko anga sọma ḅa, tẹ Amọnị bebe amakiri mẹ kẹ anana koko anga sọma ḅa, mịẹ tẹ ó nimi ḅarị ḅara mịnẹ yẹrị anie KỊNỊNYANAḄỌ ḅe.”

⁶ Mie Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḍukoarị ye: “Ị́ aḅara farị tẹ ḍereku kẹ ḍosim. Í Izirẹlị amakiri mẹ ḍiki-iderimam.

⁷ Ị́ mịẹm ẹrẹsị, àrị ị́ saḅama osi asịẹ ḅẹ apụ tẹ kụrọ-ḅara kẹ ị́ aị furu tẹ ị́ fọịn ḅẹ apụ pịrị ḅa. À ye kọnma-a ḅara kẹ í guluguluma tẹ ị́ ḅarị jen kẹ sịẹ ẹrẹ fị ḅịa, anịanịa ị́ ḅara-kuḅu ḅẹ bebe amakiri nyana. Anịtẹso í nimi ḅa mịnẹ yẹrị anie KỊNỊNYANAḄỌ ḅe.”

Koro Mohabụ ọgọnọ gbana Ịkịan

⁸ Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḅẹẹm, Mohabụ ḅẹẹ tẹ ẹrẹsị, mịnẹ Juda na osi asịẹ na gbọrụ ḅara,

⁹ à mịẹ tẹ kịnị owu kẹ bebe amakiri mẹ ḅụ á ḍụa-ḍụa opu ama ma paka ḅa, iḅi tẹịn opu ama ma kịngẹ sọ ḅọrọ ḅịa — Bẹtị-jẹsịmọtị, Balị-mehọni na, Kiriyatahịmu na.

¹⁰ À wẹrịso tẹ ịrụa-saakịarị-anga anga mẹ ḅẹ afuro ma Mohabụ nẹngịma ḅa ọmụ kiri ḅụ, Amọnị kẹ sụa, mịẹ tẹ Mohabụ ḅarị jen kẹ sịẹ ẹrẹ fị ḅịa ḅara.

¹¹ À fomu-ḅara kẹ Mohabụ pịrị ḅa tẹ in nimi ḅa mịnẹ yẹrị anie KỊNỊNYANAḄỌ ḅe.

Koro Idọmụ ọgọnọ gbana Ịkịan

¹² Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḅẹẹm, “Idọmụ ḅẹ apụ ma mbasị ḅara kẹ Juda ḅara gbẹẹfị ḅiim, tẹ anị gbẹẹfị mẹ fa-faa ḅẹrẹ-ḅarasii dogi-ḅo Idọmụ ọgọnọ gbana tẹ.

¹³ Mịọkụ à ḍuko wasamarị mịnẹ à fomu-ḅara kẹ Idọmụ pịrị ḅa tẹ tomḅọ goḅọ-goḅọ na nama goyegoye na ḅaa ḅa anịanga ḅụ. À mịẹ tẹ anị ḅarị kẹ mịẹ-mịẹ ofori anga sọ ḅa, Tẹmanị opu ama mẹ ḅụ ọkị mu Dedanị opu ama mẹ la, tẹ in tomi ma ḅaa ḅa ọmụ ḅio.

¹⁴ Ị̀ atomi Izirẹlị Idọmụ ọgọnọ gbẹẹfị ḅii ị̀ pịrị ḅa, tẹ mie ḅụ Idọmụ ì opu ịganị da tẹ anị sime-sime ḅara lekiri ḅa. Idọmụ ị̀ ịganị da fiearị ye nimi ḅa.” Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ọkọ ḅẹẹm.

Koro Filisiteni ọgọnọ gbana Ịkịan

¹⁵ Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḅẹẹm, “Filisiteniapụ mbasị gbẹẹfị fị tẹ ḅụọ-fa-ḅụọ-paka ḅụ ini na fịya-fịya-a apụ ma ọgọnọ tẹ ịna ḍiki-ḅioḅu ḅụ ịn ḅaa guluguluma tẹ.

¹⁶ Tẹ mie ḅụ à ḍuko-wasamarị mịnẹ arị owu kẹ Filisiteni paka tẹ ịn fama lịaị-lịaịma ḅa. Filisiteni ḅẹ lẹsẹrẹ-kiri mẹ ḅụ kirikọntẹ ḍumo wararị ḅọ goḅọ-goḅọ à guluguluma ḅa.

¹⁷ À kụrọma in fomu tẹ ḅintẹ ḅara kẹ ịna ọgọnọ gbẹẹfị fị ḅa. Ị̀ ịganị ini ịnọ ḅa. Anịtẹso in nimi ḅa mịnẹ yẹrị anie KỊNỊNYANAḄỌ ḅe.”