Izikẹlị 24 - FỊAFỊA BAỊBỤLỤ

Asarị-sọ tẹ Fịye-sọ Ḅẹlẹ Mẹ

¹ Ịn wa kun-so tẹ eseni karama kụra mẹ ḅẹ oyi karama akalụ mẹ ḅẹ oyia aḍin karama eneḅaka mẹ ḅụ, KỊNỊNYANAḄỌ ḅe ẹkwẹn ị̀ pịrịm.

² Ori mẹẹ: Fịị-fịị tomḅọ, mịmgba ḅẹ eneḅaka mẹ kẹ ḍiri ḅio ḅụ kẹ koroma, mịẹ eneḅaka mẹ anie Babịlonịya ḅẹ amadaḅọ ḅe Jeruselemu ọkị ḅẹ ẹrẹsị saakị anị ikelema-koroarị ene mẹ.

³ Mị egberima-ẹkwẹn mẹ tẹ yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe nyana ị̀ kọngọ-kụrọma atomi pịrị ye mẹ ḍuko ịn pịrịị: ḅẹlẹ mẹ kẹ ọpọ mẹ ḅio sịẹma tẹ minji kẹ anị ḅio sụa ḅinmaa.

⁴ Iḅitẹịn keni tẹ nama kẹ anị ḅio sụaa, apana ma na ḅụọ ma na iḅitẹịn tẹ sẹlẹ pakama-ḅo mgbe ma sọ kẹ sụa ḅinmaa.

⁵ Iḅitẹịn anana nama kẹ sọọ; ḅẹlẹ mẹ suku-ḅio pakịrị tan gbori. Yee minji mẹ ḍarị; mgbe ma na meni ma na sọọ.

⁶ Mie Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḍukoarị ye: “Kịnị-ḅaapụ opu ama mẹ ḅẹrẹ fa tẹẹ! Anị kịkarị ye anie asarị-sọ tẹ ḅẹlẹ tẹ gbala-gbala amụ ịn kụrọrọ fịafịama-a ye. Nama mẹ pakịrị-pakịrị ma in ḍuu pakama-ḅo tẹ, gberie-sọ kọnma ḅara.

⁷ Kịnị-ḅa opu ama mẹ ḅio simem, kụma ọmbie mẹ ịn lịka kiri ọgọnọ ọsụma-a, anie fọọn inetẹ anị gbaịn ḅẹ anga; papaa ịkụ ọgọnọ mie anị sara ye.

⁸ À wẹrịso tẹ ọmbie mẹ anịanga simem, anie anị kikima ḅịa anga mẹ, anie anị ịganị gbẹẹfị ḅiiarị anga mẹ.”

⁹ Mie Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḍukoarị ye: “Kịnị-ḅaapụ opu ama mẹ ḅẹrẹ fa tẹẹ! Yẹrị ḅarana pakịrị ma tan kpolima ḅa.

¹⁰ Ja fịnị ikiḅa-ikiḅa ọkị-ḅoo! Fịnị mẹ fẹngụ kọrịmaa. Nama mẹ sọọ! Fiko mẹ ḍarịma siin! Mgbe ma dọkịma!

¹¹ Mịọkụ ojo kẹ mịẹ ḅẹlẹ mẹ kẹ ye anị ḅio ofori ḅara kẹ kọrịarị anyịmgbọ ma ọgọnọ sịẹma tẹ anị wẹrịso tẹ anị ọfịrị nwenii tẹ anyịmgbọ ḅịya ḅara ḅịya. Anịtẹso ḅẹlẹ mẹ ḅo kẹ Tamụnọ mịẹ-mịẹ ḅẹ ḅara kẹ kpaịn ḅa anị ḅẹ asarị mẹ dọkị so fama sakị,

¹² karakaraye anị ḅẹ asarị mẹmgba so fama ḅịa sọ kọrị-fịnị mẹ ḅio.

¹³ Jeruselemu, ị́ kọn sẹfị si mẹ í pilema tẹẹ. Tụkụmaye àrị ị́ kpaịnma ḅẹ mịẹm sọ ị́ paa pile tẹ simearị. Ị́ ḅarị jen kẹ kpaịn ḅịa nwenii ị́ ị̀ ịganị ḅẹ kụrọ laa ḅiri laa ḅiri da sakị la ḅa.

¹⁴ Yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ẹkwẹn tẹẹ. À ye mịẹ ḅẹ sakị mẹ ḅo laa tẹẹ. Àrị ọmịna asi ma kẹ ẹrị-a mị ḅịa, anịanịa ḍiki-tọrụ-kụrụkụrụ ḍie anịanịa ọkụrụkụrụ nyana. Ó fomu-ḅara da ḅa ọ́ mịẹ tẹ ye ẹrẹsị.” Tẹịn ḅẹrẹtọn kụrọ nyana KỊNỊNYANAḄỌ ḅe ẹkwẹn tẹẹ.

Ịkịankoroḅọ ḅe Ta Fịị Mẹ

¹⁵ KỊNỊNYANAḄỌ ḅe ẹkwẹn ị̀ pịrịm.

¹⁶ Ori mẹẹ, “Fịị-fịị tomḅọ, gbọrụ ḅịḅị ḅụ arị ị́ ḅẹlẹma-tẹịn ḅọ mẹ ọkị-so ḅa. Ị́ mbụrụmbụrụ ḅịa, anịanịa owu, anịanịa owu-minji kịngẹ sọ ị́ atọrụngbọ sara.

¹⁷ Ḍụkụ tẹ kịnị ị́ simarị ye naa ma. Sịḅị finji tẹ mẹnjị ma, anịanịa papaa ḅụọ kẹ mẹnjị kẹ ị́ ḍụẹịn ḍuuarị ye ḅẹ elekima ḍie. Ị́ tọrụkuḅu gbaịn ma, anịanịa ḍụẹịn ḍuu apụ fị-fị fịye fị.”

¹⁸ Ene mẹ finjiarị-finjiarị à tomi ma na ẹkwẹn simem. Anị ene ḅẹ ḅoḅiri-so ḅụ ị̀ ta fịịm, tẹ anị ḅẹ ene-ḅaa ḅụ à nwẹnị KỊNỊNYANAḄỌ ḅe ḍuko ị̀ pịrịtẹ ḅara mịẹ.

¹⁹ Tomi ma ì gbelam, “Tiye ẹrẹsị ị́ mịẹ ḅara kẹ ye mịẹarị?”

²⁰ Mie ḅụ àrị ịn ḅẹẹm, “KỊNỊNYANAḄỌ ḅe ẹkwẹn tẹẹ ḍuko ị̀ pịrịm

²¹ Mị oku mẹ kẹ ọmịnị Izirẹlịapụ ma pịrị: Ọ́ Tamụnọ-warị mẹ ḅẹ ịnyọ mẹ kẹ ḅụụ-tọn-arị. Anị ḍikiḍiki tẹ mu-mu anị la ọ́ ḅụụ-ḅẹlẹarị, kụma KỊNỊNYANAḄỌ ḅe anị kẹ tọn-tọn-a ḅara wẹrị ḅẹ-yearị. Anịsakị ọmịna asambịrịma apụ ma tẹ warị-warị ḅụ Jeruselemu ḅụ kirikọn-apụ ini ịn ḅaa ḅa ọmụ ḅio.

²² Anịtẹso ọmịnị à mịẹ tẹ ye mẹ mịẹ ḅa. Ọmịnị ọmịna atọrụ gbaịn ḅịa anịanịa ḍụẹịn-ḍuu-apụ fị-fị fịye fị.

²³ Ọ́ sịḅị-finji anịanịa papaa-aḅụọ kẹ mẹnjị ḅịa anịanịa ḍụẹịn-ḍuu anịanịa owu. Ọmịna asi gotẹ ọ́ sịkịrị fa ḅa, tẹ ọmịnị iningi jụmọ-jụmọ pịrị ḅa.

²⁴ Anịtẹso àrị elekima sọ ọ́ pịrị ḅa ọmịnị à mịẹ tẹ ye goyegoye mịẹ ḅa. KỊNỊNYANAḄỌ ḅe ḅarị mịnẹ mie pakịrị sakị ó nimi ḅa mịnẹ ori anie Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe.”

²⁵ KỊNỊNYANAḄỌ ḅe ḅẹẹm, “Fịị-fịị tomḅọ, mịọkụ arị ịna ḅara kụrọtẹ Tamụnọ-warị mẹ ọkị-so ḅa anie ịna ḅụụ-tọn na ḍereku na mẹ, in ḍikiḍiki tẹ mu la-la ye mẹ. Tẹ arị ịna owiapụ awọmẹ na eremịna-awọmẹ na ọkị-so ḅa.

²⁶ Anị ene mẹ ḅụ, gbọrụḅọ ḅaa-guluguluma mẹ ḅio pụkọ-pakaḅo tẹ anị gbolomaye ḍuko ị́ pịrị ḅa.

²⁷ Anị gbọrụ ene mẹ ḅụ, í siin ẹkwẹn kụrọ mẹ tẹ ị́ fama ye mẹ nyana ḅa, tẹ ị́ ori na ẹkwẹn ḅa. Mị ḅọkọ ḅụ ị́ ḅọrọtẹ elekima sọ tomi ma pịrị ḅa, tẹ ịn nwẹnị nimi ḅa mịnẹ yẹrị anie KỊNỊNYANAḄỌ ḅẹ.”