Izikẹlị 23 - FỊAFỊA BAỊBỤLỤ

Si Mịẹarị Eremịna Mịnapụ Ma

¹ KỊNỊNYANAḄỌ ḅe ẹkwẹn ị̀ pịrịm.

² Ori mẹẹ, “Fịị-fịị tomḅọ, sakị ḅẹ gbọrụ sakị ḅụ maa eremịna mịnapụ simem.

³ Ịna iriawọ sakị ḅụ, ini Ijiputi ḅụ angarị ogbo ini owiapụ nimi tẹ ḅo ama-mẹnjị-ereme sọm.

⁴ Omongiḅọ ma ịn kẹ à sịn ye Ohola — árị á sịẹ Sameriya pịrịm, tẹ kalaḅọ ma ẹrẹ Oholiba — árị á sịẹ Jeruselemu pịrịm. Àrị ini maa apụ ma ịyam, tẹ ini awọ iyi ị̀ pịrịm.

⁵ Karakaraye á sime ị̀ pịrịm sọ, Ohola ma paa ama-mẹnjị-ẹrẹḅọ ḍumo mẹ kọnm, tẹ kpọma lẹlẹ á ḅẹlẹmapụ Asiriya ḅụ ḅọ apụ ma pịrịm.

⁶ Ini ma ọmụapụ tẹ awụ akapa ḅiri apụ, karakara tomi tẹ opu kiri la tẹ ọmụ-alapụ. Inimgba ḅụụ-ḅẹlẹma tẹ asụ amẹẹ kẹ paka ọmụ mu-mu ọmụ-alapụ famam.

⁷ Árị ma sime Asiriya ḅẹ ọmụ-alapụ mamgba pịrị ama-mẹnjị-ẹrẹḅọọ; á ḅụụ-ọlọ-a mẹ á dogi-mu tẹ arị ini na sọ tẹ sunsin Asiriya ḅẹ oru-afụḅara ma pịrị ḅụ á ḅụụ pilemam.

⁸ Ijiputi ḅụ á kọn sime ama-mẹnjị eremịna ḍumo mẹ á paa kọn tọrọkọ-tọrọkọ mum, anie árị árị owiḅọ nimi-a ḍumo mẹ ḅụ so anga mẹ. Árị ẹrẹḅọtụḅọ sakị kụra ḅio á saakị owiapụ na tii-tii-tiim, tẹ ini ama-mẹnjị-ẹrẹḅọ ḅara kẹ á mịẹm.

⁹ Mie ḅụ àrị á saḅama árị Asiriya ḅẹ ḅẹlẹmapụ pịrịm, anie á kpọma ḅii sime apụ ma.

¹⁰ Ini á paụma sịẹmam, nwẹnị kụrọ-ḅara kẹ árị owiapụ-awọmẹ na eremịna-awọmẹ na ọlọ, tẹso ini okologie kẹ á ḅaam. Anga-anga ḅụ ereme á ḅụụ paka ye mẹ ḍuko-ḍuko ama kanam.”

¹¹ “Árị mbịra Oholiba miemẹ ẹrịm sọ, á tọrụ ḅịya Ohola nye nẹngị tẹ á pịkị ama-mẹnjị eremịna ḍumo mẹ kọn á nẹngị lamam.

¹² Árị sọ lẹlẹ á ḅụụ ḅio ḅinm Asiriya ḅẹ opu atomi na ọmụ-alapụ na pịrịm — ḅịya lamarị ọmụ-ḅiriaị ḅiri ọmụapụ ma — pịkị asụ amẹẹ kẹ paka ọmụ mu-mu apụ na, anie ḅụụ-ḅẹlẹma ḅara sime asambịrịma owiapụ ma.

¹³ Àrị ẹrịm mịnẹ á gbọrsịḅị sii gulugulu tẹẹ, mịẹ tẹ maaịn karama ẹrẹḅọ-mịnaḅọ ma ḅo tarịḅọ ma si ḅara si tẹẹ.”

¹⁴ Kụma árị ama-mẹnjị eremịna ḍumo mẹ ḍọkị-mẹnjị tọrọkọ-tọrọkọ mum. Á Babịlonịya ḅẹ owiapụ sime-ḅara kịkaye tẹ ịn kẹ warị akaka ḅụ awụ kẹ kẹẹ wararị aị ẹrịm,

¹⁵ ḅiri-ponoaị kẹ ḅiri pono tẹ ịsịram lọkụ-lọkụarị ḅịtẹ-asun kẹ sịḅị sure apụ; inimgba Babịlonịya ḅẹ kirimẹnjị-ọmụarụ dọkụarị ọmụ-alapụ kịkam.

¹⁶ Árị ini ẹrị gbọrụ-kirikiri, lẹlẹ á ḅụụ ḅio sọ ḅin tẹ árị oku kẹ ịn fịrịmam Babịlonịya ḅụ.

¹⁷ Babịlonịya ḅẹ apụ ma árị na gboloma ḅẹ tẹ ḅom. Ịn kẹ árị na mịẹ tẹ á pilema la ḅara ḅụ in ḅo á sịḅị-ngụngụmam kunoma ḅụ.

¹⁸ Árị á ḅụụ finji-sara ama pịrị tẹ mịẹ tẹ ḅẹḅọ-ḅẹḅọ nimim mịnẹ árị ma anie ama-mẹnjị ḅụụ-kpọtẹ ẹrẹḅọọ. Á kẹ ị̀ ḅụụ-ngụngụma la ḅara anie arị mbịra ma sọ kẹ ị̀ ḅụụ sime-ḅara.

¹⁹ Á ḅo ama-mẹnjị-ẹrẹḅọ sọ la ḅara mẹ jene-jene amụ arị ọkọ la-a, á kala-sakị á mịẹ-mịẹ ḅara mẹ famam, árị Ijiputi ḅụ ama-mẹnjị eremịna ḍumo kọn-kọn sakị mẹ ḅụ.

²⁰ Owiapụ na gboloma á lẹlẹma la ḅara mịẹ tẹ arị amịna owiapụ aḅụụ ḍụḅa ḍụḅa ḅụratẹ owiapụ tẹ owi-asụ ịyọrọ na gboloma gotẹ lẹlẹ ḅara kịka ḅara kẹ lẹlẹarị owiapụ mie á ḍọkị ye.

²¹ (Oholiba, í ḅiim í siin Ijiputi ḅụ ị́ mịẹ ama-mẹnjị si mẹ mịẹ, anie owiapụ í ndo kpọmbị-kpọmbị tẹ ị́ ḅụụ-gboloa ḍumo mẹ ị́ ḅụ so anga mẹ.)

Tamụnọ Ḅẹrẹkọn Kala-mịnaḅọ Ma Ọgọnọ

²² “Mịọkụ ọkọ ẹrẹsị, Oholiba, mie yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe kẹ ị́ ḅẹẹarị ye naa. Arị ị́ ḅẹlẹmapụ ma ini ị́ pọkọ-tama tẹẹ, kụma àrị ịn mịẹ tẹ ini ịganị nyana ị́ pịrị ḅa, tẹ àrị ini ọkị-ḅo tẹ ini í gbori-ikelema ḅa.

²³ À Babịlonịya na Kalidiya na ḅẹ apụ mamgba ọkị-ḅo ḅa, Pẹkọdị na, Soha na, Koha na ḅụ ḅo owiapụ, pịkị Asiriya ḅẹ apụ mamgba na. Àrị arị ḅụụ-ḅẹlẹmarị asambịrịma karakara atomi ma na fịrịmẹnjị-opuapụ mamgba na kobiri ḅa, arị fịrịmẹnjị-opuapụ mamgba tẹ opu kiri la tẹ asụ kẹ paka ọmụ muarị ọmụapụ ma.

²⁴ Ini owu kẹ ị́ paka ḅa ọgọnọ-jụ da pakịrị anga mẹ ḅụ, opu ọmụ-ogbo kẹ ḅo ḅụ, na kirimẹnjị-ọmụarụ amẹẹ na ye dogi kirimẹnjị-arụ amẹẹ na sọ. Ịn ḅụụ-ḍụa ḅụ ekpeke na okpoko-asun na nyana wararị, ini í ikelema-koro ḅa. Àrị ị́ saḅama ịn pịrị ḅa tẹ ini ịna oloko ma ḍiki tẹ ị́ kọn ḅa.

²⁵ Àrị ịganị nyana ị́ pịrị wararị ẹrẹsị, àrị ịn wẹrịso tẹ ini ị́ na mịẹ ḅa ini ịganị ḅụ. Ini í nini na ị́ aḅeri na pẹlẹ-siin ḅa, tẹ ị́ awọmẹ ḅaa ḅa. Inn, ini ị́ ḅara í owiapụ-awọmẹ mamgba na eremịna-awọmẹ mamgba na ọkị tẹ ịn kẹ dọkịma ḅa ḍumo tọrụ ḅụ.

²⁶ Ini ị́ kapa kan siin tẹ í yela ḅụụ ḅiriaị ma ọkị ḅa.

²⁷ Ị́ lẹlẹ-lẹlẹ tẹ mịẹ tẹ sịḅị-ngụngụnma aị ma í Ijiputi ḅụ sime-sime sakị ḅụ, à dasịẹma ḅa. Ị́ ḅarị jen kẹ oru-afụḅara ḍiki ḅịa anịanịa jen kẹ Ijiputi kẹ ḅiokoroma.”

²⁸ Mie Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḍukoarị ye: “Àrị ị́ saḅama í ḍiki-ḅioḅuarị tẹ pịkị ị́ ḅụụ-ngụngụmarị apụ pịrị ḅa.

²⁹ Tẹ ini í ḍiki-ḅioḅuarị ẹrẹsị, ini ị́ namakọrị tẹ nyana-ye nyana-ye ọkị-so tẹ ị́ paụma koroma ḅa, gbala ama-mẹnjị-ẹrẹḅọ paụ-sara ḅara. Ị́ lẹlẹ na ị́ ama-mẹnjị ḍumo na mie dogi-ḅo ị́ ọgọnọ gbanatẹ.

³⁰ Ị́yẹrị anie sịẹ-sịẹ ma ama-mẹnjị-ẹrẹḅọọ, tẹ ịna oru-afụḅara ma kẹ ị́ ḅụụ pilematẹ.

³¹ Ị́ mbịra aḅụọ sịẹ tẹ so kiri mie í ḍukamẹnjị ye, tẹ mie ḅụ sọ gbọrụ fomu-ḅara kọpụ mẹ ḅio ḅuu ḅa.”

³² Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḅarị, “Ị́ ị́ mbịra kọpụ ḅio ḅuu ḅa; anị ḍụḅa tẹ pokolo wararị. Ḅẹḅọ-ḅẹḅọ í ḍiki-sima tẹ í kombo ḅa; kọpụ mẹ ḅin wararị.

³³ Anị ị́ kẹ sịḅị-jịrịma ḅara wẹrị tẹ iru ị́ tọrụ ḅaa ḅa, anị ḅalafa na gulugulu na kọpụ mẹ, ị́ mbịra Sameriya kọpụ mẹ.

³⁴ Ị́ anị ḅuu samụnọma ḅa, anị ḅụ fịị kọsị tẹ pakịrị-pakịrị ma kẹ í ekpe kanị-kọsịma ḅa. Yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ọkọ ḅẹẹm.”

³⁵ Mịọkụ mie Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḅẹẹ ye: “ị́ ị̀ kẹ ḅioḅọrọma tẹ ọḅụ kẹ ì gbin ye ẹrẹsị, ị́ ị́ lẹlẹ na ị́ ama-mẹnjị eremịna ḍumo na gotẹ tọrụsiẹrị ḅa.”

Tamụnọ Ḅẹrẹkọn Maa Eremịna-mịnapụ Ma Ọgọnọ Gbanam

³⁶ KỊNỊNYANAḄỌ ḅe ị̀ ḅẹẹm, “Fịị-fịị tomḅọ, ị́ tẹlẹma tẹ, Ohola na Oholiba na kọn? Ịn mịẹ tẹ sịḅị-ngụngụnma aị ma ḍuko ịna sịḅị-sẹịn.

³⁷ Ịn sẹfị tẹ pịkị kịnị ḅaa tẹ — ịn sẹfịm in sunsin oru-afụḅara pịrị ye ḅụ tẹ kịnị ḅaam ini ini iyi ị̀ owiapụ-awọmẹ ḅaa ye ḅụ. Ini ị̀ owiapụ-awọmẹ kẹ agbamịẹ ịna oru-afụḅara pịrịm.

³⁸ Tẹ anie kịngẹ-a. Ini ị̀ Warị kẹ tọn-tọn ḅara wẹrị-a tẹ pịkị ị̀ Ịnyọsara-Ene mẹ ḅẹ oloko mẹ kanm, anie yẹrị ḅarana kẹ ọrụtọn wẹrịtẹ ye mẹ.

³⁹ Anị gbọrụ ene mẹ tẹ ini ị̀ awọmẹ kẹ agbamịẹ ḅẹ tẹ ḅaa ene mẹ ḅụ, in ḅo ị̀ Warị la tẹ anị kẹ tọn-tọn-a ḅara wẹrịm!”

⁴⁰ “Sakị-sakị ḅụ ini oku kẹ ala-jụ owiapụ fịrịmam in ḅo, tẹ owiapụ ma ḅom. Eremịna maa mịnapụ ma minji-ḅiri tẹ ye kẹ amịna atọrụ-anjị ḅọrọma tẹ ye-ḅiri ḅụlụ-ḅụlụmam.

⁴¹ Ịn nwẹnị iḅitẹ lẹgịye ọgọnọ lẹgị, dẹbịlẹ kẹ ịna tọrọkọ koroma, kịrị-kịrị aị anị ọgọnọ sara simem, kụnụaị dọkịma ye na olivu olo na sọ, anie yẹrị kẹ ịn pịrị tẹ aị ma.

⁴² Kịnị inetẹ ye-bala-a gbiri-gbiri-gbiriarị inweni-ogbo fie ma ḅọrọarị ye na ḅa, ịkpa mẹ ḅio ini ọkị-ḅo inweni-ogbo. Ịn ḅarasụa aị kẹ ereme ma aḅara kọngọ sụam, pịkị iḅi-fịtẹ akịranị kẹ ịna asịḅị surem.

⁴³ Tẹ à nwẹnị ị̀ ḅụụ ḅẹ mịnẹ ịn sẹfị nwenii ịnyọ ḅụụ ḅụ fa tẹẹ ama-mẹnjị-ẹrẹḅọ kẹ ịna ḅiotọn ye mịẹarị.

⁴⁴ Ịn pịkịma arị ama-mẹnjị-ereme ma dama-mu-mu-mum. In siin Ohola na Oholiba na dama-mum, arị ama-mẹnjị si mịẹ ma ḅọrọarị ereme ma.

⁴⁵ Karakara mịẹarị owiapụ sẹfị na kịnị ḅaa na asi ḍuko ini ọgọnọ gbana ḅa ịn sẹfị mẹnjị kọn tẹ ọmbie pịkị ịna aḅara ọmbịma tẹ ẹrẹsị.”

⁴⁶ Mie Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḍukoarị ye: “Tomi ogbo kẹ ḅo ịna tẹmẹ-naịn-naịnma tẹ ịna aị fọịn.

⁴⁷ Yee tomi ogbo mẹ ḍụḅarị kẹ in gbin tẹ okologie kẹ owu kẹ ịn paka, ịna awọmẹ ḅaa, tẹ ịna awarị dọkịma.

⁴⁸ Bebe amakiri mẹ ḅụ à mịẹ tẹ owiapụ na ereme na kura-a ḅara kẹ gboloma si daasịẹ ḅa, ḅeri nụnụ ḅụ à ḍukoarị ẹrẹḅọ goḅọ-goḅọ ḅarị sẹfị ma ịn mịẹ tẹ ḅara mẹ.

⁴⁹ Tẹ ọmịnị maa mịnapụ ereme ma — à fomu-ḅara kẹ ọ́ pịrị ḅa ọ́ mịẹ tẹ kura-a ḅara kẹ owiapụ na gboloma si mẹ na sunsin oru-afụḅara pịrị si mẹ na gotẹ. Anịtẹso ó nimi ḅa mịnẹ yẹrị anie Tẹịn-Ḅẹrẹtọn-Kụrọ-Nyana KỊNỊNYANAḄỌ ḅẹẹ.”