Izikẹlị 22 - FỊAFỊA BAỊBỤLỤ

Jeruselemu Si-amịẹaị ma

¹ KỊNỊNYANAḄỌ ḅe ẹkwẹn ị̀ pịrịm.

² Ori mẹẹ, “Fịị-fịị tomḅọ, ị́ tẹlẹma tẹ kịnị-ḅaapụ ḅin wararị opu ama mẹ kọn ḅẹ tẹ? Á mịẹ tẹ sịḅị-ngụngụnmarị aị mamgba mịẹ banabanama á ḍiee.

³ Ḍuko opu ama mẹ pịrịị, yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḍukoarị ye mẹ: í kura-a ḅara kẹ ị́ atomi ma ḅụ tọnwa-tọnwa ḅẹ apụ ḅaa tẹ pịkị sunsin oru-afụḅara pịrị ḅụ ị́ ḅụụ pilematẹ ẹrẹsị, ị́ sakị ḅoarị.

⁴ Arị kịnị-ḅa aḅẹrẹ ma ị́ fịnama wararị, tẹ ị́ pịkị ḅarana mịẹ oru-afụḅara kẹ ị́ ḅụụ pilema wararị, anie ḅụ í eneḅaka ḅoarị, ị́ sakị la tẹ! Anie mie à gotẹ sịẹ-sịẹ ma wẹrịso tẹ ini í kombo tẹ ama kịrị-kịrị mamgba nini-suku sụa ị́ pịrịarị ye.

⁵ Ama kịrị-kịrị ma tẹ kpeki wararị aị na ama kịrị-kịrị ma tẹ ḅele fa wararị aị na nini-suku sụa ị́ pịrịarị, ị́ oloko koko-koko-a ẹrẹsị.

⁶ Izirẹlị sịḅịdapụ mamgba ịna soku-ḅẹ ịnyọ kẹ ḅiokpọmarị tẹ kura-a ḅara kẹ kịnị ḅaarị.

⁷ Opu ama mẹ ḅio emi tẹ amịna ḍaḅọ-na-iyingiḅọ-na kụn-arị ḅọ ofori. Ọ́ tọrụ-nimi-a jen asịẹ ḅẹ apụ mingirimarị, pịkị diapụ-fịtẹ-ereme na ḍapụ-na-iyingiapụ-na fịtẹ awọmẹ ma sime-ḅara gotẹ ọmịna ḅiotọn ḅara kẹ ini na mịẹarị.

⁸ Ọ́ mangịma nyana fịafịa ayọ ma pịrị-a, ọ́ pịkị Ịnyọsara-Ene mẹ koko-a.

⁹ Ọmịna ḅụ ḅẹ jen-apụ osi apụ ḅụ iruo aị ḍukoarị ini ịn ḅaa ḅarị ḅara. Ịna ḅụ ḅẹ jen-apụ kẹ agbamịẹ oru-afụḅara pịrịtẹ fịye fịarị. Japụ sakị mamgba ịn lẹlẹ pịrị ye mịẹ mie ịna ḅụụ na-iḅiarị.

¹⁰ Ịna ḅụ ḅẹ jen-apụ ịna ḍaḅọ ta na tii-arị. Ịna ḅụ ḅẹ jen-apụ kụrọ-ḅara kẹ ereme ọlọ-ọlọ tẹ ini na gbolomarị ịn sakị-ẹrịarị sakị ḅụ.

¹¹ Japụ sẹfịarị, tẹ osi apụ ịna awọmẹ ereme anịanịa ini na gbọrụ ḍaḅọ anịanịa iyingiḅọ iyi eremịna-amịnapụ na tọn-tọnye mịẹarị.

¹² Ị́ atomi ma ḅẹ jen-apụ igbigi da ọkị-ọkị tẹ kịnị ḅaarị. Japụ ye gbanama tẹ igbigi kẹ kịnị ḅọlọarị tẹ ịna pembema Izirẹlịapụ kẹ ngọ kọn-arị. Ini ị̀ kẹ ḅioḅọrọma tẹẹ.” Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ọkọ ḅẹẹm.

¹³ “Àrị mgbụlụḅa sụa tẹ kẹ ị́ ḅakụ ḅa ị́ kụrọ-ḅara kẹ furu-furu-furuarị ye mẹ na kịnị-ḅaaḅa ye mẹ na gotẹ.

¹⁴ Í kuromarị ị́ paa tẹmẹ-kpọma, anịanịa ịnyọ nyana tẹ ị́ ḅara saakị ḅẹ àrị ị́ na mịẹ fama sakị? Yẹrị KỊNỊNYANAḄỌ ḅe ọkọ ḅẹẹm, tẹ à ḍuko tẹ ye mẹ à mịẹ ḅa.

¹⁵ Àrị ị́ atomi ma gala-galama mu bebe amakiri goyegoye na sịẹ goyegoye na la ḅa, tẹ í si-amịẹaị ma kuno ḅa.

¹⁶ Anị tẹso, osi asịẹ ma í ḍiki-sima ḅa, kụma í nimi ḅa mịnẹ yẹrị anie KỊNỊNYANAḄỌ ḅe.”

Tamụnọ Kẹ Ye Fọị Tẹlẹmarị Opu Fịnị Mẹ

¹⁷ KỊNỊNYANAḄỌ ḅe ị̀ ḅẹẹm,

¹⁸ “Fịị-fịị tomḅọ, àrị Izirẹlịapụ ma kẹ mịẹ-mịẹ gberie-sọ ofori. Ịn kịkarị aị anie kiri-ḅio soku pakama-ḅo aị tẹ ḅarị mịẹ ḅụ sọ-a aị kọpa, tini, ikulele na lẹjị na tẹ in seleḅa sanị ọkị tẹ kirikọn-aị opu ye fọị tẹlẹma fịnị mẹ ḅio.

¹⁹ Mịọkụ mie ḅụ, yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḍuko ịn pịrịarị mịnẹ anị gbọrụ ḅara mẹ mie ini sọ kẹ ye-mịẹ-mịẹye-ofori ḅara sime-ḅara. Àrị in kobiri ḅo gboloma ḅa Jeruselemu ḅụ

²⁰ anị gbọrụ ḅara mẹ tẹ ịn kẹ kiri ḅio paka-ḅo seleḅa, kọpa, ikulele, lẹjị, na tini na ye fọị tẹlẹma opu fịnị mẹ ḅio sụa-sụa ḅara. Ị̀ ịganị na owi-ịganị na ịn sanị ḅa kiri ḅio paka-ḅo ye sanị-sanị gbọrụ ḅara mẹ.

²¹ Inn, arị in kobiri ḅa Jeruselemu ḅio ḅụ, ịna suku ḅio fịnị-tọnọ, tẹ nwẹnị ị̀ ịganị kẹ ịn sanị.

²² Jeruselemu ḅio in sime tẹ sanị ḅa, anie ye fọị tẹlẹma opu fịnị ḅio seleḅa sanịarị gbọrụ ḅara mẹ, anị tẹso, in nimi ḅa mịnẹ KỊNỊNYANAḄỌ ḅe ịganị mẹ ịna ḅụụ ịnọarị.”

Izirẹlị ḅẹ Sịḅịdapụ Asi Ma

²³ KỊNỊNYANAḄỌ ḅe jen kẹ ẹkwẹn ị̀ pịrịm.

²⁴ Ori mẹẹ, “Fịị-fịị tomḅọ, ḍuko Izirẹlịapụ ma pịrị mịnẹ ịna amakiri fịafịa-a, tẹ anie ḅụ àrị in fomuarị ị̀ ịganị ḅụ.

²⁵ Sịḅịdapụ ma ọkụkụ amẹẹ kịkarị, anie ịn ḅaa tẹ anama gotẹ ekirearị aị. In tomi ma ḅaarị, ini inetẹ ọkị igbigi mamgba na ịn nyana jaị na, tẹ ịna kịnị-ḅa mẹ ḅụ tọnwa ereme kẹ diapụ-fịtẹ-ereme ḅara wẹrịarị.

²⁶ Agbamịẹapụ ma ì oloko kan-arị, tẹ kụn nyana fịafịa ye nwẹn-sịn ye pịrị-a. Ịn kịrị mịẹ-a tọn-tọnye na tọn-tọn-a ye na ogboku. Fịafịa ye na fịafịa-a ye na ḅẹ kịrị in toluma-a, ịn pịkị Ịnyọsara-Ene mẹ ḍiki-tọrụsin-arị. Ma ma dogi-ḅo ye anie Izirẹlịapụ ma ḅarị ị̀ mangịma-a.

²⁷ Kọnsịnị fịrịmẹnjị-opuapụ ma kịkarị aị anie anamakiri amẹẹ tẹ ịn ḅaa tẹ anama ma kanị-kanị-sararị aị. Ngọ-kọn mie ịn gotẹ kịnị ḅaa si mịẹarị ye.

²⁸ Ịkịankoroapụ ma mịna asi ma ḅọị tẹ tọrụ kẹ onu akaka ọmbị gbaịn ḅara. Papaa ịkịan-ịkịan mie ini ẹrịarị tẹ ofori aị kẹ tọrọkọ paka ḅẹ aị sọma tẹ ḍukoarị. Ini ọkịarị mịnẹ Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ẹkwẹn mie ịn kọn-arị ye, kụma yẹrị, KỊNỊNYANAḄỌ ḅe amụ ẹkwẹn ịn pịrị-a.

²⁹ Kọn-sara wararị apụ ma kịnị mingirimarị pịkị kụrọ-ḅara kẹ furuarị. In si ḅara kẹ igoin-apụ ma na mịẹarị, pịkị jen asịẹ ḅẹ apụ ma sime-ḅara mẹ ọkị tẹ kẹ ịna ḅiotọn-aị tọn-aị kẹ ịn mịẹarị.

³⁰ Àrị inetẹ onu nama ḅẹ ḅọ ḍọkịm, inetẹ onu mẹ ḅịkị anga ma ḅụ sịẹsime tẹ amakiri mẹ ḍụa ḅẹ ḅọ ị̀ ịganị anị guluguluma ḅẹ sakị, kụma à gbọrụḅọ-sọ ẹrị-a.

³¹ Mie ḅụ à kiki ofori ḅara kẹ ị̀ ịganị pịkị ịna ọgọnọ sara ḅa, tẹ fịnị kịka tẹ ịn dọkịma guluguluma ḅa.” Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ọkọ ḅẹẹm.