Izikẹlị 20 - FỊAFỊA BAỊBỤLỤ

Tamụnọ Tọn ye na Tomḅọ anị na Tụḅụrụarị ḅara na

¹ Miemẹ mịẹ sakị ịn wa kun-so tẹ sọnọma karama kụra mẹ ḅụ sọnọ karama akalụ mẹ ḅẹ oyi karama ene mẹ ḅụ. Izirẹlị ḅẹ sịḅịdapụ ma ḅẹ jen-apụ ye kẹ ị̀ na ḅịḅị-ọkịya ḅẹ ḅom KỊNỊNYANAḄỌ ḅe tọn ye mẹ gboloma ye, tẹ ịn nwẹnị ị̀ tọrọkọ lẹgị sime.

² Anịtẹso KỊNỊNYANAḄỌ ḅe ẹkwẹn ị̀ pịrịm,

³ Ori mẹẹ, “Fịị-fịị tomḅọ, ẹkwẹn mịna atomi ma pịrị tẹ ḍuko ịn pịrị mịnẹ yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḅẹẹm: Ó ḅo à tọn ye gbela ḅẹ ḅom, ọkọ-a? Piki-pikiye-ofori ḅara ḅụ, yẹrị anie ḍumo wararị Tamụnọ ḅee ẹrẹsị, à ḍụkụ tẹ ó gberie-sọ gbela ḅịa ị̀ ḅịḅị ḅụ. Yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ọkọ ḅẹẹm.”

⁴ “Fịị-fịị tomḅọ, ị́ tẹlẹma tẹ ḅẹrẹ-pẹlẹ ịna ọgọnọ gbana ḅẹ? Ọkọ ḅẹḅẹ anị ḅara mị. Ịna aḍapụ mịẹ sịḅị-ngụngụnma aị ma kẹ ịna ḅiokoroma.

⁵ À ḍuko-aị ye mẹ ḍuko ịn pịrị. Arị Izirẹlị sẹlẹ ọkị sakị à ye minini ịn pịrịm. Àrị ị̀ ḅụụ pakama in ḍiem Ijiputi ḅụ, tẹ ḍuko ịn pịrịm: Yẹrị anie KỊNỊNYANAḄỌ ọmịna Tamụnọ ḅe.

⁶ Anị ene mẹ ḅụ, à minini mịnẹ àrị ịn ọkị paka-so ḅa Ijiputi ḅụ, tẹ ịna tọrọkọ-sụn tẹ ịn kẹ mu à sẹlẹ ịn pịrịtẹ amakiri mẹ la ḅa, ḅụụ-ḅẹlẹmatẹ iḅiọkụma fịye so-pakamarị amakiri mẹ — kiri mamgba ḅụ iḅitẹịn amakiri mẹ.

⁷ À ḍuko ịn pịrịm ịn sịḅị-ngụngụnmarị oru-afụḅara ma tẹ ịn ḅẹlẹma-sime aị ma kẹ wakị ngumaa, tẹ ḅarị Ijiputi ḅẹ oru-atamụnọ ma kẹ ịna ḅụụ pilema ḅẹ wẹrịma, yẹrị anie KỊNỊNYANAḄỌ ịna Tamụnọ ḅe ẹrẹsị.

⁸ Kụma ini ị̀ na pikiya tẹ ḍụkụ tẹ ị̀ ḅịḅịpoki-a. Ịna sịḅị-ngụngụnma oru-afụḅara ma ịn kẹ wakị-nguma-a, anịanịa Ijiputi ḅẹ atamụnọ ma ḅụ ḅara-siin. À tẹlẹmam anịanga Ijiputi mẹ ḅụ ị̀ ịganị ḅẹ kụrọ laa ḅara laa ḅara kẹ ịna ọgọnọ sara tẹ anị ini ịnọ.

⁹ Kụma à mịẹ-a, aniemẹ ị̀ ẹrẹ sima ḅẹ sakị goyegoye, gbala ịn gbori tẹ ini na anga sime apụ ma ogboku ḅụ à ḍuko-pakama Izirẹlị pịrị tẹ mịnẹ à tọrọkọ-sụn tẹ ịn pakama-ḅo ḅẹm Ijiputi ḅio ḅụ.”

¹⁰ “Tẹ anie ḅụ à tọrọkọ tarị tẹ ịn pakama-ḅom Ijiputi ḅio ḅụ, tẹ ịn kẹ ịkpa mẹ ḅio sọ-mum.

¹¹ Àrị à tọn-koroma-aị ma kẹ ịn pịrịm, tẹ ì oloko ma kẹ in tolumam, anie ḍumo ọkị-ḅo arị poki tẹ mịẹ ḅọ mịẹ ḅọ pịrị-pịrị aị ma.

¹² Àrị Ịnyọsara-Ene mẹ koko kẹ àrị ini na fị ọḅọkụ mẹ ḅẹ elekima mịẹm, kẹ ịna ḅiokoroma mịnẹ yẹrị KỊNỊNYANAḄỌ ịn wẹrị ḅelema tẹ.

¹³ Kụma ịkpa mẹ ḅio kịngẹ sọ ini ị̀ na pikiam. Ini ì oloko ma kan tẹ à tọn-koroma-aị ma sịkịm, anie ḍumo ọkị-ḅo arị poki tẹ mịẹ ḅọ mịẹ ḅọ pịrị-pịrị aị ma. In ye-kọnma ḅara kẹ Ịnyọsara-Ene mẹ simam. À tẹlẹmam ịn mịẹ tẹ ini ị̀ ịganị mẹ kụrọ laa ḅara laa ḅara da anịanga ịkpa mẹ ḅio tẹ in guluguluma.

¹⁴ Kụma à mịẹ-a, anie anị ị̀ ẹrẹ sima ḅarị sakị goyegoye, sịẹ-sịẹ ma ogboku ḅụ anie àrị Ijiputi ḅio Izirẹlị tọrọkọ tarị tẹ ịn pakama-ḅoarị ye mẹ kẹ ị̀ ẹrị tẹ apụ ma.

¹⁵ Anie ḅụ à mininim ịkpa mẹ ḅio mịnẹ à ḅarị ịn kẹ mu à kẹ ịn pịrịtẹ amakiri mẹ la ḅịa, anị ḅụụ-ḅẹlẹmatẹ iḅiọkụma fịye so-pakamarị amakiri mẹ — kiri mamgba ḅụ iḅitẹịn ye mẹ.

¹⁶ À gotẹ ọkọ mịẹ ḅẹ tẹ minini ye ini à tọn-koroma-aị ma sịkị tẹ ẹrẹsị, ì oloko ma kan, Ịnyọsara-Ene mẹ sima sunsin oru-afụḅara pịrị mie ịn sẹlẹ ọkị ye.”

¹⁷ “Kụma anịsọ àrị in ḍiki sịḅị-kụrụkụrụm. À tọn-pẹlẹm àrị ịn ḅaa ḅịa ịkpa mẹ ḅio.

¹⁸ Anie nakara, àrị ịna ogboku ḅụ asambịrịma apụ ma ḅeri nụnụm. Ọmịnị ịna ama-anganga-aḅara ma ḍukamẹnjị ma anịanịa ịna oru-afụḅara ma kẹ ọmịna aḅụụ pilema ma.

¹⁹ Yẹrị anie KỊNỊNYANAḄỌ ọmịna Tamụnọ ḅe. Ọmịnị ì oloko ma na à tọn-koroma-aị ma na poki tẹ mị.

²⁰ Ọmịnị Ịnyọsara-Ene mẹ kẹ fịafịa ene sọma, mịẹ tẹ anị wa fị wararị ọḅọkụ mẹ ḅẹ elekima sọ ḅarị ḅara, tẹ kẹ ọmịna ḅiokoroma ḅa mịnẹ yẹrị anie KỊNỊNYANAḄỌ ọmịna Tamụnọ ḅe.”

²¹ Kụma anị ḅụọ ḅẹ apụ ma sọ ị̀ na pikiyam. Ini ì oloko ma kan tẹ à tọn-koroma-aị ma mịẹ-a, anie ḍumo ọkị-ḅo arị poki tẹ mịẹ ḅọ mịẹ ḅọ pịrị-pịrị aị ma. Ịn nwẹnị Ịnyọsara-Ene mẹ sima. À tẹlẹmam tẹ ị̀ ịganị kẹ ịna ọgọnọ sara ḅẹm ịkpa mẹ ḅio tẹ anị ḅẹ kụrọ mẹ ịna ḅụụ ịnọ tẹ inimgba ḅaa.

²² Kụma à mịẹ-a, anie ị̀ ẹrẹ sima ḅarị ẹrẹsị sịẹ-sịẹ ma ogboku, anie àrị Izirẹlị pakama-ḅoarị ye kẹ ị̀ ẹrị tẹ apụ Ijiputi ḅio ḅụ.

²³ Mie ḅụ à siin jen ye mininim ịkpa mẹ ḅio. À ye karị ḅara kẹ ḍukom àrị ịn gala-galama ḅa tomikiri mẹmgba ḅụ.

²⁴ À mie mịẹm ini à tọn-koroma-aị ma sịkịm ẹrẹsị, ì oloko ma kan, Ịnyọsara-Ene mẹ sima, pịkị sunsin ịna elemu-aḍapụ ma fịrịmẹnjị pịrị sime oru-afụḅara ma pịrị.

²⁵ Anịtẹso àrị iḅi-a oloko na tọn-koroma-aị na kẹ ịn pịrịm, anie ḍumo dogi-ḅoḅoa aị.

²⁶ Àrị ịn wẹrịso tẹ ini ịna soku-ḅẹ ḍiepịrị-aị kẹ ịna aḅụụ pilemam tẹ ịn wẹrịso tẹ ini ịna mgbe ma kẹ agbamịẹ. Mie kẹ fomu-ḅara kẹ ịn pịrị tẹ kẹ ịn ḍie mịnẹ yẹrị anie KỊNỊNYANAḄỌ ḅe.

²⁷ Mịọkụ ọkọ ẹrẹsị, fịị-fịị tomḅọ, yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḍukoarị ye mẹ ḍuko Izirẹlịapụ pịrịị. Mie jen ḅọkọ tẹ ịna aḍapụ ma kẹ ị̀ mịẹ-sima ye ḅioḅẹngbọ-kẹ-sịrẹrẹ-niḅi-a ḅara tẹ in sime ye mẹ ḅụ.

²⁸ Àrị ini ọkị-ḅo à minini ịn pịrị amakiri mẹ lamam. In gele atụndụ ma na ịwọ asịn ma na ẹrị sakị ini arịmgba ḅụ agba mịẹm. Ini ị̀ ịganịmam ịn mịẹ dọkịma-agba na iru ḍiepịrị-aị agba na tẹ ini ọkị-ḅo aị na ḅụ.

²⁹ À nwẹnị in gbela: Ma gele ayọ ma tẹ ó muarị ayọ ma ḅọrọ tọ-anga? Anie ḅụ Anịngẹ-kụraḅio ḅụ “Gele-Ayọ” mie ịn kẹ arị sịn ye.

³⁰ Mie ḅụ ḍuko Izirẹlịapụ ma pịrị yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḍukoarị ye mẹ: Tiye ẹrẹsị ọmịnị ọ́ mịẹ-a-so ḅịa ḅara kẹ ọmịna aḍapụ ma mị gbọrụ asi ma mịẹ-mịẹ tẹ mangị oru-afụḅara tẹkẹ ḍukarị?

³¹ Mịmgba mẹ sọ ọ́ paa gbọrụ ḍiepịrị-aị ma pịrịarị tẹ ọmịna aḅụụ pilemarị ọmịnị ọmịna awọmẹ kẹ fịnị ḅio dọkịmarị agbamịẹ mẹ ḅụ. Anị tẹso, ọmịnị Izirẹlịapụ ma tọrụ-gelegele ḅo à tọn ye tiye mọ gbelarị! Piki-pikiye-ofori ḅara ḅụ, yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe anie ḍumo wararị Tamụnọ ḅee ẹrẹsị, à ḍụkụ tẹ ó gberie-sọ gbela ḅịa.

³² Ọmịnị ọmịna ḅioḅẹngbọ ḅụ tọn-pẹlẹ tẹ mịnẹ ó ḅiiarị ọmịnị osi asịẹ ma kịka, jen asịẹ ḅẹ apụ ma kịka, tẹ sunsin sịn amẹẹ na ịkụ amẹẹ na pịrị. Kụma anie gbala-gbala paka ḅịa.

Tamụnọ Fomu-ḅara Pịrịtẹ Pịkị Si wẹrịso-som

³³ “Gbala-gbala piki-pikiye-ofori ḅara ḅụ, yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe anie ḍumo wararị Tamụnọ ḅee ẹrẹsị, àrị ọmịna aḅeri nụnụarị mịnẹ ị̀ ịganị mie à kẹ ḅẹrẹtọn ọ́ pịrị ḅarịye kụrọ-ḅara ḅụ, ị̀ opu kụrọ mamgba ḅụ.

³⁴ Àrị ị̀ kụrọ na ị̀ ịganị na kẹ ó ḍie ḅa, àrị ó kobiri gboloma tẹ ọ́ kẹ pịkị-ḅo ḅẹ sakị, ọ́ gala-gala mu la tẹ asịẹ mamgba ḅụ.

³⁵ Àrị ọmịnị ọkị-ḅo ‘Sịẹ-sịẹ ma Ịkpa’ ḅio suu ḅa, tẹ anie àrị ọmịna tọrọkọ ḅụ ọ́ mịẹ tẹ asi ma ḍuko ọmịna ọgọnọ gbana ḅa.

³⁶ Àrị ọmịna asi ḍuko ọmịna ọgọnọ gbana ḅa mịọkụ, à kẹ ọmịna aḍapụ mịẹ gbọrụ ḅara mẹ Sayịnayị Ịkpa mẹ ḅio ḅụ,” Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ọkọ ḍukoarị.

³⁷ “Àrị ọmịnị ọlọ kụrọma lama ḅa, tẹ mịẹ tẹ ọmịnị ị̀ ọḅọkụ mẹ poki tẹ koko ḅa.

³⁸ Ọmịna ogboku ḅụ à kọngọ-kụrọma tẹ si ḍumo kọn-arị apụ ma ọkị so ḅa. Mịọkụ ini angarị amakiri ma ḅụ ẹrị ini ọkị so ḅa, kụma à ḍụkụ tẹ ịn pịkị-ḅo Izirẹlị amakiri mẹ la ḅịa. Anịsakị ó nimi ḅa mịnẹ yẹrị anie KỊNỊNYANAḄỌ ḅe.”

³⁹ Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḅẹẹm, “Tẹ mịọkụ ọmịnị Izirẹlịapụ mamgba, ọmịnị ọmịna ḅụụ-ḅẹlẹye-ḅẹlẹye mịẹẹ! Ọ́ fịrịmẹnjị ọmịna oru-afụḅara ma pịrị tọrọkọ-tọrọkọ mu! Kụma àrị ọmịna aḅeri nụnụarị mịnẹ mie ḅọrọtẹ so ọmịnị ị̀ ḅịḅịpoki ḅa tẹ ị̀ fịafịa ẹrẹ kụn-a tẹ ye ḍie-ḍie oru-afụḅara pịrị dasịẹma ḅa.

⁴⁰ Anị anga amakiri mẹ ḅio, fịafịa tụndụ mẹ ọgọnọ ḅụ, Izirẹlị ḅẹ gele tụndụ mẹ, ọmịnị Izirẹlịapụ mamgba sunsin ị̀ pịrị ḅa. Ọmịna amịẹaị ị̀ ḅụụ-ḅẹlẹ ḅa, tẹ à ḅii ḅa ọmịnị agba ma ọkị-ḅo ị̀ pịrị, ọmịna iḅitẹịn agbamịẹ-aị ma, na ọmịna fịafịa ḍiepịrị-aị ma na.

⁴¹ Àrị ini ọ́ gala-gala mu wararị amakiri ma ḅụ ó kobiri gboloma tẹ ọmịnị ọkị-ḅo tẹso, àrị ọ́ dọkịma ḅarị agba ma daa-ọkị ḅa, tẹ sịẹ-sịẹ ma ẹrị ḅa mịnẹ à fịafịam.

⁴² Àrị ọmịnị ọkị pịkị-ḅo Izirẹlị la sakị, à mininim à kẹ ọmịna elemu apụ ma pịrị ḅẹ amakiri mẹ, anịsakị mie ó nimi ḅarịye mịnẹ yẹrị anie KỊNỊNYANAḄỌ ḅe.

⁴³ Anịtẹso ọ́ kẹ ḅiokoroma ḅa tọrụ-tuu amịẹaị mamgba tẹ ọ́ mịẹ tẹ aị ma na ọ́ wẹrịtẹ ọmịna aḅụụ pilematẹ ḅara na. Ọmịnị ọmịna aḅụụ ḍiki sịḅị-ngụngụn ḅa, ọ́ mịẹ tẹ si-aị mamgba ẹrẹsị.

⁴⁴ Àrị ị̀ kụn wẹrị kpaịnma ḅẹ ẹrẹsị ye mị sakị, ọmịnị Izirẹlịapụ ma nimi ḅa mịnẹ yẹrị anie KỊNỊNYANAḄỌ ḅe, àrị ọmịna si-sịḅịḅio si amịẹaị ma gbẹẹ ḅara kẹ ọmịnị na mịẹ-a ẹrẹsị.” Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ọkọ ḅẹẹm.

Abajị Suku da anga mẹ ḅụ Kọrịarị fịnị

⁴⁵ KỊNỊNYANAḄỌ ḅe ẹkwẹn ị̀ pịrịm.

⁴⁶ Ori mẹẹ, “Fịị-fịị tomḅọ, tọrụ kẹ abajị-suku da anga ḍikii. Ẹkwẹn kọn abajị-suku mẹ ọgọnọ gbana tẹ ịkịankoro abajị-suku ḅẹ opu-piri mẹ pịrịị.

⁴⁷ Ḍuko abajị-suku ḅẹ opu-piri mẹ pịrị tẹ anị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḍukoarị ye naa: Ḍikii! À fịnị pakamarị, tẹ anị ị́ ḅio simearị sịn goyegoye dọkịma ḅa, ịwọ ye-o, ḅịyatẹ ye-o. Gberie-sọ inetẹ anị ḅinma ḅịa. Anị kọrị iwo ḅa, suku-jụ mu ọgọnọ-jụ la, tẹ fịnị-ḅẹlẹ mẹ ḅẹ ọfịrị mẹ ḅẹḅọ-ḅẹḅọ ịnọ ḅa.

⁴⁸ Inimgba ẹrị ḅa mịnẹ yẹrị, KỊNỊNYANAḄỌ ḅe anị ḅụ fịnị mẹ pakamam, tẹ gbọrụḅọ-sọ inetẹ biinma ḅịa.”

⁴⁹ Kụma àrị anị ị̀nịna sụụn-a anga ḍukom, “Tẹịn-Ḅẹrẹtọn-Kụrọ-Nyana KỊNỊNYANAḄỌ, ị̀ mịẹ tẹ à miemẹ mịẹ ma. Ḅẹḅọ-ḅẹḅọ saakị ḍuko-sụarị mịnẹ yẹrị sakị mamgba egberima-aị ḍukoarị.”