Izikẹlị 2 - FỊAFỊA BAỊBỤLỤ

Tamụnọ Izikẹlị Sịnm Ò Ḅo Ịkịankoroḅọ Sọ

¹ Pọkọ nwẹnị ị̀ ḅẹẹ, “Fịị-fịị tomḅọ, saakị sịẹ, à ḅiiarị àrị ẹkwẹn ị́ pịrị.”

² Pọkọ mẹ ẹkwẹn-arị sakị, kụrọ nwẹnị ị̀ ḅụụ ḅio sọ tẹ ị̀ saakị sịẹma. À nwẹnị ori ẹkwẹn ị̀ pịrịarị ye mẹ naa:

³ “Fịị-fịị tomḅọ, arị ị́ kẹ Izirẹlị ḅẹ apụ fịrịmarị. Ịn kọngọ-kụrọma tẹ pịkị tẹ ị̀ na tụḅụrụ tẹẹ, tẹ mịọkụ sọ ini paa kọngọ-kụrọma-apụ, anie ịna elemu-aḍapụ ma sime gbọrụ ḅara mẹ.

⁴ Ini ma anie ḍukoye naa-a apụ, tẹ ị̀ mangịma-a, mie ḅụ yẹrị ị́ kẹ fịrịmarị, ḍuko ịn pịrị yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḍuko ịn pịrịarị ye mẹ.

⁵ Arị kọngọ-kụrọma-apụ ma ini í poki ḅarị-o, in poki ḅịa-o, in nimi ḅa mịnẹ ịkịankoroḅọ ịna ogboku sime tẹẹ.”

⁶ “Ị́yẹrị kụma, fịị-fịị tomḅọ, í in ḍiki-ḅalafa nyana-a, anịanịa in ḍukoye-ḍukoye sọ. Ini ị́ na tụḅụrụ tẹ í ḍiki-sima ḅa anị ị́ akpị ogboku angarị ye kịka ḅa. Anịsọ arị kọngọ-kụrọma-apụ ma ḍiki-ḅalafa ma anịanịa in ḍukoye-ḍukoye sọ.

⁷ À ḍuko ị́ pịrịye pịrịye í ḍuko ịn pịrị ḅa, in poki-o, in poki-a-o. Ini kọngọ-kụrọma-apụ mẹ kẹ ḅiokoroma.

⁸ “Fịị-fịị tomḅọ, à ḍuko ị́ pịrịarị ye pokii. Kọngọ-kụrọma tẹ ịn kịka ma. Ị́ ḅịḅị finji tẹ à kẹ ị́ pịrị ḅẹ-yearị ye mẹ fị.”

⁹ À nwẹnị sụụn-pakama tẹ ị̀ da wararị ḅara ẹrị, tẹ anị in-ikoarị-abịlala ọlọ wararị.

¹⁰ Ḅara mẹ nwẹnị in-ikoarị-abịlala mẹ finji-sara, tẹ àrị ẹrịm maa apakịrị ma ḅụ kẹẹ wararị ye — owu na kururu na iningi na anị ḅio kẹẹ wararị.