Izikẹlị 19 - FỊAFỊA BAỊBỤLỤ

Kururu Nume

¹ Tamụnọ ḍuko ị̀ pịrịm à mị kururu nume mẹ su Izirẹlị ḅẹ maa amadapụ awọmẹ pịrịị:

² Í iyingi anie tọrụ nyanatẹ ịyọrọ ọkụkụ. Ḅalafamarị owi-ọkụkụ ma ogboku mie árị á ḍọkọḍọkọ-awọmẹ ma ḍikiḍiki pakama-ḅo yee.

³ Á gbọrụ kala ye ḍikiḍiki pakama-ḅo tẹ piri dee-dee ḅara kẹ ò tolumam; ò tomi kun pẹị-pẹị ye sọm.

⁴ Sịẹ-sịẹ ma ò gboloma ye naa tẹ ò tuu olulu ḅio koromam. Ini inji-ḅaa-arị kẹ ọ̀ sụka tẹ ọ̀ fọnọ-so Ijiputi mum.

⁵ Á koru nwenii tẹ ẹrịm gbọrụ ḅiokpọmaye sọ ḅarị ofori. Anịtẹso á jen ḍikiḍiki pakama-ḅom árị aḍọkọḍọkọ-awọmẹ ma ḅụ, tẹ ọ̀ nwẹnị ḍụḅa ḅo ḅalafamarị ọkụkụ sọ.

⁶ Ò ḅo ḍụḅa famatẹ opu ye sọ sakị, ori osi ọkụkụ ma ḅụ sọ tẹ mẹnjịma-mẹnjịmam tẹ kun pẹị ḅẹ ye ḍọkịarị ḅara ḅụ. Ori sọ ḍawọ tẹ piri-dee tẹ pịkị tomḅọ pẹị ye sọm.

⁷ Ọ̀ kụrọnị-ayọ sima kọsịmam, ori ama-ama ma famam. Ori ekire sakị-sakị, amakiri mẹ ḅẹ apụ ma tẹmẹ-naịn-naịnm.

⁸ Sịẹ-sịẹ ma kobiri ḅo owu kẹ ọ̀ sọ ḅẹm; anga mamgba kịnị ḅom. Ini ịna piri-dee ịgbọ ma sụam tẹ ori ịna ọnya ḅio korom.

⁹ Ini ọ̀ kẹ feni-warị pembe ye ḅio sunm, tẹ ori ọkị mu Babịlonịya ḅẹ amadaḅọ pịrịm. Ini ọ̀ kẹ ọ̀ pụkọ-so ḅịa ḅara wẹrịm, mịẹ tẹ kịnị ḅarị jen kẹ ori ekirearị ye naa ḅịa ḅara Izirẹlị ḅẹ atụndụ ma ọgọnọ ḅụ.

¹⁰ Í iyingi girepu mgbọlụ sụa-sụa kụrọ kịkam minji akaka ḍiḅi ye ọkụ. Minji ḅin wararị ẹrẹsị, kụrọ sịn mẹ ịnyịnya anị ḅụ puruku tẹ anị mgbọlụ sụa saram.

¹¹ Anị ḅẹ aḅara ma kụrọm, tẹ ḍụḅa paka-ḅo ama-da mkpara-mkpara sọm Kụrọ sịn mẹ ḅo sịn sọ tẹ iwo So-tọrụ mu oḅuto lam; ḅẹḅọ-ḅẹḅọ anị ḅẹ ịnyịnya anị ḅụ pụrụkụ ḅara na anị sịẹ-gele ḅara na ẹrịm.

¹² Kụma ịganịarị aḅara kuno ma anị nụnụ pakama-ḅom tẹ anị kẹ kiri ọgọnọ gbin koromam. Okiringa fẹrụ ḅo anị ḅẹ mgbọlụ ma samụnọmam. Ini anị ḅẹ aḅara ma anyịma siinm arị samụnọ tẹ ịn dọkịmam.

¹³ Mịọkụ ini anị kẹ ịkpa ḅio ḍiḅi tẹ samụnọtẹ minji ofori kiri ḅụ.

¹⁴ Fịnị anị ḅẹ ḅiri mẹ ḅụ sọm; fịnị anị ḅẹ aḅara ma na mgbọlụ ma na dọkịmam. Ḅara ma ḅarị jen kẹ kụrọ ḅịa, arị ḅarị gala-gala ama-da mkpara ma sọ ḅịa. Miemẹ kururu numee; ini anị su, siin su, siin su tẹẹ.