Izikẹlị 18 - FỊAFỊA BAỊBỤLỤ

¹ Gbọrụ ene ḅụ, KỊNỊNYANAḄỌ ḅe ì ḅẹẹm,

² Mie tomi Izirẹlị amakiri mẹ ḅio gbaarị egberi: Ḍapụ-na-iyingiapụ-na aka-ḅumarị girepu mgbọlụ fịm, kụma awọmẹ ma aka mie ḅuu ye.

³ Piki-pikiye-ofori ḅara ḅụ, yẹrị ḍumo wararị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḅẹẹarị, “Ọ́ ḅarị jen kẹ mịẹ egberi mẹ gbaa ḅịa Izirẹlị ḅụ.

⁴ Ḅẹḅọ-ḅẹḅọ ḍumo, sime ị̀ pịrịm; iyiḅọ mẹ ḍumo pịkị tụḅọ mẹ nye sọ. Si mịẹarị ḅọ mẹ anie fịị ḅarị ḅọ mẹẹ.”

⁵ “Ọkị mịnẹ karakaramatẹ iḅi wararị tomḅọ emi tẹ karakara mịẹarị pịkị kịnị mingirima-mingirima-a ḅọ.

⁶ Ò sunsin Izirẹlịapụ ma oru-afụḅara ma pịrị-a, anịanịa kẹ oru pịrị tẹ agbamịẹ-aị fị tọn-tọn oru-awarị ma ḅụ. Ọ̀ jụmọ ta sịḅịḅio sima-a, anịanịa sakị-ẹrịarị ẹrẹḅọ na gboloma.

⁷ Ọ̀ kịnị-inoma inoma-a, anịanịa kụrọ-ḅara kẹ ḅẹḅọ-ḅẹḅọ nye furu. Ori ọ̀ ḅara ye-ḅọlọ ḅọ kẹ ọ̀ ḅara sụa tẹ ye ḅọlọ ye kẹ pịkị mḅọ pịrịarị; ò fịye kẹ ḅuru-pọkọtarịḅọ pịrị fịarị, pịkị kapa kẹ paụ wararị ḅọ pịrị sụarị.

⁸ Ọ̀ sọye gotẹ igbigi kẹ kịnị ḅọlọ-ḅọlọ-a. Ọ̀ ḍụkụ tẹ siye mịẹ-mịẹ-aa, tẹ maa apụ ye na ịgbanịyarị anga ḅụ ọḅụ-fị-a ḅara kẹ ḅẹrẹ-pẹlẹarị.

⁹ Ọkọ sime tomḅọ mẹ mḅọ à tọn-koroma-aị ma poki tẹ mịẹarị pịkị bala ḅara kẹ ì oloko ma kokoarị. Ori karakara mịẹḅọọ, tẹ ò ḍumo ḅa.” Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ọkọ ḅarị.

¹⁰ “Pịkị ọkị mịnẹ ḅị tomḅọ gbọrụ owiḅọtụḅọ nyana wararị tẹ kụrọ-ḅara kẹ jen-apụ aị furuarị tẹ kịnị ḅaarị, tẹ ma aị ma ḅẹ gberie mịẹarị,

¹¹ anie ḍaḅọ ḅe gbala-gbala mịẹ-a aị ma. Ọ̀ kịnị lama nwẹn ḅẹẹ oru-awarị ḅẹ agbamịẹ-aị fịarị, pịkị ja owiapụ ereme toluma ọkịarị.

¹² Ori igoin-apụ ma inomarị, ọ̀ kụrọ-ḅara kẹ ye furuarị, kẹ ọ̀ ḅarasụa tẹ igbigi ḅọlọ ye ọ̀ gbọrsịḅị ọkịarị. Ori oru-awarị mu-mu tẹ sunsin sịḅị-ngụngụnmarị oru-afụḅara pịrịarị,

¹³ tẹ sọye fị ḅara kẹ igbigi kẹ kịnị ḅọlọarị. Anị ḅọ ḅe ò ḍumo ḅẹ? Ẹn-ẹn, ò ḍumo ḅịa. Ọ̀ mịna sịḅị-ngụngụnmarị aị mamgba mịẹ tẹ, anie ḅụ ọ̀ fịị ḅa. Ọ̀ fịị ḅẹ ḅẹrẹ mẹ, ọ̀ sịḅị ọgọnọ gbana ḅa.

¹⁴ Mịọkụ ọkị mịnẹ ḅị maaịn karama owiḅọ ḅe owiḅọtụḅọ nyana wararị. Ori ọ̀ da mịẹ asi mamgba ẹrịarị, kụma ori ò ḍikima mịẹ-a.

¹⁵ Izirẹlịapụ ma sunsin pịrịarị oru-afụḅara ma, ọ̀ tẹkẹ-a; anịanịa kịnị laa ma nwẹn ḅẹẹ oru-awarị ma ḅẹ agbamịẹ-aị fị. Ọ̀ jụmọ ta toluma ọkị-a,

¹⁶ anịanịa ḅẹḅọ-ḅẹḅọ ponoma, anịanịa kụrọ-ḅara kẹ ḅẹḅọ-ḅẹḅọ nye furu. Ọ̀ ḅara ye-ḅọlọ ḅọ kẹ ọ̀ ḅarasụa tẹ ye mẹ ḅọlọ ye, ọ̀ kẹ pịkị mḅọ pịrịarị. Ò fịye kẹ ḅuru-pọkọtarịapụ pịrị fịarị, tẹ kapa kẹ paụ wararị apụ pịrịarị.

¹⁷ Ọ̀ ḍụkụ tẹ siye mịẹ-mịẹ-a, tẹ ọ̀ pịkị sọye gotẹ igbigi kẹ kịnị ḅọlọ-ḅọlọ-a. Ori ì oloko ma kokoarị, tẹ à tọn-koroma-aị ma poki tẹ mịẹarị. Ori ọ̀ ḍa asi ẹrẹsị fịị ḅịa, kụma karakaraye ḍuko ḅụ ò ḍumo ḅa.

¹⁸ Ọ̀ ḍa, osi pakịrị anga kẹ anị ḍiki ḅụ, kịnị-inomam pịkị kụrọ-ḅara kẹ furum, tẹ sakị mamgba siye kẹ ḅẹḅọ-ḅẹḅọ mịẹm. Tẹ anie ḅụ ọ̀ fịịm, ori ḅarana mịẹ si-aị ẹrẹsị.”

¹⁹ “Kụma ó gbelarị: ‘Tiye ẹrẹsị tụḅọ ḅe ọ̀ ḍa asi gotẹ tọrụsiẹrị ḅịa? Anị ḅẹ pakịrị-ḅịḅị anie mie, mịnẹ tụḅọ ḅe kuraye na iḅiye na mịẹm. Ori ì oloko koko tẹ bala ḅara kẹ arị ḍukamẹnjịm, tẹ mie ḅụ karakaraye ò ḍumo ḅa.

²⁰ Si mịẹarị ḅọ anie fịị ḅarịye. Tụḅọ ọ̀ ḍa si ẹrẹsị tọrụsiẹrị ḅịa, anie ḍaḅọ pịkị ọ̀ tụḅọ asi ẹrẹsị tọrụsiẹrị ḅịa ḅara. Iḅi tomḅọ mḅọ mịẹarị iḅi ḅẹ gbẹẹ-ye nyana ḅa, tẹ si tomḅọ pịkị mḅọ mịẹarị siye mẹ ḅẹ tọrụsiẹrị da ḅa.

²¹ Gbọrụ tomḅọ si mịẹ dasịẹma tẹ ì oloko ma kokoarị ḅẹḅẹ, ò kuraye na iḅiye na mịẹarị ḅẹḅẹ, ọ̀ fịị ḅịa; karakaraye ḅụ ò ḍumo ḅa.

²² Ori asi mamgba ịn kẹ ḅioḅọrọma tẹ ò ḍumo ḅa, ò kuraye mịẹarị ẹrẹsị.’

²³ Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe gbelarị, ‘Ó kuromarị tọrụ-tọrụ kẹ si tomḅọ mẹ ḍiki tẹ mḅọ fịị mẹ ị̀ ḅioḅẹlẹmarị aro? Ẹn-ẹn, anie nakara àrị ẹrị ḅẹ ḅiim mḅọ si-ḅụ-pịkị tẹ ḍumo.’ ”

²⁴ Kụma karakara mịẹ-mịẹ tomḅọ iḅi mị ḅụ ḅara-siin tẹ saakị si-aị mamgba mịẹarị, anie sịḅị-ngụngụnmarị aị ma tẹ si-mịẹapụ mịẹarị aị ma, ọ̀ paa ḍumo sime ḅa aro? Ẹn-ẹn! Elemu ọ̀ mịẹ tẹ iḅi mẹ gberie-sọ ịn kẹ ḅiokoroma ḅịa. Ọ̀ fịị ḅa, ḅioḅẹngbọ kẹ ọ̀ ḅụụ ḅụ gbana na-iḅi-a ḅara mẹ na ori asi na gotẹ.

²⁵ “Kụma ọ́ ḅẹẹarị, ‘KỊNỊNYANAḄỌ ḅe mịẹarị ye kura-a.’ Ọmịnị ì pokii, Izirẹlịapụ. Ó kuromarị à kẹ ị̀ amịẹaị mịẹarị ḅara kura-a aro? Ọmịnị ma ye-mịẹ-ḅara rẹ mie kura-aye.

²⁶ Karakara mịẹ-mịẹ tomḅọ ḅarị iḅiye mịẹ-a tẹ siye mịẹarị tẹso, fịịarị sakị, ọ̀ mịẹ tẹ siye ẹrẹsị ọ̀ fịịarị.

²⁷ Si tomḅọ ḅarị siye mịẹ-a tẹ kuraye na iḅiye na mịẹarị sakị ori ò ḍumo ḅọrọmarị.

²⁸ Ori ọ̀ mịẹarị ye lekiriarị tẹ si mịẹ dasịẹmarị, anie ḅụ karakaraye ḅụ ọ̀ fịị ḅịa, kụma ò ḍumo tọrọkọ mu ḅa.

²⁹ Tẹ ọmịnị Izirẹlịapụ ma ḅẹẹarị, ‘KỊNỊNYANAḄỌ ḅe mịẹarị ye kura-a. Ó kuromarị à ye mịẹarị ḅara kura-a, ọmịnị ọkọ ḅarị? Ọmịna ye-mịẹ-ḅara ẹrẹ mie kura-aye.’ ”

³⁰ “Mịọkụ yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḍuko ọmịnị Izirẹlịapụ ma pịrịarị mịnẹ àrị ọmịna ḅụ ọrụḅọ-ọrụḅọ kọn ḅa mḅọ mịẹ tẹ ye ḅụ. Ọmịnị ọ́ mịẹarị si-aị mamgba ḅụ pịkị-soo, tẹ mịẹtẹ si ó guluguluma ma.

³¹ Ọmịnị ọ́ mịẹarị siye mẹmgba ḅụ ḅara-siin, tẹ ịwọ akuroma na ịwọ aḅioḅẹngbọ na nyana ọmịna aḅụụ pịrị. Ọmịnị Izirẹlịapụ, tiye ẹrẹsị ọ́ fịị ḅẹ-ḅiiarị?

³² À ḅii-a gbọrụḅọ-sọ fịị,” Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ọkọ ḅẹẹarị. “Ọmịnị ọmịna asi ḅụ pịkị-so tẹ ḍumo.”