Izikẹlị 16 - FỊAFỊA BAỊBỤLỤ

Jeruselemu, Ḅioḅẹngbọ Kẹ Sịrẹrẹ Na-iḅi-a Ḅọ

¹ KỊNỊNYANAḄỌ ḅe siin ẹkwẹn ị̀ pịrịm.

² Ori mẹẹ, “Fịị-fịị tomḅọ, kẹ Jeruselemu ḍie á mịẹ tẹ sịḅị-ngụngụnmarị aị ma.

³ Ḍuko Jeruselemu pịrịị Tẹịn-Ḅẹrẹtọn-Kụrọ-Nyana ḅọ ḅe kẹ á ḅẹẹarị ye: ‘Ị́yẹrị ma Kenanị amakiri ḅụ ini í iyim. Ị́ ḍa Amọrayịtị ḅọ, tẹ í iyingi Itayịti ḅẹ ḅọ.

⁴ Í iyi sakị, gbọrụḅọ-sọ í ombu pẹlẹ-a, anịanịa ị́ sịkịrị, anịanịa fụn kẹ í sikiri, anịanịa ḅịtẹ kẹ ị́ sụa.

⁵ Gbọrụḅọ-sọ iḅiọkụ í ḍiki-sịḅị-kụrụkụrụ tẹ ma ma ḅẹ gberie-sọ mịẹ ị́ pịrị-a. Í iyi sakị ị́ ḅẹlẹmaḅọ ofori. Ini ị́ kẹ finji-sara wararị ḍụọ-kọrị-kiri ḅụ wakị-koromam.’ ”

⁶ “Anịtẹso à mẹnjị ḅọrọ tẹ ị́ ẹrịm ị́ ị́ ọmbie ḅio kpelekiarị. Ọmbie ị́ gbaịn famam, kụma à ḍụkụ tẹ ị́ fịị ḅẹ ḅii-a.

⁷ Àrị ị́ mịẹ tẹ í obi-a sịn kịkam. Ị́ nwẹnị so-paka ḅo kụrọ, tẹ gele paka-ḅo iriawọ-tụḅọ sọ. Ị́ ndo pakama tẹ ḅo iḅim, tẹ ị́ sịḅị ḅẹ inume sọ ḍụḅam, kụma ị́ paụ sara simem.”

⁸ “À siin mẹnjị-ḅọrọarị ogbo, àrị ẹrịm mịnẹ ị́ na ḅẹlẹma ḅẹ sakị mẹ ḅo laa tẹẹ. À nwẹnị ì opu kapa kẹ ị́ paụtẹ oju gbaịn tẹ minini mịnẹ àrị ị́ ḅẹlẹma ḅa. Inn, àrị ị́ na sime ḅẹ ọḅọkụ kẹ ị́ na fịm, tẹ í ḅo ì nye sọm.” Mie Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḅẹẹ ye.

⁹ “Anịtẹso à minji ọkị tẹ kẹ ị́ ḅụụ ọmbie mẹ sịkịrị-siinm. Àrị olivu olo kẹ í oju kiri ọmbịm.

¹⁰ À ḍoriye sime opu akapa kẹ ị́ sụam, tẹ iḅitẹịn nama oju kẹ mịẹ okuro kẹ ị́ pịrịm, ferefere pịna-fa ḅịtẹ kẹ ị́ sịḅị fịna, tẹ lọkọ-ḅịtẹ ọgọnọ ḅẹ kapa kẹ ị́ ḅirimam.

¹¹ À juwẹlị nwẹn-sịn opu yela-ye kẹ í ḅirimam — ḅara kpọọ-aị na pọkọsụa-aị na.

¹² À nini-sụaye na ḅerisụa-aị na kẹ ị́ pịrịm, tẹ nwẹnị iḅitẹ kịranị kẹ ị́ pịrị í sure.

¹³ Kẹ í ḅiriaị ma mịẹ busunuma ḅụ í golu na seleḅa na nyanam, tẹ sakị mamgba ḅara kẹ ḍori ḅirimatẹ aị sime ferefere pịna-fa ḅịtẹ na lọkọ-ḅịtẹ na akapa mie ị́ sụa ye. Iḅitẹịn fịlawa kẹ mịẹ fịturu mie ị́ fị ye, tẹ ḅẹm na olivu-pulo na sọ ị́ nyana tẹ kẹ ye fịm. Í iḅi mẹ nwẹnị ḅịya tọrụngbọ ḅio sọọ, tẹ ị́ nwẹnị amada-ẹrẹḅọ sọọ.

¹⁴ Sịẹ goyegoye ḅụ ị́ eresom ị́ kpaịntẹ iḅi gotẹ, yẹrị anie ị́ mịẹ tẹ ị́ ọkọ kẹ ḅụụ-ḅẹlẹma ye ẹrẹsị.” Mie Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḅẹẹ ye.

¹⁵ “Kụma í iḅi na ereso na kẹ ḅẹrẹ iyingi sọma tẹ ị́ dama-ḅo ḅọ ḅo ḅọ na tiim.

¹⁶ Ị́ ị́ aḅịtẹ ḅẹ jaị kẹ ị́ atẹkẹ-ayọ ma ḅirimam, tẹ ama-mẹnjị-ẹrẹḅọ kịka tẹ ị́ ḅụụ kẹ ḅẹḅọ-ḅẹḅọ pịrịm.

¹⁷ Ị́ nwẹnị à kẹ ị́ pịrị golu na seleḅa na ḅụụ-ḅirima aị ma ọkị tẹ kẹ owi oru-afụḅara tẹmẹ tẹ arị na sẹfị si mị.

¹⁸ Ị́ nwẹnị ḅirima aị kẹ ḅụ ḅụụ ḍori warị akapa ma tẹ à kẹ ị́ pịrị aị ma kẹ oru-afụḅara ma sụa, tẹ olivu-pulo mẹ na kụnụaị ma na kẹ agbamịẹ oru-afụḅara na pịrị.

¹⁹ À fịye kẹ ị́ pịrịm — iḅitẹịn fịlawa, olivu-pulo, na ḅẹm na — kụma ị́ arị kẹ agbamịẹ oru-afụḅara pịrịm, arị í boma ḅẹ ḅara.” Mie Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḍukoarị ye.

²⁰ “Anịtẹso í í iyi ị̀ pịrịtẹ owiapụ-awọmẹ ma na eremịna-awọmẹ ọkị tẹ kẹ agbamịẹ oru-afụḅara pịrịm, ḅioḅẹngbọ-kẹ-sịrẹrẹ-niḅi-a ḅara sime ị̀ pịrị ye mẹ boowa wararị ya.

²¹ Ị́ pịkị ị̀ awọmẹ ọkị tẹ kẹ agbamịẹ oru-afụḅara pịrị-a ogbo?

²² Ị́ ama-mẹnjị eremịna sịḅị-ngụngụnma ḍumo mẹ kọn sime sakị, ị́ kala-sakị mẹ gbala-gbala ị́ kẹ ḅiokoroma-a ị́ paụtẹ ị́ ḅụ ḅẹ ọmbie ḅio kpeleki sime saakị mẹ.”

Jeruselemu Ama-Mẹnjị-Ẹrẹḅọ Ḍumo

²³ Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḅẹẹm, “Ị́ fa tẹẹ! Ị́yẹrị anị siye mẹmgba mịẹm, anị tẹso

²⁴ etela akaka goyegoye ḅụ í oru-afụḅara tẹkẹ ayọ nama tẹ ama-mẹnjị eremịna ḍumo kọnm.

²⁵ Ị́ í iḅi kẹ lịka ḅio fọnọm. Ḅo ḅọ ḅo ḅọ ị́ ị́ ḅụụ kẹ mḅọ pịrịm, tẹ ene-ḅaaene-ḅaaene ị́ ama-mẹnjị-ẹrẹḅọ sọ ḅụram.

²⁶ Ị́ ị́ na kpeki tẹ anga apụ tẹ ḅụụ-ọlọlọ-a Ijiputi-ḅẹ-apụ ma na tiim, tẹ ị́ ama-mẹnjị eremịna mịẹ mẹ kẹ ị̀ ịganịmam.”

²⁷ “Mịọkụ à fomu-ḅara kẹ ị́ pịrị ḅẹ tẹ ị̀ ḅara saakị-gelema tẹ, ì boma ḅụ ị́ la kiri sọ àrị ọkị so tẹẹ. Àrị ị́ saakị saḅama Filisiteniapụ ma pịrị tẹẹ, anie í ḍiki-ḅioḅuarị tẹ í si-amịẹaị ma ḅụụ-ngụngụmarị apụ ma.

²⁸ “Osi apụ ma ị́ na iḅi-a ẹrẹsị, ị́ mangị-mangị Asiriya ḅẹ apụ ma dama-mum. Ị́ ịna ama-mẹnjị-ẹrẹḅọ sọm, kụma ini sọ ini ị́ pọkọ-ta-a.

²⁹ Ị́ Babịlonịya ḅẹ ama-mẹnjị-ẹrẹḅọ sọm, anie tuḅoni-tuḅoni-tuḅoni sịẹ mẹ, kụma ini ị́ pọkọ-ta-a.”

³⁰ Mie Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḍukoarị ye: “Ị́ ḅụụ-jịrị nyana-a ama-mẹnjị-ẹrẹḅọ kịka tẹ mie mẹmgba mịẹ tẹẹ.

³¹ Etela goyegoye ḅụ ị́ ị́ kẹ sunsin oru-afụḅara pịrị ḅẹ oru-awarị nama tẹ ama-mẹnjị amịẹaị mịẹarị. Kụma ị́ ama-mẹnjị-ẹrẹḅọ mịẹ-mịẹ ḅara kịka tẹ igbigi gotẹ mịẹ-a.

³² Ị́ kịkarị ḅọ anie sẹfịarị ẹrẹḅọ tẹ amịna diḅọ nakara kịnị tọrụ-nimi-a apụ ḅẹlẹmarịḅọ.

³³ Ama-mẹnjị-ẹrẹḅọ igbigi ọkị-ọkịm, kụma ị́yẹrị rẹ ḍiepịrị-aị kẹ ị́ ḅẹlẹma apụ mamgba pịrị tẹ pịkị ọḅụ kẹ ịn pịrị fịm tẹ anga-anga ḅụ in sime tẹ ḅo-ḅo tẹ ị́ na tii-arị.

³⁴ Ị́yẹrị ma anie kịrị ama-mẹnjị-ẹrẹḅọọ. Gbọrụḅọ-sọ í ponoma tẹ í ḅo ama-mẹnjị-ẹrẹḅọ sọ-a. Kịnị anị ḅẹ igbigi kẹ ị́ gbẹẹ-a; ị́yẹrị mie ịn gbẹẹ yee! Inn, ị́ kịrịm.”

Tamụnọ kẹ Jeruselemu Ọgọnọ gbana Ḅẹrẹ-pẹlẹ-ḅịḅị

³⁵ Mịọkụ ọkọ ẹrẹsị, Jeruselemu, ama-mẹnjị-ẹrẹḅọ! KỊNỊNYANAḄỌ ḅe ḍukoarị ye pokii.

³⁶ Mie Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḅẹẹ ye: “Ini ị́ paụma tẹ ị́ ama-mẹnjị-ẹrẹḅọ kịka tẹ ị́ ḅụụ kẹ ị́ ḅẹlẹmapụ ma pịrị tẹ, pịkị arị ḅụụ-ngụngụmarị oru-afụḅara mamgba pịrị tẹ, tẹ ị́ awọmẹ ḅaa oru-afụḅara pịrị tẹ ịn kẹ agbamịẹ ḅụ.

³⁷ Miemẹ ẹrẹsị àrị ị́ na ḅẹlẹma sime apụ ma ọkị-ḅo kobiri ḅa — ị́ ḅụụ-ḅẹlẹ apụ na ị́ ḍiki-ḅioḅu apụ na, àrị ini ọkị-ḅo ọkọrọ mịẹ í ikelema ḅa, anịtẹso àrị ị́ paụma-sara tẹ mịẹ tẹ ini ị́ paụ mẹ kẹ ị́ ẹrị ḅa.

³⁸ À sẹfị na kịnị-ḅa na ḅẹrẹ-pẹlẹ ị́ ọgọnọ gbana ḅa, tẹ ị̀ opu ịganị ḅụ à fịị kẹ í fomu ḅa.

³⁹ Àrị ị́ kẹ ịna kụrọ suku-ḅio suu ḅa, tẹ ini ị́ ama-mẹnjị amịẹaị ma mịẹ-mịẹ tẹ sunsin oru-afụḅara pịrịarị oru-awarị ma kan-sara ḅa. Ini ị́ aḅịtẹ na kapa na, yela ḅụụ-ḅirima aị ma na ọkị so tẹ ye kọnma-a ḅara kẹ ị́ paụma koroma tẹ so ḅa.”

⁴⁰ “Ịn tomi ogbo-ogbo toluma tẹ ịn ḍụḅarị kẹ í gbin tẹ ịna okologie ma kẹ ị́ keni kọsịma ḅa.

⁴¹ Ini ị́ awarị dọkịma kiri lama ḅa, tẹ mị tẹ ereme ogbo-ogbo í fomu-ḅara mẹ ẹrị ḅa. Àrị ị́ mịẹ tẹ ị́ ḅarị ama-mẹnjị eremịna ḍumo kọn ḅịa, pịkị ye ḍie-ḍie ị́ ḅẹlẹmapụ pịrị ḅịa.

⁴² Anịtẹso ị̀ ịganị ḅọrọtẹ à dein ḅa. À ḅarị jen kẹ ịganị tẹ afana tẹmẹ nyana ḅịa.

⁴³ Ị́ ịwọ sakị ḅụ àrị ị́ na mịẹ ḅara ị́ kẹ ḅioḅọrọma tẹ, tẹ àrị ị́ mịẹ tẹ aị mamgba gotẹ ịganịm. Anie ẹrẹsị anị ị́ mịẹ tẹ ị́ arịmgba gbẹẹ tẹẹ. Tiye ẹrẹsị ị́ mịẹ tẹ ḅụụ-ngụngụma aị mamgba ọgọnọ ḅụ ị́ pịkị owiapụ na ereme na si ḅara kẹ gboloma ma ḅọrọ kẹ arị ọgọnọ gbana?” Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ọkọ ḅẹẹm.

Iyingiḅọ na Tụḅọ na Kịka Kọnma-a

⁴⁴ KỊNỊNYANAḄỌ ḅe ḅẹẹm, “Jeruselemu kịnị ị́ kẹ mị kaụ mẹ kọn ḅa, ‘Iyingiḅọ na tụḅọ na kịka kọnma-a.’

⁴⁵ Karakara-ḅara-ḅụ anie í iyingi iyi tụḅọọ. Árị á di na árị awọmẹ na sịḅị-ngụngụmam. Ị́ amịnapụ ereme ma mie ị́ kịkarị ye, anie amịna adiapụ na amịna awọmẹ na ḍiki-ḅioḅu apụ ma. Ị́yẹrị na ị́ amịnapụ ereme opu ama ma na Hiti ḅẹ iyingiḅọ nyanam pịkị Amọrayịtị ḅẹ ḍaḅọ na.”

⁴⁶ “Ị́ mịnaḅọ ẹrẹḅọ omongiḅọ anie Sameriya, ọgọnọ-jụ da anga emi ama mẹ, árị na árị akala-ama ma na. Ị́ mịnaḅọ kala ẹrẹḅọtụḅọ, na arị akala-ama ma na, anie Sọdọmụ, abajị-suku da anga ḅụ.

⁴⁷ Ịna aḅụọ ḍiki-mẹnjị tẹ ịna sịḅị-ngụngụnma amịẹaị ma ḍiki mịẹ ị́ na iḅi? Gbala-gbala, boowa kala sakị kịngẹ, kụma ị́ mịẹ ye goyegoye ḅụ í sii ịn nẹngị tẹẹ.”

⁴⁸ “Piki-pikiye-ofori ḅara ḅụ, yẹrị anie ḍumo wararị Tamụnọ ḅe sakị goyegoye,” Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ọkọ ḅẹẹarị, “ị́ ịyịmbara Sọdọmụ na árị akala-ama ma na amụ gbala-gbala ị́yẹrị na ị́ akala-ama na mịẹ tẹ siye mịẹ-a.

⁴⁹ Árị na árị eremịna-awọmẹ ma na ḅụụ-tọnm mịnẹ ini ịn fị ḅẹ afịaị nyana saram, tẹ pịkị dein na gbene na ḅụ angam, kụma ini igoin-apụ ma na ye nyana ḅẹ ḅọkọ nyana-a apụ ma na koko-a.

⁵⁰ Ịn ḅụụ-tọn tẹ pịkị kọngọ-kụrọmam tẹ yẹrị ḍiki-ḅioḅuarị aị mịẹm, anie ḅụ àrị ịn ḅaa-gulugulumam, í nimi lama wararị ḅara ḅụ.”

⁵¹ “Ị́ mịẹ tẹ si kẹ maa anga ḍiya ḅẹ gbọrụ anga na gbasị ye sọ Sameriya mịẹ-a. Ị́ kpọma ḅụụ-ngụngụma aị mịẹ jene á mịẹ tẹ ḅara goyegoye nẹngịm. Ị́ ḅụrụ-kọsị mẹ mịẹ tẹ ị́ amịnapụ ereme ma ḍiki-tọrụ ḅụ amụ gbọrụ si sọ mịẹ-a apụ kịka tẹẹ, kẹ tọnma ḅụ.

⁵² Tẹ mịọkụ ị́ ị́ tọrụ-tuu mẹ ḅio taụ sime ḅa. Ị́ asi ma ḅaka ḅara ẹrẹsị, ị́ akaka ḅụ ị́ amịnapụ ereme ma jene amụ si mịẹ-a apụ kịka tẹẹ. Mịọkụ ị́ tọrụkuḅu sima tẹ ị́ ḅụụ-jịrị mẹ dogi, ị́ mịẹ tẹ ị́ amịnapụ ereme ma kpaịn apụ kịkarị ẹrẹsị.”

Sọdọmụ na Sameriya na Siin Paka ḅa

⁵³ KỊNỊNYANAḄỌ ḅe Jeruselemu ḅẹẹm, àrị ịn mịẹ tẹ in siin lọkọlọkọ ḅa — Sọdọmụ na árị akala-ama ma na, pịkị Sameriya na arị akala-ama ma na sọ. Inn, àrị ị́ mịẹ tẹ ị́yẹrị sọ lọkọlọkọ ḅa.

⁵⁴ Ị́ ị́ ḅụụ ḍiki ḅụụ-jịrị ḅa, tẹ ị́ tọrụ-tuu mẹ nwẹnị kẹ ị́ amịnapụ ereme ma ḍie ḅa ye ini na-iḅi fama wararị ḅara.

⁵⁵ Ị́ ịyịmbara-amịnapụ, Sọdọmụ na árị eremịna-awọmẹ ma na kụma in siin lọkọlọkọ ḅa. Sameriya na árị eremịna-awọmẹ ma sọ in siin lọkọlọkọ ḅa. Ị́yẹrị na ị́ akala-ama ma na sọ siin paka-ḅo ḅa.

⁵⁶ Ị́ ḅụụ-tọn sime ene ma ḅụ Sọdọmụ gboloma ye kẹ ḅịḅịkpọ-tii-tiiḅọ kọkọ ị́yẹrị,

⁵⁷ tẹrẹmẹ ị́ kẹ á mịẹ siye mẹ paka? Mịọkụ ị́ gbọrsịḅị á kịka tẹẹ — kẹ ḅịḅịkpọ-tii-tiiye sọ Idọmụ ḅẹ apụ pịrị, sọ Filisiteniapụ, na osi í kpeki tẹ angarị í ḍiki-ḅioḅuarị apụ ma na.

⁵⁸ Muno-muno tẹ ị́ mịẹ tẹ ḅụụ-ngụngụmarị aị ma gotẹ ị́ tọrụsiẹrị nyanam. KỊNỊNYANAḄỌ ḅe ọkọ ḅẹẹm.

Sime Gbamasoarị Ọḅọkụ

⁵⁹ Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḅẹẹm, “Àrị ị́ gbẹẹ ḅara kẹ ị́ na mịẹ ḅa, ị́ ị́ minini aị ma tan anga pịrịtẹ pịkị ọḅọkụ mẹ kan tẹ ẹrẹsị.

⁶⁰ Yẹrị kụma àrị àrị ị́nịna fị ọḅọkụ mẹ kụn ḅa, anie ị́ asambịrịma sakị ḅụ, tẹ à sime mu ḅẹẹ-sakị ḅẹẹ-sakị la ḅara ọḅọkụ kẹ ị́nịna na fị ḅa.

⁶¹ Ị́ ị́ mịẹ tẹ ḅara kẹ ḅiokoroma ḅa, tẹ anị gotẹ ḅụụ-jịrị ḅa ị́ ị́ mịnaḅọ ẹrẹḅọ omongiḅọ ma na ị́ mịnaḅọ iriawọ-tụḅọ ma na pịkịma ị́ ḍọkụma-ḅo sakị. Àrị ịn mịẹ tẹ ini iyi eremịna-awọmẹ sọ ị́ pịrị ḅa, karakaraye miemẹ àrị ị́nịna fị ọḅọkụ mẹ ḅio ofori sọ.

⁶² Àrị àrị ị́nịna fị ọḅọkụ mẹ mịẹ ịwọma ḅa, tẹ í nimi ḅa mịnẹ yẹrị anie KỊNỊNYANAḄỌ ḅe.

⁶³ Mịẹ-irima-aị mamgba tẹ ị́ mịẹ tẹ aị ma à wẹrịso ị́ pịrị ḅa, kụma ị́ arị kẹ ḅiokoroma tẹ ḅụụ-jịrị ḅaka tẹ ḅarị ị́ ḅịḅị sọ finji ḅịa.” Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ọkọ ḅẹẹm.