Izikẹlị 15 - FỊAFỊA BAỊBỤLỤ

Kụrọ sịn gboloma Egberi

¹ KỊNỊNYANAḄỌ ḅe ẹkwẹn ị̀ pịrịm.

² Ori mẹẹ, “Fịị-fịị tomḅọ, ndẹẹ ịn kẹ kụrọ na opu sịn na kẹ tọnma ḅẹ ḅara? Iru mị mgbọlụ, girepu nwẹn-sịn ye mẹ ịkpangị kẹ opu piri-ḅio-ḅẹ sịn amẹẹ sime anga tọ iḅi nyana, kẹ tọnma ḅụ?

³ Í inetẹ anị kẹ mịẹ ḅẹ ye emi? Kẹ ye-sololoye mịẹ tẹ kẹ ye sololo kịngẹ sọ í inetẹ kẹ mịẹ ḅẹ?

⁴ Anị iḅi pịrị ye kẹ fịnị kọrịma kịngẹ. Tẹ maa asịḅị ma dọkị famatẹ ogboku mẹ anyị so tẹ sọ, í inetẹ pịkị anị kẹ mịẹ ḅẹ ye tiye?

⁵ Tẹrẹmẹ ini anị dọkịma sọ anị mịẹ ḅụ sọ-sọa. Mịọkụ fịnị mẹ anị dọkịma tẹ anị anyị sọ tẹ mẹ anị pịkị si ḅaka tẹẹ.”

⁶ Kụma mie Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḅẹẹ ye, “Ini opu-piri ḅio kụrọ mẹ ọkị mu dọkịma gbọrụ ḅara mẹ, anie à kẹ Jeruselemu ḅio angarị apụ ma ọkị

⁷ tẹ in fomu ḅarị ḅara. Ịn gbọrụ fịnị gbarị tẹẹ, kụma mịọkụ fịnị ịn dọkịma siin ḅa. Àrị in fomuarị sakị mie í nimi ḅarịye mịnẹ yẹrị anie KỊNỊNYANAḄỌ ḅe.

⁸ In ḅioḅẹngbọ-kẹ-sịrẹrẹ-niḅi-a ḅara sime ị̀ pịrịtẹ, anie ḅụ à mịẹ tẹ bebe sịẹ mẹ ḅẹ amakiri mẹ ịkpa sọ ḅa.” Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ọkọ ḅẹẹm.