Izikẹlị 13 - FỊAFỊA BAỊBỤLỤ

Koro Iruo Owiapụ Ịkịankoroapụ Ọgọnọ Gbana Ịkịan

¹ KỊNỊNYANAḄỌ ḅe ẹkwẹn ị̀ pịrịm.

² Ori mẹẹ, “Fịị-fịị tomḅọ, Izirẹlị ḅẹ ịkịankoroapụ ma sime si ḅara ḍuko pakama, anie ḅarana amịna soku-ḅẹ ịkịan mịẹ-pakama tẹ koroarị apụ ma. Ḍuko ịn pịrị tẹ ịn KỊNỊNYANAḄỌ ḅe ẹkwẹn mẹ poki.”

³ Mie Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḅẹẹ ye: “Mịna oḅori ịkịankoroapụ ma in famatẹ! Ini mie ḅarana ịna ḅụụ jike-saakịma tẹ ini ẹrị ḅẹ ịkịan ma kuroma-ḅoarị.

⁴ Izirẹlịapụ, ọmịna ịkịankoroapụ ma ịn kẹ mịẹ-mịẹ ye ofori, opu ama ḅio ḅụ kan-saratẹ ayọ ḅụ angarị apụnụ ọkụ.

⁵ Ini opu ama mẹ onu ḅịkị tẹ ayọ ma koru-a, ịn pịkị onu mẹ ḅụ kan tẹ ayọ ma siin nama-a, tẹ mie ḅụ kịnị inetẹ Izirẹlị ḍụa ḅẹ ọkụ ofori ọmụ koroarị sakị KỊNỊNYANAḄỌ ḅe eneḅaka mẹ ḅụ.

⁶ Ini ẹrịarị ịkịan ma papaa aị, tẹ tọrọkọ-jụ paka ḅẹ tẹ in ḍukoarị aị ma sọ iruo aị. Ini ọkịarị mịnẹ ini ì oku ḍukoarị, kụma yẹrị ịn fịrịma-a. Anịsọ ịn paa tọrụ kẹ anị paka ḅẹ ḅara ḍikiarị!

⁷ À ḍuko ịn pịrịarị: Árị ịkịan ma tẹ ọmịnị ẹrịarị aị ma papaa aị, tẹ tọrọkọ-jụ paka ḅẹ tẹ ó ḍukoarị aị ma sọ iruo aị. Ọ́ ḅẹẹarị mịnẹ arị aị ma ị̀ ẹkwẹn, kụma amụ àrị ẹkwẹn ọ́ pịrị-a!”

⁸ Mie ḅụ Tẹịn-Ḅẹrẹtọn-Kụrọ-Nyana KỊNỊNYANAḄỌ ịn ḅẹẹarị, “Ọmịna ẹkwẹn ma papaa aị, tẹ ọmịna ịkịan ma sọ iruo. Yẹrị na ọmịnị na tụḅụrụ wararị.

⁹ À fomu-ḅara kẹ ọmịnị ịkịankoroapụ ma tẹ papaa ịkịan ẹrịarị tẹ pịkị kịnị toluma irimarị aḅịrị ẹrịarị apụ ma pịrị ḅẹ-yearị. Ị̀ atomi kobiri tẹ ḅẹrẹ-ḅiya ḅarị anga ḅụ ó sime ḅịa; ini Izirẹlị furo-ḅẹ-apụ ẹrẹ kẹẹ-kẹẹ koroma ḅarị ḍiri ḅio ọmịna ẹrẹ sọ ḅịa; gbala-gbala ọ́ pịkịma ḅo ọmịna amakiri la ḅịa. Anịtẹso ó nimi ḅa mịnẹ yẹrị anie Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe.”

¹⁰ Ịkịankoroapụ ma ị̀ atomi toluma irimarị mịnẹ ye-mamgba iḅi wararị. Nimi lama ye ḍuko ḅụ, ye-mamgba iḅi-a. Ị̀ atomi jen-jen ọlọ oḅolo ye ofori ḅara kẹ ḍụḅarị onu nama tẹẹ, tẹso, ịkịankoroapụ ma ḅo toru kẹ anị ọmbị gbaịn tẹẹ.

¹¹ Ḍuko ịkịankoroapụ ma pịrị ịna onu mẹ ḅịkị-koro ḅẹ-yearị. Àrị ọsụma-sararị eene kẹ fịrịma ḅa. Ḍụḅarị kịka eene-mgbọlị-mgbọlị anị ọgọnọ koro ḅa, tẹ kụrọ fẹrụ fie ḅo anị bịnya ḅa.

¹² Onu mẹ paịn-sara ḅa, tẹ ḅẹḅọ-ḅẹḅọ ó gbela ḅa tọrụ mẹ mịẹ iḅi.

¹³ Mịọkụ mie Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḅẹẹ ye: Ị̀ ịganị ḅụ à kụrọ fẹrụ ọsụma sararị eene na, ḍụḅarị kịka eene mgbọlị-mgbọlị na kẹ fịrịma tẹ kẹ onu mẹ guluguluma ḅa.

¹⁴ À ḅiiarị arị in tọrụ kẹ ọmbị onu mẹ kan-sara, anị kọsịma gala-galama, tẹ mịẹ tẹ suku-saakị aḍụḅarị ma wẹrịso tẹ arị paụ sime. Anị fuku koro tẹ ọmịnị-mgba ḅaa ḅa. Anịtẹso ḅẹḅọ-ḅẹḅọ nimi ḅa mịnẹ yẹrị anie KỊNỊNYANAḄỌ ḅe.

¹⁵ “Onu mẹ na ini ma tẹ tọrụ kẹ anị ọmbị gbaịn apụ ma na ị̀ ịganị ḅẹ kụrọ mẹ da ḅa. Anịtẹso à ḍuko ọ́ pịrị ḅa mịnẹ onu mẹ so tẹ, anie tọrụ kẹ anị ọmbị apụ ma sọ so ḅara —

¹⁶ árị ịkịankoroapụ ma tẹ Jeruselemu ḅiokpọmam ye-mẹmgba iḅi wararị ḅẹ apụ ma, ye-mẹmgba iḅi-a sakị mẹ ḅụ!” Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ọkọ ḅẹẹm.

Koro iruo Eremịna Ịkịankoroapụ Ọgọnọ gbana Ịkịan

¹⁷ KỊNỊNYANAḄỌ ḅe ḅẹẹm, “Mịọkụ, fịị-fịị tomḅọ, ị̀ atomi ma ogboku simearị ereme ma ḍiki, anie ḅarana amịna ẹrị ḅẹ ḅịrị kuroma-ḅoarị apụ ma. Ịna si ḍuko tomi pịrị,

¹⁸ tẹ Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe kẹ ịn ḅẹẹarị ye ḍuko ịn pịrị: “Ọmịnị ereme ma, ọ́ fa tẹẹ! Ọmịnị mie majịkị ḅara kọngọ kpọọ agba gbin-gbin ḅẹḅọ-ḅẹḅọ pịrịarị, tẹ pịkị majịkị ḅịtẹ apakịrị mịẹ ịn pịrịarị, ịn kẹ ịna asịḅị kpọọ, mịẹ tẹ ini osi apụ aḍumo ḅụ kụrọ nyana ḅẹ ḅara. Ó ḅiiarị ó ḍumo na fịị na kụrọ nyana ị̀ atomi ḅụ, tẹ anị sọye mịẹ ọ́ pịrị ḅẹ ḅara.

¹⁹ Ọ́ kụn kẹ ị̀ pịrị-pịrị-a ị̀ atomi tọrọkọ, paa kẹ mịẹ tẹ ọ́ bali mgbọlị fịye kalịye na fịturu apakịrị-apakịrị na nyana ḅẹ ḅara. Ọ́ fịị na-iḅi-a apụ ḅaarị, tẹ ḍumo sime gbẹẹ-a apụ ḍumomarị. Mị-ḅara ḅụ iruo aị ḍuko-ḍuko ị̀ atomi pịrị tẹ ini ó mininiarị.”

²⁰ Mịọkụ mie Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḅẹẹ ye, “À ḅara kọngọ kpọọ agba ma tẹ kẹ mịẹ tẹ ḍumo na fịị kụrọ nyana ḅẹ aị ma ḍiki-ḅioḅuarị. Àrị ọmịna aḅara kọngọ ḅụ arị kanị-siin ḅa, tẹ ọmịnị ọlọ-kụrọma wararị apụ ma paka-ḅo ḅa.

²¹ Àrị ó gbin ịn pịrị wararị ḅịtẹ apakịrị ma kanị-siin tẹ mịẹ tẹ ị̀ atomi pụkọ-pakaḅo ḅa ọmịna kụrọ ḅụ gbọrụ sakị mẹ ḅụ mu ḅẹẹ-sakị ḅẹẹ-sakị la. Anịtẹso ó nimi ḅa mịnẹ yẹrị anie KỊNỊNYANAḄỌ ḅe.”

²² “Ọmịna iruo-aị ḅụ ọ́ ḅọrọtẹ iḅi atomi ḅioḅẹngbọ lọkọmarị, anie yẹrị ye kẹ lama ḅẹ ḅii-a apụ ma. Ó si-mịẹapụ kikiarị siye ḅụ ḅara-siin ḅụ, tẹ ịna ḍumo wẹrịarị.

²³ Mịọkụ ọkọ ẹrẹsị ọmịna papaa ịkịan ma na ọmịnị ẹrịarị kịnị toluma irimarị aḅịrị ma na ḅẹrẹ fa tẹ. Àrị ị̀ atomi pụkọ-pakamaḅoarị ọmịna kụrọ ḅụ, mịẹ tẹ ó nimi ḅarị ḅara mịnẹ yẹrị anie KỊNỊNYANAḄỌ ḅe.”