Izikẹlị 12 - FỊAFỊA BAỊBỤLỤ

Ịkịankoroḅọ Ḅe Ḍumo-mangị kọn ḅọ Ḅara

¹ KỊNỊNYANAḄỌ ḅe ẹkwẹn ị̀ pịrịm.

² Ori mẹẹ, “Fịị-fịị tomḅọ, kọngọ-kụrọma-apụ ogboku ị̀ angarị. Ịn tọrụngbọ nyana wararị, kụma in gberie-sọ ẹrị-a; in ḅeri nyana wararị, kụma in gberie sọ naa-a, ịn kọngọ kụrọma wararị ẹrẹsị.

³ “Mịọkụ, fịị-fịị tomḅọ, sarasarama saakị dogi ḅẹ aị kobiri fịna wẹrị, gbala ḍumo-mangị kọn ḅẹ ḅọ ḅara, tẹ ene amụ gbaịn koro-a ogbo saakị mẹnjị paka. Yee ḅẹḅọ-ḅẹḅọ í so jen anga muarị ye kẹ ị́ ẹrị. Ẹbịsịya arị kọngọ-kụrọ apụ ma ị́ kẹ elekima sụa ḅa.

⁴ Ene paa bele wararị ogbo ị́ kẹ paka so ḅarị aị ma kobiri fịna, mịẹ tẹ ini inetẹ ị́ ẹrị ḅẹ ḅara, anị tẹso yee ini í ḍikiarị ogbo ị́ mẹnjị paka-so jen sịẹ ḅụ mu anga ḅẹ-yearị ye ọkụ, ḅoḅiri-so ḅụ.

⁵ In ḍikiarị ogbo ị́ warị akaka kan tolu tẹ í kobiri fịna poku mẹ na anị ḅio mẹnjị paka.

⁶ Yee ini í ḍikiarị ogbo í í kobiri fịna poku mẹ saakị ị́ apana gbana tẹ mẹnjị paka kanakana mẹ ḅio sọ, ị́ ị́ atọrụngbọ gbaịn wararị ḅara ḅụ, mịẹ tẹ í inetẹ í muarị anga ẹrị ḅịa ḅara. Ị́ mịẹarị ye mẹ ḅeri-nụnụye sọ Izirẹlịapụ ma pịrị ḅẹ ḅara.”

⁷ À KỊNỊNYANAḄỌ ḅe ḍuko ị̀ pịrịm à mịẹ ḅẹ ye mẹ mịẹm. Anị eneḅaka mẹ ḅụ à ye kobiri fịnam ḍumo-mangị kọn ḅẹ ḅọ mịẹ-mịẹ ḅara, tẹ anị ḅẹ ḅoḅiri-so ḅụ anị kpitiarị ogbo arị ị̀ aḅara kẹ warị akaka mẹ soku fooma tẹ mẹnjị pakam. Ḅẹḅọ-ḅẹḅọ ḍikiarị ogbo à poku mẹ kẹ ị̀ apana gbana tẹ som.

⁸ Anị ḅẹ ene-ḅaa ḅẹ dede-ḅio ḅụ KỊNỊNYANAḄỌ ḅe ẹkwẹn ì pịrịm.

⁹ Ori mẹẹ, “Fịị-fịị tomḅọ, mịọkụ arị Izirẹlị ḅẹ kọngọ-kụrọma-apụ ma ị́ mịẹarị ye kẹ í gbelarị ye mẹ,

¹⁰ ḍuko ịn pịrị yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḅẹẹm: mị oku mẹ sime Jeruselemu daarị amadaḅọ tụḅọ ḅe na anịanga angarị apụ mamgba na pịrịm.

¹¹ Ḍuko ịn pịrị mịnẹ ị́ mịẹ tẹ ye mẹ ịna ḅụụ paka ḅẹ ye ḅẹ elekima sọ ịn pịrịarị — ini ma in ḍumo-mangị kọn-apụ na kun-soapụ na sọ ḅa.

¹² Amadaḅọ tụḅọ ḅe tẹ ḅẹrẹtọn ịn pịrịarị-ḅọ ḅe ò kobiri fịna poku mẹ kẹ apana-ḅa tẹ kanakana mẹ ḅio onu mẹ ḅụ in soku finji ọ̀ pịrị anga mẹ ḅụ tolu-ḅọrọ so ḅa. Ò ye kẹ ori atọrụngbọ gbaịn tẹ ò muarị anga ẹrị ḅịa.

¹³ Kụma àrị ị̀ ịgbọ finjima tẹ ori anị ḅio sụka ḅa. Anịtẹso arị ori ọkị so Babịlọnị opu ama mẹ mu ḅa, ọ̀ tọrụngbọ kẹ ẹrị-a tẹ fịị ḅarị anga mẹ.

¹⁴ Àrị ọ̀ ḅẹrẹ-siri mẹ ḅẹ apụ mamgba na ḅẹrẹ-ḍuko ò tolumarị apụ na ò ḍikiḍikiarị ọmụapụ na gala-galama kịrị-kịrị ayọ da ḅa, tẹ kịnị ịn ḅaa ḅẹ gotẹ ịn ḍọkị ḅa.”

¹⁵ “À nwẹn kẹ osi asịẹ ma ogboku na tọrụ-nimi-a apụ amakiri ma na ḅụ ịn gala-galama sakị mie in nimi ḅarị ye mịnẹ yẹrị anie KỊNỊNYANAḄỌ ḅe.

¹⁶ À mịẹ tẹ ịna ḅụ boowa apụ ọmụ mẹ ḅio na ḅuru-ḅa mẹ ḅio na, kịrị-kịrị obi ma na ḅio na fịị-a so ḅa, mịẹ tẹ anịanga sịẹ-sịẹ ma ogboku ḅụ in lekiri ḅẹ ḅara ịna amịẹaị ma ḅụụ-ngụngụma la ḅara, tẹ minini ḅa mịnẹ yẹrị anie KỊNỊNYANAḄỌ ḅe.”

Oju sẹkịarị Ịkịankoroḅọ ḅe Elekima mẹ

¹⁷ KỊNỊNYANAḄỌ ḅe ẹkwẹn ị̀ pịrịm.

¹⁸ Ori mẹẹ, “Fịị-fịị tomḅọ, í oju sẹkịma í ye fịarị sakị, tẹ í ye ḅuuarị sakị sọ ḅalafa ḅụ í oju sẹkịma.

¹⁹ Ḍuko bebe sịẹ mẹ pịrị mịnẹ mie Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḅara ḅo Jeruselemu ḅẹ apụ ma pịrị oku. Ịna oju jike ḅa in yefịarị sakị, tẹ ịn pịkị ḅalafa ḅụ oju sẹkị ḅa in ye ḅuuarị sakị. Kịnị ịna amakiri mẹ ḅụ sime-ye sime-ye ọkị fama ḅa, ịna ḅụ ọrụḅọ-ọrụḅọ oloko koko-koko-a ḍumo kọn-arị ẹrẹsị.

²⁰ Opu ama ma tẹ mịọkụ kịnị ḅin wararị aị ma in guluguluma tẹ bebe sịẹ mẹ ḅẹ amakiri mẹ kẹ ịkpa sọma ḅa. Anịtẹso in nimi ḅa mịnẹ yẹrị anie KỊNỊNYANAḄỌ ḅe.”

Ama-kana Egberi Na Kịnị Naa Ḅẹ Ḅii-a Oku Na

²¹ KỊNỊNYANAḄỌ ḅe ẹkwẹn ị̀ pịrịm.

²² Ori mẹẹ, “Fịị-fịị tomḅọ, Izirẹlịapụ ma tiegotẹ mịẹ egberi mẹ gbaa-gbaa-gbaarị: ‘Sakị ḅọrọ-ḅọrọ-ḅọrọarị tẹ paka ḅẹ tẹ ḍuko-aị ma ḅo paka aị sọ-a?’

²³ Mịọkụ ḍuko ịn pịrịị, yẹrị Tẹịn-Ḅẹrẹtọn-Kụrọ-Nyana ḅọ ḅe nyanatẹ ḍuko ḅẹ ye aniemẹ gboloma ye ḅụ. À mịẹ tẹ anị egberi mẹ kuno ḅa. Izirẹlị ḅụ ịn ḅarị jen kẹ anị gbaa ḅịa. Anie nakara ḍuko ịn pịrị: ‘Sakị mẹ ḅo laa tẹẹ, tẹ paka ḅẹ tẹ ḍuko aị ma ḅo karakara aị soarị.’ ”

²⁴ “Izirẹlịapụ ma ogboku iruo ịkịan ma na kịnị toluma fama ịkịankoro ma na ḅarị paka ḅịa.

²⁵ Yẹrị, Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ẹkwẹn ịn pịrị ḅa, tẹ à ḍuko ḅarịye mẹ mịẹ ḅa. Sakị fama ḅarị jen kẹ paka ḅịa. Ọmịna ḍumo tọrụ ḅụ, kọngọ-kụrọma-apụ, à mịẹ ḅẹ tẹ kẹ ọmịna ḅeri nụnụ ye mẹ à mịẹ ḅa. Yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ọkọ ḅẹẹm.”

²⁶ KỊNỊNYANAḄỌ ḅe ị̀ ḅẹẹm,

²⁷ “Fịị-fịị tomḅọ, Izirẹlịapụ ma kuromarị mịnẹ ị́ ẹrịarị ịkịan ma na í koroarị aị ma na alatẹ tọrọkọ-jụ gboloma aị.

²⁸ Mie ḅụ ḍuko ịn pịrị mịnẹ yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḅẹẹm: sakị fama ḅarị paka ḅịa. À ḍuko tẹ ye mẹ mịẹ ḅa. Yẹrị, Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe, ḍuko tẹẹ!”