Hosiya 9 - FỊAFỊA BAỊBỤLỤ

Hosiya Izirẹlị Daa ḅẹ Fomu-ḅara Ḍuko-wasamarị

¹ Izirẹlịapụ, ọ́ Tamụnọ-minini-a apụ ḅara kẹ ọmịna alalị ma fị mẹ dasịẹma. Ọmịnị ọmịna Tamụnọ ḅụ pịkị-so tẹ ḅioḅẹngbọ-kẹ-sịrẹrẹ-niḅi-a ḅara sime ọ̀ pịrị tẹẹ. Bebe amakiri mẹ kana-koro ḅụ ọmịnị ọmịna aḅụụ kẹ ama-mẹnjị-ereme kịkama tẹ ḅụụ kẹ Balị nwẹn-sịn tamụnọ ḅe dẹrị tẹẹ, pịkị ó kuromam ịn kẹ ọ́ gbẹm nwẹn ḅẹẹ mbịaka mẹ ḅẹlẹma tẹ!

² Kụma ala-a ọ́ ḅarị ọmịnị na iḅi ḅẹ ḅara kẹ mbịaka na olivu pulo na nyana ḅịa, tẹ waịnị iru ḅarị paka ḅịa.

³ Izirẹlịapụ ma ḅarị Tamụnọ amakiri mẹ ḅụ sime ḅịa, kụma pịkị-so Ijiputi mu sime ịn pịrịm, tẹ Asiriya ḅụ ịn fị-fịa fịye fị nyanam.

⁴ Árị ja asịẹ ḅẹ amakiri ma ḅụ ini inetẹ iru sara agba ma mịẹ KỊNỊNYANAḄỌ ḅe pịrị ḅịa, anịanịa ịna agbamịẹ-aị kẹ ọ̀ pịrị. Ịna fịye anị fịḅọ-fịḅọ pilema ḅa, ḍụẹịn-ḍiḅi anga fị fịye ọkụ. Ịna pọkọ-tarịarị ḅuru mẹ deinma kịngẹ mie anị sime pịrị ye; anị ḅụ in ḍiepịrịye ḅara kẹ ọkị so KỊNỊNYANAḄỌ ḅe Warị mẹ mu ḅẹ kalịye sọ ofori.

⁵ Anịtẹso kẹ KỊNỊNYANAḄỌ ḅe kụn ḅẹ tẹ tọn wẹrị alalị ma ḅo sakị ini mịẹ ḅẹ ye tiye?

⁶ Opu ḅụụ-fụka ḅoarị sakị ḅụ, tẹ tomi ma gala-galama sakị, Ijiputi-ḅẹ-apụ in kobiri kpoo ḅụ wẹrị ḅa — in kobiri tẹ ịn kẹ ḍiḅi ḅẹ ḅara anịanga Mẹmụfịsị ḅụ! Ịna seleḅa ngọ ma na ịna sime-ayọ ma tẹ gbọrụ sakị ḅụ sime-sime anga mẹ ḅụ osuka paka ḅa pịkị nangị asịn na.

⁷ Fomu-ḅara sakị ḅo tẹẹ, tomi sime ịn pịrị gbẹẹ-ye ọkị ḅẹ sakị mẹ. Anie mẹ pakarị sakị, Izirẹlị anị nimi ḅa! Ọ́ ḅẹẹarị, “Ḅị ịkịankoroḅọ ḅe oḅori ḅọ. Ḅie tẹmẹ-jikematẹ tomḅọ ḅe ọ̀ sịḅịḅio-kuḅua.” Ọmịna si ḍụḅa ḅaka ḅara ẹrẹsị ọmịnị tomi ma ì ḍiki-ḅioḅuarị.

⁸ Tamụnọ ị̀ kẹ fịrịmatẹ ịkịankoroḅọ ḅara ḅụ tẹ ori atomi Izirẹlị ma aḅeri nụnụ. Anịsọ à mu anga mu anga ọmịnị ị̀ kẹ feni kịkama tẹ ọnya kẹ ì tuuarị. Tamụnọ ḅara-kuḅu ḅẹ amakiri ḅụ tomi ma anie si kẹ ịkịankoroḅọ tọn-arị apụ.

⁹ Ịn mịẹarị siye ḅụ ịn kẹ mịẹ-mịẹ ye ḅarị ofori, anie Gibiya ḅụ in sime sakị ịn mịẹ-mịẹ gbọrụ ḅara mẹ. Tamụnọ ịna si kẹ ḅiokoroma tẹ anị gotẹ in fomu ḅa.

Izirẹlị Si na Anị dogi-ḅo Aị na

¹⁰ KỊNỊNYANAḄỌ ḅe ḅẹẹarị, “Àrị Izirẹlị ḍọkị ẹrị sakị, anị kịkaye ịkpa ḅio so-pakarị girepu mgbọlụ sịn ḍọkị ye ọkụ. Àrị ọmịna elemu aḍapụ ma ẹrị sakị, anị kịkaye kụra mẹ ḅẹ tarị figi asịnmgbọlụ ẹrị ye ọkụ. Kụma in ḅo Pẹyọ Tụndụ la sakị, ịn saakị sunsin Balị pịrịm, tẹ ala-a in ḅo ịn ḅẹlẹmarị oru-atamụnọ ma sịḅị-ngụngụnma ḅara kẹ sịḅị-ngụngụmam.

¹¹ Izirẹlị opu mẹ feni kịka tẹ fiin so ḅa, tẹ ịn ḅarị jen kẹ awọ iyi ịn pịrị ḅịa, furatẹ-ereme ḅarị sime ḅịa, sime-kọn tẹ nwẹn ḅẹẹ sọ ḅarị mịẹ ḅịa.

¹² Kụma ịn nwẹnị paa ḍụkụ-a tẹ awọ iyim ḅẹsọ, àrị ini ọkị so ḅa, tẹ mịẹ tẹ gbọrụḅọ sọ ḍumo sime ḅịa. À mịna atomi ma kẹ gbin-koroma-so sakị, opu ḅalafama aị ịna aḅụụ paka ḅa.”

¹³ KỊNỊNYANAḄỌ, àrị inetẹ ịna awọmẹ ẹrịarị kịnị in ḍuka-ḍuka tẹ ịn ḅaam.

¹⁴ Ndẹẹ arị ị́ ḅara ḅii tẹ ị́ kẹ mịna atomi ma mịẹ ḅẹ ye? Ịna ereme mịẹ tẹ in fura-fura-a ereme sọ! Mịẹ tẹ ini inetẹ amịna awọmẹ ḍikiḍiki-a ereme sọ!

KỊNỊNYANAḄỌ ḅe Pẹlẹ Izirẹlị ọgọnọ gbana Ḅẹrẹ

¹⁵ KỊNỊNYANAḄỌ ḅe ḅẹẹarị, “Ịna si mịẹ ye mẹmgba Giligalị ḅụ saakịm. Anị anga mie à saakị in ḍiki-ḅioḅu ye. Tẹ ịn mịẹ tẹ siye mẹ ẹrẹsị, àrị ị̀ amakiri ḅụ in dee-pakama ḅa. À ḅarị jen kẹ ịn ḅẹlẹma ḅịa; ịna sịḅịdapụ mamgba kọngọ-kụrọma ị̀ pịrị tẹẹ.

¹⁶ Izirẹlịapụ ma kịkarị ye anie sịn tẹ anị ḅẹ akuno mamgba samụnọ tẹ ye, tẹ ḅarị jen kẹ mgbọlụ sụa-a ye, Ini awọ nyana ḅịa, kụma ịn nwẹnị nyana sọ, arị ịna aḅụụ yela lama wararị awọmẹ ma ḅaa ḅa.”

Ịkịankoroḅọ ḅe Izirẹlị gboloma ye Ḍukoarị

¹⁷ À fịrịmẹnjị pịrịarị Tamụnọ ḅe ori atomi sịkị ḅa, amụ ini ò poki-a ẹrẹsị. Ịn sịẹ-sịẹ ma ogboku ikelekelearị apụ sọ ḅa.