Hosiya 8 - FỊAFỊA BAỊBỤLỤ

KỊNỊNYANAḄỌ ḅe sunsin Oru-fụḅara pịrị Ḅẹrẹ-ḅarasii kẹ Izirẹlị ọgọnọ Gbanarị

¹ KỊNỊNYANAḄỌ ḅe ḍukoarị, “Akusa farị ama sịn! Wamịnị na fịya-a apụ igo amẹẹ kịka tẹ gbiima fiin ḅo ị̀ amakiri ḅụ sara tẹẹ! Ị̀ atomi àrị ini na mị ọḅọkụ mẹ sima tẹ pịkị kọngọ-kụrọma ị̀ tolumaye pịrị tẹẹ.

² Karakaraye ini ị̀ kẹ ịna Tamụnọ sịn-arị tẹ ọkịarị mịnẹ ini ị̀ atomi tẹ ì nimi wararị ḅẹsọ,

³ ini iḅiye nwẹn-sịn ye sịkị tẹ. Miemẹ ẹrẹsị ini na fịya-a apụ in ḍuka mangịma ḅa.”

⁴ “Ị̀ atomi amadapụ sẹlẹ pakama-ḅom, kụma ịna ḅiotọn ḅara mie ịn kẹ mịẹ ye. Ịn sịḅịdapụ tọnm, kụma ị̀ ḅịḅị-sọ-a ḅara. Ini ịna seleḅa na golu na ọkị tẹ kẹ oru-afụḅara mịẹm — kẹ ịna ḅụụ guluguluma ḅẹm.

⁵ À Sameriya opu ama mẹ ḅẹ apụ ma sunsin pịrịarị golu mḅudu mẹ ḍiki-ḅioḅuarị. Àrị ịn gotẹ ịganị ḅụramarị. Mu tọ sakị la tẹrẹmẹ ini ịna oru-afụḅara tẹkẹ mẹ ḅụ ḅara-siin ḅẹ?

⁶ Gbọrụ ḅara-ḍịn Izirẹlị ḅẹ ḅọ oru-fụḅara mịẹm, tẹ ḅọkọ-ḅọkọ ḅụ mamgba anị tamụnọ-a! Sameriya ḅụ ịn tẹkẹarị golu mḅudu mẹ ini anị ḅaa gẹrẹ-gẹrẹma ḅa!

⁷ Ịn fẹrụ ḍiḅiarị sakị, ini erise soku ḅa! Kpoo-kpoo-a mbịaka ḍụọ inetẹ gbala-gbala gbọrụ fịturu sọ pakama-ḅo ḅịa. Kụma anị nwẹnị ọkọ mịẹ sọ ja sịẹ ḅẹ apụ mie anị fị sin ḅarịye.

⁸ Izirẹlị ḅo ḅe jen sịẹ jen sịẹ kịka tẹ ḅarị kẹ mịẹ-mịẹye-ofori fịị tẹ ḅẹlẹ sọ tẹ.

⁹ Izirẹlịapụ piri-ḅio-ḅẹ asụ kịka tẹ kọngọ-kụrọma tẹ ịna etela muarị. In so Asiriya ḅarasụa ḍọkị ḅẹ muarị, tẹ osi asịẹ ma ọkọ tẹ ini ịn gbaịn.

¹⁰ Kụma àrị in kobiri gboloma tẹ in fomu ḅẹ-yearị. Ala-a ini akụye ḅụ gụnụ ḅa, Asiriya tomikiri mẹ daarị ḅọ ḅe in ponomarị sakị.”

¹¹ “Izirẹlịapụ ma si siin ḅẹ agbamịẹ-anga nama-nama-namarị ḅara, anie ịn pịkị si mịẹ ayọ nyana-nyana-nyanarị ḅara.

¹² À kịẹnkịẹn-ọkụ-ofori toluma-aị kẹ koro ma tomi ma pịrịm, kụma ịn kịrị aị na ja asịẹ ḅẹ aị na ḅara kẹ arị sịkịarị.

¹³ Ini agbamịẹ-mịẹ ị̀ pịrị tẹ arịḅẹ nama mẹ pẹịarị. Kụma yẹrị KỊNỊNYANAḄỌ ḅe, ịna mịẹ ye ḅẹlẹma-a, tẹ mịọkụ arị ịna si kẹ ḅiokoroma tẹ anị gotẹ in fomu ḅa; arị ịn kẹ pịkị Ijiputi fịrịma ḅa!”

¹⁴ “Izirẹlịapụ ma ama-da opu awarị nama tẹẹ, kụma ini ịn Tẹmẹḅọ kẹ ḅioḅọrọma tẹẹ. Juda ḅẹ apụ kụrọnị opu ama ma nama tẹẹ. Kụma à fịnị fịrịma mu ịna ama-da opu awarị ma na opu ama ma na dọkịma kiri lama ḅa.”