Hosiya 6 - FỊAFỊA BAỊBỤLỤ

Tomi ma Tẹmẹ-la-a Si-ḅụ-pịkị Mẹ

¹ Tomi ma ḅẹẹarị, “Ó yee wa pịkị KỊNỊNYANAḄỌ ḅe dama-mu! Ó ye kẹ wa lama tẹ, kụma piki-pikiye-ofori ò wa gwọ ḅa; ọ̀ wamịna ḅụụ ịnọ pakama tẹ, kụma ọ̀ wamịna ịnọ ma fịna ḅa, ori ọkọ mịẹ ḅịa aro?

² Maa aḍin anịanịa tẹra aḍin sakị ḅụ ọ̀ mịẹ tẹ wa naa saakị ḅa, tẹ wa ọ̀ tọrọkọ anga ḅa.

³ Ó yee wa ḅụụkụrọma tẹ KỊNỊNYANAḄỌ ḅe nimi. Gbarịma-a ḅara ḅụ ó ḅo wa la ḅa ḅaaene ḅo ḅara ḅụ, opuma sara tẹ kiri pisimarị eene ḅara ḅụ.”

⁴ Kụma KỊNỊNYANAḄỌ ḅe ḅẹẹarị, “Izirẹlị na Juda na, àrị ọ́ kẹ mịẹ ḅẹ-yearị ye tiye? Ọ́ nyana ị̀ pịrị ḅẹlẹma sarama soarị ḅara dede si-so kaan-so ḅara anị dede igirigi kịkarị anie dede-funfun ịmaịn-faarị ye mẹ.

⁵ Anie mie à gotẹ ị̀ ịkịankoroapụ kẹ ọ́ fịrịmarị ini ị̀ ḅẹrẹkọn na guluguluma na oku kẹ ḅo ọ́ pịrị. Àrị ọmịna ḅara ḅiiarị ye banabana wararị pịkị giregire wararị:

⁶ Àrị ọmịna ḅara ḅiiarị ye sakị mamgba emi ḅẹlẹma, nama agba-a. À ḅiim ị̀ atomi ị̀ nimi, dọkịma-agba mịẹ-mịẹ ị̀ pịrị-a.”

⁷ Ini amakiri mẹ sọ-mu gbọrụ-kirikiri, ini Adamụ kịka tẹ àrị ini na mịẹ ọḅọkụ mẹ kanm.

⁸ Giliyadi opu ama mẹ ḅio si-mịẹapụ na kịnị-ḅaapụ na ḅin wararị.

⁹ Agbamịẹapụ ma kịkarị apụ kụrọ-ḅara kẹ ja apụ aị ọkị ḅẹ tẹ piri akaka tomḅọ ẹbịarị apụ ogbo. Mẹnjị Sẹkẹmụ ḅụ ḅọrọ mu fịafịa yọ la-la etela ogbo mẹ kịngẹ ḅụ sọ ịn kịnị ḅaarị. Tẹ mị si mẹmgba ịn tọrụ-gelegele mịẹarị!

¹⁰ À sịḅị-jịrịmaye ẹrị tẹẹ Izirẹlị ḅụ: ị̀ atomi ịna aḅụụ pilematẹ sunsin oru-afụḅara pịrị ḅụ.

¹¹ Tẹ ọmịnị Juda ḅẹ apụ kịngẹ kụma à fomu-ḅara kẹ ọmịnị sọ pịrị ḅẹ sakị tọn-pẹlẹ tẹ ọ́ mịẹarị aị gotẹ.