Hosiya 5 - FỊAFỊA BAỊBỤLỤ

¹ “Ó miemẹ pokii, ọmịnị agbamịẹapụ! Izirẹlịapụ, ó ḅeri-tokolomaa! Ó pokii, ọmịnị amada-furo mẹ ḅẹ apụ! Kịnị ọmịnị inoma ofori ḅẹrẹ kọn ḅẹ tọrụ kẹ ó ḍikiarị — mie ḅụ ḅẹrẹkọn ọmịnị ọgọnọ gbana ḅa! Ó tuu wararị ọnya sọ wararị Mizipa ḅụ, sụa ịgbọ Tabọ Tụndụ ọgọnọ ḅụ,

² pokolotẹ olulu Akasiya Opu ama ḅụ, tẹ à fomu-ḅara kẹ ọmịnị-mgba pịrị ḅa.

³ Izirẹlị kịkarị ye à nimi wararị — árị inetẹ kẹ ị̀ ḅọịma ḅịa. Á ḅioḅẹngbọ kẹ ḅụụ ḅụ gbana na-iḅi-a ḅara sime tẹẹ, tẹ arị atomi ma in sunsin ị̀ pịrị gbẹẹ-a.”

Hosiya Oru-afụḅara tẹkẹ si kẹ Izirẹlị Ḅeri nụnụm

⁴ Tomi ma mịẹ tẹ si mẹ ḍụkụ tẹ ịn pịkịma ịna Tamụnọ dama-ḅoa. Oru-afụḅara tẹkẹ ini ọlọ kụrọma wararị, tẹ ịn KỊNỊNYANAḄỌ kẹ ye-sịn-a.

⁵ Izirẹlịapụ ma Opu ẹkwẹn mẹ mie ḅẹrẹ kẹ ịna sịḅị-sẹịn-arị. Ịna asi ịn mịẹ tẹ ịn pụmbụ tẹ ḅịkịarị, tẹ Juda ḅẹ apụ ma ini na ḅịkịarị.

⁶ Ini ịna anana ma na opu anama ma na kẹ agba mịẹ-mịẹ KỊNỊNYANAḄỌ ḅe pịrịarị, kụma anị gbọrụ iḅi sọ kẹ ịn mịẹ-a. Ini inetẹ ọ̀ ḍọkị ẹrị ḅịa, kẹ gotẹ ọkọ ḍukoarị àrị in koroma-so tẹẹ.

⁷ In ḅioḅẹngbọ-kẹ-sịrẹrẹ-niḅi-a ḅara sime KỊNỊNYANAḄỌ ḅe pịrị tẹẹ; ịna awọmẹ sime ọ̀ pịrị-a. Mie ḅụ ini na ịna amakiri ma na ala-a gulugulu ḅa.

Juda na Izirẹlị na ogboku ḅẹ Ọmụ

⁸ Ọmụ ọdụ ma ofuro Gibiya ḅụ! Saakị Rama fiema! Bẹtẹlị ọmụ oloku mẹ saakị! Benijamịnị ḅẹ owiapụ, ọmịnị ọmụ ḅio sọ-mu.

⁹ Fomu-ḅara ene ḅoarị, tẹ Izirẹlị faa-fama ḅa. Izirẹlịapụ, miemẹ paka-a so ḅịa!

¹⁰ KỊNỊNYANAḄỌ ḅe ḅẹẹarị, “Àrị ịganịarị Juda ḅẹ sịḅịdapụ ma ọmụ kẹ Izirẹlị koro tẹ á kiri furu tẹ ẹrẹsị. Mie ḅụ à fomu-ḅara ọsụma ịna ọgọnọ sara ḅarị ḅara ẹgẹnẹ-minji seri sọ ḅara kịka ḅa.

¹¹ Izirẹlị ponoma tọrụsiẹrị ẹrịarị; árị á soku-ḅẹ kiri fama tẹẹ; àrị inetẹ ḅarasụa á pịrị ḅịa apụ dama-mua mu-a ịgbanịarị ẹrẹsị.

¹² À guluguluma ọkị-ḅo Izirẹlị ọgọnọ gbana tẹ Juda ḅẹ apụ fama ḅa.”

¹³ “Izirẹlị árị obi la ḅara ẹrị sakị, tẹ Juda á la aị ḅẹ ịnọ ma ẹrị sakị, Izirẹlị nwẹnị Asiriya mu tẹ tomikiri mẹ daarị opuḅọ ḅe ḅara ḅarasụa ḅii, kụma ori inetẹ ịn gwọ-a anịanịa ịna ịnọ ma mịẹ ḅịyama.

¹⁴ Àrị ọkụkụ kịka tẹ owu kẹ Izirẹlị na Juda ḅẹ apụ ma paka ḅa. Yẹrị ḅarana ịn kanị-kọsịma ḅa, anịtẹso àrị ịn kẹ gbin koroma ḅa. Àrị ịn fọnọ so sakị, gbọrụḅọ-sọ inetẹ ịn ḅọrọma ḅịa.

¹⁵ Àrị ị̀ atomi kẹ gbin koroma-so nwenii ịn tọrụsiẹrị furo ḅinma ḅa ịna asi ma gotẹ, tẹ in ḅo ị̀ ḍọkị ḅa. Ẹbịsịya ịna tọrụsiẹrị ḅụ ịn ḅụụkụrọma ị̀ ḍọkị ẹrị ḅa.”