Hosiya 2 - FỊAFỊA BAỊBỤLỤ

¹ Mie ḅụ ọmịnị ọmịna pembema Izirẹlịapụ ma sịịn, Ami na Ruhama na.

KỊNỊNYANAḄỌ Ḅe Ama-mẹnjị Goma Kẹ Izirẹlị Na Tọmam

² Ị̀ awọmẹ, ọmịnị ọmịna iyingiḅọ na ẹkwẹnmaa — karakaraye árị ḅarị jen kẹ ị̀ ta-a, tẹ yẹrị pịkị ḅarị jen kẹ á di-a sọ. Ọmịnị árị na ẹkwẹnma tẹ árị á sẹfị na ama-mẹnjị na ḅụ ḅara-siin.

³ Á ḍụkụ-a ḅẹḅẹ, àrị á paụma fama tẹ árị ini árị iyi ene mẹ ḅụ á sime-ḅara sime ḅa. Àrị á mịẹ tẹ árị ịkpa kịka ḅa, tẹ á minji-pọkọtarị ḅụ fịị ḅa.

⁴ Àrị ọkụrụkụrụ nyana árị awọmẹ pịrị ḅịa, ini ḅụụ-jịrị-jịrị-a sẹfị-ẹrẹḅọ awọmẹ ẹrẹsị.

⁵ Ịna iyingiḅọ ḅioḅẹngbọ-kẹ-sịrẹrẹ-niḅi-a ḅara sime tẹ tọrụ-tuu ḅụ in furam. Árị mẹẹ, “Àrị ị̀ ḅẹlẹmapụ ma ḍuka-mu ḅa, anie fịye na minji na, oḅoku-dee-ḅịtẹ na, ferefere-ḅịtẹ na, pulo na iru na kẹ ị̀ pịrịarị apụ ma.”

⁶ Mie ḅụ à nangị asịn kẹ á gbori-ikelema ḅa, pịkị ḍụḅarị onu nama árị etela kiki ḅa.

⁷ Á mangị á ḅẹlẹmapụ ma ḍuka-mu ḅa, kụma árị inetẹ ịn la ḅịa. Árị ịn ḍọkị ḅa, kụma árị ịn ḍọkị ẹrị ḅịa. Anịtẹso á ḅẹẹ ḅa, “À pịkịma-so ị̀ tarị diḅọ ḍọkụma-mu ḅa — anị sakị ḅụ ye ị̀nịna iḅi mịọkụ nẹngịm.”

⁸ Gbala-gbala á minini ḍụkụ-a mịnẹ yẹrị anie mgbọlị-fịye mẹ na, iru mẹ na, olivu-olo mẹ na, seleḅa mẹ na, golu mẹ na kẹ á pịrị tẹ á kẹ mu sunsin Balị pịrị ḅọ ḅee.

⁹ Mie ḅụ fịye-soku sakị ḅụ, àrị à kẹ á pịrị mgbọlị-fịye mẹ na, iru mẹ na, oḅoku-dee-ḅịtẹ mẹ na, ferefere-ḅịtẹ mẹ na tẹ á kẹ á ḅụụ gbaịn-arị aị ma ọkị ḅa.

¹⁰ Á ḅẹlẹmapụ ma tọrọkọ ḅụ àrị á paụma ḅa, tẹ gbọrụḅọ-sọ inetẹ ị̀ kụrọ ḅụ á ḅọrọma ḅịa.

¹¹ À mịẹ tẹ árị alalị mamgba kuno ḅa — kụra-kụra na akalụ-akalụ na alalị ma na, Ịnyọsara-Ene ma na, fịafịa-akobiri ma na.

¹² Àrị á girepu-aḍụọ ma na figi-aḍụọ ma na guluguluma ḅa, anie á ḅẹlẹmapụ ma kẹ á mẹnjị ịn pịrị fịrị ḅụ á pịrị aị ma. Àrị á girepu-aḍụọ ma na figi-aḍụọ ma na kẹ piri-piri-piri sọma ḅa, tẹ piri-ḅio-ḅẹ anama arị guluguluma ḅa.

¹³ À fomu-ḅara kẹ á pịrị ḅa árị ị̀ kẹ ḅioḅọrọma asakị ma gotẹ, anie á dọkịma-kụnụaị dọkịma Balị pịrị tẹ ye-ḅiri bụlụ-bụlụma tẹ mangị á ḅẹlẹmapụ ḍuka-ḍuka-mu asakị ma. Yẹrị, KỊNỊNYANAḄỌ ḅe, ọkọ ḍukom.

KỊNỊNYANAḄỌ Ḅe Nyana Ori Atomi Pịrị Ḅẹlẹma

¹⁴ Mie ḅụ àrị á kẹ so ịkpa mẹ ḅio mu ḅa. Anịanga ḅụ à ḅẹlẹma ẹkwẹn kọn tẹ kẹ á nyana ọkị ị̀ ḅụụ pịrị ḅa.

¹⁵ Àrị á nyana sime girepu-aḍụọ ma kẹ siin á pịrị ḅa, tẹ Ḅụụ-fụkamarị Tụndụ-suku mẹ kẹ Ḅiokpọmarị Ḅọkọ sọma ḅa. Á minini ị̀ pịrị ḅa anịanga ḅụ, anie árị iriawọ sakị á mịẹ ḅara mẹ, árị Ijiputi ḅụ paka-ḅo sakị.

¹⁶ Anịtẹso á pịkị siin gbọrụ sakị kẹ “ì di” kẹ ị̀ sịn ḅa — á ḅarị jen kẹ “ị̀ Balịị” kẹ ị̀ sịn ḅịa.

¹⁷ À ḍụkụ tẹ á ḅarị jen kẹ ḅịḅị kẹ Balị ẹrẹ go ḅịa.

¹⁸ Anị ene mẹ ḅụ, à piri-ḅio-ḅẹ anama mamgba na feni mamgba na ọḅọkụ fị ḅa, mịẹtẹ in ye kẹ ị̀ atomi lama ḅịa ḅara. À pịkị amakiri mẹ ḅụ ọmụgbin-aị mamgba ḅelema ḅa, okologie mamgba na iboli ma na, tẹ mịẹ tẹ ị̀ atomi dein na kpaịnma na ḅụ anga ḅa.

¹⁹ Izirẹlị, àrị ị́ kẹ ị̀ ta mịẹ ḅa. À karakara na ḅioḅẹngbọ-kẹ-sịrẹrẹ-niḅi ḅara na sime ḅa. À kuno-kuno-a ḅẹlẹma na ọkụrụkụrụ na nyana ị́ pịrị ḅa, tẹ í sime ị̀ pịrị mu ḅẹẹ-sakị ḅẹẹ-sakị la ḅa.

²⁰ Àrị à minini ye mịẹ tẹ ị́ mịẹ tẹ í sime ị̀ pịrị ḅa, tẹ ị́ mịẹ tẹ ị́ KỊNỊNYANAḄỌ ḅara kẹ ị̀ ọkị ḅa.

²¹ Anị ene mẹ ḅụ, yẹrị KỊNỊNYANAḄỌ ḅe tọn So-tọrụ mẹ pịrị tẹ anị Kiri mẹ ḅụ eene koroma ḅa,

²² tẹ Kiri mẹ mgbọlị-fịye na, iru na, pulo na pakama Jẹzirili pịrị ḅa.

²³ À mịẹ tẹ ị̀ atomi ịna amakiri mẹ ḅụ sime tẹ lolo ḅa. Àrị ọkụrụkụrụ kẹ tomi kẹ “Ọkụrụkụrụ Nyana-a” sịn apụ ma ḍie ḅa, tẹ ini ma tẹ tomi kẹ “Ị̀ Atomi-a” sịn apụ ma ḅụ, à ḅẹẹ ḅa, “Ọmịnị ị̀ atomi” tẹ ịn pakịrị ḅa, “Ị́yẹrị wamịna Tamụnọ.”