Hosiya 12 - FỊAFỊA BAỊBỤLỤ

¹ Izirẹlịapụ ma mịẹ arị ye goyegoye, dee-dee ḅụ ọkị mu ḍin la, kẹ mịẹ ye ḅụụ sun-suu ye ofori pịkị ye guluguluma ye. Mbasị na gbiri-gbiri-gbiri na ịna ogboku ḅaka tẹẹ. Ini Asiriya na ọḅọkụ fị tẹ Ijiputi na ọḅụ mẹnjịarị.

² KỊNỊNYANAḄỌ nyana tẹ kẹ Izirẹlịapụ ma sịḅị-sẹịn ḅẹ ye emi, ọ̀ pịkị Juda fomu ḅa árị atomi ye mịẹarị ḅara gotẹ. Ori ịn mịẹ tẹ aị mamgba kẹ ịn gbẹ ḅa.

³ Ịna elemu ḍaḅọ Jekọbụ ḅe ori iyimbere Ịsọ maa apụ awọmẹ ḅe na nụnụam ini ịna iyingiḅọ furo ḅio ḅụ ịn paa emi ogbo; Jekọbụ ḍụḅa paka-ḅo sakị, ọ̀ Tamụnọ na owu-sọm —

⁴ ori enjẹlị na owu-sọ tẹ owu-ḅara-iḅi nyanam. Ori owu-owu tẹ boma ḅiim. Tẹ Bẹtẹlị ḅụ Tamụnọ ḅo wamịna elemu ḍaḅọ Jekọbụ la tẹ ori na ẹkwẹnm.

⁵ Ḅieḅe anie KỊNỊNYANA-TAMỤNỌ, Kụrọmamgba Nyanaḅọ ḅe. KỊNỊNYANAḄỌ ḅe anie ẹrẹ mẹ tẹ kịnị kẹ sunsin ọ̀ pịrị ḅarịye mẹ.

⁶ Mie ḅụ mịọkụ, Jekọbụ furo-ḅẹ-apụ, ọmịnị ọmịna Tamụnọ kẹ ḅiokpọma tẹ pịkị ọ̀ dama-mu. Ọ́ ḅioḅẹngbọ-kẹ-sịrẹrẹ-niḅi ḅara sime tẹ jụmọ la kiri kẹ mḅọ pịrị tẹ inema tẹ koru, ọmịna Tamụnọ ḅe ye mịẹ ḅa.

Ja Ḅẹrẹkọn Aḅịḅị

⁷ KỊNỊNYANAḄỌ ḅe ḅẹẹarị, “Izirẹlịapụ ma kịnị mingirimarị Kenanị ḅẹ apụ ma mịẹ-mịẹ ḅara; ini ịna tuḅoniapụ inomarị la-a ye-tọn-aị ḅụ.

⁸ Ịn ḅẹẹarị, ‘Wa ye-kọn tẹẹ, wa ye nyana sara tẹẹ. Tẹ gbọrụḅọ-sọ inetẹ wa kịnị-inoma ḅara kẹ ngọ-kọnm ḅẹ ye kẹ wamịna sịḅị-sẹịn ḅịa.’

⁹ Kụma yẹrị, KỊNỊNYANAḄỌ ọmịna Tamụnọ ḅe tẹ Ijiputi ḅụ ọmịna tọrọkọ-sụn tẹ ọ́ pakama-ḅo ḅọ ḅe, à mịẹ tẹ ó siin akpụrụ-awarị ḅio anga ḅa, anie à ịkpa ḅio à ḅo ọ̀ la sakị ọ́ mie sime-ḅara mẹ.”

¹⁰ “Àrị ẹkwẹn ịkịankoroapụ ma pịrị tẹ tọnwa ịkịan kẹ in ḍiem, tẹ ịkịankoroapụ ma ḅụ mie à ḅọrọ tẹ tọnwa ḅeri nụnụ aị kẹ ị̀ atomi pịrị ye.

¹¹ Anịsọ ịn paa sunsin oru-afụḅara pịrịm Giliyadi ḅụ, tẹ sunsin arị pịrị apụ ma ịn fịị ḅa. Giliyadi ḅụ ịn nambulo-nambulo-nambulo kẹ agba mịẹm, tẹ anịanga ḅụ agbamịẹ-anga ma ḅo papaa kobiri-kobiri kirikiri ḅụ kpolima wararị aḍụḅarị sọ ḅa papaa finji sara wararị ḍụọ kọrị-a kiri ḅụ.”

¹² Ye sime-ḅara ḅụ wamịna elemu ḍaḅọ mangị Mẹsopotemịya mum, anịanga ḅụ, ẹrẹḅọ sime ḅẹ gotẹ ọ̀ kọrịnama kọrị jen tomḅọ pịrị tẹ tomḅọ ḅe anana kokom.

¹³ KỊNỊNYANAḄỌ ḅe ịkịankoroḅọ fịrịma mu ori atomi Izirẹlịapụ ma pụkọ-pakamaḅom ikoli ḅara-ḅio Ijiputi ḅụ, ori in koko ḅẹ ḅara.

¹⁴ Izirẹlịapụ ma KỊNỊNYANAḄỌ ḅe mịẹ tẹ ọ̀ tẹmẹ-akụ ḅara kẹ ịganị tẹẹ; ịna si amịẹaị gotẹ ịn fịị gbẹ tẹẹ. KỊNỊNYANAḄỌ ḅe in fomu ḅa in dogi-ḅo ori ọgọnọ gbana tọrụ-tuu gotẹ.