Hiburu 8 - FỊAFỊA BAỊBỤLỤ

Jizọsị, Wamịna Sịḅịda-Agbamịẹḅọ

¹ Wa ḍukoarị aị ma ḅẹ sịḅị anie, wa ọkọ sime gbọrụ Sịḅịda-Agbamịẹḅọ nyana wararị, tẹ So-ḅio simearị Opu Tamụnọ ḅe emine mẹ ḅẹ ama-ḅara anga lẹgị wararị.

² Fịafịa-tẹịn Yọ mẹ ḅụ mie ò sime tẹ Sịḅịda-Agbamịẹḅọ fịrị mẹ mẹnjịarị, karakara akpụrụ tẹkẹ-warị mẹ tẹ KỊNỊNYANAḄỌ ḅe ḅarana nama, tomḅọ nama-a ye mẹ ḅio.

³ Sịḅịda-Agbamịẹḅọ ịn nwẹn-sịn goḅọ-goḅọ, in gotẹ mḅọ tọn pakama ye anie, mḅọ ḍiepịrị-aị daḅọrọma Tamụnọ pịrị, tẹ pịkị nama agba mịẹ ọ̀ pịrị; tẹ mị-ḅara ḅụ wamịna Sịḅịda-Agbamịẹḅọ ḅe sọ nyana tẹ daḅọrọma Tamụnọ pịrị ḅẹ ye emi.

⁴ Ò tomikiri emi namịna, ọ̀ ḅarị agbamịẹḅọ sọ-a so tẹ, Juu-ḅẹ-apụ Oloko mẹ ḅii ḅara ḅụ ḍiepịrị-aị daḅọrọma Tamụnọ pịrịarị apụ emi sakị goyegoye.

⁵ Karakara-ḅara-ḅụ, ini kọrịarị agbamịẹ kọrịnama mẹ anie papaa kẹ So-ḅio ḅẹ ye mẹ tọnma tẹ mịẹarị ye, ịrụa ḅịya ye sarama tẹ anị ḅẹ tẹmẹ tọn ḅara pembe ye. Anie Mozizi eneḅaka ḅụ sọ anị sime gbọrụ ḅara mẹ. Ori ọḅọkụ Akpụrụ-warị mẹ nama ḅẹ-yearị sakị, Tamụnọ ọ̀ ḅẹẹm, “Ẹrị mịnẹ í ye goyegoye kẹ tụndụ mẹ ọgọnọ ịn kẹ í ḍie ḅara mẹ ḍiki tẹ mịẹm.”

⁶ Kụma mịọkụ, Tamụnọ agbamịẹ fịrị kẹ Jizọsị pịrị tẹ, iḅi ịna nye nẹngị lama ye, anie pịkị Tamụnọ na tomi na ogboku ọ̀ tọn pakama ọḅọkụ mẹ sọ iḅi tarị ye mẹ nẹngị ḅara, anie iḅi tarị aị ma nẹngịm minini pịrị-aị ḅụ anị sịrẹrẹ wararị ẹrẹsị.

⁷ Tarị ọḅọkụ mẹ ḅụ si anga ofori namịna, kẹ gotẹ maaịn karama ye kẹ ḅo-ḅo ye ofori.

⁸ Kụma mị ẹkwẹn mẹ kọn sakị KỊNỊNYANA-TAMỤNỌ ḅe anị kẹ ori atomi ma si goarị, “KỊNỊNYANAḄỌ ḅe ḅẹẹarị, ene ma ḅoarị, arị ịwọ ọḅọkụ kẹ Izirẹlịapụ na, Juda ḅẹ atomi ma na fị ḅẹ sakị mẹ.

⁹ Anị à ḅara kẹ ini atẹngịapụ ma ọlọ tẹ Ijiputi ḅụ ịn pakama-ḅo eneḅaka mẹ ḅụ arị ini na fị ọḅọkụ mẹ na kịka ḅịa. In ḅioḅẹngbọ-kẹ-sịrẹrẹ-niḅi ḅara sime àrị ini na fị ọḅọkụ mẹ pịrị-a, anie ḅụ yẹrị sọ ḅarị ịn bala-a.

¹⁰ KỊNỊNYANAḄỌ ḅe pịkị ḅẹẹarị, mịọkụ, mie àrị Izirẹlị ḅẹ atomi ma na fị ḅarị ọḅọkụ mẹ, ḅo ḅarị ene ma ḅụ, àrị ì oloko ma kẹ ịna akuroma ḅụ suu ḅa, tẹ pịkị mịẹtẹ ịna aḅioḅẹngbọ ḅụ ịna ḅioḅọrọ ḅịa. Àrị ịna Tamụnọ sọ ḅa, tẹ ini pịkị ị̀ atomi sọ ḅa.

¹¹ Ịna ḅụ gbọrụḅọ-sọ amịna ama ḅẹ ḅọ toluma ḅịa, anịanịa mḅọ na gbọrụ sịẹ ḅẹ ḅọ ḅẹẹ, ‘KỊNỊNYANAḄỌ ḅe nimii.’ Kẹ gotẹ ọkọ ḍukoarị, inimgba ì nimi ḅa, iderima tẹịnḅọ ḅụ saakị mu opu sọ tẹịnḅọ la.

¹² Àrị ịna asi wẹrịso ḅa, tẹ à ḅarị jen kẹ ịna amịẹ-irima ma kẹ ḅiokoroma ḅịa.”

¹³ Ịwọ ọḅọkụ ḅẹrẹ ḍuko ḅụ, Tamụnọ tarị ye mẹ kẹ elemu ye mịẹ tẹ; anịsakị elemu tẹ ḅarị mịẹye ḅụ sọ-a ye goyegoye ḅarị sime tẹ kịnị ẹrị ḅịa.