Hiburu 5 - FỊAFỊA BAỊBỤLỤ

¹ Sịḅịda-Agbamịẹḅọ goḅọ-goḅọ, tomina ogboku ḅụ mie ini mḅọ sẹlẹ pakama-ḅo tẹ mḅọ tomi ma gotẹ Tamụnọ fịrị mẹnjịarị ye, tẹ tomina asi gotẹ kẹ ḅo agbamịẹ-aị na ḍiepịrị-aị na da ḅọrọma Tamụnọ pịrịarị ye.

² Ori sọ tọnwa aḅọkọ ḅụ ịnyọ nyana-a ḅọ ḅara ḅụ, ori inetẹ ọkụrụkụrụ nyana ḅara kẹ ini na mịẹ ḅa, ịna ye-nimia na mịẹ-irima ma na ḅụ.

³ Tẹ ori sọ ịnyọ nyana-a ẹrẹsị, ò tomi ma asi ngẹrị gotẹ agba mịẹ-a, kụma ò soku-ḅẹ asi sọ ò gotẹ mịẹarị.

⁴ Gbọrụḅọ-sọ ḅarana Sịḅịda-Agbamịẹḅọ kiri mẹ ḅẹ kụn mẹ sẹlẹ ḅụụ pịrị pịrị-a; Tamụnọ sịn-ḅịḅị ḅụ ngẹrị mie tomḅọ ḅọrọ tẹ Sịḅịda-Agbamịẹḅọ sọarị — anie anị sime Erọnị sọ pịrị ḅara.

⁵ Anị gbọrụ ḅara mẹ ḅụ, Kịrayịsị ḅarana Sịḅịda-Agbamịẹḅọ kụn mẹ ọkị ḅụụ pịrị-a. Anie nakara Tamụnọ ọ̀ ḅẹẹm, “Ị́yẹrị ị̀ Tụḅọọ; mịmgba mie àrị ị́ Ḍa sọ ye.”

⁶ Jen anga ḅụ sọ ọ̀ ḅẹẹm, “Ị́ agbamịẹḅọ sọ gbamaso ḅa, Mẹlịkizẹdẹkị agbamịẹ ọrụ sime-ḅara.”

⁷ Jizọsị tomikiri ḅẹ ḍumo ḅụ sime, sime sakị, oloku-oloku owu na, tọrụ owu-aminji sara na, mie ọ̀ kẹ Tamụnọ tẹkẹ, tẹkẹ tẹ ọ̀ ḅara ye ḅii ye, ori anie inetẹ fịị ḅụ ọ̀ ḅọrọma ḅẹ ḅọ ḅara ḅụ. Ọ̀ ḅụụ-lẹgịma tẹ tẹmẹ-la ḅara kẹ tẹkẹm ẹrẹsị Tamụnọ pịkị ọ̀ tẹkẹ naam.

⁸ Karakaraye, ori Tamụnọ Tụḅọ sọ, tọrụsiẹrị ḅụ mie ọ̀ ḅọrọ tẹ ḅịḅịpoki ḍawọ ḅo ye.

⁹ Tamụnọ mịẹtẹ ò ḅo kara-gbasị tẹso, ò sime gbamaso ḅọrọma nyana ḅẹ ḅọkọ sọ ọ̀ ḅịḅị poki apụ mamgba pịrịm,

¹⁰ tẹ Tamụnọ ḍuko pakamam, mịnẹ ori anie Sịḅịda-Agbamịẹḅọ, Mẹlịkizẹdẹkị agbamịẹ ọrụ sime-ḅara ḅụ.

Ịn kẹ Mininiye Mẹ Ḅụ Ḅara-siin-arị Apụ Ḅeri Nụnụ Ye

¹¹ Mị ḅẹrẹ mẹ ḅụ wa nyana tẹ ḍuko ḅẹ aị ḅakam, kụma ḍuko finji ọ́ pịrị mẹ ḅụụ-fụkamam, ọmịnị inetẹ sarasarama ye fiearị ye naa ḅo ḅo-a ẹrẹsị.

¹² Ọ́ sakị nyana lamam, ọ́ kẹ ye kẹ ja apụ toluma ḅẹ apụ sọ — anịsọ ọ́ paa ḅiiarị kịnị Tamụnọ oku mẹ ḅẹ Suku-saakị aị ma kẹ ó tolumaa, mịọkụ mẹ ḅụ sọ. Ọ́ kụrọtẹ fịye fị ḅẹ nakara, ọ́ paa ndo-ndoarị.

¹³ Paa ndo-ndo ḅẹ ḅọ mẹ mḅọ anie paa kalatụḅọ, mḅọ amụ paa kuraye na kura-aye na gbolomaye ḅẹ nimi nyana-a.

¹⁴ Osi pakịrị anga kẹ anị ḍiki kụma, kụrọtẹ fịye mẹ sime ḍụḅa paka-ḅo tomi la tẹ apụ pịrịm, anie sakị mamgba anị mịẹ ḅụ inetẹ iḅi na si na ḅẹ kịrị lekiri ḅẹ apụ.