Hiburu 4 - FỊAFỊA BAỊBỤLỤ

¹ Mịọkụ, Tamụnọ minini wa pịrị tẹ, mịnẹ ò ḍuko wararị ịnyọsara mẹ wamịna ḅara la ḅa. Ọkọẹrẹsị, ó yee wa ẹbị, mịnẹ ọmịna ḅụụ gbọrụḅọ-sọ Tamụnọ minini ịnyọsara mẹ nyana-a som.

² Kẹ gotẹ ọkọ ḍukoarị, ịn naa gbọrụ ḅara mẹ mie mịọkụ wamịnị sọ Iḅi-Oku mẹ naa tẹ ḅara. Ịn naa oku mẹ gbọrụ iḅi sọ kẹ ịn mịẹ-a, in minini nyana ḅara kẹ anị daa-ọkịa ẹrẹsị.

³ Anịsakị wamịnị minini nyana apụ ma Tamụnọ minini ori atomi pịrị ịnyọsara mẹ nyana tẹ. Anie ọ̀ paa ḍuko ḅara mẹ, “Àrị ịganị tẹ tẹmẹ-la ḅara kẹ karịm, Ini ma à minini ịn pịrị tẹ ịnyọsara mẹ ḅio, gbala-gbala ịn sọ-mu ḅịa!” Ó miemẹ ḍukom, karakara ye, tomikiri mẹ tẹmẹ kọrịnama mẹ, Anịngẹ-kụraḅio ọ̀ ḅara fa tẹ ḅẹ sọ.

⁴ Fịafịa Ḍiri mẹ ḅio ḅẹ gbọrụ pakịrị ḅụ mie ịn sọnọma aḍin karama ene gbolomaye ḅụ ḍuko ye: “Sọnọma aḍin karama ene mẹ ḅụ Tamụnọ ọ̀ kọrịnama mẹmgba ḅụ ịnyọsaram.”

⁵ Mị gbọrụ ḅẹrẹ mẹ ịn paa anị gboloma ye ḍukoarị: “À kẹ ịn pịrị ḅẹ ịnyọsara mẹ, gbala-gbala ini anị ḅio sọ-mu ḅịa.”

⁶ Tarị tarị Iḅi Oku mẹ naa apụ ma anị ịnyọsara mẹ nyana-a, in minini nyana-a ẹrẹsị. Anịsọ minini tẹ anị nyana apụ emi.

⁷ Wa kẹ miemẹ ẹrị ye anie, Tamụnọ jen ene tọn pakamam, ịn kẹ “Mịmgba” sịn ene mẹ. Tọnwa akụra ḅọrọ tẹ sakị ḅụ ò Devidi ḅụ ḅọrọ tẹ ḍukom, anie Fịafịa Ḍiri mẹ tẹ gotẹ ḅọrọ tẹ ye mẹ: “Mịmgba ọ́ Tamụnọ pọkọ naa ḅẹḅẹ, ọ́ kọngọ kụrọma ma.”

⁸ Jọsụwa nwẹnị Tamụnọ minini tomi ma pịrị ịnyọsara mẹ kẹ ịn pịrị namịna, Tamụnọ ḅarị jen Ịnyọsara-Ene gbolomaye ḍuko ḅịa, anị sakị mẹ ḅọrọ tẹ sọ.

⁹ Anị sime-ḅara, sime-ḅara sọ, Ịnyọsara-Ene paa sime Tamụnọ atomi pịrị wararị, Tamụnọ sọnọma aḍin karama ene mẹ ḅụ ọ̀ kọrịnama ḅụ ịnyọsara ḅara pembe ḅara.

¹⁰ Anị ịnyọsara mẹ tẹ Tamụnọ minini ye mẹ, ḅara la ḅọ, la ḅọ mḅọ amịna kọrịnama ḅụ ịnyọsara ḅa, Tamụnọ amịna nye ḅụ ịnyọsara ḅara.

¹¹ Ọkọ ẹrẹsị, ó yee wa inetẹ ḅara, inetẹ ḅara mịẹ, tẹ anị ịnyọsara mẹ wamịna ḅara la, mịẹtẹ wamịna ḅụ anị gbọrụḅọ-sọ gbarị ḅịa ḅara, anị in minini nyana-a ẹrẹsị ịn gbarị ḅara mẹ.

¹² Tamụnọ ẹkwẹn mẹ ḍumo wararị, anị pịkị kụrọ nyana tẹ kẹ ye mịẹarị, anị oḅu maa tọrụ sụa okologie nẹngịm. Anị inetẹ pẹlẹ sọ-mu la ḅịa anga ofori, so mu tomḅọ ḍumo mẹ na mḅọ tẹmẹ na ḅo bịama wararị anga la, mu pịkị anda na iko na gboloma wararị anga sọ laarị. Anị mie tomḅọ ḅioḅẹngbọ ḅụ simearị aị na mḅọ ḅiiarị aị na, kuromarị aị ma na kọn-arị.

¹³ Tamụnọ ḅụ inetẹ kikima ḅarị gberie-sọ ofori, ori tẹmẹ ye goyegoye ọ̀ tọrọkọ finji sara wararị. Anịsakị ori mie wa pịkị kọn-arị mẹnjị kọn-arị mẹnjị ḍuko pịrị ḅarị ḅọ.

Jizọsị, Opu Sịḅịda-Agbamịẹḅọ Ḅe

¹⁴ Ọkọẹrẹsị, ó yee wa kụrọma wa ḍuko finjiarị mininiye mẹ ọlọ sịẹma. Kẹ gotẹ ọkọ ḍukoarị, wa gbọrụ opu Sịḅịda-Agbamịẹḅọ nyana wararị, tẹ tolu-ḅọrọ mu gbọrsịḅị Tamụnọ tọrọkọ la tẹ ḅọ, Jizọsị, Tamụnọ Tụḅọ ḅe.

¹⁵ Wamịna Sịḅịda-Agbamịẹḅọ ḅe anie inetẹ ọkụrụkụrụ nyana wamịna ịnyọ ofori ma pịrị ḅịa ḅọ-a. Kụma wa nyana wararị Sịḅịda-Agbamịẹḅọ ḅe anie, ịn ḅọkọ-ḅọkọ ḅụ, ịn wa daaḍikiarị ḅara kẹ daaḍiki tẹ kụma gbọrụ si sọ mịẹ-a ḅọ.

¹⁶ Ọkọẹrẹsị, ó yee wa ḅalafa-a ḅara kẹ Tamụnọ ḍiki-ḅụụjịrị emine mẹ dama-mu, ḍiki-ḅụụjịrị emi anga mẹ. Anịanga wa ọkụrụkụrụ na ḍiki-ḅụụjịrị na nyana tẹ kẹ ḅarasụa ḅụụ pịrị ḅa, wa ḅii sakị, ḅii sakị.