Hiburu 2 - FỊAFỊA BAỊBỤLỤ

Opu Ḅọrọma Mẹ

¹ Anie mẹ mie wa gotẹ wa naa tẹ akarakara mamgba fịnama sịẹma na-iḅi ye, ọkọ-a kụma tomikiri mẹ ḅofa minji anị ḅio tẹịn-arị ye fọnọ-so ḅara kẹ wa fọnọ-so.

² Enjẹlị apụ ḅụ ḅọrọ ḅo wamịna atẹngịapụ ma la oku mẹ karakara ye sọm, tẹ anị ḍukamẹnjị tẹ anị ḅẹẹ ḅara mịẹ-a apụ pịkị ịn da na-iḅi fomu-ḅara dam.

³ Nwẹnị ọkọ kụma, ndẹẹ fomu-ḅara wa gbarị ḅẹ ḅara wa nwẹn sime opu ḅọrọma mẹ kẹ ye-sịn-a kụma? KỊNỊNYANAḄỌ ḅe ḅioju ḅarana tarị mị ḅọrọma mẹ ḍuko wasamam, tẹ ó ḍuko ye mẹ naa apụ ma kẹ wa ḍie tẹ mịnẹ oku mẹ karakaraye.

⁴ Anị gbọrụ sakị mẹ ḅụ Tamụnọ sọ in ḍuko ye mẹ mịẹ kụrọmam, ḅụụ-buama-aị na, ḅụụ-gbiripuma-aị na, Fịafịa Tẹmẹ ḅe ḍiepịrịye kẹ ọrụḅọ-ọrụḅọ pịrị na ḅụ, anị ọ̀ ḅụụ-ḅẹlẹ ḅara ḅụ.

Jizọsị, Tọrọkọ Sụn Wa Pịrị Mu Ḅọrọma Laarị Ḅọ

⁵ Ḅo ḅarị ịwọ tomikiri mẹ, tẹ wa ḍukoarị ye mẹ, Tamụnọ amụ tọn-a mịnẹ enjẹlị apụ anị da tẹ ḅẹrẹtọn ḅa.

⁶ Anie nakara Fịafịa Ḍiri mẹ ḅẹ gbọrụ pakịrị ḅụ anị ḅẹẹ wararị: “yei, Tamụnọ, tomi ḅọrọ tiye, tẹ ị́ ịn kẹ ḅiokoroma ḅẹ; papaa tomi ma tẹ ị́ ịn bala ḅẹ?

⁷ Ị́ ịn mịẹtẹ boowa kala asakị ḅụ ịn iderima enjẹlị apụ nẹngịm; ị́ nwẹnị ebube na kụn na ama-da sun kẹ ịn sure,

⁸ pịkị mịẹtẹ ịn ḅẹrẹtọn tomikiri sime aị mamgba pịrị ḅẹ ḅọ sọm.” Anị mẹẹ, Tamụnọ tomi mịẹtẹ ịn “ḅẹrẹtọn tomikiri sime aị mamgba pịrị ḅẹ atomi sọm” mẹ, ye goyegoye giregire ḅara kẹ anị ḅụ emi. Anịsọ mịọkụ tomi ḅẹrẹtọn ye goyegoye pịrịarị ḅara amụ wa ọkọ ẹrị-a.

⁹ Kụma wa ẹrịarị ye anie, Jizọsị, Tamụnọ mịẹtẹ boowa sakị kẹ iderima enjẹlị apụ nẹngị ḅọ ḅe, Tamụnọ ḍiki-ḅụụjịrị ḅụ, ḅo fịị ḅẹḅọ-ḅẹḅọ pịrị tẹẹ. Mịọkụ wa ẹrị tẹ mịnẹ Tamụnọ ebube na, kụn na, ama-da sun kẹ ò sure tẹ, ọ̀ fị ḅụ tọrụsiẹrị ye gotẹ.

¹⁰ Anị kuram, mịnẹ Tamụnọ, tẹ ye mamgba tẹmẹ tẹ pịkị wẹrị kpaịnmarị ḅọ ḅe, mịẹtẹ Jizọsị tọrụsiẹrị ḅụ ḅọrọ tẹ kara gbasịm, mịẹ tẹ ọ̀ tọnwa awọmẹ ọkị-ḅo tẹ ini ori ebube ḅụ ḍie kiri nyana ḅẹ ḅara. Kẹ gotẹ ọkọ ḍukoarị, Jizọsị ḅe anie tọrọkọ-sụn tẹ ịn kẹ mu ḅọrọma laarị ḅọ.

¹¹ Ori anie tomina ḅụụ ịna asi sịkịrị sin-arị ḅọ, anịsakị ori ịn sịkịrị fịafịamarị ḅọ ḅe na ọ̀ sịkịrị fịafịama tẹ apụ ma na, gbọrụ Ḍaḅọ. Anie Jizọsị gotẹ ḅụụ-jịrị-a tẹ ori amịnapụ kẹ ịn sịn-arị ye.

¹² Ọ̀ Tamụnọ ḅẹẹarị, “Arị ị́ kọrị tẹ aị ma ḍuko ị̀ amịnapụ ma pịrị ḅa; in kobiri wararị anga ḅụ àrị í tokini ḅa.”

¹³ Ọ̀ pịkị ḅẹẹarị, “À Tamụnọ kẹ ḅiokpọma ḅa.” Tẹ ọ̀ pịkị ḅẹẹarị, “Mie yẹrịị, Tamụnọ kẹ ị̀ pịrị tẹ awọmẹ ma na ị̀ na.”

¹⁴ Jizọsị kẹ ịn sịn-arị ḅara ḅụ, nwẹn ḅẹẹ awọmẹ ma tomii, meni na ọmbie na nyana apụ. Jizọsị ḅioju sọ ḅo ịn kịka tẹ ịna pembe tomḅọ sọm. Ò gotẹ miemẹ mịẹ ye, ori ọ̀ fịị ḅụ ḅọrọ tẹ Ekwesu ḅe, tẹ fịị kụrọ nyanaḅọ ḅe, ḅaa guluguluma ḅẹ ḅara,

¹⁵ tẹ nwẹnị mị-ḅara ḅụ, amịna ḍumo ene mamgba kẹ fịị ḍiki ḅalafa omoni-sọ apụ mamgba pakama-ḅo ḅarị ḅara.

¹⁶ Anị banabana wararị, mịnẹ ọ̀ nwẹn kẹ ḅarasụa pịrịarị apụ ma enjẹlị apụ-a. Anie nakara, Fịafịa Ḍiri ḅẹẹarị, “Ọ̀ ḅarasụa pịrịarị apụ ma anie Ebira-amụ furo-ḅẹ-apụ.”

¹⁷ Miemẹ fiearị ye anie ḅọkọ, ḅọkọ mamgba ḅụ ori ori amịnapụ ma na kịka fama ḅẹm, mịẹtẹ ò ḅioḅẹngbọ-kẹ-sịrẹrẹ-niḅi tẹ pịkị ọkụrụkụrụ nyana wararị Sịḅịda-Agbamịẹḅọ sọ ḅẹ ḅara, Tamụnọ fịrị mẹ ḅụ, mịẹtẹ Tamụnọ tomina asi wẹrịso ḅarị ḅara.

¹⁸ Tẹ mịọkụ ori inetẹ ḅarasụa daaḍiki laarị apụ pịrị ḅa, ò ḅioju sọ daaḍiki na ḅụụ-fụka na da tẹ ẹrẹsị.