Hiburu 12 - FỊAFỊA BAỊBỤLỤ

Tamụnọ Wamịna Ḍaḅọ

¹ Ọkọẹrẹsị, nwẹn sime tomina-ogbo, tẹ minini ḍumo mẹ kọn ḅọrọ tẹ apụ, oḅuto sọ tẹ wa gbaịn wararị mẹ, ó yee wa ịnyọ kpọma tẹ wa kikiarị ye goyegoye na, sakị mamgba wa oḅoloarị si mẹ na, wẹrị ḅelema wamịna ḅụụ, tẹ wamịna tọrọkọ simearị, tẹ wa ị̀rụà ḅẹ mangị mẹ ị̀rụà.

² Ó yee wa tọrụ kẹ Jizọsị ọgọnọ gbana; ọ̀ ḅụụ mie wamịna minini mẹ saakị tẹ pịkị mu kunomaye. Ori, ori ẹngbẹsẹ-sịn mẹ gotẹ ọḅụ da-a! Anie nakara, tọrọkọ-jụ sime ọ̀ pịrị ḅioḅẹlẹ mẹ ẹrẹsị ẹngbẹsẹ-sịn ọgọnọ ḅẹ fịị ḅụụ-jịrị mẹ ọ̀ kẹ ye-sịn-a, tẹ mịọkụ Tamụnọ ọ̀ kẹ amịna emine mẹ ḅẹ ama-ḅara anga lẹgịma tẹ.

³ Ọmịnị ọ̀ da tolu-ḅọrọ tẹ ye mẹ kẹ ḅiokoromaa; ọ̀ wẹrịtẹ si-mịẹapụ ḍiki-ḅioḅu ḅio sime la ḅara! Mie ḅụ ọ́ ḍụkụ tẹ ọmịna tẹmẹ lọkọtẹ ọmịnị ọḅụ da ma.

⁴ Kẹ gotẹ ọkọ ḍukoarị, ọ́ nwẹn kẹ si na gbin-arị ọmụ mẹ, amụ ọ́ ḍụkụ-a tẹ pịrịya nwenii ini ọ́ ḅaa ḅẹ anga la-a.

⁵ Ori awọmẹ ḅara ḅụ Tamụnọ kọn ọmịna ḅiokpọmarị ẹkwẹn ma ọ́ kẹ ḅioḅọrọma tẹ ḅoto? Ori mẹẹ: “Ị̀ tụḅọọ, KỊNỊNYANAḄỌ ḅe ị́ daa-karakaramarị sakị kẹ ye sịn, Ḍụkụ tẹ ị́ tẹmẹ lọkọ ma, ori í ḍiki-ịganịarị sakị.

⁶ Kẹ gotẹ ọkọ ḍukoarị, KỊNỊNYANAḄỌ ḅe daa-karakaramarị ḅọ goḅọ-goḅọ anie ọ̀ ḅẹlẹmarịḅọ, tẹ ọ̀ pịkị fomu-ḅara kẹ ọ̀ kẹ tụḅọ ọkị ḅọ, ọkị ḅọ pịrịarị.”

⁷ Ọmịnị ẹrịarị tọrụsiẹrị mẹ, ọ́ tụḅọ ḍaḅọ ḅara da-da fomuye inema-inema ḅara kẹ anị inemaa; ọmịna tọrụsiẹrịarị mẹ ḍie pakamarị mịnẹ Tamụnọ ọmịnị ori awọmẹ nwẹn ḅẹẹ ḅara kẹ ọ́ mịẹarị. Jen sakị tụḅọ tẹ amịna ḍaḅọ fomu fomu-a ḅọ paka tẹ?

⁸ Ọ́ nwẹnị ọ̀ kẹ ori awọmẹ mamgba datụkụma ḅẹ ye gotẹ kẹ in fomuarị fomuye mẹ ḅụ ọmịnị ọ̀ ḅụụ puu sikimarị ḅẹḅẹ, ọmịnị ọ̀ karakara awọmẹ-a, kụma ḍa nyana-a apụ.

⁹ Wamịna tomikiri ḅẹ aḍapụ wa datụkụma ḅẹ ye ḅụ wa fomuarị sakị, wa ịn mangịmarị. Nwẹnị ọkọ kụma ndẹẹ wa gotẹ anị ḅara nẹngị ḅara kẹ sịḅị-tuu wamịna tẹmẹ anga ḅẹ Ḍaḅọ ḅe pịrị tẹ ḍumo ḅịa ye!

¹⁰ Wamịna tomikiri ḅẹ aḍapụ boowa sakị kẹ wa fomuarị, ini ḅii ḅara ḅụ, kụma Tamụnọ, wamịna iḅi mie ó gotẹ ọkọ mịẹarị, mịẹtẹ wamịnị sọ ọ̀ fịafịatẹ ḍumo mẹ kọn ḅẹ ḅara.

¹¹ Wa fomuye daarị sakị mẹ anị akụye sọ wa pịrị wararị, ḅioḅẹlẹma ye-a. Anị sime-ḅara, sime-ḅara sọ, anịtẹso sakị, ọkọsime ḅara kẹ daa-karakarama fomuye da tẹ apụ ma in ḅo karakara mịẹ ḅẹ dein ḍumo ḅẹ gbẹẹ-ye nyana tẹ apụ sọ tẹ.

Ịn Mịẹ Ḅẹ Aị Na Ḅeri nụnụ Ẹkwẹn Na

¹² Ọkọẹrẹsị, ọmịnị ọmịna ịnyọ faarị aḅara ma saakị-gelema, tẹ pịkị ẹgwẹ ḅaarị aḅụọ-sịḅị ma mịẹ kụrọmaa!

¹³ Ó gono-gono etela ngẹrị ḅụ mẹnjịị, mịẹtẹ ekeli wararị ḅụọ mẹ ḅarị gbọrsịḅị ḅo kẹ mịẹ mịẹye-ofori ḅara sime ḅịa ḅara, kụma, anie nakara, anị ḅo gwọọtẹ ye sọ ḅe ḅara.

¹⁴ Ọ́ ḅụụkụrọma tẹ ḅẹḅọ-ḅẹḅọ na dein ḅụ simee, tẹ pịkị fịafịa ḍumo kọn, kẹ gotẹ ọkọ ḍukoarị, anieofori kụma gbọrụḅọ-sọ KỊNỊNYANAḄỌ ḅe ẹrị ḅịa.

¹⁵ Ọmịnị ọḅụ pịkị Tamụnọ ḍiki-ḅụụjịrị mẹ gbin mẹ ẹbịị. Yee gbọrụḅọ-sọ akụarị sịn sọ tẹ so-paka tẹ anị ḅẹ akụ mẹ ḅo tọnwa-apụ sima ma.

¹⁶ Yee gbọrụḅọ-sọ Ịsọ kịka tẹ ḅụụ gbẹẹ-a amịẹaị na, Tamụnọ kẹ ye-sịn-a amịẹaị na ḍumo kọnma, ori anie gbọrụ sakị ḅẹ fịye gotẹ amịna mgbe kiri dẹrị ḅọ ḅe.

¹⁷ Anịtẹso, ọ́ wẹrịtẹ nimi ḅara ḅụ ori ọ̀ ḍa ḅara boma nyana ḅẹ ḍọkịm, kụma ọ̀ ḍa ò dee-siinm, ọ̀ mịẹ ḅọrọ tẹ ye mẹ ḍima-ḍima ḅọkọ ḅarị ofori ẹrẹsị, tụkụmaye ori owu atọrụ ḅụ anị ḍọkịm ḅẹsọ.

¹⁸ Ó ḅo la anga mẹ anie elemu sakị Izirẹlịapụ ma mu la Sayịnayị Tụndụ mẹ anị-a. Anie ḅụụ ịnọ ḅẹ aị paka anga mẹ — kọrị-fịnị na, kanakana kpiti so na, erise na,

¹⁹ ọdụ ofuro na, pọkọ fie na anga mẹ. Tomi ma pọkọ mẹ naa sakị ịn tẹkẹm ịn ḅarị jen kẹ anị naa ma,

²⁰ kẹ gotẹ ọkọ ḍukoarị, Tamụnọ tọn ye mẹ ini inetẹ daa ḅẹ ọkụ ofori; anị mẹẹ, “Oḅori tẹ papaa ḅo tụndụ mẹ la ye sọ, ọmịnị ò gbin ḅaa.”

²¹ Ḍiki-tọrụ ḅụ ye mẹ ḅalafama la ḅara mịẹtẹ Mozizi ḅẹẹm, “Ị̀ ḅalafa tẹ ì oju sẹkịarị!”

²² Anie nakara, ó ḅo la anga anie Zayọnị Tụndụ, ḍumo wararị Tamụnọ ḅe opu ama mẹ So-ḅio ḅẹ Jeruselemu mẹ, tẹ kịẹnkịẹn-ọkụ-ofori enjẹlị ogbo emi anga mẹ.

²³ Ó ḅo Tamụnọ tarị iyi owiapụ-awọmẹ ma, tẹ ẹrẹ So-ḅio ḍiri ḅio kẹẹ wararị apụ ma sime anga mẹ la tẹ. Ó ḅo Tamụnọ sime anga la tẹ, anie tomi mamgba ḅẹrẹkọn ḅọ ḅe, pịkị iḅi atomi tẹ ịn mịẹtẹ karakara gbasị tẹ apụ ma atẹmẹ ma simearị anga mẹ la tẹẹ.

²⁴ Ó ḅo Jizọsị la tẹẹ, anie ịwọ ọḅọkụ mẹ na, si-mịẹapụ asana ọmbie mẹ, tẹ kpọma iḅi Ebẹlị ọmbie nẹngị ye mẹ na tẹlẹma tẹ ḅọ ḅe.

²⁵ Ọkọẹrẹsị, ọmịnị ẹbịị, tẹ ḍụkụ tẹ ẹkwẹn ọ́ pịrịarị ḅọ ḅe poki-a sọma. Tomikiri ḅụ Tamụnọ oku mẹ ḍuko ḅọ ḅe poki ḍụkụ-a apụ ma ịn papaa ḅara kẹ ịn wẹrịso-a. Ọkọẹrẹsị, wamịnị sọ wẹrịtẹ pụkọ-paka ḅẹ gbọrụ kala ḅọkọ sọ ofori, wa ọḅụ pịkị So-ḅio sime tẹ ẹkwẹn wa pịrịarị ḅọ ḅe gbin kụma!

²⁶ Anị sakị mẹ ḅụ ọ̀ pọkọ mẹ fie tẹ kiri jikem, kụma mịọkụ ò minini tẹ mịnẹ, “À pịkị sin jike ḅarị ye mẹ kiri ngẹrị-a, so sọ.”

²⁷ Ẹkwẹn mẹ, “pịkị sin”, banabana ḅara kẹ wa ḍiearị mịnẹ ịn Tamụnọ tẹmẹ-aị ma jike tẹ arị saakị sin ḅa arị sime kiri ḅụ, mịẹtẹ inetẹ jike-a aị ma kirikọn ḅarị ḅara.

²⁸ Ọkọẹrẹsị, ó yee wa ịmịẹtẹ kẹ Tamụnọ ḅẹẹ, mịnẹ wa nyana wararị ama mẹ anie inetẹ jike ḅịa ye. Ó yee wa ịmịẹtẹ-ḅẹẹ ḅioḅẹngbọ kẹ sunsin Tamụnọ pịrị, ḅioḅẹlẹma ḅarị ḅọkọ ḅụ, anie ọ̀ kụn na ò mangịma na ḅụ,

²⁹ kẹ gotẹ ọkọ ḍukoarị, karakara-ḅara-ḅụ, wamịna Tamụnọ ḅe anie ye dọkịma fama-fama kọrị-fịnị.