Hiburu 11 - FỊAFỊA BAỊBỤLỤ

Minini

¹ Minini nyana anie, kẹ ọkị mịnẹ wa kẹ ḅiokpọmarị ye mẹ wamịna ḅara la tẹ; ḅio-maaịn-tọn-a ḅara kẹ tọrụngbọ amụ ẹrị-a aị ma kẹ ẹrị tẹ aị sọma.

² Elemu sakị ḅẹ apụ ma, ịn nyana minini ḅụ mie Tamụnọ ḅọrọ tẹ ịn kẹ karakara atomi kịẹn ye.

³ Minini ḅụ mie wa ḅọrọ tẹ nimi ye, mịnẹ Tamụnọ ẹkwẹn-ḅịḅị kẹ so na kiri na tẹmẹm, mịẹtẹ tọrụngbọ inetẹ ẹrịarị aị ma ḅo tọrụngbọ inetẹ ẹrị-a aị ma ḅụ ḅọrọ tẹ tẹmẹ-aị sọ tẹ.

⁴ Minini ḅụ mie Ebẹlị ḅọrọ tẹ iḅi Keni agba nẹngị agba mịẹ Tamụnọ pịrị ye. Ò minini ḅụ mie ọ̀ ḅọrọ tẹ Tamụnọ tokini-ḅịḅị nyana ye, mịnẹ ori karakara tomḅọ; kẹ gotẹ ọkọ ḍukoarị, Tamụnọ ọ̀ kẹ ḍie ọ̀ pịrị aị ma daa-ọkịm. Ọ̀ nyana minini mẹ ẹrẹsị, Ebẹlị ḅẹ, ọ̀ fịị tẹ sọ, mịọkụ ọ̀ paa ẹkwẹn-arị.

⁵ Minini mie mịẹtẹ Ẹnọkụ fịị-a so ye. Anie nakara, Tamụnọ ori ọkị so ò sime anga mum, tẹ tomi ḅarị inetẹ ori ẹrị-a, Tamụnọ ori ọkị iwo so tẹ mẹ ẹrẹsị. Fịafịa Ḍiri mẹ ḍukoarị, mịnẹ tẹrẹmẹ Tamụnọ Ẹnọkụ ḅe ọkị iwo so mu, ọ̀ Tamụnọ ḅụụ-ḅẹlẹ ye mịẹ tẹ.

⁶ Minini nyana-a tomḅọ inetẹ Tamụnọ ḅụụ-ḅẹlẹ ye mịẹ ḅịa, kẹ gotẹ ọkọ ḍukoarị, Tamụnọ ḍọkụma-ḅoarị ḅọ, ḅoarị ḅọ minini ḅa mịnẹ ori emi, tẹ gbẹẹ-ye kẹ ò nimi ḅẹ ḍọkịarị apụ pịrịarị.

⁷ Minini mịẹtẹ Noha tọrọkọ-jụ ḅo ḅarị sakị ḅẹ aị, tẹ ori inetẹ ẹrị ḅịa aị ma ḅụ Tamụnọ kẹ ò ḅeri nụnụ ye mẹ naa ye. Ọ̀ nwẹnị Tamụnọ ḅịḅị poki, tẹ arụ ịkasị tẹ kẹ ọ̀ ḅụụ na ọ̀ warị-suku na ḅọrọma. Anị dogi-ḅo ye anie, tomikiri mẹ ḅẹrẹ-ḅarasii ḅụ sọm, tẹ Noha nwẹnị Tamụnọ ḅara ḅụ minini ḅụ ḅọrọ tẹ ḅo, ḅo karakara mịẹ mẹ nyana.

⁸ Minini mịẹtẹ Ebira-amụ Tamụnọ ḅịḅị poki tẹ ori ọ̀ sịn sakị, ori ori ama ḅụ paka-so Tamụnọ kẹ ọ̀ pịrị ḅẹ tẹ minini ama mẹ mum. Ọ̀ nwẹnị ori ama koroma so, ò muarị anga tọ-anga-o, tọ-anga-o nimi-a ḅara ḅụ.

⁹ Minini ḅụ ọ̀ kịnị tọrụ nimi-a ḅọ ḅara kẹ Tamụnọ minini ọ̀ pịrị ama mẹ ḅụ angam. Anị sakị akpụrụ-awarị ḅio ori angam, anie Ayịzịkị na Jekọbụ na tẹ Tamụnọ ḅara anị gbọrụ minini pịrịye mẹ nyana apụ ma sọ anga ḅara.

¹⁰ Kẹ gotẹ ọkọ ḍukoarị, Ebira-amụ ọ̀ Tamụnọ ḅarana tọn tẹ nama ama mẹ koru simem, anie sime gbamaso aḍụḅarị kẹ suku sakị ama mẹ.

¹¹ Minini anie mịẹtẹ Ebira-amụ inetẹ ḅo ḍaḅọ sọ ye, karakaraye ori omongi lama tẹ sọ, anịsakị ọ̀ ta Sera sọ, á sịḅị ḅọrọ tẹ akụra la ḅara ḅụ á ḅarị inetẹ fura ḅịa ḅara sime tẹẹ. Ò mininim mịnẹ Tamụnọ minini ọ̀ pịrị tẹ ye mẹ mịẹ ḅa.

¹² Tụkụmaye, Ebira-amụ aḍin ḅo la tẹ ḅara ḅụ, fịtẹ ḅọ famam, anịsọ mị gbọrụ tomḅọ ḅe ḅụ mie kịẹnkịẹn-ọkụ-ofori awọmẹ paka-ḅo ye, gbala So-tọrụ ḅẹ alolia ma na tuḅu ọgọnọ ḅẹ onwin na sara ḅara.

¹³ Arị atomi mamgba minini ḅụ in simearị ogbo ịn fịịm, amụ ịn Tamụnọ minini aị ma nyana-a ogbo. Kụma iḅere-iḅerea anga ḅụ mie ini arị aị ma ẹrị tẹ, arị gotẹ ịmịẹtẹ kẹ Tamụnọ ḅẹẹ ye. Ini ma in ye ḅọị-a ḅara kẹ mịẹtẹ kịnị nimim, mịnẹ mị tomikiri mẹ ḅụ ini igoni apụ, pịkị amịna ama koroma-so wararị apụ.

¹⁴ Ọkọ sime aị ḍukoarị apụ ma ịn mịẹtẹ kịnị kikimaye ofori ḅara kẹ nimi tẹ, mịnẹ ini ịna soku ḅe ama ḍọkịarị.

¹⁵ Ịn sịkọpẹlẹ-a ḅara kẹ in sime tẹ so ama mẹ kẹ ḅiokoroma-a, ọkọ namịna mimgbe ịn paa sakị nyana tẹ pịkịma ḅo tẹ.

¹⁶ Anie nakara, iḅi anie nẹngị ama mie ịna pọkọsọlịma ye, anie so-amakiri mẹẹ. Tẹ mie ḅụ, ịn Tamụnọ kẹ ịna Tamụnọ sịn-arị ye mẹ ịna ḅụụ-jịrịma-a, kẹ gotẹ ọkọ ḍukoarị, ori ama tẹlẹma ịn wẹrịma tẹ.

¹⁷ Minini mie mịẹtẹ Ebira-amụ ọ̀ tụḅọ Ayịzịkị kẹ agba mịẹ yee, Tamụnọ ọ̀ daaḍiki sakị. Ori Ebira-amụ ḅe mie Tamụnọ ye mẹ minini pịrị ḅọ, anịsọ ọ̀ ḅụụ ḅẹrẹ-a ọ̀ tụḅọ kẹ agba mịẹ Tamụnọ pịrị.

¹⁸ Tamụnọ tarị ḍuko ọ̀ pịrị ḅọrọma tẹ, “Ayịzịkị ḅụ mie ị́ ḅọrọ tẹ à minini ị́ pịrị awọmẹ ma nyana ḅarịye.”

¹⁹ Ebira-amụ ọkị tẹ mịnẹ Tamụnọ inetẹ fịị ḅụ Ayịzịkị saakịma ḅa tẹ kẹ ye ḍuko, ḍuko ḅara ḍuko ḅụ, fịị ḅio mie Ebira-amụ Ayịzịkị nyana ḅo ye.

²⁰ Ayịzịkị minini ḅụ Jekọbụ na Ịsọ na boma tẹ tọrọkọ-jụ ḅo ịn la ḅarị aboma karị ịn pịrịm.

²¹ Minini mie mịẹtẹ, Jekọbụ, tẹrẹmẹ ọ̀ fịị, Josẹfụ awọmẹ ma gbọrụḅọ, gbọrụḅọ boma ye. Ọ̀ nwẹnị ori mkpara sịḅị ḅụ sịrẹrẹ tẹ Tamụnọ tẹkẹ.

²² Minini mie mịẹtẹ Josẹfụ, ọ̀ fịị ḅẹ sakị kpeki tẹso, Izirẹlịapụ Ijiputi ḅụ paka-so ḅarị mẹ na, ịn kẹ ori mgbe ma mịẹ ḅẹ ḅara na ḍuko ye.

²³ Minini mie mịẹtẹ Mozizi ḍa-na-iyingi-na tẹra akalụ kẹ ọ̀ ḅọị ye, ori iyi tẹso. Ini ẹrịm mịnẹ ḍiki-tọrụ ḅụ ori iḅim ḅẹẹ-sakị, ịn ḅarị amadaḅọ ḅe oloko mẹ kan mẹ ḍiki-ḅalafa-a.

²⁴ Minini mie mịẹtẹ Mozizi, ọ̀ ḍụḅa paka-ḅo tẹso, ḅarị ḍụkụ tẹ kịnị amadaḅọ ada tụḅọ kẹ ọ̀ sịn-a ye.

²⁵ Tamụnọ atomi ma na sọ tẹ tọrụsiẹrịarị ọ̀ ḅụụ-ḅẹlẹ, boowa kala-sakị kẹ si ḅụ sime tẹ tọrụ-ḅẹlẹ nẹngịm.

²⁶ Ori ọkịm mịnẹ Mẹsaya ḅe gotẹ tomina ḍiki-sima da iḅi Ijiputi ḅẹ ngọ mamgba nẹngịm, kẹ gotẹ ọkọ ḍukoarị, tọrọkọ-jụ ḅo ḅarị gbẹẹ-ye mẹ ọgọnọ mie ori ori atọrụngbọ saakị tẹ kẹ gbana ye.

²⁷ Minini mie mịẹtẹ Mozizi amadaḅọ ḅe ịganị sọ ḍiki ḅalafa-a tẹ Ijiputi ḅụ paka-so ye. Gbala ọ̀ tọrụngbọ kẹ kịnị ẹrị-ẹrịa Tamụnọ ḅe ẹrị ye ọkụ, ọ̀ ḍụkụ tẹ tọrụ-pịkị ọḅụ ḍiki-a.

²⁸ Minini mie mịẹtẹ ọ̀ Saḅaḅọrọ-Alalị mẹ tọn pakama tẹ, ḅẹẹ tẹ ini ọmbie kẹ Izirẹlịapụ ma aḅọkọ ma asana wẹrị tẹ Kịnị ḅaa, ḅaa Enjẹlị ḅe ḅo sakị ọ̀ ḅarị ịna anga tarị iyi owiapụ ma ḅaa-a ye.

²⁹ Minini mie mịẹtẹ Izirẹlịapụ ma Awụ Tọrụ mẹ saḅa ye, kpongbo-kiri ọkụ; Ijiputi-ḅẹ-apụ ma ḅụụkụrọma tẹ ọkọ mịẹarị ogbo minji mẹ ịn mẹnị ọkịm.

³⁰ Minini mie mịẹtẹ Jeriko ḅẹ onu ma paịn-sara ye, Izirẹlịapụ ma sọnọma aḍin kẹ mẹnjị-mẹnjị ama mẹ ikelema-koro tẹso.

³¹ Minini ḅụ mie Rehabụ, ama-mẹnjị-ẹrẹḅọ ma, ḅọrọ tẹ ḅọrọma tẹ ịn ḅarị árị na Tamụnọ ḅịḅị poki-a apụ ma na kẹ sụa ḅaa-a ye, kẹ gotẹ ọkọ ḍukoarị, Izirẹlị kẹ fịrịma tẹ ama mẹ ẹnyẹ ḅẹ mu apụ ma árị iḅi ḅara kẹ ịn daa-ọkịm.

³² À ḅọrọ paa jaị ḍuko ḅẹ mụnọọ? Sakị boowa, kẹ Gidiyọnị na, Barakị na, Samụsịnị na, Jẹfụta na, Devidi na, Samụwẹlị na, ịkịankoroapụ ma na ḅụụ ye ḍuko.

³³ Minini ḅụ mie ịn ḅọrọ tẹ bebe sịẹ, sịẹ ma na owu sọ tẹ ịn nẹngịma ye. Ịn karakaraye mịẹ tẹ Tamụnọ kẹ tomi pịrị ḅẹ tẹ minini ye mẹ nyanam. Ini ọkụkụ amẹẹ ma aḅịḅị gbaịnm,

³⁴ ini opu kọrị afịnị ḅinmam, ogie fịị ḅio ịn pụkọ-pakaḅom. Ịnyọ ịna ḅụụ faam, kụma ịn pịkị ịnyọ sụam; ọmụ kiri ḅụ ini kụrọnịapụụ, tẹ ja asịẹ ḅẹ ọmụ-ogbo ma nẹngịma, nẹngịmam.

³⁵ Minini ḅụ ereme ḅọrọ tẹ ịna fịtẹ amịnapụ nyanam, fị-ḅụ-saakị ḅụ. Osi apụ, ini ịn pọnjị ḅaarị sọ, ịn ḅịḅị ḍima tẹ paka-ḅo ḅẹ nakara ịn pọnjị ḅara mẹ ḅio sime tẹ fịịm, ịn fị-ḅụ-saakị ḅo iḅi in sime tẹ fịịarị ḍumo mẹ nẹngị ye la ḅẹ ẹrẹsị.

³⁶ Ja apụ ini in kombo tẹ in fomum, osi apụ ini ikoli kẹ ini ịkasị tẹ ịn fọnọ mu ikoli-warị ḅio koromam.

³⁷ Ịn ḍụḅarị kẹ in gbinm, ini ịn kẹ maaịn-maaịn puum, ini okologie kẹ ịna sịḅị pẹlẹ-siinm. Anana na oḅori oju apara anie ịn kẹ kapa gbin tẹ sụa tẹ kẹ mẹnjịma ḅọrọ yee — ini igoin ḅara simem; ịn ḅaa-ḅọkọ kẹ ịn ḍọkịm tẹ mbasị ḅara kẹ inina mịẹm.

³⁸ Tomikiri mẹ sime-ḅara iḅi tẹ ini anga ḅẹ anga-a! Ịn nwẹnị amịna ama koroma so tẹ apụ ḅara kẹ ikelekele ikelekelema-ḅọrọm ịkpa ma na tụndụ ma na ḅio, fukuru na, ịḅụkụ na, aḅio ḅụ ini angama ḅọrọm.

³⁹ Mịna apụ mamgba anie ịn nyana minini gotẹ kịnị ịna ḅụụ iḅiye ḍuko tẹ apụụ! Anịsọ Tamụnọ minini tomi pịrị ye mẹ amụ ịn nyana-a,

⁴⁰ anị gotẹ ọkọ sime ye, Tamụnọ iḅi anị nẹngị ye tọn-pẹlẹ wa pịrị tẹ. Ori tọn ḅara anie, ịn wamịnị na gbọrụ ḅụ ḅụ emi rẹ mie ini ma sọ ḅo kara-gbasị ḅarịye.