Hegayị 2 - FỊAFỊA BAỊBỤLỤ

Ịwọ Tamụnọ-warị mẹ ḅẹ Iḅi Mẹ

¹ Amadaḅọ Dayịrọsị ama-da tẹ maaịn karama kụra mẹ ḅụ, sọnọma karama akalụ mẹ ḅẹ si gbọrụ ḍin finji karama ene mẹ ḅụ, KỊNỊNYANAḄỌ ḅe jen kẹ ịkịankoroḅọ Hagayi ḅụụ ḅọrọ tẹ ẹkwẹnm.

² Ò ḍuko Hagayi pịrịm ori ẹkwẹn Zerubabẹlị, Juda ḅẹ Ḅẹrẹtọnḅọ ḅe na, Jọsụwa Sịḅịda-Agbamịẹḅọ ḅe na, tomi mamgba na pịrị tẹ ịn ḅẹẹ,

³ “Ọmịna ḅụ inetẹ kẹ ḅiokoroma ḅẹ ḅọ emi mị Tamụnọ-warị mẹ tarị iḅi-iḅi ḅara? Mịọkụ ndẹẹ anị ọmịna atọrụ simearị ḅara? Gberie sọ gberie-a ḅara mịẹ anịmgba kịkarị.

⁴ Kụma mịọkụ ó ḅioḅẹngbọ ḅịkị nyana ma, ọmịna ḅụụ ḅẹḅọ-ḅẹḅọ. Ọ́ kọrịnama mẹ kọrịị, kẹ gotẹ ọkọ ḅẹẹarị, yẹrị na ọmịnị na emi.

⁵ Ijiputi ḅụ ọ́ paka-ḅo sakị, à mininim mịnẹ sakị mamgba àrị ọmịnị na sime ḅa. À paa ọmịnị na emi, mie ḅụ ọ́ ḅalafa ma.”

⁶ “Ala ḅịa, à So na Kiri na jikema ḅa, kpongbo-kiri na tọrụ-minji na.

⁷ À sịẹ-sịẹ mamgba pịkị-ḅo ḅa, tẹ ini ịn nyana aị ma kẹ mị yọọ ḅo ḅa, tẹ ngọ Tamụnọ-warị mẹ ḅio ḅin ḅa.

⁸ Tomikiri ḅẹ seleḅa na golu na mamgba ị̀ yaị.

⁹ Ịwọ Tamụnọ-warị mẹ iḅi elemu ye mẹ nẹngị ḅa, anịanga ḅụ à lọkọlọkọ na dein na kẹ ị̀ atomi pịrị ḅa,” Kụrọmamgba nyana KỊNỊNYANAḄỌ ḅe ọkọ ḅẹẹm.

Ịkịankoroḅọ ḅe Agbamịẹapụ ma Ḅịḅị Gbelarị

¹⁰ Darịyọsị saakị Pasịya tomikiri mẹ da tẹ maaịn karama kụra mẹ ḅụ eseni karama akalụ mẹ ḅẹ si ini aḍin finji karama ene mẹ ḅụ KỊNỊNYANAḄỌ jen kẹ ẹkwẹn ịkịankoroḅọ Hagayi pịrịm.

¹¹ Ori mẹẹ, “Mị gbela ḅịḅị mẹ ḅụ, agbamịẹapụ ma sụa ḅẹ oloko gbolomaye nimi ḅẹ ḅara:

¹² Ọkịị mịnẹ gbọrụḅọ ịn kẹ agbamịẹ tẹ nama-oḅolo kẹ mḅọ opu kapa ḅio fịna tẹ kẹ som. Anịtẹso ori opu kapa mẹ fịturu, sọọtẹ fịye, tẹmẹ fịye fị iru, olivu-olo, anịanịa ḅẹ fịye ḅẹ fịye fọnọ kụma, anị mịẹ tẹ anị fịye mẹ fịafịa ḅẹ?” Gbela-ye mẹ gbela sakị, agbamịẹapụ ma pakịrịm, “Ẹn-ẹn.”

¹³ Anịtẹso Hagayi gbelam, “Ọkịị mịnẹ gbọrụ tomḅọ fịafịa-a ḅara sime wararị tẹ mḅọ ḅara kẹ fịtẹ tomḅọ lamam ẹrẹsị. Anịtẹso mḅọ ḅara kẹ ma fịaị ma ḅẹ gberie lama kụma, anie mịẹ tẹ arị sọ fịafịa-a ḅara sime ḅẹ?” Agbamịẹapụ ma pakịrịm, “Inn.”

¹⁴ Anịtẹso Hagayi nwẹnị ḅẹẹ, “KỊNỊNYANAḄỌ ḅe ḍukoarị mịnẹ anị gbọrụ ye mẹ mịẹ mị sịẹ mẹ ḅẹ atomi ma ḅụụ pakarị ye, pịkị ịn kọrị pakama ḅo ye ḅo ye na ḅụ; tẹ mie ḅụ ini kẹ agbamịẹ ḅụ Tamụnọ pịrị ye pịrị ye agbamịẹ-anga mẹ ḅụ, fịafịa-a ḅara sime tẹ.”

KỊNỊNYANAḄỌ ḅe Ò Boma Minini Ori Atomi Pịrịarị

¹⁵ KỊNỊNYANAḄỌ ḅe ḅẹẹarị, “Ọmịnị inetẹ ẹrị-a aro, ọmịna ḅụ paka ye mẹ? Tẹrẹmẹ ọ́ saakị Tamụnọ-warị mẹ nama,

¹⁶ ọmịnị ọmịna mbịaka kobiri kpoli wararị anga mu tẹ ye-tọnye ḅẹ kiri oyia asi oyia asi tọn pakama-ḅo ḅẹ ye kẹ ḅiotọnm anịanga ḅụ, kụma kiri sọnọa si kịngẹ. Ọ́ waịnị iru koko anga mu tẹ sọnọa si ḍuu pakama-ḅo kẹ ḅiotọnm, kụma anị paka ye inia si kịngẹ.

¹⁷ Àrị oju dọkịmarị fẹrụ na ḍụḅarị-mgbọlị-eene na kẹ fịrịma tẹ ọ́ ḅụụkụrọma ḍiḅi aị ma ḅaam, kụma anịsọ ó si ḅụ pịkị-a.

¹⁸ Mịmgba anie eseni akalụ karama ye mẹ ḅụ si ini aḍin finji karama ene, Tamụnọ-warị mẹ ḅẹ suku-saakị kọrịnama mẹ fa sakị. Ó ḍikii, mịọkụ saakị tọrọkọ mu ḅụ paka ḅarịye.

¹⁹ Tụkụmaye, mbịaka gbọrụmgbọ-sọ ḅarị ofori, anịsakị girepu-asịn na, omburo-asịn na, olivu asịn na paa ye pakama-a sọ, mịọkụ saakị tọrọkọ mu ḅụ àrị ó boma ḅa.”

KỊNỊNYANAḄỌ ḅe minini Zerubabẹlị pịrị ye

²⁰ Anị gbọrụ ene mẹ ḅụ, akalụ mẹ ḅụ si ini aḍin finji karama ene mẹ ḅụ, KỊNỊNYANAḄỌ ḅe maaịn karama oku-ḅịḅị kẹ Hagayi fịrịmam

²¹ ò ḍuko Zerubabẹlị, Juda ḅẹ Ḅẹrẹtọnḅọ ḅe pịrị: “À So na Kiri na jikema ḅẹ-yearị

²² tẹ amadapụ daarị ayọ ma pịkị-ḅo tẹ ịna kụrọ kẹ ḅo kunoma lama ḅa. Àrị ịna kirimẹnjị-ọmụarụ ma na arị dọkụarịapụ ma na pịkị iḅo ḅa; asụ ma fịị ḅa, tẹ arị dọkụ mẹnjịarị apụ ma jụmọ-jụmọ ḅaa ḅa.

²³ Anị ene mẹ ḅụ, arị ị́ ọkị ḅa Zerubabẹlị ị̀ fịrịmẹnjịḅọ, tẹ ị́ kẹ ḅẹrẹtọnḅọ sọma ḅa ị̀ ẹrẹ ḅụ. Ị́yẹrị anie à sẹlẹ ọkị tẹ ḅọ ḅee.” Kụrọmamgba nyana KỊNỊNYANAḄỌ ḅe ọkọ ḅẹẹm.