Habakọkụ 3 - FỊAFỊA BAỊBỤLỤ

Habakọkụ Tẹkẹm

¹ Mie ịkịankoro Habakọkụ kọn tẹkẹ:

² “KỊNỊNYANAḄỌ, ị́ mịẹtẹ ye mẹ à naa tẹ, tẹ ẹgwẹ ị̀ ḅaa tẹ. Mịọkụ siin mịẹẹ wamịna asakị ḅụ, ị́ kọrị-kọrị opu aị. Ọkụrụkụrụ nyanaa, ị́ ịganịarị sakị mẹ ḅụ sọ.”

³ Tamụnọ Idọmụ ḅụ sime tẹ siin-ḅoarị, fịafịa Tamụnọ ḅe siin-ḅoarị Paranị ḅẹ tụndụ ma ḅụ. Ori ebube So ma gbaịn-arị, tẹ ò tokini ḅịḅị kiri mẹ ḅin wararị.

⁴ Bele ḅịya ḅụ ò ḅoarị; Ọ̀ ḅara ḅụ bele kọrị-kọrị pakarị, anịanga ọ̀ kụrọ ḅọị sime wararị.

⁵ Ori obi kẹ ọ̀ tọrọkọ tarị fịrịmarị tẹ tọn-arị fị ò ḍuka ḅoo.

⁶ Ọ̀ daasịẹarị sakị kiri jikearị; ọ̀ tọrụ pịkị sịẹ ma ḍiki kụma ini oju sẹkịarị. Sime gbamaso tụndụ ma puu-puu sararị; ḅụọ fa ḅụọ atụndụ ma kiri sọ faarị, ọ̀ mẹnjị-mẹnjị tụndụ ma, elemu sakị ḅụ.

⁷ Àrị ẹrịm Kusani ḅẹ apụ ḅalafaam tẹ Midiya ḅẹ apụ oju sẹkịm.

⁸ KỊNỊNYANAḄỌ, tọrụ ma mịẹ tẹ ị́ ịganị mụnọọ? Abajị mẹ ḅọrọ mịẹ tẹ ị́ ịganị ḅụra mụnọọ? Oḅuto ma ọgọnọ ḅụ mie ị́ dọkụ yee; erise oḅuto mẹ anie í kirimẹnjị-ọmụarụ, í owu-ḅara-iḅi ọkị-ḅo ị́ atomi pịrị sakị mẹ ḅụ.

⁹ Ị́ tẹlẹmam í iboli kẹ ye mịẹ, ị́ tẹlẹmam ị́ aḍịẹịn tẹịn. Í so-ḅalapụ mẹ kọrị mu kiri puu finjim.

¹⁰ Tụndụ ma ị́ ẹrị sakị arị jikem; minji paịn-saram So-tọrụ ma ḅụ. Kiri suku-ḅio ḅẹ aminji ma ḍarịm, arịḅẹ ọnụngọ ma gele-faam.

¹¹ Ị́ aḍịẹịn ma fọnya kọrị ḅọrọ tẹ ị́ ḅịyarị aḅẹkẹrẹ nwanam ḅọrọ sakị, ịrụa mẹ na akalụ mẹ na sịẹsimem.

¹² Ị́ mẹnjị kiri mẹ saḅa-ḅọrọm ịganị ḅụ; owi ịganị ḅụ ị́ sịẹ-sịẹ ma nanga ḅọrọm.

¹³ Ị́ ị́ atomi ḅọrọma ḅẹ tẹ paka mum, sẹlẹ ọkị amadaḅọ ḅe ḅọrọma ḅẹm. Í si-sịḅịḅio-sụapụ ma sịḅịdaḅọ ḅe fomu gbinm tẹ ye-kọnma-a ḅara kẹ in ḍukamẹnjị apụ ma ḅaa gulugulumam.

¹⁴ Ị́ aḍịẹịn ma ori ọmụ-ogbo sịḅịdaḅọ ḅe kan sọ-mum anị erise ḅara kẹ wa gala-galama ḅẹ ḅo sakị, nwẹnị ḅọị ḅara kẹ igoin-apụ ma ponomarị apụ kịka tẹ wa ḍikiḍiki tẹ ḅioḅẹlẹarị.

¹⁵ Ị́yẹrị asụ ma ḅụ abajị mẹ nanga ḅọrọm, tẹ opu kụrọ nyana aminji ma fiko pakamam.

¹⁶ À mie mẹmgba naa tẹ oju sẹkịarị, ị̀ ḅịḅị-apakịrị ma jikearị ḅalafa ḅụ. Ì oju fịịarị, tẹ ị̀ aḅụọ pụmbụarị ì suku-ḅio ḅụ. À yaụ-sime tẹ ḅo ḅarị sakị mẹ koruarị Tamụnọ owu kẹ wa pakarị apụ ma fomu ḅẹ sakị mẹ.

¹⁷ Anị nwẹnị karakaraye tẹ figi asịn ma mgbọlụ sụa-a sọ, tẹ gbọrụ girepu sọ vaịnị asịn ma ḅụ paka-a sọ anị nwẹnị karakaraye tẹ olivu ḍiḅi-aị ma ye sụa-a sọ, tẹ ḍụọ ḍiḅi akiri ma mbịaka pakama-a sọ, anị nwẹnị karakaraye tẹ anana mamgba fịị sọ, tẹ opu anama koko ayọ ma ḅụ gberie-sọ ofori sọ,

¹⁸ À paa ḍereku tẹ ḅioḅẹlẹ ḅa, KỊNỊNYANA-TAMỤNỌ ḅe anie ị̀ ḅọrọmaḅọ ẹrẹsị

¹⁹ KỊNỊNYANAḄỌ ḅe ịnyọ kẹ ị̀ pịrịarị. Ori ị̀ mịẹ tẹ ị̀ aḅụọ kiri ḅụ kụrọ sịẹarị, tụḅụra aḅụọ ọkụ, tẹ ye-ḅụụ-la-a ḅara ì koko kpaịnmarị tụndụ ma ọgọnọ ḅụ.