Habakọkụ 2 - FỊAFỊA BAỊBỤLỤ

KỊNỊNYANAḄỌ ḅe kẹ Habakọkụ Pakịrị ye

¹ Àrị ị̀ ama-koru tọpịịtẹ-yọ mẹ kpọlị tẹ koru tẹ ḍiki ḅa KỊNỊNYANAḄỌ ḅe ị̀ ḅẹ tẹ à ḍuko ḅẹ ye na ọ̀ kẹ ị̀ pịrị ḅẹ pakịrị-ḅịḅị na ì ḍuko-sụa mẹ ḅụ.

² KỊNỊNYANAḄỌ ḅe mị pakịrị-ḅịḅị mẹ kẹ ị̀ pịrịm: “Anị kẹ ye-kẹẹ-ye ọgọnọ banabanama kẹẹ koromaa, à mịẹfinji ị́ pịrịarị ye mẹ, mịẹtẹ tomḅọ anị ẹrị gbọrụ-kirikiri mḅọ inetẹ goo ḅẹ ḅara.

³ Anị kẹ kẹẹ koroma anị ḅo paka tẹ ye sọ ḅẹ sakị tọrọkọ-jụ ḅo ḅa ẹrẹsị. Kụma sakị mẹ sarasarama ḅoarị, tẹ à kẹ ị́ ḍiearị ye mẹ ḅo karakara ye sọ ḅa. Ẹbịsịya anị fọnya ḅo-a ḅara kịka ḅa, kụma anị koruu, gbarị-a ḅara ḅụ anị paka ḅa, anị sime ala ḅịa.

⁴ Tẹ mie oku mẹ: ‘Ini ma tẹ si wararị apụ ma ịn fịị-a so ḅịa, kụma ini ma tẹ karakaraye-mịẹapụ ma, in ḍumo ḅa, in ḅioḅẹngbọ-kẹ-sịrẹrẹ-niḅi ḅara sime Tamụnọ pịrị wararị ẹrẹsị.’ ”

Karakara mịẹ-a apụ ma la ḅẹ Fomu-ḅara

⁵ Ngọ-kọn oḅori kẹ kịnị sịn-arị. Opu-pọkọḅẹngbọ sụa atomi anie opu-amịẹaị mịẹ apụ pịkị kịnị ḍiki-sịḅịjịrị-a apụ — ịn fị kịka tẹ gbala-gbala ye ịna apọkọ tata-a. Anie mie in gotẹ sịẹ-sịẹ nẹngịma-nẹngịma ịna ḅụụ pịrịarị.

⁶ Ini nẹngịma tẹ atomi ma ịn wori sima ḅa, tẹ ini ịn ḍiki-iderimarị ye ḍie-pakama ḅa. Ịn ḅẹẹ ḅa, “Ọmịna nye-a ye mie ọmịnị ọkịarị, kụma fomu-ḅara sime ọ́ pịrịm! Ọ́ paa tomi inetẹ ịn fị saa gbẹẹ-a gotẹ ponoma ḅara kẹ ịna ngọ fọịn-ọkị mu tọ-sakị la ḅẹ?”

⁷ Kụma tẹrẹmẹ í ḅo anị nimi, jen-apụ nẹngịmarị ḅọ ḅe sọ saa ḅụ sọ ḅa tẹ ini í ponoma tẹ í igbigi gbana tẹ gbẹẹ ḅa. Si kẹ ị́ tọn apụ ḅo mịẹ tẹ í oju sẹkị ḅa. Ini ị́ yaị ọkị-so ḅa!

⁸ Ị́ tọnwa asịẹ ḅẹ apụ inoma tẹ ịna aị ọkị tẹ, kụma mịọkụ ịna ḅụ fịị-a so apụ ma í inoma tẹ ị́ aị ọkị-so ḅa, ị́ ḅaa guluguluma tẹ atomi ma ẹrẹsị, pịkị guda-guda amịẹaị tẹ ị́ kẹ tomikiri ḅẹ atomi ma na anị ḅẹ opu ama ma na mịẹtẹ aị ma gotẹ.

⁹ Ị́ fa tẹẹ! Ị́ kụrọ-kụrọ ḅara kẹ ọkị aị ḅụ ị́ warị-suku kọnma tẹ, ị́ pịkị ḅụụ kụrọma tẹ mịẹ tẹ í sime yọ mẹ gberie-sọ anị la ḅịa ḅara sime tẹ!

¹⁰ Kụma ị́ tọn pakama-ḅo tẹ mịẹ aị ma ḅụụ-jịrị dogi-ḅo ị́ warị suku pịrị tẹ; tọnwa-tọnwa ḅẹ asịẹ fama ḅụ fa dogi-ḅo ị́ ḅụụ pịrị kịngẹ mie ị́ mịẹ yee.

¹¹ Warị akaka ma ḅẹ aḍụḅarị mẹ kịngẹ sọ owu pakama ị́ ọgọnọ gbanarị, tẹ warị isun ḅẹ oluku ma sọ arị aḅịḅị ọkị tẹ owuarị.

¹² Ị́ fa tẹẹ! Si amịẹaị mie ị́ kẹ opu ama pakama ye, tẹ kịnị ḅaa kẹ anị nama saakịm.

¹³ Sịẹ-sịẹ ma tẹ ị́ nẹngịma aị ma ye mịẹ-a kụrọ kọrịnama ḅụ ịna ịnyọ fama famam, tẹ ịn nama ye mẹmgba fịnị ḅio dọkịarị. Kụrọmamgba Nyana KỊNỊNYANAḄỌ ḅe miemẹ mịẹm.

¹⁴ Kụma KỊNỊNYANAḄỌ ḅe ebube mẹ tomikiri mẹ ḅin ḅa minji abajị ma ḅio ḅin ḅara.

¹⁵ Ị́ fa tẹẹ! Ị́ owi ịganị ḅụ ị́ ị́ na kpeki sime asịẹ ma iderima tẹ ịna atọrụ tuum; ị́ ịn mịẹ tẹ ịn pụmbụma-pụmbụmam ini iru ḅuu tọrụ-ḅaama ye ọkụ.

¹⁶ Ị́ sakị ḅo tẹ ḅụụ-jịrị ị́ gbaịn ḅa, kụn nakara. Í ḅioju sọ iru ḅuu tẹ pụmbụma-pụmbụma ḅa. KỊNỊNYANAḄỌ ḅe ị́ mịẹ tẹ í sime ị́ pịrị fomu-ḅara ḅẹ kọpụ mẹ ḅio sime ye ḅuu ḅa, tẹ ị́ kụn mẹ pịkị-ḅo tọrụ-tuu sọ ḅa.

¹⁷ Lẹbanọnị ḅẹ opu-apiri ma ị́ pẹlẹ-gbin tẹ; mịọkụ ini ị́ pẹlẹ-gbin ḅa. Ị́ arịḅẹ anama ma ḅaam; mịọkụ nama amẹẹ ị́ tẹmẹ-naịn-naịnma ḅa. Miemẹ paka ḅa ị́ ḅaa tẹ atomi ma ẹrẹsị, pịkị ị́ kụrọ-kụrọ ḅara kẹ tomikiri ḅẹ atomi ma na anị ḅẹ opu ama na mịẹ ye na ẹrẹsị.

¹⁸ Oru-fụḅara kẹ mịẹ-mịẹ ye tiye? Anị jen-a, tomḅọ ḅara kẹ mịẹ ye kịngẹ, tẹ anị ḍuko ị́ pịrịarị gberie-sọ ofori, iruo sikima. Anị tẹ iḅiye mịẹarị tẹ anị mịẹ ḅọ gotẹ anị kẹ ḅiokpọma ḅẹ tamụnọ tẹ inetẹ ẹkwẹn sọ ẹkwẹn ḅịa ye!

¹⁹ Ị́ fa tẹẹ! Ị́ sịn-ikiḅa ḅẹẹarị, “Naa saakị!” anịanịa ḍụḅarị kpoo, “Saakị sịẹ!” Oru-fụḅara inetẹ mịẹfinji ị́ pịrị ḅẹ ye emi? Ẹbịsịya ini inetẹ seleḅa na golu na kẹ anị sara-gbaịn ḅa, kụma anị ḅio ḍumo ofori.

²⁰ KỊNỊNYANAḄỌ ḅe ọ̀ fịafịa Warị ḅio emi; yee tomikiri sime-ḅọ sime-ḅọ yaụ-sime ọ̀ tọrọkọ ḅụ.