Habakọkụ 1 - FỊAFỊA BAỊBỤLỤ

¹ Mie oku mẹ tẹ KỊNỊNYANAḄỌ ḅe mịẹfinji ịkịankoro Habakọkụ pịrị ye mẹ.

Habakọkụ Inoma ẹrẹsị Ḍuko-sụa Ye

² Yei KỊNỊNYANAḄỌ, ḅo tọ-sakị la à nwẹn kẹ ḅarasụa gotẹ ị́ sịn nwenii tẹrẹmẹ í poki ḅa, tẹrẹmẹ ị́ wa ḅọrọma ḅẹ kụrọ-kụrọ amịẹaị ḅara-ḅio?

³ Tiye ẹrẹsị ị́ ị̀ mịẹ tẹ à nwẹn sime ḅụụ-fụka ẹrịarị? Ndẹẹ í inetẹ inema tẹ tọrụ-tọrụ kẹ nwẹn sime kura-a mịẹ-aị ẹrịarị ḅara? Guluguluma na kụrọ-kụrọ amịẹaị na ì gbori wararị, tẹ owu-sọ na kamụ-sọ na emi anga goyegoye ḅụ.

⁴ Oloko mẹ ḅarị kụrọ nyana-a, tẹ mịẹ-mịẹ ye ofori ye sọ tẹẹ, tẹ inoma ofori mịẹ ye gbala-gbala mịẹ-a. Si atomi karakaraye-mịẹapụ ma kiri ọkị tẹẹ, mie ḅụ ịn karakara ḅẹrẹkọn pịkị-iḅo tẹẹ.

KỊNỊNYANAḄỌ ḅe Pakịrị-ḅịḅị

⁵ Anịtẹso KỊNỊNYANAḄỌ ḅe ori atomi ḅẹẹm, “Ọmịnị ọmịnị ikelema-koro wararị asịẹ ma ẹbị, tẹ ọ́ ḅụụ-bua ḅa ọmịnị ẹrị ḅarị ye ḅụ. À mịẹ ḅẹ-yearị ye mẹ ọmịnị anị gboloma ye naa sakị ó minini ḅịa.

⁶ À Babịlonịya ḅẹ apụ ma ọkị-ḅo kụrọ ḅara ḅụ simearị apụ sọma ḅẹ-yearị, arị ḅalafamarị tẹ gbene sime-sime-a atomi ma. In tomikiri mẹ mẹnjị saḅa ḅọrọ mu jen-apụ amakiri ọkịarị.

⁷ Ịn ḅalafa na tẹmẹ-naịn-naịn na wasamarị, tẹ ịna ḅụụ-gelema ḅụ ini oloko sọ amịna ḅụụ pịrị wararị.”

⁸ “Ịna asụ ma ḅụọ sarasara sịrị aḅụọ nẹngịm, ịn ḅalafama, ḅuru-pọkọtarịarị anamakiri amẹẹ nẹngịm. Ịna ọmụapụ tẹ asụ kẹ ọmụ gbin-arị apụ ma ala anga ḅẹ amakiri ḅụ asụ ọgọnọ sime tẹ mangị ma ḅoarị; ịna asụ ma ḅụọ kẹ kiri tẹịnma ḅoarị. In ḅo ini owu kẹ pakarị apụ gbaịn koroarị ḅara igo amẹẹ fiin ideri-ḅo in kun pẹị ḅẹ ye gbaịn ḅara kịkarị.”

⁹ “Ịna ọmụ ogbo-ogbo ma kụrọ-kụrọ ḅara kẹ mẹnjị mu owu-ḅara-iḅi nyanarị, ọrụḅọ-ọrụḅọ tẹmẹ-naịn-naịnarị in ḅoarị sakị. In kun soarị atomi onwin mgbọlị ḅaka ḅara ḅakarị.

¹⁰ Ini amadapụ ḍiki-iderima ḅara kẹ ini na mịẹarị tẹ fịrịmẹnjị-opuapụ ḍẹrịarị. Gbọrụ kụrọnị-anga sọ in kiki-kiki-a; ini aḅaịn soku kpolima anị bịan si tẹ anị ọkịarị.

¹¹ Anịtẹso ịn fẹrụ kịka tẹ fie ḅo la tẹ pịkị so tẹẹ, mịna atomi ma ịna kụrọ anie ịna tamụnọ.”

Habakọkụ Pịkị Ye-ḍuko-sụa KỊNỊNYANAḄỌ ḅe Pịrịm

¹² “KỊNỊNYANAḄỌ, sukuyọ-saakị kụra-ḅio ị́yẹrị Tamụnọọ. Ị́yẹrị ị̀ Tamụnọ, fịafịa pịkị sime gbamaso ḅọ. KỊNỊNYANAḄỌ ị̀ Tamụnọ pịkị ị̀ gbaịn ḅọrọmarị ḅọ, Babịlonịya ḅẹ apụ ma sẹlẹ ọkị tẹ ịn mịẹ kụrọmam mịẹtẹ ini inetẹ wa fomu ḅẹ ḅara.

¹³ Kụma mịọkụ ndẹẹ í inetẹ mịna mbasịarị si-mịẹapụ na inema ḅẹ ḅara? Ị́ atọrụngbọ ma fịafịa ḅaka wararị ya, kẹ siye ḍiki ḅụ, tẹ ị́ inetẹ tọrụ-tọrụ kẹ kura-aye mịẹ ḍiki ḅịa sakị. Mie ḅụ tiye ẹrẹsị í ḅịḅị-fie-a tẹ ịn karakara mịẹ ịn nẹngị atomi ma ḅaa gulugulumarị ḅara?”

¹⁴ “Ndẹẹ í inetẹ tomi kẹ inji anịanịa ọmọmọ ogbo tẹ ḅẹrẹtọnḅọ nyana-a aị ma mịẹ ḅara mịẹ ḅẹ ḅara?

¹⁵ Babịlonịya ḅẹ apụ ma arị-arị-arị kẹ tomi kun-arị, gbala inji ọkụ. Ini ịgbọ kẹ ịn fọnọ soarị tẹ in kun tẹ apụ ma ḅẹ ḍereku oloku kọn-arị!

¹⁶ Ịn pịkị sunsin ịna ịgbọ ma pịrị tẹ agba mịẹ arị pịrịarị, ịna ịgbọ ma ye goyegoye ḅẹ iḅi tẹịn ye nyana ḅo ịn pịrịarị ẹrẹsị.”

¹⁷ “Ini ịna okologie ma kẹ mịẹ ḅụ suu tẹ sịẹ-sịẹ ma ḅaa-ḅaa tọrọkọ-tọrọkọ mu gbamaso ḅẹ, ọkụrụkụrụ nyana-nyana-a ḅara ḅụ?”