Galesiya 5 - FỊAFỊA BAỊBỤLỤ

Ọ́ Ḅarị Omoni Sọ Ma

¹ Wamịnị ḅarị omoniapụ-a! Kịrayịsị omoni ḅara-ḅio wa pakama-ḅo tẹẹ! Ọkọẹrẹsị, ọmịnị ọmịna asịḅị ḅẹ atomi ḅara kẹ sịẹsimee, tẹ ḅarị ḍụkụ tẹ jen kẹ omoni-sọ ma.

² Ó pokii! Yẹrị Pọlụ ḍuko ọ́ pịrịarị, ọ́ ḍụkụ tẹ ini ọmịna tarị-ḅụụ sin tẹ ḅẹḅẹ, Kịrayịsị ḅarị gbọrụ sọye sọ mịẹ ọ́ pịrị-a.

³ Yee à pịkị jen kẹ ọmịna ḅeri nụnụ, mịnẹ gbọrụḅọ nimiatẹ ḍụkụ tẹ ini mḅọ tarị-ḅụụ sin-sin, mḅọ Oloko mamgba koko nyanam.

⁴ Ọmịna ḅụ Oloko koko kẹ Tamụnọ na kura ḅẹ ḍọkịarị apụ ma, ọmịnị ọmịna aḅụụ pẹlẹ-siin tẹ Kịrayịsị ḅụ. Tamụnọ ḍiki-ḅụụjịrị mẹ ḅio ọ́ ḅarị ofori.

⁵ Wamịnị kụma, wamịna ḅiokpọmaye anie, Tamụnọ ḅarana wa kẹ ori na kura ḅara wẹrị ḅa; tẹ miemẹ mie wa koruarị ye, anie Tamụnọ Tẹmẹ ḅe wa nyana minini ḅụ ḅọrọ tẹ, ọ̀ kụrọ ḅụ, kọrịarị kọrịnama mẹ.

⁶ Gbala, wa Kịrayịsị ḅụ emi sakị goyegoye, wa tarị-ḅụụ sin na, tarị-ḅụụ sin-a na, gbọrụ kiri sọ nyana-a; ḅẹlẹma ḅụ ḅọrọ tẹ kọrịnama kọrịarị minini anie ḅẹrẹ-sịḅị mẹ.

⁷ Ọmịnị iḅiye mịẹ sime apụ! Tụḅọ ḅọrọ karakara mẹ ḍuko ḅara mịẹ mẹ ḅụ ọ́ dasịẹma? Ọ̀ tọ-ḅara kẹ ó tuu koroma?

⁸ Ọ́ sịn ḅụụ pịrịarị Tamụnọ ḅe miemẹ mịẹ-a.

⁹ Ini mẹẹ, “Boowa ye-sunmaye kalịye kịngẹ mie ịn kẹ fịturu mịẹ ḅẹ fịlawa kpo ḅio sụa tẹ anị sun tendere ḅo opu fịturu kpo mịẹarị.”

¹⁰ Kụma à paa ọmịna ḅụụ ḅiokpọ nyana wararị. KỊNỊNYANAḄỌ ḅe na gbọrụ ḅụ sime mẹ ḅụ wa kọn-arị ḍumo mẹ ḅụ, à ḅiokpọ wararị mịnẹ ó jen kuroma nyana ḅịa, tẹ anị tomḅọ ḅe tẹ ó pikirimarị ḅọ ḅe, ori tụḅọ-o, tụḅọ-o, Tamụnọ fomu-ḅara ọ̀ gbarị ḅịa.

¹¹ Ị̀ amịnapụ, yẹrị kụma, à paa tarị-ḅụụ sin na-iḅim ḅẹ ye ḍukoarị ḅẹ kụma in gotẹ paa ị̀ ḅaa ḅẹ ḅọkọ ḍọkịarị ye tiye? Ọkọẹrẹsị, aniemẹ nwẹnị karakaraye ḅẹḅẹ, Kịrayịsị ẹngbẹsẹ-sịn ḅụ ḅakụm ḅẹ ye mẹ tẹ à ḍukoarị ye mẹ ḅarị ḅụụ-fụka dogi-ḅo ḅịa.

¹² À ḅiiarị mịnẹ ọmịna sịḅị ḅio pikirimarị atomi ma gbọrsịḅị mịẹ ma-muu; yee ịn mịẹ ma-mu tẹ ịna aḅụụ poo, tẹ ḅarị owiḅọ kụrọ nyana ma!

¹³ Ọmịnị kịngẹ kụma, ị̀ amịnapụ, Kịrayịsị omoni sọ ḅụ ọ́ sịn pakama-ḅo tẹ. Kụma ọ́ ḍụkụ tẹ mị ḅarana sịḅị nyana mẹ mịẹ tẹ ọmịna meni-oju sọlịmarị aị ma ḅo ḅẹrẹtọn ọ́ pịrị ma. Anie nakara, yee ḅẹlẹma ọ́ mịẹ tẹ ọ́ fịrịmẹnjị jụmọ-jụmọ pịrị.

¹⁴ Kẹ gotẹ ọkọ ḍukoarị, bebe Oloko mẹ tọn koroma aị ma ḅẹ gbọrụmgbọ arịmgba kobiri ọkị wararị, “Ị́ ị́ ḅụụ ḅẹlẹmarị ḅara kẹ í pembe tomḅọ ḅẹlẹmaa.”

¹⁵ Kụma ó piri-ḅio-ḅẹ anama kịka ḅara kẹ ye mịẹarị ḅẹḅẹ, anie jụmọ-jụmọ kanị na, ye kẹ jụmọ-jụmọ lama na; ọmịnị ẹbịị, anieofori ọ́ gbọrsịḅị jụmọ-jụmọ ḅaa guluguluma fama ḅa.

Fịafịa Tẹmẹ Ḅe Na Tomḅọ Si Sime Ḅara Na

¹⁶ À fiearị ye anie mie: yee Fịafịa Tẹmẹ ḅe ọmịna aḍumo ma datụkụma, anịsakị ọ́ ḅarị tomḅọ si sime-ḅara mẹ sọlịmarị aị kẹ anị pịrị ḅịa.

¹⁷ Kẹ gotẹ ọkọ ḍukoarị, tomḅọ si sime-ḅara mẹ ḅiiarị ye Fịafịa Tẹmẹ ḅe ḅiiarị ye na tụḅụrụ wararị, tẹ Fịafịa Tẹmẹ ḅe ḅiiarị ye pịkị tomḅọ si sime-ḅara ḅiiarị ye na tụḅụrụ wararị. Mịna maa aị ma fịya-a aị, tẹ miemẹ fiearị mịnẹ í inetẹ ị́ mịẹ ḅẹ ḅiiarị ye mịẹ ḅịa.

¹⁸ Fịafịa Tẹmẹ ḅe ị́ tọrọkọ-sụn-arị ḅẹḅẹ, í Oloko mẹ suku-ḅio ofori.

¹⁹ Tomḅọ si sime-ḅara mẹ mịẹ-mịẹ aị giregire wararị. Anị amịna ḅụụ ḍie-pakamarị anga anie, owiapụ na ereme na si mẹnjị kọn na, ḅụụ sima mịẹye na, ḅụụ gbẹẹ-a amịẹaị na ḅụ;

²⁰ oru tẹkẹ na, arị amịẹaị na ḅụ. Anị mịẹtẹ kịnị fịya-a ḅara sime tẹ owu sọarị; anị pịkị mịẹtẹ kịnị afana na, ịganị na, opu sọlịma na tẹmẹ nyanarị. Ini ịna ḅụụ puu ḅelema tẹ pakịrị, pakịrị na ogbo-ogbo na ḅụ simearị;

²¹ kịnị sọlịma ḅụ in ḍiki-ḅioḅu na, ḅẹlẹma iru ḅuu tọrụ-ḅaama na, saḅa-ḅọrọ tẹ ḅara kẹ su na sẹkị na ma ḅọrọ na, mịna aị ma kịka jaị sọ tomḅọ si sime-ḅara mẹ ḅụ ḅoarị. Ḅọrọ tẹ sakị ḅụ à kẹ ọmịna ḅeri nụnụ tẹ ḅara, à pịkị mịọkụ sọ ọmịna ḅeri nụnụarị, mịnẹ mịna aị ma mịẹarị apụ Tamụnọ Ama-da yọ mẹ sọ-mu ḅịa.

²² Kụma Fịafịa Tẹmẹ ḅe pakama-ḅoarị aị anie ḅẹlẹma na, ḍereku na dein na; ye-inema na, iḅi-yemịẹ-ḅara na iḅi na; ḅioḅẹngbọ-kẹ-sịrẹrẹ-niḅi ḅara sime na,

²³ ḅụụ lẹgịma na, ḅụụ ọlọ na. Gbọrụ oloko sọ nwẹn sime aị ma ọlọ-a.

²⁴ Sime Kịrayịsị Jizọsị pịrị apụ ịna si sime-ḅara mẹ na anị sọlịma tẹ ḅiiarị aị mamgba na kẹ sụa ḅaa sin tẹ.

²⁵ Fịafịa Tẹmẹ ḅe ḍumo kẹ wa pịrị tẹẹ; ọ̀ pịkị wamịna aḍumo ma kẹ ọrụtọn ḅara wẹrị ḅa.

²⁶ Wa ḅụụ-gelema ma, anịanịa jụmọ-jụmọ ḅụụ-sịnịsịnịma ma, anịanịa afana tẹmẹ nyana jụmọ-jụmọ pịrị ma.