Galesiya 3 - FỊAFỊA BAỊBỤLỤ

Oloko Anịanịa Minini

¹ Galesiya ḅẹ apụ, oḅori atomi! Tụḅọ ó pile? Ọmịnị ḅarana banabana ḅara kẹ ẹrịarị ḅara pembe ḅara ịn kọkọ nwẹn kẹ Jizọsị Kịrayịsị ẹngbẹsẹ-sịn ḅụ fịị ḅara mẹ ḍuko ọ́ pịrị fama!

² Ọ́ mị gberie mẹ kịngẹ pakịrị ị̀ pịrị: Oloko mẹ ḅii ye mịẹ ḅụ ọ́ ḅọrọ tẹ Tamụnọ Tẹmẹ ḅe nyana, mụnọọ iḅi oku mẹ naa tẹ anị minini ḅụ?

³ Ndẹẹ ọmịnị inetẹ mị-ḅara kẹ oḅori-sọ ḅẹ ḅara. Tamụnọ Tẹmẹ ḅe ḅụ mie ọ́ saakị ye; mịọkụ ọ́ ḅọrọ ḅiiarị ọmịnị ọmịna kụrọ kẹ mu kunoma?

⁴ Ọmịnị ẹrị tẹ ye mẹmgba ḅo papaa fa ye sọm ọkụ-a? Piki-pikiye-ofori ḅara ḅụ anị ye sọ wararị.

⁵ Ọmịnị Oloko mẹ ḅiiarị ye mịẹarị ye, mie Tamụnọ gotẹ Tẹmẹ ḅe kẹ ọ́ pịrị, tẹ ọmịna ogboku ḅụụ-buama-aị mịẹarị ye mụnọọ, ọmịnị iḅi-oku mẹ naa tẹ anị minini ye ḅụ?

⁶ Ọmịnị anị Ebira-amụ ḅụ sime-ḅara kẹ ḅiokoromaa: anie Fịafịa Ḍiri mẹ ḍukoarị ḅara, “Ọ̀ Tamụnọ mininim, tẹ Tamụnọ ḅụ ọ̀ nyana minini gotẹ Tamụnọ karakara mịẹ ḅọ ḅara kẹ ori ọkịm.”

⁷ Ọkọẹrẹsị, ó nimii mịnẹ karakarama tẹ Ebira-amụ furo-ḅẹ-apụ anie minini nyana atomi maa.

⁸ Fịafịa Ḍiri mẹ tọrọkọ tarị ḍuko wẹrị tẹ, mịnẹ minini ḅụ mie Tamụnọ ḅọrọ tẹ ja asịẹ ḅẹ apụ ma kẹ ọ̀ ḅụụ kura ḅara wẹrị ḅarịye. Tẹ mie ḅụ Fịafịa Ḍiri mẹ nwẹnị Iḅi Oku mẹ ḍuko Ebira-amụ pịrị: “Tamụnọ ị́ ḅụụ ḅọrọ tẹ tomikiri ḅẹ atomi mamgba boma ḅa.”

⁹ Ebira-amụ minini nyanam ẹrẹsị Tamụnọ ò bomam; mie ḅụ minini nyana apụ mamgba Ebira-amụ boma ḅara mẹ mie ini sọ boma tẹ ḅara.

¹⁰ Wori-nume Oloko mẹ koko ḅụ sịrẹrẹ wararị apụ ọgọnọ emi. Kẹ gotẹ ọkọ ḍukoarị, Fịafịa Ḍiri mẹ ḅẹẹm, “Ḅẹḅọ-ḅẹḅọ tẹ, sakị mamgba, Oloko ḍiri mẹ ḅio kẹẹ koro wararị ye goyegoye poki tẹ mịẹ-a ḅọ mẹ Tamụnọ wori-nume mḅọ ọgọnọ emi.”

¹¹ Mịọkụ, anị giregire wararị mịnẹ gbọrụḅọ-sọ oloko koko ḅụ ḅọrọ tẹ Tamụnọ na kura ḅịa, anie, Fịafịa Ḍiri mẹ ḅẹẹarị ḅara mẹ ẹrẹsị, “Minini ḅụ ḅọrọ tẹ Tamụnọ na kura ḅọ mẹ kịngẹ anie ḍumo ḅarịye.”

¹² Kụma Oloko mẹ minini na gbọrụ mịẹye sọ nyana-a. Anie nakara, Fịafịa Ḍiri mẹ ḅẹẹm, “Ḅẹḅọ-ḅẹḅọ tẹ Oloko mẹ ḅiiarị ye goyegoye mịẹarị ḅọ ḍumo ḅa.”

¹³ Kụma Kịrayịsị, wori tẹ ḅọ sọ wa pịrị ḅụ ḅọrọ tẹ Oloko mẹ kẹ ḅo wamịna ọgọnọ gbanarị wori-nume mẹ ḅụ wa pakịrị pakama-ḅo tẹ; kẹ gotẹ ọkọ ḍukoarị, Fịafịa Ḍiri mẹ ḅẹẹm, “Sịn ọgọnọ ịn kpọọ ḅaa ḅọ, ḅaa ḅọ Tamụnọ wori-nume mḅọ ọgọnọ emi.”

¹⁴ Kịrayịsị gotẹ mie mịẹye, mịẹtẹ Tamụnọ minini Ebira-amụ pịrị boma mẹ, Jizọsị Kịrayịsị ḅụụ ḅọrọ tẹ Ja asịẹ ḅẹ apụ ma ḅara la, mịẹtẹ minini nyana ḅụ wa Tamụnọ minini ori atomi pịrị wararị Tẹmẹ ḅe daa-ọkị ḅẹ ḅara.

Oloko Mẹ Na Minini Pịrịye Mẹ Na

¹⁵ Ị̀ amịnapụ, yee arị ene-ḅaaene-ḅaaene pakarị ye kẹ tọnma ọ́ pịrị. Maa apụ gberie ḅụ ḅịḅị-kẹ-ogbosọ tẹ anị kẹ ḍiri kẹẹ tẹ, ḅara kẹ ḍiri mẹ ḅio sụa tẹ ḅẹḅẹ, gbọrụḅọ-sọ inetẹ anị kan ḅịa, pịkị ye kẹ anị ḅụ sụa ḅịa.

¹⁶ Mịọkụ Tamụnọ minini aị ma ò minini Ebira-amụ na ò furo ḅẹ ḅọ na pịrịm. Fịafịa Ḍiri mẹ “furo-ḅẹ-apụ” ẹkwẹn kọn-a, gbala tọnwa-apụ ḅẹẹarị ye ọkụ; kụma “furo-ḅẹ-ḅọ” mie anị ḅẹẹ ye, anie fiearị, gbọrụḅọ ngẹrị, ẹrẹ go ḅụ, anie Kịrayịsị.

¹⁷ À fiearị ye anie, Tamụnọ Ebira-amụ na ọḅọkụ fịm, tẹ mininim mịnẹ ori anị sima ḅịa. Oloko mẹ, tẹ kụra ẹndẹ na kụra suei na ḅọrọ tẹ ḅo ye mẹ, inetẹ anị ọḅọkụ mẹ kan tẹ Tamụnọ minini ye mẹ kẹ papaaye sọma ḅịa.

¹⁸ Kẹ gotẹ ọkọ ḍukoarị, Tamụnọ ḍiepịrịye mẹ Oloko mẹ ḅụ sịrẹrẹarị ḅẹḅẹ, anị ḅarị ò minini ye ḅụ sịrẹrẹ-a. Anị sime-ḅara sime-ḅara sọ, Tamụnọ kẹ Ebira-amụ pịrị ḍiepịrịye mẹ, ò minini ọ̀ pịrịm ẹrẹsị ọ̀ kẹ ọ̀ pịrịm.

¹⁹ Anị kụma in tiegotẹ Oloko mẹ sụa? In gotẹ anị sụa ye, anị kura-a mịẹye kẹ kịnị ḍie ḅẹm, tẹ anị kụrọ nyana mu Ebira-amụ furo-ḅẹ-ḅọ ḅe ḅo ḅẹ sakị la ḅẹm, ori tẹ in ye mẹ minini pịrị ḅọ ḅe. Oloko mẹ enjẹlị apụ anị daḅọrọmam, ogbo sịẹ tomḅọ ḅara ḅụ.

²⁰ Kụma gbọrụḅọ ngẹrị ye mịẹarị anga anị ogbo sịẹ ḅọ ḅii-a; anịsakị Tamụnọ anie ngẹrịḅọ.

Oloko Mẹ Sime Pịrị Ye Mẹ

²¹ Mie ḅọrọ fiearị mịnẹ Oloko mẹ Tamụnọ minini ye mẹ na tụḅụrụ wararị mụnọọ? Gbala-gbala ọkọ-a! Kẹ gotẹ ọkọ ḍukoarị, tomi nwẹnị ḍumo ọkị-ḅo kịnị pịrịarị oloko daa-ọkị tẹ namịna, mimgbe ḅẹḅọ-ḅẹḅọ Tamụnọ na kura tẹẹ, oloko koko ḅụ.

²² Kụma Fịafịa Ḍiri mẹ ḅẹẹarị mịnẹ si kụrọ bebe tomikiri mẹ gbaịn wararị; tẹ mie ḅụ, ḍiepịrịye mẹ tẹ Jizọsị Kịrayịsị ḅụ minini nyana ḅụ kịnị ḅara la-la ye mẹ, ịn kẹ minini nyana apụ ma pịrị tẹ.

²³ Kụma minini sakị mẹ amụ ḅo-a sakị mẹ Oloko mẹ wa ịkasị ikoli ḅio koroma wẹrị nwenii mie ḅoarị minini mẹ amịna ḅụụ mịẹfinji ḅẹ sakị mẹ ḅom.

²⁴ Mie ḅụ Oloko mẹ wa ḍikiḍiki nwenii Kịrayịsị ḅom, ọ̀ mịẹtẹ wa minini ḅụ ḅọrọ tẹ Tamụnọ na kura ḅẹ ḅara.

²⁵ Mịọkụ wa ḅo minini sakị ḅụ sọ tẹ mẹ, Oloko mẹ ḅarị wamịna ḅụụ kụrọ nyana-a.

²⁶ Minini ḅụ mie ọmịnị-mgba ḅọrọ tẹ Kịrayịsị Jizọsị na gbọrụ ḅụ sime tẹ Tamụnọ awọmẹ sọ ye.

²⁷ Ó minji sara tẹ Kịrayịsị na gbọrụ ḅụ simem, tẹ mịọkụ ḅo, ye ḍuko-ḍuko ḅara, ḅụ, Kịrayịsị ḅe ḅioju ḍumo mẹ kẹ kapa sọma sụa tẹ.

²⁸ Mie ḅụ, Juu-ḅẹ-apụ na Ja asịẹ ḅẹ apụ na ogboku, omoni na amịna sịḅị atomi na ogboku, owiapụ na ereme na ogboku, kịrị ḅarị ofori; Kịrayịsị Jizọsị na gbọrụ ḅụ sime ḅụ ọmịnị-mgba gberie mịẹ tẹ.

²⁹ Ọkọẹrẹsị, ó sime Kịrayịsị pịrị ḅẹḅẹ, ọmịnị Ebira-amụ furo-ḅẹ-apụụ, tẹ Tamụnọ minini ye mẹ nyana ḅa.