Galesiya 2 - FỊAFỊA BAỊBỤLỤ

Pọlụ Na Osi Afịrịmẹnjịapụ Ma Na

¹ Ngei akụra fa jei ḅọrọ tẹso, Banabasị na ị̀ na Tayịtọsị kẹ wamịna ḅụụ sụa tẹ Jeruselemu mum.

² À gotẹ mu ye, Tamụnọ mịẹfinji ị̀ pịrịm mịnẹ à muu. Sịḅịdapụ ma na ị̀ na ngẹrị kobiri ḅụ à ḍuko Ja asịẹ ḅẹ apụ ma pịrịarị iḅi-oku mẹ wa nwẹn ḍuko finji ịn pịrịm. À ḅii-a ḅọrọtẹ sakị-o, mịọkụ-o, ị̀ kọrịnama mẹ papaaye sọ.

³ Anịsakị, ị̀ na mu Tayịtọsị ḅe Girisi ḅẹ ḅọ sọ, ini ò ponoma-a ọ̀ tarị-ḅụụ sin-a sin-a,

⁴ karakaraye ja apụ ọkọ ịgbanịm sọ. Ḅụụ kẹ wamịnị na sọ tẹ Kịrayịsị minini apụ ḅara wẹrị ḅụ, mịna atomi ma furu ḅara kẹ wamịna ogbo sọ ḅom, tẹ Kịrayịsị Jizọsị ḅụ wa nyana ḅarana sịḅị nyana mẹ ḍọkị nimi ḅẹ ḅara, ori na gboloma mẹ ḅụ. Ịn wa kẹ omoni sọma ḅẹm,

⁵ kụma mịẹtẹ iḅi-oku mẹ ḅẹ karakara mẹ kpaịn sime ọ́ pịrị ḅẹ ḅara, wa gbọrụ ḅọkọ kalịye sọ fooma ịn pịrị-a, boowa sakị kalịye kịngẹ sọ.

⁶ Kụma anị sakị sịḅịda ḅara sime apụ ma — à gotẹ ọkọ ḅẹẹarị, ini tapụ-o tapụ-o, ị̀ ḅụụ anị kịrị nyana-a; Tamụnọ tọrụngbọ kẹ ḍiki tẹ ye simearị ḅara ḍiki ḅẹrẹkọn-a — à ḍukoarị, nwẹn ḅẹẹ sịḅịdapụ ma kẹ ì ḍie gbọrụ ịwọ ye sọ ofori.

⁷ Anie nakara, ini ẹrịm mịnẹ Tamụnọ iḅi-oku mẹ ḍuko Ja asịẹ ḅẹ apụ ma pịrị fịrị mẹ kẹ ị̀ pịrị tẹ, ori iḅi oku mẹ ḍuko Juu-ḅẹ-apụ ma pịrị fịrị mẹ kẹ Pita pịrị gbọrụ ḅara mẹ.

⁸ Kẹ gotẹ ọkọ ḍukoarị, Tamụnọ kụrọ mie ị̀ kẹ Ja asịẹ ḅẹ apụ ma ḅẹ fịrịmẹnjịḅọ mịẹ ye, anị gbọrụ ḅara mẹ tẹ Tamụnọ Pita kẹ Juu-ḅẹ-apụ ma ḅẹ fịrịmẹnjịḅọ mịẹ ḅara.

⁹ Jemusị na, Pita na, Jọnị na tẹ Sịḅịdapụ nwẹn ḅẹẹ apụ ma sọ lekiri tẹ mịnẹ Tamụnọ mị fịrị mẹ saakị sikima ị̀ pịrịm; mie ḅụ ịn nwẹnị mọnị kẹ Banabasị na ị̀ na pịrị, tẹ kẹ elekima mịẹ, mịnẹ wamịnị maa apụ mị kọrịnama mẹ kọrị gbolomaa. Wa nwẹnị ḅịḅị-kẹ-ogbosọ mịnẹ Banabasị na ị̀ na Ja asịẹ ḅẹ apụ ogboku kọrịnama mẹ kọrịị, ini nwẹnị Juu-ḅẹ-apụ ogboku kọrị ḅa.

¹⁰ Ini bebe wamịna ḅara ḅii ye anie, wa ịna ogboku ḅụ mịẹ ḅẹ ọkụ ofori apụ ma kẹ ḅiokoromaa, anie yẹrị sọ ḅio-sẹsẹ pịrị tẹ mịẹarị gbọrụ ye mẹ.

Pọlụ Anịtọkụ Jụ Pita Ḍiki-ịganịm

¹¹ Kụma Pita ḅo Anịtọkụ la sakị tomina ogboku ḅụ arị ori na tụḅụrụm, ọ̀ tọrụ-ḅọị-a ḅara kẹ mịẹ-irima ye gotẹ.

¹² Jemusị kẹ fịrịma atomi ma amụ ḅo la-a sakị, Pita na Ja asịẹ ḅẹ amịnapụ ma na ḅara gboloma tẹ fịye fị-fịm. Kụma mịna tomi ma ḅo la tẹso, ọ̀ nwẹnị amịna ḅụụ puu sikima, tẹ ḅarị Ja asịẹ ḅẹ apụ ma na gbọrụ anga fịye fị ḍụkụ-a, ó gotẹ ọkọ mịẹ ye, ori ịn tarị-ḅụụ sin-a sin-a ịgbanị apụ ma na gbọrụ jụ ḅọrọ tẹ.

¹³ Ja Juu-ḅẹ amịnapụ sọ Pita ḍikima tẹ ḅalafa ḅara mẹ mịẹm; tẹ Banabasị, Banabasị sọ, ḅọrọ-a tẹ ịna tẹmẹ ofori mịẹye mẹ mịẹm.

¹⁴ Àrị ẹrịm ịn ḅarị iḅi-oku mẹ ḅẹ karakara mẹ ḅẹ gono-gono etela mẹnjị-a ḅẹẹ sakị, inimgba tọrọkọ ḅụ à Pita ḅẹẹm, “Ị́yẹrị Juu-ḅẹ ḅọ, anịsọ í Jen sịẹ ḅẹ ḅọ ḅara kẹ ḍumo kọn-arị, ḅarị Juu-ḅẹ ḅọ ḅara-a. Ọkọ kụma, ndẹẹ í inetẹ ḅụụkụrọma tẹ Ja asịẹ ḅẹ apụ ma ponoma tẹ in Juu-ḅẹ-apụ ḅara kẹ ḍumo kọn ḅẹ ḅara?”

Minini Ḅụ Mie Juu-ḅẹ-apụ Na Ja asịẹ Ḅẹ Apụ Na Ḅọrọ Tẹ Ḅọrọmarị Ye

¹⁵ Karakaraye, wamịnị Juu-ḅẹ-apụ, wa iyi ḅara ḅụ, tẹ nwẹn ḅẹẹ ḅẹẹ “Ja asịẹ ḅẹ si-mịẹapụ” ma-a, ịn kẹ ịn sịn-sịn ḅara ḅụ.

¹⁶ Anịsọ wa nimi wararị mịnẹ Jizọsị Kịrayịsị ḅụ minini nyana ḅụ mie tomḅọ ḅọrọ tẹ Tamụnọ na kura ḅụ simearị ye, gbala-gbala Oloko mẹ ḅiiarị ye mịẹ ḅụ-a. Wamịnị sọ wa Kịrayịsị Jizọsị minini tẹ, mịẹtẹ wa wa Kịrayịsị ḅụ nyana minini mẹ ḅụ ḅọrọ tẹ Tamụnọ na kura ḅụ sime ḅẹ ḅara, Oloko mẹ ḅiiarị ye mịẹ ḅụ-a. Kẹ gotẹ ọkọ ḍukoarị, jene-jene gbọrụḅọ-sọ amụ Tamụnọ na kura ḅụ sime-a, mḅọ Oloko mẹ ḅiiarị ye mịẹm gotẹ.

¹⁷ Ọkọ, tẹ wa ḅụụkụrọma tẹ Kịrayịsị na gbọrụ ḅụ sime ḅụ ḅọrọ tẹ Tamụnọ na kura apụ sọ ḅẹ ḍọkịarị ye mẹ ḅụ wa ḅo ḍọkị-ẹrị tẹ mịnẹ ja asịẹ ḅẹ apụ ma si-mịẹapụ ḅara mie wamịnị Juu-ḅẹ-apụ ma sọ si-mịẹapụ ḅara, kụma — anie mẹ ḅọrọ fiearị, mịnẹ Kịrayịsị fịrịmẹnjị si pịrịarị? Gbọrụ ḅọkọ ḅụ sọ-a!

¹⁸ À nwẹnị sin saakị à kan saratẹ Oloko mẹ nama saakịarị ḅẹ kụma ị̀ ḅioju sọ ḅo Oloko mẹ kan-arị ḅọ sọ tẹ.

¹⁹ Anị sime-ḅara, sime-ḅara sọ, Oloko mẹ ḅụ kịngẹ kụma yẹrị à fịị tẹ — Oloko mẹ ḅioju mie ị̀ ḅaa ye — mịẹtẹ à ḍumo Tamụnọ pịrị ḅẹ ḅara. Ini ị̀ kẹ Kịrayịsị na ori ẹngbẹsẹ-sịn mẹ ḅụ sụa ḅaa tẹ,

²⁰ mie ḅụ, ḍumoarị ḅọ mẹ ḅarị yẹrị-yaa, kụma Kịrayịsị tẹ ị̀ ḅụụ ḅio angarị ḅọ ḅe. Mị ḍumo mẹ tẹ mịọkụ à kọn-arị ye mẹ, Tamụnọ Tụḅọ ḅe ḅụ à nyana minini ḅụ mie à ḍumoarị ye, anie ị̀ ḅẹlẹma tẹ amịna ḍumo kẹ ì gotẹ pịrị ḅọ ḅe.

²¹ À ḍụkụ tẹ Tamụnọ ḍiki-ḅụụjịrị mẹ sịkị-a. Kụma tomḅọ nwẹnị Oloko ḅụ ḅọrọ tẹ Tamụnọ na kurarị ḅẹḅẹ, anie fiearị Kịrayịsị kọn fịị mẹ papaa faam!