Fịrịmẹnjịapụ 9 - FỊAFỊA BAỊBỤLỤ

Sọlụ Si Ḅụ Pịkị Tẹ Kịrayịsị Ḍukamẹnjịḅọ Sọm

¹ Arị ene mamgba ḅụ Sọlụ paa kụrọma, kụrọma KỊNỊNYANAḄỌ ḅe ḍukamẹnjịapụ ma ḅaa ḅẹ tẹ ini ẹrẹmam. Ọ̀ nwẹnị mu Sịḅịda-Agbamịẹḅọ ḅe la,

² mịnẹ ò ḍiri kẹẹ tẹ kẹ ọ̀ pịrị tẹ ọ̀ kẹ Damasịkọsị ḅụ Juu-ḅẹ-apụ ma ama-awarị ma mu, tẹ arị aḅio KỊNỊNYANAḄỌ ḅe Etela mẹ ḍukamẹnjịapụ ẹrị-ẹrị, ini ḅẹ owiapụ-o, ini ḅẹ ereme-o, ori in kun tẹ kẹ pịkị Jeruselemu ḅo ḅẹ ḅara.

³ Sọlụ mẹnjị ma-mu Damasịkọsị opu ama mẹ kpekiarị ogbo bele So-ḅio ḅịya ḅo ori ikelemam, ḅiotọn-a ḅara ḅụ.

⁴ Ọ̀ nwẹnị ḅịkị kiri koro tẹ pọkọ naa, ọ̀ ḅẹẹarị, “Sọlụ, Sọlụ, í tiegotẹ ḅaa-ḅọkọ kẹ ị̀ ḍọkịarị?”

⁵ Sọlụ nwẹnị gbela, “Ị̀ Nyanaḅọ, ị́yẹrị tụḅọ?” Pọkọ mẹ nwẹnị ḅẹẹ, “Yẹrị Jizọsị, ị́ ḅaa-ḅọkọ kẹ ḍọkịarị ḅọ ḅe.

⁶ Kụma saakị sịẹ tẹ opu ama mẹ ḅio sọ-muu, ị́ mịẹ ḅẹ ye in ḍuko ị́ pịrị ḅa.”

⁷ Sọlụ na mu sime apụ ma nwẹnị daasịẹ, ẹkwẹn-ẹkwẹn ḅịḅị sọ ịn nẹngịm; ịn pọkọ naam kụma ịn gbọrụḅọ-sọ ẹrị-a.

⁸ Sọlụ nwẹnị kiri mẹ ḅio saakị tẹ tọrụ finji, kụma ọ̀ ḅarị inetẹ ye ẹrị-a. Mie ḅụ ịn ḅara kẹ ori ọlọ mu Damasịkọsị ḅio sọm.

⁹ Ò ye ẹrị-a ḅara kẹ tẹra aḍin simem; mịna aḍin ma ḅụ ò fịye fị-a, ọ̀ pịkị gberie-sọ ḅuu-a.

¹⁰ Anị sakị mẹ ḅụ Damasịkọsị opu ama mẹ ḅio Ananayasị nwẹn-sịn Kịrayịsị ḍukamẹnjịḅọ simem. Ḅị tomḅọ ḅe mono-a ḅara kẹ ḍawọm, tẹ KỊNỊNYANAḄỌ ḅẹ nwẹnị ọ̀ sịn, “Ananayasị!” Ọ̀ nwẹnị pakịrị, “Ị̀ Nyanaḅọ, mie yẹrịị.”

¹¹ Tẹ KỊNỊNYANAḄỌ ḅe nwẹnị ọ̀ ḅẹẹ, “Tẹlẹma tẹ ịn kẹ Gono-gono Etela sịn-arị etela mẹ muu, tẹ Judasị warị ḅụ Tasọsị ḅẹ ḅọ tẹ ịn kẹ Sọlụ sịn-arị ḅọ gbelaa, ọ̀ tẹkẹarị,

¹² tẹ ḍawọ-jụ pembe ḅara ḅụ Ananayasị nwẹn-sịn ḅọ ẹrị tẹ, ọ̀ sọ ḅo tẹ ḅara kẹ ori ọgọnọ gbana tẹ ò siin ye ẹrị ḅẹ ḅara.”

¹³ Ananayasị nwẹnị pakịrị, “KỊNỊNYANAḄỌ, tọnwa apụ ḅị tomḅọ ḅe gbolomaye ḍuko ị̀ pịrị tẹ, pịkị ḅalafama aị tẹ ọ̀ kẹ Jeruselemu ḅụ í minini apụ ma mịẹ tẹ aị na.

¹⁴ Tẹ ọ̀ pịkị Damasịkọsị ḅo tẹ, agbamịẹapụ ma kẹ ọ̀ pịrị kụrọ ḅụ, tẹ ị́ tẹkẹarị apụ mamgba kun so ḅẹ ẹrẹsị.”

¹⁵ KỊNỊNYANAḄỌ ḅe nwẹnị ọ̀ ḅẹẹ, “Muu, gbala yẹrị ọ̀ sẹlẹ ọkị tẹ mịnẹ ori ị̀ fịrịmẹnjịḅọ sọọ, tẹ mịẹtẹ Ja asịẹ ḅẹ apụ na, ịna amadapụ na, Izirẹlịapụ na ị̀ ẹrẹ naa tẹ ì nimi ḅẹ ḅara.

¹⁶ Tẹ yẹrị ḅarana ori ì gotẹ ẹrị ḅarị tọrụsiẹrị mamgba kẹ ò ḍie ḅa.”

¹⁷ Mie ḅụ Ananayasị nwẹnị mu, tẹ Sọlụ sime, sime warị mẹ so, tẹ ori aḅara kẹ Sọlụ ọgọnọ gbana tẹ ḅẹẹ, “Mbire Sọlụ, KỊNỊNYANAḄỌ Jizọsị ḅe ḅioju ị̀ kẹ fịrịmam, ori anie amịna ḅụụ pakama í ḍie ḅọ ḅee etela ḅụ, ị́ mịanga ḅoarị sakị. Ò gotẹ ị̀ kẹ fịrịma ye, í siin tọrụngbọ kẹ ye ẹrị tẹ Fịafịa Tẹmẹ ḅe ị́ ḅụụ ḅio sọ ḅin ḅẹ ḅara.”

¹⁸ Anị gbọrụ sakị ḅụ inji ẹfẹrẹfẹ pembe aị nwẹnị Sọlụ atọrụngbọ ḅio sara paka-ḅo, tẹ ọ̀ nwẹnị inetẹ siin ye ẹrị. Ọ̀ saakị sịẹ tẹ in minji kẹ ọ̀ saram;

¹⁹ tẹ ò ye fị tẹso, ịnyọ nwẹnị ọ̀ ḅụụ sọ. Sọlụ nwẹnị Damasịkọsị ḅụ Jizọsị minini apụ ma na boowa aḍin sime tẹso,

Sọlụ Damasịkọsị Ḅụ Tamụnọ Ẹkwẹn Kọnm

²⁰ anị gbọrụ sakị ḅụ ọ̀ nwẹnị Juu-ḅẹ-apụ ma ama-awarị ma mu, mu tẹ saakị ẹkwẹn ịn pịrị mịnẹ Jizọsị ḅe Tamụnọ Tụḅọọ.

²¹ Ò ḍuko ye mẹ naa apụ mamgba ḅụụ-bua tẹ gbelam, “Ḅie ḅe anie Jeruselemu ḅụ Jizọsị nwẹn-sịn ḅọ ḅe tẹkẹ apụ ma ḅaa sime ḅọ ḅe ori-a? Tẹ ọ̀ pịkị mị gbọrụ ye mẹ gotẹ mị ama ḅụ ori atomi ma kun so mu agbamịẹapụ ma pịrị ḅẹ tẹ ḅo-a?”

²² Kụma Sọlụ kọn ẹkwẹn mẹ kụrọ nyana la ḅara na, ọ̀ kịrị-kịrị aḅọkọ ḅụ Jizọsị anie Mẹsaya ḅe nwẹn ḅẹẹ ye mẹ ḍuko giregirema ḅara na mịẹtẹ Damasịkọsị ḅẹ Juu-ḅẹ-apụ ma ḅarị inetẹ ò kuḅu sịẹ-a.

²³ Tọnwa aḍin ḅọrọ tẹso, Juu-ḅẹ-apụ ma kobiri tẹ ịn Sọlụ ḅaa ḅẹ ḅẹrẹ-ḅiyam,

²⁴ kụma kịnị nwẹnị mu in ḅiya ye mẹ ḍuko ọ̀ pịrị. Eneḅaka na ḍin na ḅụ ḅọrọ ama mẹ sọ-sọ aḅọkọ mamgba ḅụ ini ẹbịm, ọ̀ ḅaa ḅẹ gotẹ.

²⁵ Kụma gbọrụ ḍin ḅụ Sọlụ ḍukamẹnjịapụ ọ̀ kẹ kana ḅio sụa tẹ onu mẹ foo wararị anga ḅụ ò toluma pakama iderima koromam.

Sọlụ Mu Jeruselemu La Tẹ

²⁶ Sọlụ mu Jeruselemu la tẹ Jizọsị ḍukamẹnjịapụ ma ḅụ sọ ḅẹ ḍọkị sakị, ori sọ ini ḅẹ ḅọọ sọ tẹ ye mẹ in minini ḍụkụ-a, inimgba ò ḍiki-ḅalafaam.

²⁷ Anịtẹso Banabasị nwẹnị ḅo ḅarasụa ọ̀ pịrị, tẹ ọ̀ kẹ fịrịmẹnjịapụ ma dama-mu. Ọ̀ nwẹnị ḍuko finji ịn pịrị Sọlụ etela ḅụ KỊNỊNYANAḄỌ ḅe ẹrị tẹ ḅara, tẹ KỊNỊNYANAḄỌ pịkị ẹkwẹn ọ̀ pịrị tẹ ḅara. Ọ̀ pịkị ḍuko ịn pịrịm mịnẹ Damasịkọsị ḅụ Sọlụ ḅalafa-a ḅara kẹ Jizọsị ẹrẹ mẹ ḍuko pakamam.

²⁸ Mie ḅụ Sọlụ ini na simem, tẹ Jeruselemu bebe ama mẹ kana-koro ḅụ ḅalafa-a ḅara kẹ KỊNỊNYANAḄỌ ḅe ẹrẹ mẹ ḍuko pakamam.

²⁹ Ọ̀ pịkị Giriki ḅịḅị fie Juu-ḅẹ-apụ ma na ẹkwẹn tẹ ye-nụnụam, kụma ini ọ̀ ḅaa ḅẹ ḅọkọ ḍọkịm.

³⁰ Jizọsị minini apụ ma miemẹ ḍọkị-nimi tẹso, ịn nwẹnị Sọlụ ọkị so Sizariya mu tẹ ọ̀ kẹ Tasọsị fịrịma.

³¹ Tẹ Judiya na, Galili na, Sameriya na mamgba ḅụ sọsị mẹ nwẹnị dein nyana. Fịafịa Tẹmẹ ḅe ḅarasụa ḅụ anị nwẹnị kụrọ sịẹ, tẹ pịkị kịẹn-ḅịḅị ḅụ ḍụḅa, anie anị kẹ KỊNỊNYANAḄỌ ḅe kụn ḅụ anga ḅara ẹrẹsị.

Pita Mu Lida Na Jọpa Na Lam

³² Anịtẹso Pita mu ama, ama la-la tẹ pịkị mu Tamụnọ atomi ma tẹ Lida ḅụ sime apụ sọ ḍiki ḅẹ mum.

³³ Anị yọ ò nine akụra kẹ ngụrọ kiri ḅụ iḅila ḅọlọlọ tẹ ḅọ ẹrịm, ori ẹrẹ Ahinasị.

³⁴ Pita nwẹnị ọ̀ ḅẹẹ, “Ahinasị, Jizọsị Kịrayịsị ị́ gwọ tẹ, saakị tẹ ị́ akpalị ikoo.” Anị gbọrụ sakị ḅụ ọ̀ nwẹnị saakị sịẹ.

³⁵ Tẹ Lida na Sarọnị ama ma ḅụ sime apụ mamgba ori ẹrị tẹ pịkị tẹ KỊNỊNYANAḄỌ ḅe dama-ḅom.

³⁶ Anị sakị Jọpa ḅụ Tabita nwẹn-sịn gbọrụ ẹrẹḅọ sime tẹ KỊNỊNYANAḄỌ ḅe mininim. (Giriki ḅịḅị ḅụ ịn kẹ á sịn ye Dọkasị, anie fiearị ḍuu). Á bebe ḍumo mẹ á kẹ iḅi mịẹ tẹ ḅarasụa igoin-apụ pịrịm.

³⁷ Anị sakị mẹ ḅụ ma ẹrẹḅọ ma nwẹnị obi tẹ fịị. Ịn nwẹnị á sịkịrị tẹ ḍụẹịn mẹ kẹ mu ḅekin-warị ọgọnọ-jụ ẹdẹ ọgọnọ gbana.

³⁸ Anị kụma Jọpa mẹ Lida ḅụ sụma ḅaka-a; tẹso Jọpa ḅụ Jizọsị minini apụ ma naam mịnẹ Pita ḅe Lida ḅụ emi ḅẹẹ sakị, ịn maa apụ fịrịmam, mịnẹ in mu ọ̀ sịn tẹ ọ̀ fọnya ḅo.

³⁹ Mie ḅụ Pita nwẹnị tẹlẹma tẹ ini na mu. Ò mu la tẹso ịn nwẹnị ori na ḅekin-warị mẹ kpọlị iwo. Anịanga sime diapụ-fịtẹ-ereme mamgba nwẹnị ò gbori-ikelema tẹ owu-owu tẹ Dọkasị ḍumo wararị sakị á gbin ịn pịrị akapa ḅara-ḅara ma kẹ ò ḍie.

⁴⁰ Pita nwẹnị ḅio mẹ ḅụ inimgba pakama, tẹ kparakị tẹ tẹkẹ; anịtẹso ọ̀ nwẹnị pịkị ḍụẹịn mẹ da tẹ ḅẹẹ, “Tabita, saakịị.” Tẹ á tọrụ finji tẹ Pita ẹrị tẹso, á nwẹnị tụkụ tẹ lẹgị.

⁴¹ Pita nwẹnị ḅarasụa á pịrị tẹ á saakị sịẹ. Anịtẹso ọ̀ nwẹnị Jizọsị minini apụ mamgba sịn, diapụ-fịtẹ-ereme ma sọ ịna ḅụụ sọm, tẹ ori á kẹ ḍumo ḅụ ịn pịrịm.

⁴² Paka ye mẹ Jọpa kana-koro tẹ tọnwa-apụ KỊNỊNYANAḄỌ ḅe mininim.

⁴³ Tẹ Pita nwẹnị Jọpa ḅụ Sayịmọnị nwẹn-sịn, nama oju apara kẹ kọrịnama kọrị, kọrị ḅọ warị ḅụ tọnwa aḍin sime.