Fịrịmẹnjịapụ 8 - FỊAFỊA BAỊBỤLỤ

Sọlụ Ḅaa-ḅọkọ Kẹ Sọsị Mẹ Ḍọkịm

¹ Anị gbọrụ ene mẹ ḅụ mie ịn saakị tọrụ-kpọma ḅaa-ḅọkọ kẹ Jeruselemu ḅẹ sọsị mẹ ḍọkị ye. Fịrịmẹnjịapụ ma sikima Jizọsị minini apụ mamgba mangị gala-gala mu Judiya na Sameriya na ibe ma ḅụ sọm.

² Ịna ḅụ Tamụnọ mangịma apụ ma ḅẹ ja apụ nwẹnị Sitivini ḍụẹịn mẹ dogi-mu ḍiḅi, tẹ ịn kpọma kururu tẹ oloku-oloku owum.

³ Kụma Sọlụ mịẹ tẹ sọsị mẹ fama ḅẹ ḅara ḍọkịm gotẹ ọ̀ warị-warị sọ-sọ tẹ Jizọsị minini apụ ma, owiapụ na ereme na, kun kun ikoli suum.

Iḅi-Oku Mẹ Mu Sameriya Lam

⁴ Jizọsị minini apụ ma tẹ gala-gala apụ ma, mu anga, anga la tẹ oku mẹ ḍukom.

⁵ Filipu nwẹnị Sameriya ḅẹ sịḅịda opu ama mẹ mu tẹ Mẹsaya ḅe gbolomaye mẹ ḍuko anị ama ḅẹ atomi ma pịrị.

⁶ Tomina-ogbo-ogbo ma Filipu ḍuko ye mẹ kẹ ye sịn lama tẹ poki tẹ pịkị ọ̀ mịẹ ḅụụ-buama-aị ẹrịm.

⁷ Si-atẹmẹ tọnwa atomi ḅụụ ḅio sime tẹ oloku-ma paka-som; anịsakị ngụrọ-kọnapụ na ekeliapụ na ḅẹ tọnwa apụ sọ gwọm.

⁸ Mie ḅụ anị opu ama mẹ kpọma ḅioḅẹlẹm.

⁹ Anị sakị mẹ ḅụ Sayịmọnị nwẹn-sịn gbọrụḅọ anị opu ama mẹ ḅụ anga tẹ majịkị mịẹ-mịẹ tẹ kẹ Sameriya ḅẹ apụ ma ḅụụ-buama-buamam. Ori mẹẹ ori opu tomḅọọ.

¹⁰ Tẹ opu ama mẹ ḅio sime-ḅọ sime-ḅọ, opu-o, kala-o, inimgba ọ̀ kẹ ye-sịn lamam. Ini mẹẹ, “Ḅieḅe anie Tamụnọ kụrọ tẹ ini ‘Opu Kụrọ’ kẹ sịn-arị ye mẹ.”

¹¹ Ini mị opu ḅara mẹ kẹ ori ọkịm, anie ala lama tẹ sakị ọ̀ nwẹn kẹ majịkị mịẹ-mịẹ tẹ kẹ ịna ḅụụ-buama tẹ ẹrẹsị.

¹² Kụma in ḅo Filipu kẹ Tamụnọ Ama-da mẹ na Jizọsị Kịrayịsị na gboloma Iḅi Oku mẹ minini tẹso, in minji saram, owiapụ na ereme na.

¹³ Sayịmọnị ḅe na amịna ḅụụ na sọ mininim; tẹ ó minji sara tẹso, ọ̀ ḅarị Filipu ḅụ ḅele-a, tẹ Filipu mịẹ opu ḅụụ-buama-aị ma na ḅụụ-gbiripuma aị ma na ẹrị sakị ọ̀ ḅụụ-gbiripu lamam.

¹⁴ Fịrịmẹnjịapụ ma nwẹnị Jeruselemu ḅụ sime tẹ naa mịnẹ Sameriya ḅẹ apụ ma Tamụnọ ẹkwẹn mẹ daa-ọkị tẹ; mie ḅụ ịn nwẹnị Pita na Jọnị na kẹ ịn fịrịma.

¹⁵ Ịn mu la sakị ịn tẹkẹ Jizọsị minini apụ ma pịrịm, ịn Fịafịa Tẹmẹ ḅe nyana ḅẹ ḅara.

¹⁶ Gbala Fịafịa Tẹmẹ ḅe amụ ịna ḅụ gbọrụḅọ sọ ọgọnọ gbana-a, minji kịngẹ mịẹ ịn KỊNỊNYANAḄỌ Jizọsị ḅe ẹrẹ mẹ ḅụ sara tẹ ye.

¹⁷ Anịtẹso Pita na Jọnị na nwẹnị ḅara kẹ ịna ọgọnọ gbana, tẹ ịn Fịafịa Tẹmẹ ḅe nyanam.

¹⁸ Sayịmọnị ẹrị tẹ mịnẹ fịrịmẹnjịapụ ma ḅara kẹ Jizọsị minini apụ ma ọgọnọ gbana tẹ ịn Tẹmẹ ḅe nyana tẹ ḅẹ sakị, ori igbigi kẹ Pita na Jọnị na da

¹⁹ tẹ ḅẹẹm, “Ọmịnị ọkị tẹ mị kụrọ mẹ kẹ yẹrị sọ pịrịị, mịẹtẹ arị ị̀ ḅara kẹ gbana ḅọ, gbana ḅọ Fịafịa Tẹmẹ ḅe nyana ḅẹ ḅara.”

²⁰ Kụma Pita ọ̀ pakịrịm, “Yee ị́yẹrị na í igbigi na mu ẹlị ḅio sọ, í kuromam í inetẹ igbigi kẹ Tamụnọ ḍiepịrịye mẹ fẹẹ ḅẹ ye gotẹ!

²¹ Tamụnọ tọrọkọ í ḅioḅẹngbọ karakara-a mẹ ẹrẹsị wamịna kọrịnama mẹ ḅụ í kiri nyana-a, ị́ pịkị wamịna ḅụ ofori.

²² Ọkọẹrẹsị, í ḅiotọn-arị siye mẹ ḅụ pịkị, tẹ KỊNỊNYANAḄỌ ḅe tẹkẹ tẹ ori í kuromarị siye mẹ wẹrịso ị́ pịrị.

²³ Kẹ gotẹ ọkọ ḍukoarị, à kẹ ị́ ẹrịarị ḅara opu ḍiki-ḅioḅu ị́ ḅụụ sọ kụrọ wararị, tẹ si pịkị ikoli kẹ ị́ sụa wararị.”

²⁴ Sayịmọnị nwẹnị Pita na Jọnị na ḅẹẹ, “Sisi ọ́ KỊNỊNYANAḄỌ ḅe tẹkẹ ị̀ pịrịị, mịẹtẹ ó ḍuko aị ma ḅẹ gberie-sọ ị̀ ḅụụ paka ḅịa ḅara.”

²⁵ Ini in nimi ye na KỊNỊNYANAḄỌ oku mẹ na ḍuko tomi ma pịrị fama tẹso, Pita na Jọnị na pịkịma so Jeruselemu mum. In soarị sakị, Sameriya ḅẹ tọnwa kala-ama ḅụ, ini Iḅi Oku mẹ ḍukom.

Filipu Na Ẹtịyopịya Ḅẹ Fịrịmẹnjị-Opuḅọ Ḅe Na

²⁶ KỊNỊNYANAḄỌ ḅe enjẹlị nwẹnị Filipu ḅẹẹ, “Tẹlẹma tẹ tọrụ kẹ suku-jụ daa, tẹ Jeruselemu ḅụ ḅọrọ mu Gaza la etela mẹ ḍuka-muu.” (Mị etela mẹ anie ịkpa ḅio ḅẹ etela)

²⁷ Mie ḅụ Filipu nwẹnị saakị tẹ mu. Tẹ ò muarị ogbo Ẹtịyopịya ḅẹ gbọrụ pootẹ ḅọ ori na bịamam, anịḅọ ḅe anie fịrịmẹnjị-opuḅọ tẹ Ẹtịyopịya ḅẹ amada-ẹrẹḅọ, ịn kẹ Kandasi sịn ḅọ ma ngọ warị ḍikiḍikiarị ḅọ. Ḅị tomḅọ ḅe tẹkẹ ḅẹ tẹ Jeruselemu mum

²⁸ tẹ ò kirimẹnjị-arụ ḅio sime tẹ pịkịma so ori ama muarị. Ori ọkọ kẹ soarị sakị ori Ayịzaya, ịkịankoroḅọ ḅe, ḍiri mẹ goarị.

²⁹ Fịafịa Tẹmẹ ḅe nwẹnị Filipu ḅẹẹ, “Saḅa mu anị kirimẹnjị-ọmụarụ mẹ la, tẹ anị ḅụ ḅele ma.”

³⁰ Filipu nwẹnị mangị saḅa tẹ naa mịnẹ tomḅọ ḅe ịkịankoro Ayịzaya ḍiri goarị. Ọ̀ nwẹnị ò gbela, “Í goarị ye mẹ fiearị ye í gbeke naarị?”

³¹ Fịrịmẹnjị-opuḅọ ḅe nwẹnị pakịrị, “Ndẹẹ arị inetẹ anị fiearị ye naa ḅẹ ḅara, jụmọ ḍuko-finji ị̀ pịrị sikima tẹ?” Tẹ ọ̀ nwẹnị Filipu ḅẹẹ ò kirimẹnjị-arụ mẹ ḅụkụlọ tẹ ori na lẹgịị.

³² Mie fịafịa ḍiri mẹ ḅio ò go sime anga mẹ: “Ịn kẹ ḅaa ḅẹ-muarị anana sime-ḅara ọ̀ nwẹn simem, ini oju ḅụ isuke kịrị sin-arị anana tụḅọ yaụ-sime ḅara, gbọrụ ẹkwẹn sọ ọ̀ ḅịḅị ḅio paka-ḅo-a.

³³ Ini ọ̀ ḅụụ-jịrịma ḅẹ ye kẹ ọ̀ mịẹm, ịn karakara ḅẹrẹ kọn ọ̀ pịrị ḍụkụ-a. Inetẹ ọ̀ paka-furo nimi tẹ ḍuko ḅọ ofori, mị tomikiri ọ̀ kọn ḅẹ ḅo ḍumo mẹ kunoma tẹ ẹrẹsị.”

³⁴ Fịrịmẹnjị-opuḅọ ḅe nwẹnị Filipu gbela, “Sisi ḍuko ị̀ pịrị, ịkịankoro ḅọ ḅe nwẹn ḅẹẹarị ye mẹ tụḅọ ḅụụ ḅẹ ḅẹrẹ? Ọ̀ ḅụụ ḅẹ ḅẹrẹ mụnọọ, jụmọ ḅụụ ḅẹ ḅẹrẹ?”

³⁵ Anịtẹso Filipu nwẹnị mị fịafịa ḍiri mẹ ḅio ò goo sime anga mẹ ḅụ saakị ẹkwẹn tẹ Jizọsị gboloma Iḅi-Oku mẹ ḍuko ọ̀ pịrị.

³⁶ Ini etela mẹ ḅụ ideri koro mu minji sime anga la tẹso, Fịrịmẹnjị-opuḅọ ḅe nwẹnị ḅẹẹ, “Mịanga minji emi sakị, tiye pịkị ì kiki ḅẹ minji sara ḅụ.”

³⁷ Filipu nwẹnị ọ̀ ḅẹẹ, “Ị́ ị́ tẹmẹ mẹmgba kẹ mininim ḅẹḅẹ, ị́ sara ḅa.” Fịrịmẹnjị-opuḅọ ḅe nwẹnị pakịrị, “À mininim, Jizọsị Kịrayịsị ḅe anie Tamụnọ Tụḅọ ḅee.”

³⁸ Fịrịmẹnjị-opuḅọ ḅe nwẹnị kirimẹnjị-arụ mẹ dasịẹma, tẹ Filipu na ori na nwẹnị ideri koro minji mẹ ḅio mu, tẹ Filipu nwẹnị minji kẹ ọ̀ sara.

³⁹ In minji mẹ ḅio sime tẹ paka-ḅo tẹso, KỊNỊNYANAḄỌ ḅe Tẹmẹ nwẹnị Filipu dogi-so. Fịrịmẹnjị-opuḅọ ḅe ḅarị jen kẹ ori ẹrị-a tẹ nwẹnị ḅioḅẹlẹma ò mu sime anga mu.

⁴⁰ Tẹ Filipu nwẹnị ẹrị ò mu Asịdọdị nwẹn-sịn ama mẹ la tẹ; tẹ ọ̀ nwẹnị so Sizariya mu, tẹ ò muarị tẹ agba ama, ama ori Iḅi-Oku mẹ ḍukom.